انار بۇلت \ شينجياڭ گازەتىنىڭ ٴتىلشىسى ٴپاريزات ابدۇل
4 ـ ايدىڭ 10 ـ كۇنى بەيجيڭنەن 4000 نەشە كيلومەتر قاشىقتىقتاعى حوتان ايماعى كەريا اۋدانى مۇعاللا قالاشىعى دوستىق قىستاعىنداعى ۇلى قورعان سۋرەتى سىزىلعان داۋال قىستاق تۇرعىندارىن تالاسا ـ تارماسا سۋرەتكە تۇسىرۋگە باۋرادى. داۋالداعى يرەلەڭدەي كوسىلگەن ۇلى قورعان التىن ٴتۇستى كۇن نۇرىندا شۇعىلا شاشۋدا.
قىستاقتاعى ساقا پارتيا مۇشەسى روزى الىم داۋالداعى جولاقتاردى اقىرىن سيپاپ تەبىرەنە: ”بەيجيڭگە بارىپ كورمەگەن بولسام دا، مىنا داۋالدى سيپاعانىمدا بەينە بەيجيڭگە بارىپ، ۇلى قورعاندى كوزىممەن كورگەندەي بولىپ تۇرمىن“، ـ دەدى.
”بۇرىن ۇلى قورعاندى تەلەۆيزوردان عانا كورگەنمىن، قازىر ەسىك الدىندا سۋرەتكە ٴتۇسىپ ەستەلىك قالدىراتىنىمدى ويلاماعان ەكەنمىن“. قىستاق تۇرعىنى بارات وسمان قولىنداعى ەگىس جۇمىسىن قويا سالىپ، جۇگىرە باسىپ ”ۇلى قورعاننىڭ“ الدىنا بارىپ، بويىن تۇزەپ، كەلىستى بەينەمەن ٴبىر ەرەكشە سۋرەتكە ٴتۇستى.
”بۇل مەنىڭ ۇلى قورعان سۋرەتىن 4 ـ رەت داۋالعا سىزۋىم“. مۇعاللا قالاشىعىنىڭ كادرى وسمانجان ٴماتقۇربان كۇلىمسىرەي بىلاي دەدى: بىلتىر 5 ـ ايدان باستاپ ۇلى قورعان تاقىرىپتىق قابىرعا سۋرەتىن سالۋعا كىرىستىم، الدىڭعى 3 سۋرەتتى ىلگەرىندى ـ كەيىندى قۇربان تۇلىم ورتالاۋ مەكتەبىنىڭ، كەريا اۋداندىق CEC ٴۇمىت مەكتەبىنىڭ جانە كورشىم ٴماتتۇرسۇن رەجەپتىڭ اۋلاسىنىڭ تام قابىرعاسىنا سىزدىم.
كەريا اۋدانى سىندى تاكلاماكان ٴشولىنىڭ قويناۋىنا ورنالاسقان وسى شاعىن اۋدان ورتالىعى — قۇربان تۇلىم اتايدىڭ مەكەنى. وتكەن عاسىردىڭ 50 ـ جىلدارىنان باستاپ، قۇربان اتايدىڭ ەسەككە ٴمىنىپ بەيجيڭگە بارىپ ٴتوراعا ماۋ زىدۇڭمەن كەزدەسپەكشى بولعان حيكاياسى وسى ارادا ۇرپاقتان ـ ۇرپاققا جالعاسىپ كەلەدى ٴارى كەريا اۋدانىنداعى بۇقارانىڭ بەيجيڭگە وزگەشە تەرەڭ سۇيىسپەنشىلىگى مەن تالپىنىسىنا دا سەبەپ بولدى.
”ەگەر باداليڭدەگى ۇلى قورعاندى ەسىك الدىمىزعا ’كوشىرىپ‘ اكەلسەك، كوپشىلىكتىڭ ۇناتاتىندىعى داۋسىز“. كەزىندە كەريا اۋدانى سيەك اۋىلدىق ورتالاۋ مەكتەبىندە اسەمونەر وقىتۋشىسى بولعان وسمانجان كەريا اۋدانى مۇعاللا قالاشىق ۇكىمەتىنە اۋىسىپ كەلىپ قىزمەت ىستەگەننەن كەيىن سۋرەت سالۋ ونەرىمەن اۋىل ـ قىستاقتى كورىكتەندىرۋدى ويعا الىپ كەلگەن بولاتىن.
تاباندا ارەكەتتەنىپ، بىلتىر 5 ـ ايدا وسمانجان قۇربان تۇلىم ورتالاۋ مەكتەبىندەگى 140 شارشى مەترلىك تام قابىرعاسىنا ۇلى قورعان سۋرەتىن سىزدى.
”ول مەنىڭ جۇرەگىمدەگى ۇلى قورعان سياقتى، الىپ ايداعارعا ۇقسايدى، ايبىنى اسقاق“. مەكتەپ اۋلاسىنداعى ”ۇلى قورعاندى“ العاش كورگەندە قۇربان تۇلىم ورتالاۋ مەكتەبىنىڭ 8 ـ جىلدىق وقۋشىسى ماينۇر ياسىن قاتتى تاڭ قالدى.
ماينۇر ٴوزىنىڭ جانە ساباقتاستارىنىڭ مەكتەپتەگى ”ۇلى قورعاندى“ توتەنشە ۇناتاتىندىعىن، ۇنەمى ساباقتاستارىمەن بىرگە ”ۇلى قورعاننىڭ“ استىندا وتىرىپ وقۋدى تالقىلايتىندىعىن، ارماندارىن تىلگە تيەك ەتەتىندىگىن ايتتى.
ۇلى قورعان — جۇڭحۋا ۇلتىنىڭ ۋاكىلدىك سيپاتتى بەلگىسى جانە جۇڭحۋا وركەنيەتىنىڭ ماڭىزدى سيمۆولى. ”مەكتەپتە ۇلكەنى سپورت جارىسىنا، كىشىسى نەگىزگى تاقىرىپتىق كلاس جيىنىنا دەيىن تۇگەلدەي ’ۇلى قورعاننىڭ‘ الدىندا وتكىزىلەدى. ۇلى قورعانعا جۇڭحۋا ۇلتىنىڭ تالىقپاي تالپىناتىن كۇرەسكەرلىك رۋحى مەن ەل بىرلىگىنەن بەرىك قامال تۇرعىزاتىن، قايىسپاس قايسار وتانشىلدىق سۇيىسپەنشىلىگى سىڭىرىلگەن، ـ دەدى قۇربان تۇلىم ورتالاۋ مەكتەبى ٴمورال تاربيەسى باسقارماسىنىڭ مەڭگەرۋشىسى ياسىن ٴماتتۇرسۇن.
مۇعاللا قالاشىعى دوستىق قىستاعىندا تىلشىلىك ىستەگەن كەزدە گالستۋك تاققان 20 نەشە باستاۋىش مەكتەپ وقۋشىسىنىڭ اسىر سالا ۇلى قورعان تام قابىرعاسىنىڭ الدىنا بارىپ تىك تۇرىپ، كامەراعا قاراپ كۇلىمسىرەي سۋرەتكە تۇسكەنىن، جانارلارىنان بولاشاققا دەگەن ارمان ـ تىلەكتەر مەن مۇندالاپ تۇرعانىن كوردىك... ولاردىڭ ارتىنداعى ”ۇلى قورعان“ كۇن نۇرىندا جارقىراپ ساۋلە شاشىپ تۇر.
