انار بۇلت \ شينجياڭ گازەتىنىڭ ٴتىلشىسى حي حۇڭۋي 4 ـ ايدىڭ 14 ـ كۇنى ۇرىمجىدەن حابارلايدى. اۆتونوميالى رايوندىق ساۋدا ىستەرى مەڭگەرمەسىنەن ۇعىسۋىمىزشا، 4 ـ ايدىڭ 13 ـ كۇنى 5 ـ كەزەكتى جۇڭگو حالىقارالىق تۇتىنۋ بۇيىمدارى كورمەسى حايكوۋدا باستالعان. شينجياڭ ساۋدا ۇيىرمەسىنەن جالپى 29 ايگىلى، تاڭداۋلى كاسىپورىن كورمەگە قاتىناسىپ، 4 ۇلكەن ٴتۇر بويىنشا 300دەن استام تۇتىنۋ سارا بۇيىمى كورمەگە قويىلعان.
وسى كەزەكتى تۇتىنۋ بۇيىمدارى كورمەسىنىڭ كولەمىندە تاعى دا تىڭ ورە جاراتىلىپ، 71 مەملەكەت پەن وڭىردەن كەلگەن 4100دەن استام ماركا كورمەگە قاتىناسۋعا باۋرالدى، دۇنيە جۇزىندەگى 500 مىقتى كاسىپورىننان جانە كاسىپ سالاسىنداعى باستاماشى كاسىپورىننان 65 كاسىپورىن ٴبىر ساحنادا باسەكەلەستى. شينجياڭ ساۋدا ۇيىرمەسى تۇتىنۋ بۇيىمدارى كورمەسى تۇعىرىنان پايدالانىپ، ەكونوميكا ـ ساۋدا سەلبەستىگىن تەرەڭدەتىپ، بازاردى كەڭەيتەدى.
شينجياڭ سارايى ”شينجياڭ ماقتاسىن“ وزەكتى فاكتور ەتىپ، شينجياڭنىڭ توقىماشىلىق، كيىم ـ كەشەك كاسىپ سالاسىنىڭ وزگەشە باسىمدىعى مەن تارتىمدىلىعىن ايگىلەدى. كورمە سارايىندا ”شينجياڭ ماقتاسى جىبەك جولى“، ”شينجياڭ ٴدارى ـ دارمەگى، كۇتىنۋ“، ”شينجياڭ ەرەكشەلىگىندەگى مادەنيەت جاسامپازدىعى“، ”شينجياڭنىڭ ازىق ـ تۇلىگى“ سىندى 4 ۇلكەن كورمە رايونى جوبالانىپ، توقىماشىلىق بۇيىمدارى، كيىم ـ كەشەك، اۋىل شارۋاشىلىعى ونىمدەرى، ازىق ـ تۇلىك، مادەنيەت جاسامپازدىعى ونىمدەرى، ەرەكشە ۇيعۇر ٴدارى ـ دارمەگى سياقتى شينجياڭنىڭ تۇتىنۋ سارا بۇيىمدارى كورمەلەنىپ، كورەرمەندەردىڭ كيىم ـ كەشەك، ازىق ـ تۇلىك، مادەنيەت، كۇتىنۋ سىندى 4 ۇلكەن سالا بويىنشا شينجياڭ ەرەكشەلىگىنە يە تۇتىنۋ سارا بۇيىمدارىن تولىق سەزىنۋىنە مۇمكىندىك جاسالدى. كورمە سارايى تاعى دىبىس، جارىق، ەلەكتر سياقتى تاسىلدەر ارقىلى شينجياڭنىڭ ”ون ٴىرى كاسىپ سالاسى شوعىرىنىڭ“ دامۋ تابىستارىن ايگىلەدى.
”شينجياڭ ماقتاسى جىبەك جولى“ كورمە رايونىنان كورەرمەندەر شينجياڭنىڭ ماقتاسىن وزەكتى شيكىزات ەتىپ، اتلاس ورنەگى مەن وسى زامانعى جوبا توعىستىرىلعان جەيدە، جىبەك جاۋلىق، چەمودان، سومكە سياقتى ونىمدەردى كورە الادى، بۇل شينجياڭنىڭ ”ٴبىر شوق ماقتادان“ ” ٴبىر پار كيىمگە“ دەيىنگى تۇتاس كاسىپ سالاسى تىزبەگىنىڭ ناقتى قۋاتىن ايگىلەيدى.
وسى رەت ٴۇرىمجى جينرۋ جۋيان ساۋدا شەكتى سەرىكتەستىگىنىڭ تۇتىنۋ بۇيىمدارى كورمەسىندە 3 ـ رەت بوي كورسەتۋى، سەرىكتەستىك شينجياڭنىڭ ساپالى ۇزىن تالشىقتى ماقتاسى مەن ٴداستۇرلى قولونەرىنەن پايدالانىپ توقىلعان اتلاس ورنەگى تۇسىرىلگەن قامزول، كورپە ـ جاستىق تىسى مەن ماقتا توقىماشىلىعى مادەنيەت جاسامپازدىعى ونىمدەرىن ٴتۇيىندى تۇردە كورسەتتى.
وسى سەرىكتەستىكتىڭ قۇرۋشىسى جىن سايجىن بىلاي دەپ تانىستىردى: بيىل باتىلدىقپەن جاڭالىق اشىپ، شينجياڭ فاكتورىن ٴونىم جوباسىمەن توعىستىردىق، تۇتىنۋ بۇيىمدارى كورمەسى تۇعىرىنان پايدالانىپ ەل ٴىشى ـ سىرتىنداعى بازاردى اناعۇرلىم ويداعىداي كەڭەيتىپ، ٴتىپتى دە كوپ ادامعا شينجياڭنىڭ ٴۇي توقىما ونىمدەرىنىڭ وزگەشە تارتىمدىلىعىن سەزىندىرۋدى ٴۇمىت ەتەمىز.
وسى رەتكى تۇتىنۋ بۇيىمدارى كورمەسىندە شينجياڭ ساۋدا ۇيىرمەسى شينجياڭنىڭ تۇتىنۋ سارا ونىمدەرىن كورسەتۋمەن بىرگە، ەكونوميكا ـ ساۋدا سەلبەستىگىن دە تەرەڭدەتەدى. كورمە كەزىندە شينجياڭ ساۋدا ۇيىرمەسى ”شينجياڭ كۇنى“ ارناۋلى تاقىرىپتىق تانىستىرۋى، توقىماشىلىق، كيىم ـ كەشەك اۋقىمدىق سالتاناتى، ەرەكشە ٴدامدى تاعامداردان ٴدام تاتۋ سياقتى جەلىلەس قيمىلداردى وتكىزىپ، كورۋ، تىڭداۋ، ٴدام تۇيسىگى، مادەنيەت جاعىنداعى كوپ ولشەمدى ىقپالداستىق ارقىلى كورەرمەندەرگە شينجياڭ ايگىلى ماركاسىنىڭ تارتىمدىلىعىن تەرەڭ سەزىندىرىپ، اناعۇرلىم كوپ ساپالى ٴونىمنىڭ دۇنيە ساحناسىنا بەت الۋىن ىلگەرىلەتەدى.
