4 ـ ايدىڭ 13 ـ كۇنى جاپونيانىڭ وساكاسىندا ەكسكۋرسيالاۋشىلار جۇڭگو سارايىندا ”جياۋلۇڭ“ اتتى تەرەڭگە سۇڭگۋدى سەزىنۋ بولمەسىن ەكسكۋرسيالاپ تاماشالاۋدا.
□سۋرەتتى شينحۋا اگەنتتىگىنىڭ ٴتىلشىسى جيا حاۋچىڭ تۇسىرگەن
شينحۋا اگەنتتىگىنىڭ 4 ـ ايدىڭ 13 ـ كۇنى وساكادان بەرگەن حابارى (تىلشىلەر چىن زى ـ ان، ياڭ جىشياڭ). 2025 ـ جىلعى وساكا · كانساي الەمدىك كورمەسى (وساكا الەمدىك كورمەسى) 4 ـ ايدىڭ 13 ـ كۇنى رەسمي اشىلىپ، ”ادام مەن تابيعات تىرشىلىك ورتاق تۇلعاسى — جاسىل دامۋدىڭ بولاشاق قوعامىن بىرگە قۇرۋ“ نەگىزگى تاقىرىبىنداعى جۇڭگو سارايى سول كۇنى سارايدىڭ اشىلۋ سالتىن وتكىزدى.
وساكا الەمدىك كورمەسى 10 ـ ايدىڭ 13 ـ كۇنىنە دەيىن جالعاسادى. جۇڭگو سارايى وسى كەزەكتى الەمدىك كورمەدەگى اۋدانى ەڭ ۇلكەن شەتەلدىڭ ٴوزى سالعان سارايلارىنىڭ ٴبىرى، يەلەگەن جەر اۋدانى شامامەن 3500 شارشى مەتر.
جۇڭگو ساۋدانى جەبەۋ قوعامىنىڭ باستىعى رىن حۇڭبين سارايدىڭ اشىلۋ سالتىندا ارناۋ ٴسوز سويلەپ مىنالاردى ٴبىلدىردى: جۇڭگو ۇكىمەتى جاپونيا جاق وتكىزگەن وساكا الەمدىك كورمەسىنە بەلسەنە قولداۋ كورسەتىپ، وساكا الەمدىك كورمەسىندەگى جۇڭگونىڭ كورمەگە قاتىناسۋ قىزمەتىنە ايرىقشا ٴمان بەردى، جۇڭگو ساۋدانى جەبەۋ قوعامى ٴارقايسى جاقپەن بىرگە جۇڭگو سارايىن دەن قويا ۇيىمداستىرىپ دايىندادى. جۇڭگو سارايىنداعى تارتىمدى كورسەتۋلەر جانە باي مازمۇندى قيمىلدار ارقىلى دۇنيە ٴجۇزىنىڭ قارىشتاپ دامىعان، وزىنە سەنىمدى، اشىق جۇڭگونى كورۋىنە مۇمكىندىك جاساپ، وساكا الەمدىك كورمەسىنە تارتىمدى ۇمىتىلماس جۇڭگو بەلگىسىن قالدىرىپ، تەپە ـ تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن بەلسەنە ىلگەرىلەتۋدى ٴۇمىت ەتەمىز.
حالىقارالىق كورمە مەكەمەسىنىڭ باس حاتشىسى ديميتري كەركەنچەس بىلاي دەدى: جۇڭگو باستان ـ اياق ەرەن بەينەمەن كورمەگە قاتىناسىپ كەلەدى، كورمە سارايى تالاي رەت وزگەشە قۇرمەتكە، جاپپاي القاۋعا يە بولدى. وساكا الەمدىك كورمەسىندە دۇنيە ٴجۇزىنىڭ جەر ـ جەرىندەگى كورەرمەندەر جۇڭگو سارايىندا جۇڭگونىڭ قوردالى مادەنيەت مايەگىن جانە بايىرعى اقىل ـ پاراساتىن ٴتۇسىنىپ، وسى زامانعى جۇڭگونىڭ عىلىم ـ تەحنولوگيادا جاڭالىق اشۋ تابىستارىنا جانە جاسامپازدىق جوباسىنا كۋا بولادى.
جاپونيا الەمدىك كورمە قوعامىنىڭ باستىعى، جاپونيا ەكونوميكالىق توپ بىرلەستىگىنىڭ باستىعى شىساڭ ياحى مىنالاردى ٴبىلدىردى: جاپونيا مەن جۇڭگو قارىم ـ قاتىناسى جاپونيانىڭ ەڭ ماڭىزدى ەكى جاقتى قارىم ـ قاتىناستارىنىڭ ٴبىرى. ٴارقايسى ەلدىڭ اڭعارلى ادامدارىنىڭ وساكا الەمدىك كورمەسىن باستاما ەتىپ، جاڭالىق اشۋدى، سەلبەسۋدى جەبەپ، ومىرشەڭ كۇش قاۋلاعان بولاشاق قوعامدى بىرگە قۇرۋىن ٴۇمىت ەتەمىز.
وساكا ۇكىمەتىنىڭ اكىمى جيسۇن ياڭۋىن وساكا الەمدىك كورمەسى ارقىلى جاپونيا مەن جۇڭگونىڭ جەرگىلىكتى ورىندارىنىڭ اۋىس ـ كۇيىسىن، سەلبەستىگىن ونان ارى تەرەڭدەتۋدى ٴۇمىت ەتەتىندىكتەرىن ٴبىلدىردى.
حالىقارالىق كورمە مەكەمەسىنىڭ ٴتوراعاسى الان بوجيە، جۇڭگونىڭ جاپونيادا تۇراتىن باس ەلشىسى ۋ جياڭحاۋ، سونداي ـ اق جۇڭگو مەن جاپونيانىڭ كاسىپورىن، مادەنيەت سياقتى ٴارقايسى سالاداعى قايراتكەرلەرىنەن 300دەي ادام سارايدىڭ اشىلۋ سالتىنا قاتىناستى. سالتتا ٴداستۇرلى ارىستان ٴبيى جانە ٴبي تەاترى «جۋحۋان» كونسەرتى قويىلدى.
جۇڭگو سارايىندا جالپى ”تابيعات پەن ادام ٴبىر تۇلعا بولۋ“، ”تۇنىق سۋ، جاسىل تاۋ“، ”ۇزبەي جالعاستىرۋ“ سىندى ٴۇش كورمە اۋماعى ورنالاستىرىلدى، ماقساتى: جۇڭگونىڭ ٴداستۇرلى ەكولوگيا پاراساتىن ايگىلەپ، جۇڭگونىڭ جاسىل دامۋ ۇستانىمىن كورسەتىپ، جۇڭگو مەن شەتەل وركەنيەتتەرىنىڭ اۋىس ـ كۇيىس جاساسىپ، ٴوزارا ۇلگى الۋىن جانە جۇرت تىلەگىن توعىستىرۋدى جەبەۋ. مۇندا جۇڭگونىڭ چاڭى - 5، چاڭى - 6 بارلاۋ اسپابى جيناعان اي شارىنىڭ وڭ بەتىنىڭ جانە تەرىس بەتىنىڭ توپىراق ۇلگىسى جاقىن ارالىقتان سالىستىرىپ كورسەتىلەدى، سونداي ـ اق ”جياۋلۇڭ“ اتتى تەرەڭگە سۇڭگۋدى سەزىنۋ بولمەسى، جاڭا ۇرپاق ادام بەينەلى قۇلتەمىر، ”24 امال“ نەگىزگى تاقىرىبىنداعى كولەمدى كوپ مەديالى ديناميكالى كەسكىن، سيفرلاندىرىلعان ديناميكالى ۇزىن سۋرەت «ەگىنشىلىك، توقىماشىلىق سۋرەتى» سياقتى كورمە تۇرلەرى جۇڭگو سارايىنىڭ جارقىن ٴتۇيىنى سانالادى.
