شينحۋا اگەنتتىگىنىڭ 4 ـ ايدىڭ 9 ـ كۇنى بەيجيڭنەن بەرگەن حابارى (تىلشىلەر شيە شيياۋ، ۋاڭ يۇيشياۋ). مەملەكەتتىك كەڭەس اقپارات كەڭسەسى 4 ـ ايدىڭ 9 ـ كۇنى «جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنداعى ٴبىرقانشا ماسەلە جونىندەگى جۇڭگو جاقتىڭ تۇرعىسى» اتتى اق تىستى كىتاپتى جاريالاپ، جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنداعى شىندىقتى ايقىنداپ، جۇڭگو جاقتىڭ قاتىستى ماسەلەلەر جونىندەگى ساياساتتىق تۇرعىسىن ٴتۇسىندىردى.
اق تىستى كىتاپ العى ٴسوز، سوڭعى سوزدەن سىرت، جالپى 6 بولىكتەن قۇرالادى، ولار جەكە ـ جەكە مىنالار: جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنىڭ ٴمانى — ٴوزارا پايدا جەتكىزىپ تەڭ يگىلىككە كەنەلۋ؛ جۇڭگو جاق جۇڭگو مەن امەريكانىڭ ٴبىرىنشى كەزەڭدەگى ەكونوميكا ـ ساۋدا كەلىسىمىن مۇقيات اتقاردى؛ امەريكا جاق جۇڭگو مەن امەريكانىڭ ٴبىرىنشى كەزەڭدەگى ەكونوميكا ـ ساۋدا كەلىسىمىندەگى قاتىستى بورىشتارىنا قايشىلىق جاسادى؛ جۇڭگو ەركىن ساۋدا ۇستانىمىن امالياتتا ايگىلەپ، دۇنيە جۇزىلىك ساۋدا ۇيىمىنىڭ ەرەجەسىنە مۇقيات بويسۇندى؛ سىڭار جاقتىلىق، قورعامپازدىق ەكى جاقتى ەكونوميكا ـ ساۋدا قارىم ـ قاتىناسىنىڭ دامۋىنا زيان جەتكىزەدى؛ جۇڭگو مەن امەريكانىڭ تەڭ تۇرعىدا تىلدەسۋ، ٴوزارا پايدا جەتكىزىپ سەلبەسۋ ارقىلى ەكونوميكا ـ ساۋدا الاۋىزدىقتارىن شەشۋىنە بولادى.
اق تىستى كىتاپتا بىلاي دەپ تانىستىرىلدى: جۇڭگو مەن امەريكا ەكى ەل ديپلوماتيالىق قارىم ـ قاتىناس ورناتقان 46 جىلدان بەرى، ەكى جاقتىڭ ەكونوميكا ـ ساۋدا قارىم ـ قاتىناسى باياندى دامىدى. جۇڭگو مەن امەريكانىڭ ساۋدا سوماسى 1979 ـ جىلعى 2 ميلليارد 500 ميلليون امەريكا دوللارىنا جەتپەۋدەن ورلەپ 2024 ـ جىلى 688 ميلليارد 300 ميلليون امەريكا دوللارىنا تايادى. الايدا سوڭعى جىلدارى امەريكادا سىڭار جاقتىلىق، قورعامپازدىق بەلەڭ بەرىپ، جۇڭگو مەن امەريكانىڭ قالىپتى ەكونوميكا ـ ساۋدا سەلبەستىگىنە اۋىر كەدەرگىلىك جاسادى. 2018 ـ جىلعى جۇڭگو مەن امەريكا ەكونوميكا ـ ساۋدا قاجالىسىنان بەرى، امەريكا جاق 500 ميلليارد امەريكا دوللارىنان اساتىن جۇڭگودان امەريكاعا شىعارىلعان ونىمدەردەن جوعارى سومالى كەدەن باجىسىن ۇستەمەلەپ الىپ، جۇڭگوعا قاراتىلعان شاۋجايلاۋ، قىسپاققا الۋ ساياساتىن ۇزدىكسىز شىعاردى. جۇڭگو جاق پارمەندى توتەپ بەرۋ شارالارىن قولدانىپ، مەملەكەت مۇددەسىن باتىل قورعاۋعا ٴماجبۇر بولدى. سونىمەن بىرگە جۇڭگو جاق تالاس ـ تارتىستى تىلدەسۋ، كەڭەسۋ ارقىلى شەشۋ سىندى نەگىزگى تۇرعىعا باستان ـ اياق تاباندى بولىپ، امەريكا جاقپەن كوپ كەزەك ەكونوميكا ـ ساۋدا كەڭەسىن ورىستەتىپ، ەكى جاقتى ەكونوميكا ـ ساۋدا قارىم ـ قاتىناسىن ورنىقتىرۋعا قۇلشىندى.
اق تىستى كىتاپتا بىلاي دەپ اتاپ كورسەتىلدى: امەريكا جاق تاياۋدا ”امەريكا ٴبىرىنشى“ ساۋدا، قارجى قوسۋ ساياساتى ەسكەرتپە حاتىن جانە ”امەريكا ٴبىرىنشى“ ساۋدا ساياساتى مالىمدەمەسىن اتقارۋ تۇيىندەرىن ىلگەرىندى ـ كەيىندى جاريالاپ، جۇڭگو ونىمدەرىنەن ارتىق كەدەن باجىسىن جاپپاي ۇستەمەلەپ الدى، فەنتانيلدى قامتىعان ماسەلەلەردى سىلتاۋ ەتىپ جۇڭگودان كەدەن باجىسىن ۇستەمەلەپ الدى، ”تەڭ كەدەن باجىسىن“ الدى ٴارى %50 كەدەن باجىسىن ونان ارى ۇستەمەلەدى، سونداي ـ اق جۇڭگونىڭ تەڭىز ىستەرى، زات اينالىمى جانە كەمە جاساۋ كاسىبىنە قاراتا پورت اقىسىن الۋ سياقتى 301 ـ تارماق بويىنشا تەكسەرۋ شەكتەۋ شاراسىن ورتاعا قويدى. وسى كەدەن باجىسى ارقىلى قۇقاي كورسەتۋ، قىسىم جاساۋ سىندى شەكتەۋ شارالارى قاتەلەسكەننىڭ ۇستىنە قاتەلەسكەندىك، امەريكا جاقتىڭ تيپتىك سىڭار جاقتىلىق، زورەكەرلىك كەسپىرىن تاعى ٴبىر رەت ايپاراداي اشىپ كورسەتتى، ول بازار شارۋاشىلىعى زاڭدىلىعىنا قايشىلىق جاساعاندىق، تىپتەن، كوپ جاقتىلىققا قايشى كەلىپ، جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنا اۋىر ىقپال جەتكىزەدى. جۇڭگو جاق حالىقارالىق زاڭنىڭ نەگىزگى پرينسيبى جانە زاڭ، زاڭ ەرەجە بويىنشا قاجەتتى قارسى شارالاردى قولداندى.
اق تىستى كىتاپتا بىلاي دەلىندى: جۇڭگو جاق باستان ـ اياق جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنىڭ ٴمانى ٴوزارا پايدا جەتكىزىپ تەڭ يگىلىككە كەنەلۋ دەپ قارايدى. دامۋ كەزەڭى، ەكونوميكالىق ٴتۇزىمى ۇقسامايتىن ەكى ٴىرى ەل رەتىندە، جۇڭگو مەن امەريكا ەكى جاقتىڭ ەكونوميكا ـ ساۋدا سەلبەستىگىندە الاۋىزدىقتاردىڭ جانە قاجالىستاردىڭ تۋىلۋى قالىپتى ٴىس، مۇنداعى شەشۋشى ٴتۇيىن — ٴبىر ـ ٴبىرىنىڭ وزەكتى مۇددەسىنە جانە ٴجىتى قاداعالاپ وتىرعان كەلەلى ىستەرىنە قۇرمەت ەتىپ، تىلدەسۋ، كەڭەسۋ ارقىلى ماسەلەنى ۇيلەسىمدى شەشۋدىڭ ٴادىسىن تابۋ. ساۋدا شايقاسىندا جەڭىمپاز بولمايدى، قورعامپازدىقتىڭ شىعار جولى جوق. جۇڭگو مەن امەريكانىڭ ٴوز الدىنا تابىسقا جەتۋى ٴبىر ـ ٴبىرى جونىنەن حاۋىپ ـ قاتەر ەمەس، قايتا وراي. امەريكا جاقتىڭ جۇڭگو جاقپەن ۇقساس باعىتتا العا ىلگەرىلەپ، ەكى ەلدىڭ مەملەكەت باسشىلارى تەلەفوندا سويلەسكەندە انىق كورسەتكەن بەتالىس بويىنشا ٴوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىككە كەنەلۋ پرينسيبىنە ساي، وزدەرىنىڭ ٴجىتى قاداعالاپ وتىرعان كەلەلى ىستەرىن تەڭ تۇرعىدا تىلدەسۋ، كەڭەسۋ ارقىلى شەشىپ، جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنىڭ اقاۋسىز، ورنىقتى، باياندى دامۋىن بىرگە ىلگەرىلەتۋىن ٴۇمىت ەتەمىز.
