شينحۋا اگەنتتىگىنىڭ 4 ـ ايدىڭ 14 ـ كۇنى حانويدان بەرگەن حابارى (تىلشىلەر ياڭ يجۇن، زوۋ شۋەميان). جەرگىلىكتى ۋاقىت 4 ـ ايدىڭ 14 ـ كۇنى تۇستە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى شي جينپيڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى سۋ ليننىڭ، ۆيەتنام سوتسياليستىك رەسپۋبليكاسىنىڭ ٴتوراعاسى لياڭ چياڭنىڭ ۇسىنىسىمەن ۆيەتنامدا مەملەكەتتىك ساپاردا بولۋ ٴۇشىن ارناۋلى ۇشاقپەن حانويعا جەتتى.
شي جينپيڭ ارناۋلى ۇشاقپەن حانوي نويباي حالىقارالىق اۋەجايىنا جەتكەن كەزدە، ۆيەتنامنىڭ مەملەكەت ٴتوراعاسى لياڭ چياڭ، ۆيەتنام كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ ۇنەمىلىك ىستەرگە جاۋاپتى شۋجيى چىن جينشيۋ، ۆيەتنام كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، ورتالىق كوميتەت كەڭسەسىنىڭ مەڭگەرۋشىسى لي حۋايجۇڭ قاتارلى ۆيەتنامنىڭ پارتيا، ۇكىمەت باسشىلارى مەن جەرگىلىكتى ورىننىڭ ۋاكىلدەرى قىزۋ قارسى الدى. ۆيەتنامدىق بويجەتكەن شي جينپيڭگە گۇل ۇسىندى. قۇرمەت قاراۋىلى قىزىل كىلەمنىڭ ەكى جاعىندا تۇرىپ، مىلتىقتارىن سەرت ۇستاپ قۇرمەت ٴبىلدىردى. جەرگىلىكتى ورىنداعى جاستار ۇلتتىق كيىم كيىپ، بارابان سوعىپ، ٴان ايتىپ، ٴبي بيلەپ، ەكى پارتيانىڭ، ەكى ەلدىڭ تۋىن بۇلعاپ، شي جينپيڭنىڭ ساپارلاي كەلگەندىگىن قىزۋ قارسى الدى.
شي جينپيڭ جازباشا ٴسوز سويلەپ، جۇڭگو كوممۋنيستىك پارتياسى، جۇڭگو ۇكىمەتى جانە جۇڭگو حالقى اتىنان باۋىرلاس ۆيەتنام كوممۋنيستىك پارتياسىنا، ۆيەتنام ۇكىمەتىنە جانە ۆيەتنام حالقىنا ىقىلاستى سالەم جولدادى جانە ىزگى تىلەك تىلەدى.
شي جينپيڭ بىلاي دەپ اتاپ كورسەتتى: بيىل ۆيەتنام كوممۋنيستىك پارتياسى قۇرىلعاندىعىنىڭ 95 جىلدىعى، ۆيەتنامنىڭ مەملەكەت قۇرعاندىعىنىڭ 80 جىلدىعى جانە وڭتۇستىك بولىگى ازات بولعاندىعىنىڭ 50 جىلدىعى. ۆيەتنام كوممۋنيستىك پارتياسى ۆيەتنام حالقىن ىنتىماقتاستىرىپ جانە باستاپ، پارتيا قۇرىلعاندىعىنىڭ، مەملەكەت قۇرىلعاندىعىنىڭ ”ەكى 100 جىلدىق“ نىساناسىنا قاراي قايراتتانا العا ىلگەرىلەدى، حالىقارالىق جانە وڭىرلىك ىقپال كۇشى ۇزدىكسىز ارتىپ، سوتسياليستىك ونەركاسىپتەندىرۋ، وسىزامانداندىرۋ قۇرىلىسىندا قۋانارلىق تابىستارعا قول جەتكىزدى. جۇڭگو مەن ۆيەتنام ەكى ەل تاۋ ـ وزەنى جالعاسقان سوتسياليستىك كورشى ەلدەر، ستراتەگيالىق مانگە يە تاعدىرلاس ورتاق تۇلعا. مەملەكەتتىڭ تاۋەلسىزدىگىنە جانە ۇلت ازاتتىعىنا قول جەتكىزۋدىڭ جالىندى جىلدارىندا ەكى جاق تىزە قوسا كۇرەس جۇرگىزىپ، ٴبىر ـ ٴبىرىن قولداپ، تەرەڭ دوستىق ورناتتى. ٴوز ەلىنىڭ مەملەكەت جاعدايىنا ۇيلەسەتىن سوتسياليزم جولى جونىندە ىزدەنىس جاساۋ بارىسىندا ەكى جاق ٴوزارا ۇيرەنىپ، ٴوزارا ۇلگى الىپ، قول ۇستاسا العا ىلگەرىلەپ، دۇنيە جۇزىنە سوتسياليستىك ٴتۇزىمنىڭ نۇرلى بولاشاعىن ايگىلەدى. بيىل جۇڭگو مەن ۆيەتنام ديپلوماتيالىق قارىم ـ قاتىناس ورناتقاندىعىنىڭ 75 جىلدىعى جانە ”جۇڭگو — ۆيەتنام گۋمانيتارلىق اۋىس ـ كۇيىس جىلى“، جۇڭگو — ۆيەتنام تاعدىرلاس ورتاق تۇلعاسى قۇرىلىسى جاڭا دامۋ ورايىن كۇتىپ الدى. مەن وسى رەتكى ساپاردى وراي ەتىپ، ۆيەتنامنىڭ باسشى جولداستارىمەن جۇڭگو — ۆيەتنام ەكى پارتيا، ەكى ەل قارىم ـ قاتىناسىنداعى جالپى جاعداي سيپاتتى، ستراتەگيالىق سيپاتتى، بەتالىس سيپاتتى ماسەلەلەر جانە ورتاق كوڭىل ٴبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، جۇڭگو — ۆيەتنام تاعدىرلاس ورتاق تۇلعاسى قۇرىلىسىنىڭ جاڭا جوباسىن بىرگە كەسكىندەۋدى ٴۇمىت ەتەمىن.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، سىرتقى ىستەر مينيسترلىگىنىڭ مينيسترى ۋاڭ ي، جۇڭگو كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، قوعام حاۋىپسىزدىگى مينيسترلىگىنىڭ مينيسترى ۋاڭ شياۋحۇڭ قاتارلى ساپارلاستارى وسى ۇشاقپەن جەتتى.
جۇڭگونىڭ ۆيەتنامدا تۇراتىن باس ەلشىسى حى ۋي دا اۋەجايعا كەلىپ قارسى الدى.
شي جينپيڭ اۆتوكولىكپەن اۋەجايدان تۇراتىن قوناق ۇيگە بارا جاتقان جولدا جۇڭگو — ۆيەتنام ەكى پارتيانىڭ، ەكى ەلدىڭ تۋلارى جەلمەن بىرگە جەلبىرەپ، ”جۇڭگو — ۆيەتنام دوستىعى ماڭگى جالعاسادى“، ”تاۋ ـ وزەنى جالعاسقان، تاعدىرلاس ورتاق تۇلعا“، ”ۆيەتنام — جۇڭگو دوستىق سۇيىسپەنشىلىگى تەرەڭ، جولداس ۇستىنە باۋىرلاس“! سياقتى سوزدەر جازىلعان قىزىل ٴتۇستى كەرمە تۋلار ايرىقشا كوز تارتتى. جەرگىلىكتى ورىنداعى جۇرتشىلىق جانە جۇڭگو قارجىلاندىرعان قۇرىلىمداردىڭ، شەتەلدە وقىپ جاتقان وقۋشىلاردىڭ ۋاكىلدەرى جولدىڭ ەكى شەتىنە توپتالىپ، شي جينپيڭنىڭ ساپارلاي كەلگەندىگىن قىزۋ قارسى الدى.
