شي جينپيڭ ۆيەتنام مەدياسىندا اۆتورلى ماقالا جاريالادى
مۇراتتاس بولىپ، قول ۇستاسا العا تارتىپ، الدىڭعىلاردىڭ ٴىزىن باسىپ بولاشاققا جول اشىپ، ۇزدىكسىز تىڭ تاراۋ جازايىق
شينحۋا اگەنتتىگىنىڭ 4 ـ ايدىڭ 14 ـ كۇنى حانويدان بەرگەن حابارى. 4 ـ ايدىڭ 14 ـ كۇنى حانويعا بارىپ ۆيەتنامدا مەملەكەتتىك ساپاردا بولۋ قارساڭىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى شي جينپيڭ ۆيەتنام «حالىق گازەتىندە» «مۇراتتاس بولىپ، قول ۇستاسا العا تارتىپ، الدىڭعىلاردىڭ ٴىزىن باسىپ بولاشاققا جول اشىپ، ۇزدىكسىز تىڭ تاراۋ جازايىق» دەگەن تاقىرىپتا اۆتورلى ماقالا جاريالادى. ماقالانىڭ تولىق مازمۇنى تومەندەگىدەي:
مۇراتتاس بولىپ، قول ۇستاسا العا تارتىپ، الدىڭعىلاردىڭ ٴىزىن باسىپ بولاشاققا جول اشىپ، ۇزدىكسىز تىڭ تاراۋ جازايىق
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، جۇڭحۋا حالىق رەسپۋبليكاسىنىڭ ٴتوراعاسى شي جينپيڭ
كوكتەم سوڭى، تىرشىلىك تىنىسى تاسقىنداپ تۇر. جۇڭگو — ۆيەتنام ديپلوماتيالىق قارىم ـ قاتىناس ورناتقاندىعىنىڭ 75 جىلدىعى قارساڭىندا ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى سۋ لين جولداستىڭ جانە ۆيەتنامنىڭ مەملەكەت ٴتوراعاسى لياڭ چياڭ جولداستىڭ ۇسىنىسىمەن مەن الدا ۆيەتنامدا مەملەكەتتىك ساپاردا بولامىن. بۇل مەنىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، جۇڭحۋا حالىق رەسپۋبليكاسىنىڭ ٴتوراعاسى مىندەتىن وتەگەننەن بەرى، وسى كورىكتى توپىراققا 4 ـ رەت اياق باسۋىم، مەن ۆيەتنام باسشىلارىمەن دوستىقتى اقتارىلا اڭگىمەلەپ، سەلبەستىكتى بىرگە اقىلداسىپ، جاڭا داۋىردەگى جۇڭگو — ۆيەتنام تاعدىرلاس ورتاق تۇلعاسى قۇرىلىسىنىڭ جاڭا جوباسىن جاساۋدى ٴۇمىت ەتەمىن.
جۇڭگو مەن ۆيەتنام — سوتسياليستىك دوس كورشى ەلدەر، ورتاق مۇرات ـ سەنىمگە جانە كەڭ ستراتەگيالىق مۇددەگە يە. ٴوز ەلىنىڭ مەملەكەت جاعدايىنا ۇيلەسەتىن سوتسياليزم جولى جونىندە ىزدەنىس جاساۋ جانە وزدەرىنىڭ وسىزامانداندىرۋ ٴۇردىسىن ىلگەرىلەتۋ بارىسىندا ەكى پارتيا، ەكى ەل حالقىنىڭ ەرتەرەكتە ورناتقان تەرەڭ دوستىعى ۇزدىكسىز كۇشەيدى. ستراتەگيالىق مانگە يە جۇڭگو — ۆيەتنام تاعدىرلاس ورتاق تۇلعاسىن قۇرۋ ەكى ەلدىڭ ورتاق مۇددەسىنە ۇيلەسەدى، ٴوڭىردىڭ، ٴتىپتى، دۇنيە ٴجۇزىنىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە ٴتيىمدى، بۇل — تاريحتىڭ تاڭداۋى، حالىقتىڭ تاڭداۋى.
جۇڭگو — ۆيەتنام تاعدىرلاس ورتاق تۇلعاسى ايقىن قىزىل گەنگە مۇراگەرلىك ەتەدى. ەكى ەلدىڭ توڭكەرىس ارداگەرلەرى وتاندى جويىلۋدان قۇتقارۋ جولىن قول ۇستاسا قاراستىرىپ، دۇنيە ٴجۇزىنىڭ وتارشىلدىققا، يمپەرياليزمگە قارسى تۇرۋ كۇرەسىنىڭ جەڭىسىنە قول جەتكىزۋىنە ماڭىزدى ۇلەس قوستى. جۇڭگونىڭ گۋاڭجوۋىنداعى ۆيەتنام جاستار توڭكەرىستىك مۇراتتاستار قوعامى، گۋاڭشيدىڭ جيڭشيىندەگى ”ۆيەتنامدىقتار وداعى“ ٴىس باسقارماسى سياقتى توڭكەرىستىك بايىرعى ورىندار جۇڭگو — ۆيەتنام توڭكەرىستىك دوستىعىنىڭ تاريحي كۋاسى. جۇڭگو حالقىنىڭ جاپون شاپقىنشىلارىنا قارسى سوعىسى كەزىندە ٴتوراعا حۋ جىميڭ ىلگەرىندى ـ كەيىندى يان ـ ان، گۇيلين، چۇڭچيڭ، كۇنميڭ سياقتى جەرلەردە جۇڭگونىڭ جاپون شاپقىنشىلارىنا قارسى سوعىسىنا قاتىناستى جانە ونى قولدادى. جۇڭگو اسكەري اقىلشىلار ۇيىرمەسى مەن ساياسي اقىلشىلار ۇيىرمەسىن جىبەرىپ ۆيەتنام حالقىنىڭ فرانسياعا قارسى كۇرەسىن قولدادى، جۇڭگو پارتياسى، ۇكىمەتى جانە حالقى ۆيەتنامنىڭ امەريكا يمپەرياليزمىنە قارسى تۇرىپ، وتاندى قۇتقارۋ ادىلەتتى ىسىنە بار كۇشپەن كومەك كورسەتتى. ”ۆيەتنام مەن جۇڭگونىڭ دوستىق سۇيىسپەنشىلىگى تەرەڭ، جولداس ۇستىنە باۋىرلاس“ دەگەن سوزدەر ماڭگى وشپەيتىن قىزىل ەستەمەگە اينالدى.
جۇڭگو — ۆيەتنام تاعدىرلاس ورتاق تۇلعاسى تەرەڭ ساياسي ٴوزارا سەنىمدىلىكتەن باستاۋ العان. بەرتىنگى جىلدارى مەن باس شۋجي رۋان فۋجۇڭ، باس شۋجي سۋ لين قاتارلى ۆيەتنام باسشىلارىمەن كوپ رەت ٴوزارا ساپاردا بولىپ، جۇڭگو — ۆيەتنام تاعدىرلاس ورتاق تۇلعاسى قۇرىلىسىنا باعدار بەلگىلەپ، رول ۇستادىق. ەكى پارتيانىڭ، ەكى ەلدىڭ جوعارى جىكتەگىلەرى تىعىز ىقپالداسىپ، جۇڭگو — ۆيەتنام ەكى جاق سەلبەستىگىنە جەتەكشىلىك ەتۋ كوميتەتى، ەكى پارتيانىڭ نازاريا زەرتتەۋ ـ تالقى ٴماجىلىسى، شەكارا مەملەكەت قورعانىسى دوستىق اۋىس ـ كۇيىسى، ەكى ەل قوعام حاۋىپسىزدىگى مينيسترلىكتەرىنىڭ سەلبەستىك جاساپ قىلمىسقا سوققى بەرۋ ٴماجىلىسى سياقتى مەحانيزمدەر ٴونىمدى اينالىم جاسادى، ەكى ەلدىڭ زاڭ شىعارۋ قۇرىلىمدارى بىرلەسكەن كوميتەتى سياقتى جوعارى دارەجەلى مەحانيزمدەر ورناتىلدى، ەكى ەلدىڭ ديپلوماتيا، مەملەكەت قورعانىسى، قوعام حاۋىپسىزدىگى ”3 + 3“ ستراتەگيالىق تىلدەسۋى ٴساتتى وتكىزىلدى. كوپتەگەن حالىقارالىق جانە وڭىرلىك ماسەلەلەردە جۇڭگو مەن ۆيەتنام ەكى ەلدىڭ تۇرعىسى قارايلاس، ىستەستىگى ٴجيى.
جۇڭگو — ۆيەتنام تاعدىرلاس ورتاق تۇلعاسى مول سەلبەستىك قۇنارلى توپىراعىنا تامىر تارتقان. دۇنيە ٴجۇزى ەكونوميكاسىنىڭ جاندانۋى ٴالسىز بولعان جاعدايدا، جۇڭگو مەن ۆيەتنامنىڭ كاسىپ سالاسى تىزبەگى، قامداۋ تىزبەگى سەلبەستىگى اناعۇرلىم جيىلەي ٴتۇستى. جۇڭگو ٴۇرتىس 20 نەشە جىل ۆيەتنامنىڭ ٴبىرىنشى ۇلكەن ساۋدا سەرىگى بولدى، 2024 ـ جىلى جۇڭگو مەن ۆيەتنامنىڭ ەكى جاقتى ساۋدا سوماسى 260 ميلليارد دوللاردان استى. دۋريان جەمىسى، كوكوس سياقتى ۆيەتنامنىڭ كوپتەگەن ساپالى اۋىل شارۋاشىلىق ونىمدەرى جۇڭگونىڭ سان مىڭداعان وتباسىنا جەتتى. ەكى ەلدىڭ تەمىر جولداردى ۇلاستىرۋ ـ تۇتاستىرۋ جانە زەردەلى شەكارا وتكەلى قۇرىلىسى تارتىپپەن ىلگەرىلەتىلدى، فوتوۆولت، قوقىر ـ قوقسىقتان ەلەكتر تاراتۋ سياقتى تازا ەنەرگيا نىساندارى ۆيەتنامنىڭ ەلەكترمەن قامداۋىن پارمەندى قامتاماسىز ەتتى، جۇڭگو كاسىپورىندارى مىندەتىنە الىپ سالعان حانويداعى جەڭىل رەليس 2 ـ لەنياسى قالا تۇرعىندارىنىڭ كۇندەلىكتى ٴجۇرىس ـ تۇرىسىنا قولايلىلىق جاراتتى. جۇڭگو مەن ۆيەتنام ەكى ەل ٴبىر ـ ٴبىرىن تابىسقا جەتكىزىپ، بىرگە دامىپ، جەر شارىنىڭ وڭتۇستىگىندەگى ەلدەردىڭ ىنتىماقتاسا سەلبەسۋىنىڭ ٴمانىن جاندى ٴتۇسىندىردى.
جۇڭگو — ۆيەتنام تاعدىرلاس ورتاق تۇلعاسى قويۋ گۋمانيتارلىق اۋىس ـ كۇيىس بارىسىندا ىلگەرىلەدى. وسى بىرنەشە جىلدا جۇڭگو مەن ۆيەتنامنىڭ گۋمانيتارلىق اۋىس ـ كۇيىس قادامى بارعان سايىن زورايىپ، ەكى ەل حالقى بارعان سايىن ەتەنە بولدى. 2024 ـ جىلى جۇڭگودان ۆيەتنامعا بارعان ساياحاتشى 3 ميلليون 700 مىڭ ادامنان (رەت) استى، دىتيان (بانيۋە) سارقىراماسى شەكارا اتتاعان ساياحات سەلبەستىك رايونى رەسمي ىسكە قوسىلىپ، شەكارا اتتاپ ٴوز اۆتوكولىگىمەن ساياحاتتاۋدىڭ كوپتەگەن جەلىسى اشىلىپ، ”ٴبىر كۇندە ەكى ەلدى ساياحاتتاۋ“ رەالدىققا اينالدى. جۇڭگو كينو ـ تەلەۆيزيا تۋىندىلارى، ەلەكتروندى ويىندارى ۆيەتنام جاستارىنىڭ قىزۋ تالقى تاقىرىبىنا اينالىپ، ۆيەتنامدا ”جۇڭگو ٴتىلى ورلەۋىنىڭ“ ۇزدىكسىز جوعارىلاۋىنا دەم بەردى. ۆيەتنامنىڭ كوپتەگەن ٴان ـ كۇيلەرى جۇڭگو ينتەرنەتىندە قىزۋ قارسى الىندى، حىفىن سياقتى ۆيەتنامنىڭ ٴدامدى تاعامدارى كوپتەگەن جۇڭگو بۇقاراسىن ٴدام تاتۋعا باۋرادى.
قازىر دۇنيە ٴجۇزىنىڭ وزگەرىسى، ٴداۋىردىڭ وزگەرىسى، تاريحتىڭ وزگەرىسى بۇرىن بولىپ كورمەگەن تاسىلمەن ٴجۇرىلىپ، دۇنيە ٴجۇزى جاڭا اۋمالى ـ توكپەلى وزگەرىس مەزگىلىنە ٴوتتى. سىڭار جاقتىلىقتىڭ، قورعامپازدىقتىڭ باس كوتەرۋى الدىندا، جۇڭگو ەكونوميكاسى قيىندىقتان تايسالماي العا ۇمتىلىپ، 2024 ـ جىلى %5تىك ارتۋدى جۇزەگە اسىرىپ، دۇنيە ٴجۇزى ەكونوميكاسىنىڭ ارتۋىنا قوسقان ۇلەس مولشەرى %30 اينالاسىندا بولىپ، ۇزدىكسىز دۇنيە ٴجۇزى ەكونوميكاسىنىڭ ماڭىزدى قوزعالتقىشى بولدى. جۇڭگونىڭ جاڭا ەنەرگيا كاسىپ سالاسى، جاساندى زەردەسى جانە كارتون كينو فيلمى الەمنىڭ نازارىن اۋداردى. جۇڭگو جوعارى دەڭگەيدە سىرتقا ەسىك اشۋعا تاباندى بولۋ ارقىلى دۇنيە جۇزىنە اناعۇرلىم كوپ وراي ازىرلەپ، ٴوزىنىڭ جوعارى ساپالى دامۋى ارقىلى ٴار ەلدىڭ بىرگە دامۋىنا دەم بەرەدى.
ازيا الەمدىك سەلبەسىپ دامۋدىڭ بيىگى بولىپ، تۇتاس تۇلعالىق گۇلدەنۋدى جۇزەگە اسىرۋدىڭ جاڭا باستاماسىندا تۇر، بۇرىن بولىپ كورمەگەن وراي مەن سىن ـ سايىسقا ٴدوپ كەلىپ وتىر. جۇڭگو توڭىرەكتىك ديپلوماتيا ساياساتىنىڭ ۇلاسپالىلىعى مەن ورنىقتىلىعىن ساقتاپ، تاتۋ، ادال، قايىرىمدى، كەڭ پەيىل بولۋ ۇستانىمىنا جانە كورشىلەرمەن تاتۋ ٴوتۋ، كورشىلەردى سەرىك تۇتۋ باعىتىنا تاباندى بولىپ، توڭىرەكتەگى ەلدەرمەن دوستىق سەلبەستىكتى تەرەڭدەتىپ، ازيانىڭ وسىزاماندانۋ اياق الىسىن بىرگە ىلگەرىلەتەدى.
جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدە، ۆيەتنام ۇلت دامۋىنىڭ جاڭا عاسىرىن باستاپ، پارتيا قۇرىلعاندىعىنىڭ، مەملەكەت قۇرىلعاندىعىنىڭ ”ەكى 100 جىلدىق“ كۇرەس نىساناسىنا قاراي قادام تاستايدى. جۇڭگو ۆيەتنامدى باستان ـ اياق توڭىرەكتىك ديپلوماتيانىڭ ماڭداي الدى بەتالىسى دەپ قارايدى. ٴبىز جۇڭگو — ۆيەتنام تاعدىرلاس ورتاق تۇلعاسى قۇرىلىسىن جاپپاي تەرەڭدەتىپ، ازيانىڭ، ٴتىپتى، دۇنيە ٴجۇزىنىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە بەلسەندى ۇلەس قوسۋىمىز كەرەك.
— ستراتەگيالىق ٴوزارا سەنىمدىلىكتى تەرەڭدەتىپ، سوتسياليزم ىستەرىنىڭ دامۋىن، زورايۋىن ىلگەرىلەتۋىمىز كەرەك. جوعارى جىكتەگىلەردىڭ جەتەكشىلىك ەتۋىنە تاباندى بولىپ، جۇڭگو — ۆيەتنام ەكى جاق سەلبەستىگىنە جەتەكشىلىك ەتۋ كوميتەتىنىڭ ٴبىر تۇتاس جوسپارلاۋ، سايكەستىرۋ رولىن ساۋلەلەندىرىپ، پارتيالار ارا، ۇكىمەت، ارميا، زاڭ اتقارۋ حاۋىپسىزدىگى سياقتى باعىتتاس تاراۋلاردىڭ سەلبەستىگىن تەرەڭدەتىپ، سىرتقى ورتانىڭ حاۋىپ ـ قاتەرىنە، سىن ـ سايىسىنا قول ۇستاسا توتەپ بەرىپ، ساياسي حاۋىپسىزدىكتى بىرگە قورعاۋىمىز كەرەك. جۇڭگو جاق ۆيەتنام جاقپەن ەل باسقارۋ تاجىريبەلەرىن اۋىستىرۋدى تەرەڭدەتىپ، سوتسياليزم نازارياسى مەن امالياتى جونىندە بىرگە ىزدەنىس جاساپ جانە ونى بايىتىپ، ەكى ەل سوتسياليزم ىستەرىنىڭ نىق قاداممەن الىسقا جەتۋىن ىلگەرىلەتۋدى قالايدى.
— سەلبەسىپ تەڭ يگىلىككە كەنەلۋگە تاباندى بولىپ، ەكى ەل حالقىنىڭ قۇت ـ ىرىسىن ارتتىرۋىمىز كەرەك. دامۋ ستراتەگيالارىن ٴتۇيىلىستىرۋدى تەرەڭدەتىپ، ەكى ەل ۇكىمەتىنىڭ ”ٴبىر بەلدەۋ، ٴبىر جولدى“ بىرگە قۇرۋ مەن ”ەكى ٴدالىز، ٴبىر شەڭبەر“ جۇلگەسىن ٴتۇيىلىستىرۋ جونىندەگى سەلبەستىك جوباسىن ويداعىداي تياناقتاندىرىپ، اناعۇرلىم كوپ ەكونوميكالىق، تەحنولوگيالىق سەلبەستىك تۇعىرىن قالىپتاستىرۋىمىز كەرەك. جۇڭگو جاق ۆيەتنام جاقپەن ۆيەتنامنىڭ سولتۇستىگىندەگى ولشەمدى رەليستى 3 تەمىر جول نىسانى سەلبەستىگىن ىلگەرىلەتىپ، زەردەلى شەكارا وتكەلىن قۇرۋدى قالايدى. جۇڭگو جاق ۆيەتنامنىڭ ٴتىپتى دە كوپ ساپالى تاۋارلارىنىڭ جۇڭگو بازارىنا كىرۋىن قارسى الادى، ٴتىپتى دە كوپ جۇڭگو كاسىپورىندارىن ۆيەتنامعا بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرادى. ەكى جاق كاسىپ سالاسى تىزبەگى، قامداۋ تىزبەگى سەلبەستىگىن كۇشەيتىپ، 5G، جاساندى زەردە، جاسىل دامۋ سياقتى جاڭادان گۇلدەنگەن سالالارداعى سەلبەستىكتى كەڭەيتىپ، ەكى ەل حالقىن اناعۇرلىم ويداعىداي باقىتقا كەنەلتۋى كەرەك.
— گۋمانيتارلىق اۋىس ـ كۇيىستى كۇشەيتىپ، حالىق تىلەگىن توعىستىرۋ دانەكەرىن نىعايتۋىمىز كەرەك. بيىل ”جۇڭگو — ۆيەتنام گۋمانيتارلىق اۋىس ـ كۇيىس جىلىن“ وتكىزۋدى وراي ەتىپ، باي مازمۇندى، كوپ نەگىزدى گۋمانيتارلىق اۋىس ـ كۇيىس ورىستەتۋىمىز كەرەك. جۇڭگو جاق ۆيەتنام بۇقاراسىنىڭ جۇڭگونىڭ جەر ـ جەرىنە كوبىرەك بارىپ ”قىدىرۋىن“ قارسى الادى، سونداي ـ اق جۇڭگولىق ساياحاتشىلاردى ۆيەتنامنىڭ ايگىلى كورىنىس وڭىرلەرىنە بارۋعا شابىتتاندىرادى. جۇڭگو — ۆيەتنام جاستارىنىڭ دوستىق كەزدەسۋى، شەكارا تۇرعىندارىنىڭ بىرلەسكەن ساۋىق كەشى سياقتى مەيىرلى، بۇقارامەن ەتەنە، جۇرت تىلەگىن توعىستىراتىن گۋمانيتارلىق اۋىس ـ كۇيىس قيمىلدارىن بىرگە ويداعىداي وتكىزىپ، قىزىل بايلىقتى ىشكەرىلەي اشىپ، ەكى ەل حالقىنىڭ دوستىق حيكاياسىن ويداعىداي بايانداپ، جۇڭگو — ۆيەتنام دوستىعىنىڭ ۇتىلامالى تاياقشاسىن ۇرپاقتان ـ ۇرپاققا جالعاستىرۋىمىز كەرەك.
— كوپ جاقتى ىستەستىكتى جيىلەتىپ، ازيانىڭ گۇلدەنۋىن، كوركەيۋىن جەبەۋىمىز كەرەك. بيىل — جۇڭگو حالقىنىڭ جاپون شاپقىنشىلارىنا قارسى سوعىس جانە دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى، سونداي ـ اق بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ٴتارتىپتى باتىل قورعاپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن بەلسەنە تياناقتاندىرىپ، تەپە ـ تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن ىلگەرىلەتىپ، جەر شارىنىڭ وڭتۇستىگىندەگى قالىڭ ەلدەر مەن وركەندەپ كەلە جاتقان ەلدەردىڭ ورتاق مۇددەسىن بىرگە قورعاۋىمىز كەرەك. ساۋدا شايقاسىندا، كەدەن باجى شايقاسىندا جەڭىمپاز بولمايدى، قورعامپازدىقتىڭ شىعار جولى جوق. كوپ جاقتى ساۋدا ٴتۇزىلىسىن باتىل قورعاپ، الەمدىك كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن قورعاپ، اشىق، سەلبەسكەن حالىقارالىق ورتانى قورعاۋىمىز كەرەك. شىعىس ازيا سەلبەستىگى، لانساڭجياڭ وزەنى ـ مەكونگ وزەنى سەلبەستىگى سياقتى مەحانيزمدەردە سايكەسۋدى، سەلبەسۋدى كۇشەيتىپ، وزگەرىس پەن بىلىقپالىق قاباتتاسقان دۇنيە جۇزىنە اناعۇرلىم كوپ ورنىقتىلىق جانە وڭ ەنەرگيا ۇستەۋىمىز كەرەك.
— الاۋىزدىقتاردى ۇيلەسىمدى تىزگىندەپ، ٴوڭىردىڭ بەيبىتشىلىگى مەن ورنىقتىلىعىن قورعاۋىمىز كەرەك. جۇڭگو مەن ۆيەتنام ەكى ەلدىڭ قۇرلىق شەكاراسى مەن سولتۇستىك شىعاناق شەكاراسىن ايىرۋدى شەشۋدەگى تابىستى امالياتى ەكى جاقتىڭ تەڭىز ماسەلەسىن كەڭەسۋ، كەلىسسوز وتكىزۋ ارقىلى ويداعىداي شەشۋگە تولىق قابىلەتى، پاراساتى بار ەكەندىگىن ايگىلەدى. ەكى جاق ەكى پارتيانىڭ، ەكى ەلدىڭ جوعارى جىكتەگىلەرىنىڭ ورتاق تانىمىن تياناقتاندىرىپ، تەڭىز كەلىسسوزى مەحانيزمىنىڭ رولىن ويداعىداي ساۋلەلەندىرىپ، تەڭىزدەگى الاۋىزدىقتاردى ۇيلەسىمدى تىزگىندەپ، تەڭىز سەلبەستىگىن ۇزدىكسىز كەڭەيتىپ، تالاس ـ تارتىستى تۇبەگەيلى شەشۋگە شارت ـ جاعداي ازىرلەۋى كەرەك. «نانحاي تەڭىزىندەگى تاراپتاردىڭ ارەكەت جارناماسىن» جاپپاي، ٴونىمدى تياناقتاندىرىپ، ”نانحاي تەڭىزى ارەكەت ولشەمى“ جونىندەگى كەڭەستى بەلسەنە ىلگەرىلەتىپ، كەدەرگىلەردى الاستاپ، ورتاقتىقتى شوعىرلاندىرىپ، پارىقتاردى جويىپ، نانحاي تەڭىزىن شىن مانىندە بەيبىتشىلىك تەڭىزىنە، دوستىق تەڭىزىنە، سەلبەستىك تەڭىزىنە اينالدىرۋىمىز كەرەك.
جاڭا تاريحي باستامادا جۇڭگو ۆيەتناممەن بىرگە قول ۇستاسا العا باسىپ، الدىڭعىلاردىڭ ٴىزىن باسىپ بولاشاققا جول اشىپ، جۇڭگو — ۆيەتنام تاعدىرلاس ورتاق تۇلعاسى قۇرىلىسىنىڭ تىڭ تاراۋىن ۇزدىكسىز جازىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە تىڭ دا اناعۇرلىم زور ۇلەس قوسۋدى قالايدى.
