تاياۋدا «شينجياڭ ۇيعۇر اۆتونوميالى رايونىنىڭ قالا ـ قالاشىقتارداعى ۇيلەردىڭ پايدالانۋ حاۋىپسىزدىگىن باسقارۋ ٴادىسى (تومەندە قىسقارتىلىپ < ٴادىس> دەلىنەدى)» باسىپ تاراتىلىپ، شينجياڭنىڭ قالا ـ قالاشىقتارداعى ۇيلەردىڭ پايدالانۋ حاۋىپسىزدىگىن باسقارۋ جاعىنداعى ٴتۇزىم اقتاڭداعىن تولتىردى.
«ٴادىس» جيىنى 6 تاراۋ، 29 تارماق بولىپ، حاۋىپسىزدىك جاۋاپكەرشىلىگى، ٴۇيدىڭ حاۋىپسىزدىگىن باعالاۋ، ٴۇيدىڭ حاۋىپسىزدىگىندە ساقتالعان كومەسكى كىناراتتاردى وڭاۋ جانە ونى شۇعىل ٴبىر جاقتى ەتۋ، ٴۇيدىڭ پايدالانۋ حاۋىپسىزدىگىن باقىلاۋ ـ باسقارۋ سياقتى مازمۇنداردى تۇڭعىش رەت ايقىندادى. «ٴادىس» اۆتونوميالى رايوننىڭ اكىمشىلىك وڭىرلەرىندەگى قالا ـ قالاشىقتاردىڭ مەملەكەت مەنشىگىندەگى جەرلەرىندە زاڭدى سالىنعان ٴارى پايدالانۋعا بەرىلگەن قۇرىلىستارعا قولدانىلادى، ول حالىقتىق ٴۇي، زاۆود ۇيلەرى، قويما، قىزمەت عيماراتى، مەكتەپ جاتاعى، شيپاحانا، الەۋمەتتىك مادەنيەت الاڭ ـ سارايى سياقتى ٴتۇرلى ۇيلەردى قامتيدى.
«ادىستە» مىنالار اتاپ كورسەتىلدى: اۋدان دارەجەلىدەن جوعارى حالىق ۇكىمەتى ۇيلەردىڭ پايدالانۋ حاۋىپسىزدىگى بويىنشا شۇعىل ٴبىر جاقتى ەتۋدى ۇيىمداستىرىپ اتقارۋعا جاۋاپتى بولىپ، قاتىستى تاراۋلاردى باقىلاۋ ـ باسقارۋ جاۋاپكەرشىلىگىن زاڭ بويىنشا اتقارۋعا قۋزايدى. اۋدان دارەجەلىدەن جوعارى حالىق ۇكىمەتتەرىنىڭ تۇرعىن ٴۇي جانە قالا، اۋىل قۇرىلىسىن باسقارۋ تاراۋى ٴوز اكىمشىلىك وڭىرىندەگى ۇيلەردىڭ پايدالانۋ حاۋىپسىزدىگىن باقىلاۋ ـ باسقارۋ قىزمەتىنە جاۋاپتى بولادى. ٴۇي مەنشىك يەسى نەمەسە پايدالانۋشى ٴۇيدىڭ پايدالانۋ حاۋىپسىزدىگىنە جاۋاپتى ادام بولادى.
3 - ايدىڭ 18 - كۇنى، ينجەنەرلەر ءۇرىمجى قالاسى شۇيموگوۋ رايونىنداعى بەلگىلى عيماراتتا ٴۇي حاۋىپسىزدىگىنە باعالاۋ جۇرگىزۋدە. (سۋرەتتى تۇسىرگەن: ساۋ ۋىنحاۋ)
«ادىستە» ٴۇيدىڭ پايدالانۋ حاۋىپسىزدىگىنە جاۋاپتى ادامنىڭ جاۋاپكەرشىلىگى، قوجالىق قىزمەت وتەۋشىنىڭ مىندەتى، سونداي ـ اق ٴۇيدى پايدالانۋ بارىسىندا تيىم سالىنعان ارەكەتتەر تۇگەلدەي ايقىندالدى. «ادىستە» مىنالار ايقىندالدى: تيجارات سيپاتىنا جاتپايتىن ۇيلەردى ٴوندىرىس ـ تيجارات سيپاتتى ۇيلەرگە وزگەرتكەندە ٴۇيدىڭ پايدالانۋ حاۋىپسىزدىگىنە جاۋاپتى ادام زاڭ بويىنشا قاتىستى راسمياتتاردى وتەۋگە، سونداي ـ اق پايدا ـ زيان قاتىناسى بار مۇلىك يەسىنىڭ ماقۇلدىعىن الۋعا ٴتيىس. تيجارات رۇقسات كۋالىگىن بىتىرۋدەن نەمەسە تىزىمگە الدىرۋدان، ەستەلىككە الدىرۋدان بۇرىن زاڭ بويىنشا ٴۇي حاۋىپسىزدىگىن باعالاتۋ كەرەك. ٴۇي قۇرىلىسىنىڭ حاۋىپسىزدىگىن جانە جەر سىلكىنىسىنە توزىمدىلىگىن باعالاۋ قۇرىلىمىندا سايكەستى بارلاۋ، جوبالاۋ تولىمدىلىعى بولۋ كەرەك. ٴۇيدىڭ حاۋىپسىزدىگىن باعالاۋ، حاۋىپسىزدىك كومەسكى كىناراتىن وڭاۋ اقىسىن ٴۇيدىڭ پايدالانۋ حاۋىپسىزدىگىنە جاۋاپتى ادام ارقالايدى.
اۆتونوميالى رايون ايماق، وبلىس، قالالاردى ٴۇيدىڭ حاۋىپسىزدىگىن باسقارۋ تاسىلىندە، ادىسىندە جاڭالىق اشۋ جونىندە ىزدەنىس جاساۋعا، ۇيلەردى بەلگىلى مەرزىمدە تەكسەرۋ، كونە ۇيلەردى كۇتىمدەۋ قاراجاتى جانە ٴۇي قامسىزداندىرۋى سىناق ٴتۇيىنى قىزمەتىن ورىستەتۋگە شابىتتاندىرادى.
