شينحۋا اگەنتتىگىنىڭ 4 ـ ايدىڭ 13 ـ كۇنى بەيجيڭنەن بەرگەن حابارى. 4 ـ ايدىڭ 13 ـ كۇنى مەملەكەت ٴتوراعاسى شي جينپيڭ يندونەزيا زۇڭتۇڭى پرابوۋومەن ٴوزارا قۇتتىقتاۋ تەلەگرامماسىن جولداپ، جۇڭگو — يندونەزيا ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن يندونەزيا — ارالارىن تەڭىز ٴبولىپ جاتقان جاقسى كورشى، تاعدىرلاس جاقسى سەرىكتەر. ديپلوماتيالىق قارىم ـ قاتىناس ورناتقان 75 جىلدان بەرى، ەكى جاق قيىندىقتى بىرگە ەڭسەرىپ، شىن پەيىلىمەن ىستەستىك جاساستى، ەكى ەل قارىم ـ قاتىناسى قارىشتاي دامىپ، جۇڭگو مەن يندونەزيا دوستىعى جۇرت جۇرەگىنە تەرەڭ ۇيالادى. بىلتىر مەن زۇڭتۇڭ مىرزامەن ەكى رەت ديدارلاستىم، ٴبىر ـ ٴبىرىمىزدىڭ مەملەكەتتى دامىتۋ تىلەگىمىزدى باتىل قولداپ، ٴوز ـ ٴوزىمىزدىڭ وسىزامانداندىرۋ جولىمىزبەن قول ۇستاسا ويداعىداي ٴجۇرىپ، وڭىرلىك جانە الەمدىك ىقپالعا يە جۇڭگو — يندونەزيا تاعدىرلاس ورتاق تۇلعاسىن قۇرىپ، ەكى جاقتى قارىم ـ قاتىناستى تاعى دا تىڭ ساتىعا كوتەرۋگە جەتەكشىلىك ەتۋگە ٴبىر اۋىزدان قوسىلدىق.
شي جينپيڭ بىلاي دەپ باسا دارىپتەدى: جۇڭگو مەن يندونەزيا — بىردەي وركەندەپ كەلە جاتقان ٴىرى ەلدەر جانە ”جەر شارىنىڭ وڭتۇستىگىندەگى“ ماڭىزدى كۇش، ەكى جاقتىڭ سەلبەستىگى ستراتەگيالىق مانگە جانە الەمدىك ىقپالعا يە. مەن جۇڭگو — يندونەزيا قارىم ـ قاتىناسىنىڭ دامۋىنا ايرىقشا ٴمان بەرەمىن، زۇڭتۇڭ مىرزامەن بىرگە قۇلشىنىپ، ەكى ەل ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتاۋدى وراي ەتىپ، ەكى ەلدىڭ جالپى بەتتىك ستراتەگيالىق سەلبەستىگىن ونان ارى تەرەڭدەتىپ، كوپ جاقتى ستراتەگيالىق سايكەسۋدى كۇشەيتىپ، جۇڭگو — يندونەزيا تاعدىرلاس ورتاق تۇلعاسىنىڭ داۋىرلىك ٴمانىن ۇزدىكسىز بايىتىپ، وركەندەپ كەلە جاتقان ٴىرى ەلدەردىڭ شىن پەيىلمەن ىنتىماقتاسۋىنىڭ ۇلگىسى، بىرگە دامۋدىڭ ونەگەسى، تۇستىك ەلدەر سەلبەستىگىنىڭ اۆانگاردى بولىپ، ادامزاتتىڭ العا باسۋ ىستەرىن بىرگە جەبەۋدى قالايمىن.
پرابوۋو قۇتتىقتاۋ تەلەگرامماسىندا مىنانى ٴبىلدىردى: جۇڭگو مەن يندونەزيا ديپلوماتيالىق قارىم ـ قاتىناس ورناتقاندىعىنىڭ 75 جىلدىعى ساتىندە مەن يندونەزيا ۇكىمەتى جانە يندونەزيا حالقى اتىنان ٴتوراعا شي جينپيڭگە جانە جۇڭگو حالقىنا ىقىلاستى قۇتتىقتاۋ ايتامىن. يندونەزيانىڭ جۇڭگومەن دوستىعى ارىدان جالعاسقان، ەكى ەلدىڭ سەرىكتەستىك قارىم ـ قاتىناسى قۋاتتى، ومىرشەڭدىككە تولى. ەكى جاقتىڭ ساياسي، ەكونوميكا، گۋمانيتارلىق ىستەر، تەڭىز ٴۇستى، حاۋىپسىزدىك سىندى ”بەس ۇلكەن تىرەك“ سەلبەستىگى ۇزدىكسىز جەدەل ىلگەرىلەتىلدى. مەن ەكى ەل سەلبەستىگىن ۇزدىكسىز تەرەڭدەتىپ، ەكى ەل حالىقتارىنىڭ دوستىق دانەكەرىن شيراتىپ، دۇنيە ٴجۇزىنىڭ بەيبىتشىلىگى، ورنىقتىلىعى ٴۇشىن بەلسەندى ۇلەس قوسۋدى شىن جۇرەكتەن ٴۇمىت ەتەمىن.
