شينحۋا اگەنتتىگىنىڭ 4 ـ ايدىڭ 14 ـ كۇنى حانويدان بەرگەن حابارى (تىلشىلەر حان مو، ليۋ كاي). 4 ـ ايدىڭ 14 ـ كۇنى كەشتە مەملەكەت ٴتوراعاسى شي جينپيڭ ۆيەتنام كوممۋنيستىك پارتياسى ورتالىق كوميتەتى تۇرعان ورىندا ۆيەتنام زۇڭليى فان ميڭجىڭمەن كەزدەستى.
شي جينپيڭ بىلاي دەپ اتاپ كورسەتتى: ۆيەتنام پارتياسى مەن ۇكىمەتىنىڭ باسشىلىعىندا، ۆيەتنام ساياسيى، قوعامى ورنىقتى بولىپ، جاڭارتۋ ىستەرىندە قۋانارلىق تابىستارعا قول جەتكىزدى، حالىقارالىق ورنى كۇن سايىن جوعارىلادى، جۇڭگو جاق بۇعان قۋانادى. جۇڭگو مەن ۆيەتنام بىردەي ۇلتتىڭ گۇلدەنۋىن جۇزەگە اسىرۋ، مەملەكەتتىڭ دامۋىن جەدەلدەتۋ تاريحي بورىشىن ارقالاپ وتىر، تاعدىرلاس ورتاق تۇلعا تانىمىن بەكەمدەپ، جالپى بەتتىك ستراتەگيالىق سەلبەستىكتى تەرەڭدەتىپ، وزدەرىنىڭ وسىزامانداندىرۋ ۇردىسىنە قىزمەت ەتىپ، جۇڭگو — ۆيەتنام تاعدىرلاس ورتاق تۇلعاسى قۇرىلىسى جەتىستىكتەرىنىڭ ەكى ەل حالقىنا اناعۇرلىم ويداعىداي تيىمدىلىك جەتكىزۋىنە مۇمكىندىك جاساۋى كەرەك.
شي جينپيڭ بىلاي دەپ باسا دارىپتەدى: ەكى جاق ستراتەگيالىق ىستەستىكتى كۇشەيتىپ، جۇڭگو — ۆيەتنام تاعدىرلاس ورتاق تۇلعاسى قۇرىلىسىنىڭ ساياسي نەگىزىن بەكەمدەۋى كەرەك. جوعارى جىكتەگىلەردىڭ بارىس ـ كەلىسىن جيىلەتىپ، ستراتەگيالىق بايلانىستى كۇشەيتىپ، زورەكەرلىككە، سىڭار جاقتىلىققا، قورعامپازدىققا بىرگە قارسى تۇرىپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن ويداعىداي تياناقتاندىرىپ، حالىقارالىق ادىلدىكتى، ادىلەتتىلىكتى بىرگە قورعاپ، ازيانىڭ، ٴتىپتى، دۇنيە ٴجۇزىنىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن قورعاۋى كەرەك.
ەكى جاق جوعارى ساپالى دامۋدى ىلگەرىلەتىپ، ەكى ەلدىڭ قول ۇستاسا وسىزامانداندىرۋعا قادام تاستاۋىنا مىعىم ستراتەگيالىق تىرەك ازىرلەۋى كەرەك. جۇڭگو مەن ۆيەتنامنىڭ قۇرلىقتا، تەڭىزدە تۇتاسقان وڭىرلىك ورىن باسىمدىعىن تولىق ساۋلەلەندىرىپ، دامۋ ستراتەگياسىن ٴتۇيىلىستىرۋدى كۇشەيتىپ، كاسىپ سالاسى سەلبەستىگى كومەسكى قۋاتىن تەرەڭدەي اشۋى كەرەك. نەگىزدىك قۇرىلعىلار قۇرىلىسى سەلبەستىگىن ورنىقتى قاداممەن ىلگەرىلەتىپ، ۇلاستىرۋ، تۇتاستىرۋ دەڭگەيىن جوعارىلاتىپ، ساۋدانىڭ ىركىلىسسىزدىگىن قامتاماسىزداندىرۋ كەرەك. ساۋدا، قارجى قوسۋ سياقتى ٴداستۇرلى سالالار سەلبەستىگىن زورايتىپ، كۇشەيتىپ، 5G، جاساندى زەردە، تازا ەنەرگيا، سيفرلى ەكونوميكا سياقتى جاڭادان گۇلدەنگەن كاسىپ سالالارى سەلبەستىگىن كەڭەيتۋ كەرەك. كوپ جاقتى ساۋدا ٴتۇزىلىسىن باتىل قورعاپ، ەكونوميكانىڭ جاھاندانۋىنىڭ اناعۇرلىم اشىق، سيىسىمدى، جالپىعا ٴتيىمدى، بىركەلكى بەتالىسقا قاراي دامۋىن بىرگە جەبەۋ كەرەك.
ەكى جاق گۋمانيتارلىق سەلبەستىكتى تەرەڭدەتىپ، جۇڭگو — ۆيەتنام دوستىق نەگىزگى اۋەنىن اسقاقتاتۋى كەرەك. جۇڭگو مەن ۆيەتنام ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتاۋ جانە ”جۇڭگو — ۆيەتنام گۋمانيتارلىق اۋىس ـ كۇيىس جىلى“ جەلىلەس قيمىلدارىن ويداعىداي وتكىزىپ، جۇڭگو — ۆيەتنام دوستىق قىزىل حيكايالارىن ويداعىداي بايانداۋ ٴارى ەكى ەلدىڭ ٴوزارا پايدا جەتكىزىپ سەلبەسۋ، قول ۇستاسا وسىزاماندانۋعا قادام تاستاۋ حيكايالارىن دا ويداعىداي بايانداۋ كەرەك. حالىقتىڭ قالاۋىنان شىعاتىن، جۇرت تىلەگىنە ۇيلەسەتىن، حالىق تۇرمىسىنا تيىمدىلىك جەتكىزەتىن اناعۇرلىم كوپ نىساندى اتقارۋ كەرەك.
فان ميڭجىڭ مىنالاردى ٴبىلدىردى: ٴتوراعا شي جينپيڭنىڭ ۆيەتنامدا مەملەكەتتىك ساپاردا بولۋى — ەكى ەلدىڭ بيىلعى ەڭ ماڭىزدى جوعارى جىكتەگىلەر اۋىس ـ كۇيىسى، ۆيەتنام — جۇڭگو قارىم ـ قاتىناسىنداعى قۋانارلىق ٴىرى ٴىس، تاريحي مانگە يە، ۆيەتنام — جۇڭگو قارىم ـ قاتىناسىندا اناعۇرلىم زور دامۋعا قول جەتكىزۋگە جەتەكشىلىك ەتىپ، ەكى جاقتى سەلبەستىككە كۇشتى قوزعاۋشى كۇش ۇستەيتىندىگى ٴسوزسىز.
فان ميڭجىڭ مىنالاردى ٴبىلدىردى: ٴتوراعا شي جينپيڭ 2023 ـ جىلى ۆيەتنامدا ساپاردا بولعاننان بەرى، ەكى ەل قارىم ـ قاتىناسىنداعى ستراتەگيالىق ٴوزارا سەنىمدىلىك ونان ارى كۇشەيىپ، ناقتى ىستەر سەلبەستىگىندە كەلەلى ىلگەرىلەۋشىلىككە قول جەتىپ، حالىقتارىنىڭ دوستىق سۇيىسپەنشىلىگى كۇن سايىن تەرەڭدەدى. ۆيەتنام جاق جۇڭگومەن قارىم ـ قاتىناسىنا ايرىقشا ٴمان بەرەدى، ستراتەگيالىق مانگە يە ۆيەتنام — جۇڭگو تاعدىرلاس ورتاق تۇلعاسى قۇرىلىسىن بەرىك بەكىممەن ىلگەرىلەتەدى. ۆيەتنام جاق جۇڭگونىڭ وراسان زور دامۋ تابىستارىنا قول جەتكىزگەندىگىن شىن جۇرەكتەن قۇتتىقتايدى، جۇڭگونىڭ ۇزدىكسىز دامۋىن، زورايۋىن قولدايدى، جۇڭگونىڭ پارتيانى باسقارۋ، مەملەكەتتى باسقارۋ تاجىريبەلەرىنەن ۇيرەنۋدى، جۇڭگونىڭ ٴوز كۇشىنە سۇيەنىپ ٴوزىن الۋەتتەندىرۋ رۋحىنان ۇيرەنۋدى، جۇڭگونىڭ دامۋ ۇستانىمىنان، ۇلگىسىنەن ۇيرەنۋدى ٴۇمىت ەتەدى. ۆيەتنام جاق جۇڭگو جاقپەن ەكونوميكا ـ ساۋدا، قارجى قوسۋ، ۇلاستىرۋ، تۇتاستىرۋ، عىلىم ـ تەحنولوگيا، فينانس سياقتى سالالارداعى سەلبەستىكتى كۇشەيتىپ، ەكونوميكانىڭ ومىرشەڭ كۇشىن جانە ارتۋ قوزعاۋشى كۇشىن جوعارىلاتىپ، حاۋىپ ـ قاتەرلەرگە، سىن ـ سايىستارعا بىرگە توتەپ بەرۋدى ٴۇمىت ەتەدى. ”ۆيەتنام — جۇڭگو گۋمانيتارلىق اۋىس ـ كۇيىس جىلى“ قيمىلىن ويداعىداي وتكىزىپ، ادامداردىڭ بارىس ـ كەلىسىن جانە جەرگىلىكتى ورىندار سەلبەستىگىن كۇشەيتىپ، حالىقتاردىڭ دوستىق سۇيىسپەنشىلىگىن نىعايتۋدى ٴۇمىت ەتەدى. جۇڭگو جاقپەن بىرگە حالىقارالىق، وڭىرلىك ىستەردە ىستەستىكتى كۇشەيتىپ، كۇردەلى دە قۇبىلمالى حالىقارالىق جاعدايدا ستراتەگيالىق تاباندىلىقتى ساقتاپ، كوپ جاقتىلىقتى جانە حالىقارالىق ٴتارتىپتى بىرگە قورعاۋدى ٴۇمىت ەتەدى.
ساي چي، ۋاڭ ي، ۋاڭ شياۋحۇڭ قاتارلىلار قاتىناستى.
شينحۋا اگەنتتىگىنىڭ 4 ـ ايدىڭ 14 ـ كۇنى حانويدان بەرگەن حابارى (تىلشىلەر سۋ لياڭ، جاۋ شۇي). 4 ـ ايدىڭ 14 ـ كۇنى كەشتە مەملەكەت ٴتوراعاسى شي جينپيڭ ۆيەتنام كوممۋنيستىك پارتياسى ورتالىق كوميتەتى تۇرعان ورىندا ۆيەتنام پارلامەنتىنىڭ ٴتوراعاسى چىن چيڭمينمەن كەزدەستى.
شي جينپيڭ بىلاي دەپ اتاپ كورسەتتى: ۆيەتنامدا تاعى دا مەملەكەتتىك ساپاردا بولىپ، ۆيەتنامنىڭ جاڭارتۋ ىستەرىندە قول جەتكىزگەن جاڭا تابىستارىنا كۋا بولىپ، جۇڭگو — ۆيەتنام دوستىعىنىڭ تەرەڭ نەگىزىن شىنايى سەزىندىم. قازىر جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدە، ۆيەتنام ۇلت دامۋىنىڭ جاڭا عاسىرىن باستاۋ الدىندا تۇر، ەكى جاق بىردەي ٴوز دامۋىنىڭ، گۇلدەنۋىنىڭ شەشۋشى مەزگىلىندە تۇر. وزگەرىس پەن بىلىقپالىق قاباتتاسقان حالىقارالىق جاعداي الدىندا جۇڭگو مەن ۆيەتنام ەكى ەل جول سەنىمى مەن ٴتۇزىم سەنىمىن بەكەمدەپ، ىنتىماقتى، ىستەستىكتى كۇشەيتىپ، ستراتەگيالىق مانگە يە جۇڭگو — ۆيەتنام تاعدىرلاس ورتاق تۇلعاسى قۇرىلىسىن ۇزدىكسىز تەرەڭدەتىپ، وسىزاماندانۋعا قول ۇستاسا قادام تاستاپ، دۇنيە جۇزىنە اناعۇرلىم كوپ ورنىقتىلىق جانە وڭ ەنەرگيا ۇستەۋى كەرەك.
شي جينپيڭ بىلاي دەپ باسا دارىپتەدى: جۇڭگو مەن ۆيەتنام ەكەۋى دە كوممۋنيستىك پارتيا باسشىلىعىنداعى سوتسياليستىك مەملەكەت، ساياسي بەتالىس پارتيا مەن مەملەكەتتىڭ بولاشاق تاعدىرىنا جانە ىستەرىنىڭ گۇلدەنۋى مەن قۇلدىراۋىنا، ٴساتتى ـ ٴساتسىز بولۋىنا سايادى. ەكى پارتيانىڭ، ەكى ەلدىڭ جوعارى جىكتەگىلەرى ەكى جاقتى قارىم ـ قاتىناس جانە بىرگە كوڭىل ٴبولىپ وتىرعان كەلەلى كەڭەستىك تاقىرىپتار جونىندە دەر كەزىندە پىكىر اۋىستىرىپ، ورتاق تانىمدى ۇزدىكسىز ۇيىستىرىپ، ٴوزارا سەنىمدىلىكتى نىعايتىپ، بەتالىستى ورنىقتىرىپ، جۇڭگو — ۆيەتنام قارىم ـ قاتىناسى كەمەسىنىڭ ورنىقتى العا ىلگەرىلەۋىنە شىنايى كەپىلدىك ەتۋى كەرەك. پارتيالاردىڭ، زاڭ شىعارۋ قۇرىلىمدارىنىڭ، ساياسي كەڭەس ۇيىمدارىنىڭ باعىتتامالى اۋىس ـ كۇيىسىن، سەلبەستىگىن ۇزدىكسىز ساقتاپ، ەل باسقارۋ تاجىريبەلەرىن اۋىستىرۋدى تەرەڭدەتۋ كەرەك. ەكى جاق جۇڭگو مەن ۆيەتنامنىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتاۋدى جانە ”جۇڭگو — ۆيەتنام گۋمانيتارلىق اۋىس ـ كۇيىس جىلىن“ وراي ەتىپ، قىزىل گەندى جالعاستىرىپ، قىزىل بايلىقتان ويداعىداي پايدالانىپ، ەكى ەل حالقىنىڭ، اسىرەسە، جاس ۇرپاقتاردىڭ ٴوزارا تۇسىنىستىگى مەن دوستىق سۇيىسپەنشىلىگىن كۇشەيتىپ، ەكى ەلدىڭ دوستىق دانەكەرىن اناعۇرلىم مىقتاپ ورناتۋى كەرەك.
شي جينپيڭ بىلاي دەپ اتاپ كورسەتتى: جۇڭگو مەملەكەتتىك حالىق قۇرىلتايى مەن ۆيەتنام پارلامەنتىنىڭ بارىس ـ كەلىسى، ىقپالداستىعى جيىلەپ، سەلبەستىك جەتىستىكتەرى سۇبەلى بولدى. ەكى ەلدىڭ زاڭ شىعارۋ قۇرىلىمدارى ٴداستۇرلى دوستىقتى كۇشەيتۋ، ناقتى ىستەر سەلبەستىگىنىڭ تياناقتانۋىن قامتاماسىز ەتۋ، كوپ جاقتى سايكەستىكتى كۇشەيتۋ جاقتارىندا كوبىرەك قىزمەت ىستەپ، ٴوز ەلدەرىنىڭ سوتسياليستىك دەموكراتيالىق زاڭمەن باسقارۋ قۇرىلىسى جونىندە اۋىس ـ كۇيىس ورىستەتىپ، جۇڭگو — ۆيەتنام تاعدىرلاس ورتاق تۇلعاسىنىڭ مازمۇنىن ۇزدىكسىز بايىتۋى كەرەك.
چىن چيڭمين مىنالاردى ٴبىلدىردى: ۆيەتنام مەن جۇڭگونىڭ تاۋ ـ وزەنى جالعاسقان، ەكى پارتيانىڭ، ەكى ەلدىڭ بۇرىنعى باسشىلارىنىڭ دەن قويا باۋلۋىندا ”جولداس ۇستىنە باۋىرلاس“ بولعان شىنايى دوستىق سۇيىسپەنشىلىك ورنادى، ەكى جاقتى قارىم ـ قاتىناستا ۇزاق ۋاقىت دوستىق تاتۋلىق بولدى. باس شۋجي شي جينپيڭنىڭ وسى رەتكى ساپارى جۇڭگو پارتياسىنىڭ، مەملەكەتىنىڭ جانە حالقىنىڭ ۆيەتنام — جۇڭگو قارىم ـ قاتىناسىنا باسا ٴمان بەرەتىندىگىن تولىق ايگىلەدى. ەكى پارتيانىڭ باس شۋجيلەرى ستراتەگيالىق مانگە يە ۆيەتنام — جۇڭگو تاعدىرلاس ورتاق تۇلعاسى قۇرىلىسىن ىلگەرىلەتۋ جونىندە ماڭىزدى ستراتەگيالىق نۇسقاۋ كورسەتتى، بۇل ۆيەتنام — جۇڭگو قارىم ـ قاتىناسىن جەبەۋدىڭ تىڭ تاراۋىن اشۋدى ىلگەرىلەتەدى. ۆيەتنام پارلامەنتى جۇڭگونىڭ مەملەكەتتىك ەكى ٴماجىلىسىنىڭ ٴساتتى اشىلعاندىعىن قىزۋ قۇتتىقتايدى، جۇڭگونىڭ مەملەكەتتىك حالىق قۇرىلتايىمەن بايلانىس جاساۋدى، سەلبەسۋدى تەرەڭدەتىپ، ەكى پارتيانىڭ، ەكى ەلدىڭ ەڭ جوعارى باسشىلارى كەلىسكەن ماڭىزدى ورتاق تانىمدى شىنايى ويداعىداي تياناقتاندىرىپ، ەكى ەلدىڭ بىرگە گۇلدەنىپ ـ كوركەيۋىن، دامۋىن جەبەۋگە، حالىقتار دوستىعىن نىعايتۋعا بەلسەندى ۇلەس قوسۋدى ٴۇمىت ەتەدى.
ساي چي، ۋاڭ ي، ۋاڭ شياۋحۇڭ قاتارلىلار قاتىناستى.
