تيانشان تورى - شينجياڭ گازەتىنىڭ ٴتىلشىسى ٴپاريزات ابدۇل
”قاراڭىزدار، بۇل قىستاقتىڭ 1130 مۋ كوللەكتيۆ جەرىن اينالىمعا سالۋ توقتامى، ٴار مۋ جەر 680 يۋاندىق اقىمەن اينالىمعا سالىندى“. 4 ـ ايدىڭ 2 ـ كۇنى حوتان اۋدانى اۋات اۋىلى قۇمعىل قىستاعى قىستاق كوميتەتىندە قىستاق پارتيا ياچەيكاسىنىڭ شۋجيى مامەتتوحتى توحتىتومۇر باسقا قىستاق كادرلارىنا وسى قۋانىشتى حاباردى جەتكىزدى.
قىستاقتىڭ 1130 مۋ كوللەكتيۆ جەرى اينالىمعا سالىندى، مامەتتوحتىنىڭ كوڭىلى دە اقىرى جاي تاپقانداي بولدى.
وسى 1130 مۋ سورتاڭ جەر بوس قالعان جەرگە جاتادى. بيىل 2 ـ ايدا مامەتتوحتى قىستاق ”ەكى كوميتەتىمەن“، قىستاقتا تۇراتىن قىزمەت اترەتىمەن، پارتيا مۇشەلەرىنىڭ ۋاكىلدەرىمەن اقىلداسقاننان كەيىن، ”بوس قالعان جەردى رەتتەۋ + جەردى اينالىمعا سالۋ“ ارقىلى بوس قالعان جەردى جانداندىرۋدى بەلگىلەدى. ”2 اي ۋاقىتتا ٴبىز جەردى تەگىستەۋ، قۇدىق قازۋ، تامشىلاتىپ سۋارۋ تاسپاسىن جاتقىزۋ سياقتى قىزمەتتەردى ورىندادىق، قازىر جەر اينالىمعا سالىنىپ، قىستاق كوللەكتيۆىمىزدىڭ كىرىسى زور مولشەردە ارتتى“، ـ دەدى مامەتتوحتى.
حوتان اۋدانى اۋات اۋىلى قۇمعىل قىستاعى پارتيا ياچەيكاسىنىڭ شۋجيى مامەتتوحتى توحتىتومۇر (ەكىنشى قاتار سولدان ەكىنشى) قىستاق كادرلارىمەن، پارتيا مۇشەلەرى ۋاكىلدەرىمەن بىرگە ”تيان ـ انمىن“ الدىندا توپتىق سۋرەتكە ٴتۇستى. سۋرەتتى حۋ چۇنفاڭ تۇسىرگەن
قۇمعىل قىستاعى قۇمدى ٴشولدىڭ قويناۋىنا ورنالاسقان، بۇكىل قىستاقتىڭ ەگىستىك جەرى 4800 مۋ، ٴبيداي، جۇگەرى، شىلان، جاڭعاق ەگۋدى نەگىز ەتەدى، ٴداستۇرلى ەگىمشىلىك كاسىبىندە مول ۇسىنىلىم قوسىپ، مول ٴونىم الۋ قيىن. سوندىقتان بۇل اراداعى ادامدار ەگىس جۇمىسىنىڭ سايابىر كەزىندە گۋاڭدۇڭ، انحۇي، جياڭسۋ قاتارلى ەل ىشىندەگى باسقا ولكەلەرگە بارىپ كەپتىرىلگەن جەمىس، قاقتامالار ساتادى. ”قىستاق تۇرعىندارىنىڭ سىرتقا شىعىپ ساۋدامەن شۇعىلدانۋ ٴداستۇرى بار، بۇكىل قىستاقتاعى شارۋا وتباسىلارىنىڭ ىشىندە شينجياڭنان شىعۋ كەشىرمەسى بارلار %80تى ۇستايدى“، ـ دەدى مامەتتوحتى.
”قىستاق تۇرعىندارىندا وزگەرىس وتە زور“. مامەتتوحتى بىلاي دەدى: ولاردىڭ كوزقاراسى جاڭاردى، كوز اياسى كەڭەيدى، جاڭا زاتتاردى سىناپ كورۋى جانە قابىلداۋى ٴتىپتى دە تەزدەپ جىگەرى تاسقىندادى.
حوتان اۋدانى اۋات اۋىلى قۇمعىل قىستاعى پارتيا ياچەيكاسىنىڭ شۋجيى مامەتتوحتى توحتىتومۇر (وڭدا) حوتان اۋداندىق ەمدەۋ قامتاماسىزداندىرۋ مەكەمەسىنىڭ قۇمعىل قىستاعىندا تۇراتىن قىزمەت اترەتىنىڭ باستىعى، ٴبىرىنشى شۋجي لي يۇنفىڭمەن بىرگە ”تيان - انمىن“ الدىندا سۋرەتكە ٴتۇستى. سۋرەتتى حۋ چۇنفاڭ تۇسىرگەن
قازىر قىستاق تۇرعىندارىنىڭ كىرىس كوزى دە وتە كوپ. ”ٴداستۇرلى ەگىمشىلىكتەن سىرت، تاعى 250 مۋ جەرگە قاۋىن ـ قاربىز، 120 مۋ جەرگە ٴجۇزىم، 300 مۋ جەرگە قىزىل بۇرىش ەگىپ، ٴجۇزىم كەپتىرۋ ٴۇيىن جانە كوكونىس جىلىجايىن سالدى؛ بۇكىل قىستاقتا 20 سيىر، 50 قوي كولەمىندەگى باعىمشىلىقپەن شۇعىلداناتىن ٴىرى باعىمشىلىق وتباسى 15كە جەتتى؛ قىستاقتا تاعى ٴۇي اشەكەيلەۋ، قۇرىلىس، تىگىنشىلىك سياقتى 8 سەلبەستىك كووپەراتيۆى قۇرىلدى، وعان قىستاق قۇرعان زاۆودتى قوسقاندا قىستاقتان 104 ادامدى جۇمىستاندىرۋعا دەم بەرىلدى“... مامەتتوحتى تىلشىگە 2024 ـ جىلى قۇمعىل قىستاعىنداعى قىستاق تۇرعىندارىنىڭ جان باسىندىق ورتاشا كىرىسىنىڭ 17 مىڭ 180 يۋانعا جەتكەندىگىن ايتتى.
ٴتۇرلى ٴادىس ـ امالمەن قىستاقتىڭ كوللەكتيۆ شارۋاشىلىعىن زورايتىپ، شارۋالاردىڭ قالتاسىن بارعان سايىن قامپايتتى. مامەتتوحتىنىڭ تاعى ٴبىر جاڭا ويى بار: ”قۇمعىل قىستاعى اۋىلدىق ۇكىمەتتەن نەبارى 1.5 كيلومەتر قاشىقتىقتا، وسى باسىمدىققا سۇيەنىپ، قىستاق تۇرعىندار كوميتەتى اۋلاسىنىڭ ماڭىنان 10 نەشە دۇكەن سالىپ ونى جالعا بەرىپ، قىستاق كوللەكتيۆىنىڭ كىرىسىن ارتتىرماقشىمىز. قىستاق كوللەكتيۆى كۇشەيسە، قىستاق ’ەكى كوميتەتى‘ بۇقارا ٴۇشىن اناعۇرلىم كوپ ناقتى ٴىس ىستەپ بەرە الادى“.
