4 ـ ايدىڭ 17 ـ كۇنى تۇستەن كەيىن كامبودجا پاتشاسى سيحاموني جۇڭگونىڭ مەملەكەت ٴتوراعاسى شي جينپيڭمەن پنومپەندەگى پاتشا ورداسىندا كەزدەستى.
□ سۋرەتتى شينحۋا اگەنتتىگىنىڭ ٴتىلشىسى لي شۋەرىن تۇسىرگەن
شينحۋا اگەنتتىگىنىڭ 4 ـ ايدىڭ 17 ـ كۇنى پنومپەننەن بەرگەن حابارى (تىلشىلەر ني سى ـ ي، لي كاي، ۋ چاڭۋي). 4 ـ ايدىڭ 17 ـ كۇنى تۇستەن كەيىن كامبودجا پاتشاسى سيحاموني جۇڭگونىڭ مەملەكەت ٴتوراعاسى شي جينپيڭمەن پنومپەندەگى پاتشا ورداسىندا كەزدەستى.
شي جينپيڭ وتىرعان اۆتوكولىك جەتكەندە، سيحاموني اۆتوكولىكتەن تۇسەتىن جەردە قىزۋ قارسى الدى. قۇرمەت قاراۋىلى قىزىل كىلەمنىڭ ەكى جاعىندا قاتار تۇزەدى.
شي جينپيڭ بىلاي دەپ اتاپ كورسەتتى: پاتشا سيحامونيدىڭ تاققا وتىرعاندىعىنىڭ 20 جىلدىعى جانە كامبودجا كالەندارى بويىنشا جاڭا جىل قارساڭىندا كورىكتى كامبودجاعا ۇسىنىسپەن ساپارلاي كەلگەنىمە ەرەكشە قۋانىشتىمىن، وسى ورايدا كامبودجا حالقىنىڭ جاڭا جىلىنا قۇتتى بولسىن ايتامىن. كامبودجانىڭ مەملەكەتتى گۇلدەندىرۋ ٴىسى كۇننەن ـ كۇنگە دامىپ كەلەدى، پاتشا سيحامونيدىڭ قامقورلىعىندا، ەڭبەكشىل دە پاراساتتى كامبودجا حالقىنىڭ، ٴسوز جوق، مەملەكەتتى اناعۇرلىم گۇلدەنگەن، قۇدىرەتتى ەتىپ قۇرىپ شىعاتىندىعىنا سەنەمىن.
شي جينپيڭ بىلاي دەپ اتاپ كورسەتتى: جۇڭگو مەن كامبودجانىڭ دوستىعى 1000 جىلدى باسىپ ٴوتتى، ەكى ەل حالقى باستان ـ اياق قوس باعىتتا اتتانىپ، ٴبىرىن ـ ٴبىرى تابىسقا جەتكىزدى. حالىقارالىق اۋقىم قالاي قۇبىلسا دا، جۇڭگو - كامبودجا ەكى ەل سەنىمنەن اينىماي، ٴبىر ـ بىرىنە قارايلاسىپ، ٴبىر ـ ٴبىرىنىڭ وزەكتى مۇددەسىنە ساياتىن جانە ٴجىتى قاداعالاپ وتىرعان كەلەلى ماسەلەلەردە باستان ـ اياق ٴبىرىن ـ ٴبىرى باتىل قولداپ، ٴىرى، شاعىن ەلدەردىڭ تەڭ تۇرعىدا مامىلە جاساۋىنىڭ، شىن نيەتپەن ٴوزارا سەنىم ارتۋىنىڭ، ٴوزارا پايدا جەتكىزىپ تەڭ يگىلىككە كەنەلۋىنىڭ ۇلگىسىن ورناتتى. جۇڭگو - كامبودجا ەكى ەل باستان ـ اياق ادامزاتتىڭ تاعدىرلاس ورتاق تۇلعاسىن قۇرۋدىڭ الدىڭعى لەگىندە ٴجۇرىپ، كامبودجا جۇرتشىلىعىنا ناقتى پايدا جەتكىزدى.
شي جينپيڭ بىلاي دەپ باسا دارىپتەدى: جۇڭگو جاق كامبودجا پاتشا اۋلەتىمەن دوستىقتى قاستەرلەيدى، كامبودجا پاتشا اۋلەتىنىڭ ۇزاق جىلدان بەرى، جۇڭگو مەن كامبودجانىڭ دوستىق ىسىنە قوسقان ماڭىزدى ۇلەسىن جوعارى باعالايدى. جاڭا جاعدايدا، جۇڭگو - كامبودجا ەكى جاق جۇڭگونىڭ اعا بۋىن باسشىلارى مەن سىحانوك پاتشا بىرگە ورناتقان جۇڭگو مەن كامبودجانىڭ قۇرىشتاي بەرىك دوستىعىن قاستەرلەپ جانە جالعاستىرىپ، جۇڭگو - كامبودجا تاعدىرلاس ورتاق تۇلعاسىنا جاڭا داۋىرلىك ٴمان ۇستەپ، ٴوز ەلدەرىنىڭ دامۋىنا، حالىقتىڭ قۇت ـ ىرىسىنا قىزمەت وتەپ، توڭىرەكتىك تاعدىرلاس ورتاق تۇلعا قۇرۋعا، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە ٴتىپتى دە زور ۇلەس قوسۋى كەرەك. جۇڭگو جاق كامبودجانىڭ ورنىقتىلىقتى ساقتاپ، دامۋدى جەدەلدەتىپ، حالىق تۇرمىسىن جاقسارتىپ، ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن باتىل قولدايدى، جۇڭگو ۇلگىسىندەگى وسىزامانداندىرۋدىڭ كامبودجا قاتارلى توڭىرەكتەگى ەلدەرگە ٴتىپتى دە كوپ وراي اكەلەتىنىنە سەنەدى، جاڭا داۋىردەگى بارلىق جاعدايدا بىردەي جۇڭگو - كامبودجا تاعدىرلاس ورتاق تۇلعاسىن قۇرۋدا، ٴسوز جوق، ايبىندى تاراۋ جازاتىنىنا سەنەدى.
سيحاموني كامبودجا پاتشا ورداسى، كەڭەس پالاتاسى، ۇكىمەتى جانە جالپى حالىق اتىنان ٴتوراعا شي جينپيڭنىڭ ساپارلاي كەلگەنىن قىزۋ قارسى الدى. سيحاموني مىنالاردى ٴبىلدىردى: كامبودجا - جۇڭگو دوستىعىن ەكى ەلدىڭ اعا بۋىن باسشىلارى ٴوز قولدارىمەن ورناتقان جانە جەتىلدىرگەن، ەكى جاقتىڭ بىرگە قۇلشىنۋىندا ٴار سالاداعى سەلبەستىك كۇن سايىن جيىلەپ، تاعدىرلاس ورتاق تۇلعا قۇرىلىسى ۇزدىكسىز تەرەڭدەدى، اي سايىن العا باسىپ، جىل سايىن جەتىستىككە جەتتى دەۋگە بولادى. كامبودجا جاق ٴبىر جۇڭگو پرينسيبىن باتىل اتقارادى، ٴتوراعا شي جينپيڭ العا قويعان ٴۇش ۇلكەن الەمدىك باستامانى ايرىقشا القايدى، ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىنىڭ كامبودجاعا وراسان زور دامۋ ورايىن اكەلگەنىنە العىس ايتادى. ٴتوراعا شي جينپيڭنىڭ بۇل رەتكى ساپارى تاريحي سيپاتقا يە ساپار، ەكى ەلدىڭ قۇرىشتاي بەرىك دوستىعىن تەرەڭدەتىپ، ”الماستىڭ التى قىرى“ سەلبەستىك قۇرىلىمىن تولىقتاپ، كامبودجا - جۇڭگو قارىم ـ قاتىناسىنىڭ جاڭا دەڭگەيگە كوتەرىلۋىن ىلگەرىلەتەدى. كامبودجا جاق تا جۇڭگو جاقپەن شىعىس وڭتۇستىك ازيا ەلدەرى وداعى - جۇڭگو سەلبەستىگى، لانساڭجياڭ - مەكونگ سەلبەستىگى سياقتى كوپ جاقتى مەحانيزم اياسىنداعى سايكەسۋدى، سەلبەسۋدى كۇشەيتىپ، ٴوڭىردىڭ بەيبىتشىلىگىن، ورنىقتىلىعىن، گۇلدەنۋىن بىرگە جەبەۋدى قالايدى.
سيحاموني شي جينپيڭگە ”كامبودجا پاتشالىعىنىڭ ۇلت تاۋەلسىزدىگى ۇلكەن القا دارەجەلى وردەنىن“ بەردى.
سيحاموني مىنالاردى ٴبىلدىردى: ٴتوراعا شي جينپيڭنىڭ كامبودجاعا وزگەشە دوستىق سۇيىسپەنشىلىگى بار، كامبودجا - جۇڭگو قارىم ـ قاتىناسىنىڭ دامۋىنا ەرەن ۇلەس قوستى، كامبودجانىڭ ۇلى دوسى. ٴتوراعا شي جينپيڭنىڭ باسشىلىعىندا، جۇڭگونىڭ ٴتىپتى دە زور دامۋ جەتىستىكتەرىنە قول جەتكىزىپ، حالىقارالىق، وڭىرلىك ىستەردە اناعۇرلىم ماڭىزدى رول ساۋلەلەندىرەتىندىگىنە سەنەمىن.
شي جينپيڭ مىنالاردى ٴبىلدىردى: بۇل وردەن كامبودجانىڭ جۇڭگو - كامبودجا قارىم ـ قاتىناسىن دامىتۋعا ايرىقشا ٴمان بەرەتىندىگىن تولىق ايگىلەدى، كامبودجا حالقىنىڭ جۇڭگو حالقىنا دەگەن تەرەڭ دوستىق سۇيىسپەنشىلىگىن ارقالاعان. بۇل داڭق جەكە ماعان عانا ەمەس، جۇڭگو - كامبودجا دوستىعى ٴۇشىن تەر توگىپ ەڭبەك ەتكەن بارلىق دوس قايراتكەرلەرگە دە ٴتان.
سول كۇنى كەشتە سيحاموني شي جينپيڭگە ارناپ قارسى الۋ قوناعاسىسىن وتكىزدى.
ساي چي، ۋاڭ ي، ۋاڭ شياۋحۇڭ قاتارلىلار جوعارىداعى قيمىلعا قاتىناستى.
