مالايزياداعى مەملەكەتتىك ساپارىن ٴساتتى اياقتاتتى
شي جينپيڭ كامبودجادا مەملەكەتتىك ساپاردا بولۋ ٴۇشىن پنومپەنگە جەتتى
جەرگىلىكتى ۋاقىت 4 ـ ايدىڭ 17 ـ كۇنى تۇستەن بۇرىن مەملەكەت ٴتوراعاسى شي جينپيڭ كامبودجا پاتشاسى سيحامونيدىڭ ۇسىنىسىمەن كامبودجادا مەملەكەتتىك ساپاردا بولۋ ٴۇشىن ارناۋلى ۇشاقپەن پنومپەنگە جەتتى. پاتشا سيحاموني شياكاپىڭ حانزادا، الۇن حانىشا قاتارلى پاتشا اۋلەتىنىڭ مۇشەلەرىن، حالىق پارتياسىنىڭ ٴتوراعاسى، كەڭەس پالاتاسىنىڭ ٴتوراعاسى حۇڭسىندى، پارلامەنتتىڭ ٴبىرىنشى ورىنباسار ٴتوراعاسى چيانيەنى، سونداي ـ اق گوسوپا، بۋلاسوكۇن، حانچۇننالو، شاۋسوكا، حۇڭماني قاتارلى 5 ورىنباسار باس ٴۋازىردى باستاپ اۋەجايدا قىزۋ قارسى الدى. سۋرەتتە: شي جينپيڭ سيحامونيمەن ىقىلاسپەن قول الىسۋدا.
□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن
شينحۋا اگەنتتىگىنىڭ 4 ـ ايدىڭ 17 ـ كۇنى پنومپەننەن بەرگەن حابارى (تىلشىلەر ياڭ يجۇن، ليۋ لي ـ ۋي). جەرگىلىكتى ۋاقىت 4 ـ ايدىڭ 17 ـ كۇنى تۇستەن بۇرىن مەملەكەت ٴتوراعاسى شي جينپيڭ كامبودجا پاتشاسى سيحامونيدىڭ ۇسىنىسىمەن كامبودجادا مەملەكەتتىك ساپاردا بولۋ ٴۇشىن ارناۋلى ۇشاقپەن پنومپەنگە جەتتى.
شي جينپيڭ ارناۋلى ۇشاقپەن پنومپەن حالىقارالىق اۋەجايىنا جەتكەندە، پاتشا سيحاموني شياكاپىڭ حانزادا، الۇن حانىشا قاتارلى پاتشا اۋلەتىنىڭ مۇشەلەرىن، حالىق پارتياسىنىڭ ٴتوراعاسى، كەڭەس پالاتاسىنىڭ ٴتوراعاسى حۇڭسىندى، پارلامەنتتىڭ ٴبىرىنشى ورىنباسار ٴتوراعاسى چيانيەنى، سونداي ـ اق گوسوپا، بۋلاسوكۇن، حانچۇننالو، شاۋسوكا، حۇڭماني قاتارلى 5 ورىنباسار باس ٴۋازىردى باستاپ اۋەجايدا قىزۋ قارسى الدى. قۇرمەت قاراۋىلى قىزىل كىلەمنىڭ ەكى جاعىندا قاتار تۇزەدى. كامبودجا پاتشا اۋلەتىندەگى جىننا حانىشا شي جينپيڭگە جۇپار گۇلى ساقيناسىن ۇسىندى، قىزدار قىزىل كىلەمدى بويلاي گۇل جاپىراقشالارىن شاشتى.
سيحاموني اۋەجايدا شي جينپيڭگە ارناپ سالتاناتتى قارسى الۋ سالتىن وتكىزدى.
ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى. اسكەري وركەستر جۇڭگو - كامبودجا ەكى ەلدىڭ مەملەكەت ٴانىن ورىندادى. شي جينپيڭ سيحامونيدىڭ سەرىك بولۋىندا قۇرمەت قاراۋىلىن كوزدەن كەشىردى. ەكى ەلدىڭ مەملەكەت باسشىلارى ەكى جاقتان سەرىك بولىپ كەلگەندەرمەن جەكە ـ جەكە قول الىسىپ قۇرمەت ٴبىلدىردى.
نەشە جۇزدەگەن جەرگىلىكتى بۇقارا ەكى ەلدىڭ مەملەكەت تۋلارىن بۇلعاپ، قولدارىنا ”كامبودجا مەن جۇڭگونىڭ دوستىعى، ىنتىماعى، سەلبەستىگى جاساسىن!“ دەگەن سياقتى جازۋلار جازىلعان قىزىل ٴتۇستى كەرمە تۋلاردى ۇستاپ، شي جينپيڭنىڭ ساپارلاي كەلگەندىگىن قىزۋ قارسى الدى.
شي جينپيڭ جازباشا ٴسوز سويلەپ، كامبودجانىڭ ٴداستۇرلى جاڭا جىلى بايلانىسىمەن كامبودجا ۇكىمەتى مەن حالقىنا تاماشا جاڭا جىلدىق تىلەك ٴبىلدىردى.
شي جينپيڭ بىلاي دەپ اتاپ كورسەتتى: جۇڭگو مەن كامبودجا قارىم ـ قاتىناسىن ەكى ەلدىڭ اعا بۋىن باسشىلارى ٴوز قولدارىمەن ورناتقان، دەن قويا جەتىلدىرگەن، ول حالىقارالىق اۋمالى ـ توكپەلى وزگەرىستەردىڭ سىنىنان ٴوتىپ، باستان ـ اياق قۇرىشتاي بەرىك بولدى. ەكى ەل ەكى جاقتى تاعدىرلاس ورتاق تۇلعانى الدىمەن ورناتىپ، ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىن الدىمەن ورىستەتىپ، ٴوز ەلدەرىنىڭ ورنىقتىلىعىن قورعاۋ، دامۋدى، گۇلدەنۋدى جەبەۋ ىسىندە ٴبىرىن ـ ٴبىرى قولداپ، حالىقارالىق ادىلدىكتى، ادىلەتتىلىكتى قورعاۋ كۇرەسىندە ىنتىماقتاسا ىستەستىك جاساپ، جاڭاشا حالىقارالىق قارىم ـ قاتىناس قالىپتاستىرۋدا ۇلگى ورناتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە ۇلەس قوستى. مەن كامبودجا باسشىلارىمەن دوستىقتى بىرگە اڭگىمەلەپ، دامۋدى بىرگە قاراستىرىپ، جۇڭگو - كامبودجا ”الماستىڭ التى قىرى“ سەلبەستىك جۇلگەسىن ۇزدىكسىز تولىقتاپ، ستراتەگيالىق ىستەستىكتى تەرەڭدەتىپ، ەكى ەل حالقىنا ٴتىپتى دە كوپ قۇت ـ ىرىس اكەلىپ، ٴوڭىردىڭ، ٴتىپتى، دۇنيە ٴجۇزىنىڭ بەيبىتشىلىگىنە، ورنىقتىلىعىنا اناعۇرلىم كوپ وڭ ەنەرگيا ۇستەۋدى ٴۇمىت ەتەمىن.
ساي چي، ۋاڭ ي، ۋاڭ شياۋحۇڭ قاتارلى ساپارلاستارى سول ۇشاقپەن بىرگە باردى.
جۇڭگونىڭ كامبودجادا تۇراتىن ەلشىسى ۋاڭ ۋىنبين دە اۋەجايعا بارىپ قارسى الدى.
شي جينپيڭ اۆتوكولىكپەن اۋەجايدان ٴوزى تۇسكەن قوناقجايعا بارا جاتقان جولىندا جۇڭگو - كامبودجا ەكى ەلدىڭ مەملەكەت تۋلارى جەلبىرەپ تۇردى. 20 مىڭنان استام جەرگىلىكتى بۇقارانىڭ، سونداي ـ اق حۋاچياۋلاردىڭ، حۋارىنداردىڭ، جۇڭگو قارجىلاندىرعان كاسىپورىندار مەن سول جەردە وقىپ جاتقان وقۋشىلاردىڭ ۋاكىلدەرى جولدىڭ ەكى جاعىنا جينالىپ، جۇڭگو مەن كامبودجانىڭ مەملەكەت تۋلارىن بۇلعاپ، ەكى ەل باسشىلارىنىڭ سۋرەتتەرىن ۇستاپ، شي جينپيڭنىڭ ساپارلاي كەلگەندىگىن قىزۋ قارسى الدى.
شينحۋا اگەنتتىگىنىڭ 4 ـ ايدىڭ 17 ـ كۇنى كۋالا ـ لۋمپۋردان بەرگەن حابارى (ٴتىلشى مياۋ شياۋجۋان). 4 ـ ايدىڭ 17 ـ كۇنى تۇستەن بۇرىن مەملەكەت ٴتوراعاسى شي جينپيڭ مالايزياداعى مەملەكەتتىك ساپارىن اياقتاتتى.
كۋالا ـ لۋمپۋردان اتتاناردا مالايزيا زۇڭليى ٴانۋار، سىرتقى ىستەر مينيسترى مۇحاممەد، جولسەرىك مينيستر، قاتىناس مينيسترى لۋ جاۋفۋ قاتارلى جوعارى دارەجەلى ٴمانساپتىلار اۋەجايعا بارىپ اتتاندىردى. مالايزيا جاستارى ٴان ايتىپ، ٴبي بيلەپ، سول جەردەگى جۇڭگو قارجىلاندىرعان كاسىپورىندارداعى قىزمەتكەرلەر، سول جەردە وقىپ جاتقان وقۋشىلار جانە حۋاچياۋلار، حۋارىندار جولدىڭ ەكى جاعىندا جۇڭگو - مالايزيا ەكى ەلدىڭ مەملەكەت تۋىن بۇلعاپ، شي جينپيڭنىڭ مالايزياداعى ساپارىنىڭ تولىق تابىستى بولعاندىعىن قىزۋ قۇتتىقتادى.
