شينحۋا اگەنتتىگىنىڭ 4 ـ ايدىڭ 13 ـ كۇنى حايكوۋدان بەرگەن حابارى. مەملەكەتتىڭ ورىنباسار ٴتوراعاسى حان جىڭ 4 ـ ايدىڭ 13 ـ كۇنى حايناننىڭ حايكوۋىندا 5 ـ كەزەكتى جۇڭگو حالىقارالىق تۇتىنۋ بۇيىمدارى كورمەسى، ”جۇڭگودا زات ساتىپ الۋ“ جەلىلەس قيمىلىنىڭ باستالۋ سالتىنا قاتىناستى.
سول كۇنى تۇستەن بۇرىن حان جىڭ قاتىستى ەلدەردىڭ باسشىلارىمەن، حالىقارالىق ۇيىمداردىڭ جاۋاپتىلارىمەن بىرگە باستالۋ سالتىنا قاتىناستى. ساعات 10نان 40 مينۋت وتكەندە حان جىڭ 5 ـ كەزەكتى جۇڭگو حالىقارالىق تۇتىنۋ بۇيىمدارى كورمەسىنىڭ، ”جۇڭگودا زات ساتىپ الۋ“ جەلىلەس قيمىلىنىڭ باستالعاندىعىن جاريالادى.
قيمىلدا نەگىزگى قوناق ەل ۋاكىلى، انگليا ساۋدا مينيسترلىگىنىڭ مەملەكەت ىستەرى ٴۋازىرى دوگلاس الەكساندر، سلوۆاكيانىڭ ورىنباسار زۇڭليى دەنيسا ساكوۆا، دۇنيە جۇزىلىك ساۋدا ۇيىمىنىڭ ورىنباسار باس جوراسى جاڭ شياڭچىن ىلگەرىندى ـ كەيىندى ارناۋ ٴسوز سويلەدى.
جۇڭگو — شەتەل ۇكىمەت تاراۋلارىنىڭ، شەكارا ٴىشى ـ سىرتىنان كورمەگە قاتىناسقان ساۋداگەرلەردىڭ، ساتىپ الۋشى ساۋداگەر كاسىپورىندارىنىڭ ۋاكىلدەرى جانە جۇڭگودا تۇراتىن ٴىشىنارا ەلشىلەر قاتارلى 1000داي ادام باستالۋ سالتىنا قاتىناستى.
باستالۋ سالتى باستالۋدان بۇرىن حان جىڭ حاينان حالىقارالىق ٴماجىلىس ـ كورمە ورتالىعىنىڭ كورمە زالىنا بارىپ كورمە سارايىن ارالاپ، كورمەگە قاتىناساتىن كاسىپورىنداردىڭ جاۋاپتىلارىمەن پىكىر اۋىستىردى. حان جىڭ مىنالاردى ٴبىلدىردى: الدىڭعى ايدا ٴتوراعا شي جينپيڭ بەيجيڭدە حالىقارالىق ساۋدا ـ ونەركاسىپشىلەر سالاسىنىڭ ۋاكىلدەرىمەن كەزدەسكەندە، جۇڭگو جوعارى دەڭگەيدە سىرتقا ەسىك اشۋدى ىلگەرىلەتۋدە ەسىك اشۋ قاقپاسى تەك بارعان سايىن ايقارا اشىلادى دەپ باسا دارىپتەدى. جۇڭگودا ٴبىر ميلليارد 400 ميلليوننان استام جان سانى بار، بازار ٴورىسى كەڭ، تۇتىنۋدىڭ دارەجەسىن جوعارىلاتۋدىڭ قوزعالىس قۋاتى مىعىم. ٴار ەل كاسىپورىندارىنىڭ جۇڭگوعا كەلىپ قارجى قوسىپ، شارۋاشىلىقتى گۇلدەندىرۋىن، تۇتىنۋ بۇيىمدارى كورمەسى تۇعىرىنان ويداعىداي پايدالانىپ، ماركا ىقپالىن كەڭەيتىپ، ەكونوميكا ـ ساۋدا سەلبەستىگىن، بارىس ـ كەلىسىن تەرەڭدەتىپ، ٴوزارا پايدا جەتكىزىپ تەڭ يگىلىككە كەنەلۋدى جۇزەگە اسىرۋىن قارسى الامىز.
جۇڭگو حالىقارالىق تۇتىنۋ بۇيىمدارى كورمەسىن ساۋدا مينيسترلىگى مەن حاينان ولكەلىك حالىق ۇكىمەتى بىرگە وتكىزدى، 4 كەزەك ٴساتتى وتكىزىلدى، ول ازيا — تىنىق مۇحيت وڭىرىندەگى كولەمى ەڭ ۇلكەن تۇتىنۋ سارا بۇيىمدارى كورمەسى. وسى كەزەكتى تۇتىنۋ بۇيىمدارى كورمەسى ”ەسىك اشۋ ورايىنان بىرگە يگىلىكتەنىپ، تاماشا تۇرمىستى بىرگە جاراتۋ“ نەگىزگى تاقىرىبىن جالعاستىردى، الەمدەگى 70 نەشە مەملەكەت پەن وڭىردەگى 1700دەن استام كاسىپورىن، 4100دەن استام ماركا كورمەگە قاتىناستى.
