بيىل شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعى. 70 جىلدان، اسىرەسە، جاڭا داۋىردەن بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى شينجياڭ قىزمەتىن ستراتەگيالىق جانە جالپى جاعداي تۇرعىسىنان ٴبىر تۇتاس جوسپارلاپ، ٴبىر قىدىرۋ كەلەلى شەشىمدەر مەن ورنالاستىرۋلار جاساپ، شينجياڭ قىزمەتىندە تاريحي تابىسقا قول جەتكىزۋدى، تاريحي وزگەرىس تۋدىرۋدى ىلگەرىلەتتى. بۇگىننەن باستاپ انار بۇلت \ شينجياڭ گازەتى ”شۇعىلالى 70 جىل، جاڭا جورىقتا ەكپىندەي ىلگەرىلەيىك“ ارناۋلى ايدارىن اشىپ، شينجياڭداعى ٴار ۇلت حالقىنىڭ تاپسىرمانى ەستە بەرىك ساقتاپ، العىس ايتىپ ۇدەرە العا تارتىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن ىلگەرىلەتۋدەگى جالىندى حيكايالاردى جاندى بايانداپ، شينجياڭ قوعامىنىڭ ەسىك اشۋ سەنىمىن، ٴار ۇلتتىڭ ىنتىماقتاسا كۇرەس جۇرگىزۋىنىڭ جاڭا بەينەسىن، جاڭا كەلبەتىن جان ـ جاقتىلى ايگىلەيدى.
انار بۇلت \ شينجياڭ گازەتىنىڭ ٴتىلشىسى ٴرايدا
”اۋىل شارۋاشىلىعى — مەملەكەتتىڭ ٴتۇبىرلى ارقاۋى“. جەر — اۋىل شارۋاشىلىعىنىڭ ٴتۇبىرلى تياناعى، ونان دا ماڭىزدىسى، استىق حاۋىپسىزدىگىنىڭ جان تامىرى. شينجياڭ سىندى وسىناۋ ۇلان ـ بايتاق توپىراقتا جوعارى ولشەمدى ەگىنجاي قۇرىلىسى كەلەلى ٴۇمىت ارقالاپ وتىر، بۇل استىق ٴوندىرىسىنىڭ ۇلى جوسپارىنا ساياتىن ٴىس.
پارتيا 18 ـ قۇرىلتايىنان بەرى، شينجياڭ مەملەكەتتىڭ ۇندەۋىنە بەلسەنە ٴۇن قوسىپ، جوعارى ولشەمدى ەگىنجاي قۇرىلىسىن كۇش سالا ىلگەرىلەتىپ، قارجى ۇسىنىلىمىن ۇزدىكسىز ارتتىرىپ، سۋ يگىلىگى قۇرىلىسى ارقىلى سۋارۋ، اتىز ـ ارىق جولى سياقتى نەگىزدىك قۇرىلعىلاردى كەمەلدەندىرىپ، ەگىستىك جەردىڭ ساپاسىن جوعارىلاتۋعا كۇش سالىپ كەلەدى. سوڭعى جىلدارى شينجياڭ وسىعان وراي ”بەس ٴبىر تۇتاس“ باسقارۋ مەحانيزمىن ورناتىپ، بۇكىل شينجياڭ جوعارىدان تومەنگە دەيىن سايكەسە كۇش سالدى. ٴبىر قىدىرۋ شارالاردىڭ جەبەۋىندە، شينجياڭنىڭ ەگىنجايلارى ساپالىق سەكىرۋدى جۇزەگە اسىردى، بۇرىن بىتىراڭقى، ۇساق، تابيعاتقا سۇيەنىپ كۇنەلتەتىن، ٴونىم مولشەرى تومەن جەرلەر بۇگىنگى كۇندە شوعىرلى، تۇتاسقان، قۋاڭشىلىق پەن سەل اپاتىنا توتەپ بەرىپ، ٴونىم الۋعا كەپىلدىك ەتەتىن، جوعارى ٴونىمدى، ورنىقتى ٴونىم بەرەتىن قۇنارلى اتىزعا اينالىپ، ”جۇڭگونىڭ اس كەسەسىنە“ اناعۇرلىم مىعىم شينجياڭ كۇشىن قوستى.
2024 ـ جىلدىڭ سوڭىنا دەيىن شينجياڭدا جيىنى 59 ميلليون 890 مىڭ مۋ جوعارى ولشەمدى ەگىنجاي قۇرىلىپ، ماڭگىلىك نەگىزگى ەگىنجايدىڭ %72.8ىن، ەگىستىك جەر اۋدانىنىڭ %56.7ىن ۇستادى.
الاقانداي اتىز 10 مىڭ مۋلىق اتىزعا اينالدى
كوكتەمگى ەگىس كەزىندە ماناس اۋدانى باۋجياديان قالاشىعىنىڭ جوعارى ولشەمدى ەگىنجايلارىندا شوفەرسىز زەردەلى جۇگەرى ەگۋ ماشيناسى بەيدوۋ ورىن تۇراقتاندىرۋىندا تارتىپپەن جۇمىس جۇرگىزدى؛ شايار اۋدانى حايلوۋ قالاشىعىنىڭ ەگىس اتىزىندا ۇشقىش اپپارات ”ٴبىر كنوپكامەن ۇشىپ“، ماقتاشىلارعا وسىمدىك قورعاۋ جاعىنان قىزمەت وتەدى... كوكتەمگى ەگىس جۇمىسىنىڭ دۋماندى كورىنىستەرى شينجياڭنىڭ جوعارى ولشەمدى ەگىنجاي قۇرىلىسىنىڭ ونىمدىلىگىنىڭ جاندى بەينەسى.
جۋىردا، ماناس باۋجياديان قالاشىعىنداعى جوعارى ولشەمدى ەگىس اتىزىندا، بەيدوۋ جاساندى سەرىك جول نۇسقاۋ جۇيەسى ورناتىلعان شوفەرسىز زەردەلى ءبىر تۇلعالانعان جۇگەرى تۇقىمىن ءسىڭىرۋ ماشيناسى الدىن الا بەلگىلەنگەن لەنيا بويىنشا، ورنىقتى ءارى جوعارى ءونىمدى تۇردە تۇقىم ءسىڭىرۋ، تامشىلاتىپ سۋارۋ تاسپاسىن توسەۋ، جارعاق جابۋ، سونداي - اق توپىراقپەن كومۋ سياقتى جەلىلەس شارۋالاردى تىندىرۋدا. سۋرەتتى ماناس اۋداندىق توعىسپالى مەديا ورتالىعى قامداعان
كەزىندە شينجياڭنىڭ ەگىس اتىزدارى ”پارشا، بىتىراڭقى، ۇساق“ بولاتىن، كەيبىر جەرلەردە جەردىڭ سورتاڭدانۋى، قۇمايتتانۋى اۋىر بولىپ، ”الاقانداي اتىزدار“، ”جاماۋ اتىزدار“ كەڭ تارالعان.
2004 ـ جىلى ورتالىقتىڭ 1 ـ ٴنومىرلى حۇجاتىندا تۇڭعىش رەت ”جوعارى ولشەمدى نەگىزگى ەگىنجاي قۇرىپ، استىق جالپىلىق ٴوندىرىس قۋاتىن جوعارىلاتۋ“ ورتاعا قويىلدى. 2005 ـ جىلعى ورتالىقتىڭ 1 ـ ٴنومىرلى حۇجاتىندا ”جوعارى ولشەمدى ەگىنجاي“ ۇعىمى تۇڭعىش رەت قولدانىلدى؛ 2013 ـ جىلى مەملەكەتتىك كەڭەس «مەملەكەت بويىنشا جوعارى ولشەمدى ەگىنجاي قۇرىلىسىنىڭ جالپى تۇلعالىق جوباسىن» اتقارۋدى بەكىتتى؛ 2018 ـ جىلى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس «اۋىل ـ قىستاقتى گۇلدەندىرۋ ستراتەگيالىق جوباسىن (2022 — 2018 ـ جىل)» باسىپ تاراتىپ، جوعارى ولشەمدى ەگىنجاي قۇرىلىسىن اۋىل شارۋاشىلىعى جالپىلىق ٴوندىرىس قۋاتىن جوعارىلاتۋداعى كەلەلى ينجەنەريا ەتۋدى العا قويدى. وسى كەلەلى ستراتەگيالىق جوبالار شينجياڭنىڭ جوعارى ولشەمدى ەگىنجاي قۇرىلىسىنىڭ بەتالىسىن، نىساناسىن، جولىن، قادام ـ باسقىشىن جانە شارالارىن ايقىندادى.
پارتيا 18 ـ قۇرىلتايىنان بەرى، باس شۋجي شي جينپيڭ اتىز ـ ارىق سۋ يگىلىگى جانە جوعارى ولشەمدى ەگىنجاي قۇرىلىسىن كۇشەيتۋ جونىندە تالاي رەت ماڭىزدى ٴسوز سويلەپ، ماڭىزدى نۇسقاۋ بەردى. شينجياڭ بۇيرىقتى ەستي سالا ىسكە كىرىسىپ، ”استىق ساقتاۋدا جەرگە سۇيەنۋ، استىق ساقتاۋدا عىلىم ـ تەحنولوگياعا سۇيەنۋ“ ستراتەگياسىن ىشكەرىلەي تياناقتاندىرىپ، ”بەس ٴبىر تۇتاس“ (ٴبىر تۇتاس جوبالاپ ورنالاستىرۋ، ٴبىر تۇتاس قۇرىلىس ولشەمى بولۋ، ٴبىر تۇتاس ۇيىمداستىرىپ اتقارۋ، ٴبىر تۇتاس تەكسەرىپ وتكىزىپ الۋ، تەكسەرىپ باعالاۋ، ٴبىر تۇتاس كارتاعا ٴتۇسىرىپ قامباعا كىرگىزۋ) باسقارۋ مەحانيزمىن جەتەكشى ەتىپ، دامۋ جانە رەفورما، قازىنا، سۋ يگىلىگى سياقتى كوپتەگەن تاراۋدىڭ بايلىعىن بىرىكتىرىپ، جەردى بىرىكتىرۋدىڭ ٴبىر رەتكى توڭكەرىسىن قوزعادى.
”بۇرىن اتىزدار بىتىراڭقى بولاتىن، ەڭ ۇلكەنى 10 نەشە مۋدان اسپايتىن، سۋارۋدا بىرنەشە كيلومەتر جول جۇرۋگە تۋرا كەلەتىن، كوپ كۇش كەتەتىن“. كۇشار قالاسى چيمان قالاشىعى يۇڭكۋ ىنتىماق قىستاعىنىڭ تۇرعىنى ۋاڭ حاييان بىلاي دەدى: قازىر ەگىن ەككەندە اتىزعا بارىپ سۋارۋدىڭ قاجەتى جوق، تارازى بولمەسىندە جانە قول تەلەفوندا مەڭگەرۋگە بولادى، ٴبىر ادام 200 مۋدان استام جەردى جاقسى باپتاي الادى.
سوڭعى جىلدارى جوعارى ولشەمدى ەگىنجاي قۇرىلىسىنىڭ اتقارىلۋىنا بايلانىستى، قىستاق پارتيا ياچەيكاسىنىڭ جۇمىلدىرۋىندا ، يۇڭكۋ ىنتىماق قىستاعىنداعى 9000 مۋ جەر تۇگەلدەي قىستاقتاعى ەگىمشىلىك ٴىرى وتباسىلارىنىڭ باپتاۋىنا تاپسىرىلىپ، بىتىراندىلىقتان ٴبىر تۇلعاعا اينالعان شوعىرلى باسقارۋ قالىپتاستىرىلدى. 2023 ـ جىلى وسى قىستاقتىڭ ٴشيتتى ماقتاسىنىڭ مۋ باسىندىق ٴونىمى 300 كيلوگرامنان ارتىپ، 500 كيلوگرامعا تايادى، ٴبيدايدىڭ مۋ باسىندىق ٴونىمى بۇرىنعى 300 كيلوگرامنان ارتىپ، 700 كيلوگرامعا كوبەيدى، ٴار مۋ جەردى اينالىمعا سالۋ اقىسى ٴار مۋى نەشە ون يۋاننان 900 يۋانعا كوتەرىلدى.
شينجياڭدا بۇل ٴبىر مىسال عانا ەمەس. جوعارى ولشەمدى ەگىنجاي قۇرىلىسىنىڭ شينجياڭنىڭ كەڭ ـ بايتاق دالاسىندا ۇزدىكسىز ىلگەرىلەۋىنە ىلەسە، كوپتەگەن ”الاقانداي اتىز“ تاماشا بۇرىلىستى جۇزەگە اسىرىپ، 10 مىڭ مۋلىق قۇنارلى اتىزعا اينالدى. ولار شينجياڭنىڭ اۋىل شارۋاشىلىعىنىڭ ٴداستۇرلى كۇيدەن وسىزاماندانۋعا، بىتىراندىلىقتان شوعىرلانۋعا بەت العاندىعىنا كۋا بولدى.
ەڭبەككۇش اتىزى اقىل ـ پاراسات اتىزىنا اينالدى
لوپنۇر اۋدانىنىڭ ماقتا اتىزىندا لوپنۇر اۋدانى جۇڭۋاڭ ماقتا ەگىمشىلىگى كاسىپتىك سەلبەستىك كووپەراتيۆى تەحنولوگيا ٴبولىمىنىڭ باستىعى گو شىشۋە 3 ”تەمىر وگىزدىڭ“ قاتار ٴتىزىلىپ كەلە جاتقانىنا قاراپ تۇر، بەيدوۋ جول نۇسقاۋ ەكرانىنان شىققان ساندى مالىمەتتەر ونى ەرەكشە اسەرلەندىردى: ”بۇرىن 5 ادام قارا تەرگە ٴتۇسىپ 20 مۋ جەرگە ەگىن سالاتىن، قازىر ٴبىر تراكتورمەن كۇنىنە 120 مۋ جەرگە تۇقىم سىڭىرىلەدى، پارىق 2 سانتيمەتردەن اسپايدى“.
كەزىندە ەگىنشىلەر تاڭ سارىدە ەسەكپەن اتىزعا كەلىپ، قولىنداعى كەتپەنمەن قاتىپ قالعان جەردەن تەرەڭ ـ تايازدىعى ۇقسامايتىن شۇڭقىر قازىپ شىعاتىن. قازىر زەردەلى اۋىل شارۋاشىلىق ماشينالارى كەڭ كوسىلگەن ماقتا اتىزىنا ٴتۇزۋ سىزىق سىزىپ، سۋ مەن تىڭايتقىشتى دالمە ـ ٴدال بەرىپ، تامشىلاتىپ سۋارۋ ارقىلى قۇنارلى توپىراقتى نارلەندىرەدى، شينجياڭ ”تابيعاتقا سۇيەنىپ كۇنەلتۋدەن“ ”تابيعات زاڭدىلىعىن ٴبىلۋ مەن وعان سايكەسۋگە“ دەيىنگى تەرەڭ وزگەرىستى باستان كەشىرۋدە.
جۋىردان بەرى، ماكىت اۋدانى وسىمدىك قورعاۋ ۇشقىش اپپاراتىمەن ”دەرت - دەربەز، زياندى جاندىكتەردەن ساقتانۋ“ تەحنيكاسىنا ارقا سۇيەي وتىرىپ كوكتەمگى باپتاۋ جۇمىستارىن جوعارى ءونىمدى ورىستەتتى، دالمە - ءدال ءدارى سەبۋ، جوعارى ءونىمدى باپتاۋ ارقىلى جازعى استىق ءتۇسىمىنىڭ ورنىقتى بولىپ، كىرىستى ارتتىرۋىنا بەرىك نەگىز قالادى. سۋرەتتى ماكىت اۋداندىق توعىسپالى مەديا ورتالىعى تۇسىرگەن
سوڭعى جىلدارى شينجياڭ جوعارى ولشەمدى ەگىنجاي قۇرىلىسىن زور كۇشپەن ىلگەرىلەتتى، عىلىم ـ تەحنولوگيا اۋىل شارۋاشىلىعىن دامىتۋدىڭ قۋاتتى قوزعالتقىشىنا اينالدى.
قاشقار قالاسى اققاش اۋىلى لاڭگار قىستاعىنداعى ەگىنشى لي جيانسايدىڭ 3000 مۋ ماقتا اتىزىندا بەيدوۋ جول نۇسقاۋشى تۇقىم ٴسىڭىرۋ ماشيناسى، ۇشقىش اپپاراتپەن وسىمدىك قورعاۋ، اۆتوماتتى ماقتا تەرۋ ماشيناسى زەردەلى شوعىر بولىپ قۇرىلدى. ول بىلاي دەدى: ”بۇرىن كوكتەمگى ەگىستە بۇلتقا قاراپ اۋا رايىن بايقايتىنبىز، قازىر جاساندى سەرىكپەن ٴتۇپ ارالىعىن بەلگىلەيمىز؛ بۇرىن سۋارۋدا بۇكىلدەي تاجىريبەگە سۇيەنەتىنبىز، قازىر قول تەلەفونمەن توپىراقتىڭ دىمقىلدىعىن كورۋگە بولادى“.
قاراقاش اۋداندىق يۇيشي اشۋ رايونىندا دا وسىنداي وراسان زور وزگەرىستەر بولۋدا. بۇل ارادا توپىراقتىڭ سورتاڭدىعى جوعارى، سۋ بايلىعى تاپشى، اۋىل شارۋاشىلىق ٴوندىرىسى كوپتەگەن سىن ـ سايىسقا ٴدوپ كەلىپ وتىر. وسى ماسەلەنى شەشۋ ٴۇشىن، قاراقاش اۋدانى سۋ بايلىعىنان پايدالانۋدى عىلمي جوبالاپ، 9 ميلليون 750 مىڭ تەكشەمەتر قۇم تۇندىرىپ رەتتەۋ كولشىگىن جانە 53.6 كيلومەترلىك قىسىممەن سۋ شىعارۋ قۇبىرىن قارجى قوسىپ سالىپ، ”وسى زامانعى كارىز“ سۋ جەتكىزۋ جۇيەسىن قالىپتاستىرىپ، جەر ٴتۇزىلىسىنىڭ ٴتۇسۋ پارقىنان پايدالانىپ اعىن سۋمەن سۋارۋدى جۇزەگە اسىردى، جىلدىق سۋمەن قامداۋ مولشەرى 27 ميلليون 700 مىڭ تەكشەمەترگە جەتىپ، كوكتەمگى سۋارۋدى قامتاماسىز ەتۋ مولشەرى بۇرىنعى %60كە جەتپەۋدەن جوعارىلاپ، قازىرگى %95كە جەتتى.
قاراقاش اۋدانى زاۋا قالاشىعى لاڭگار قىستاعىنىڭ تۇرعىنى ٴماتتۇرسۇن تۇرسۇننياز قۋانا بىلاي دەدى: ”بۇرىن كوكتەمدە جەر سۋارعاندا ۇنەمى سۋ تاپشىلىعى تۋىلىپ، ەگىننىڭ ٴوسۋى جاقسى بولمايتىن، قازىر قۇم تۇندىرىپ رەتتەۋ كولشىگى جانە ٴوز قىسىمىمەن سۋ شىعارۋ ترۋبا جولى بار، سۋ اتىزعا تىكە جەتكىزىلەدى، ەندىگارى سۋارۋدان الاڭدامايتىن بولدىق“.
عىلىم ـ تەحنولوگيانىڭ توعىسۋى بۇرىن قىرۋار ادام كۇشىنە يەك سۇيەيتىن ەڭبەككۇش اتىزىن جوعارى ٴونىمدى، زەردەلىلەنگەن اقىل ـ پاراسات اتىزىنا اينالدىرىپ، اۋىل شارۋاشىلىق وندىرىسىنە اناعۇرلىم جەڭىلدىلىك، جوعارى ونىمدىلىك اكەلدى. جوعارى ولشەمدى ەگىنجاي قۇرىلىسىنا سۇيەنىپ شينجياڭنىڭ ەگىس اتىزدارىن سۋارۋعا پايدالانىلاتىن سۋ كوەففيتسەنتى 2018 ـ جىلعى0.55تەن 2024 ـ جىلى 0.582گە جوعارىلادى.
توقشىلىق اتىزىنان بايۋعا باستايتىن اتىزعا اينالدى
جاڭا جۇڭگو قۇرىلعان العاشقى مەزگىلدە شينجياڭنىڭ استىق جالپى ٴونىم مولشەرى ٴبىر ميلليون 100 مىڭ توننا بولىپ، بۇكىل ەلدەگى استىق جالپى ٴونىمىنىڭ %0.97ىن عانا ۇستايتىن. پارتيا 18 ـ قۇرىلتايىنان كەيىن، ”استىق ساقتاۋدا جەرگە سۇيەنۋ، استىق ساقتاۋدا عىلىم ـ تەحنولوگياعا سۇيەنۋ“ ستراتەگياسىنىڭ جاپپاي ىلگەرىلەۋىنە ىلەسە، شينجياڭنىڭ جوعارى ولشەمدى ەگىنجاي قۇرىلىسىنىڭ قارقىنى ۇدەي ٴتۇستى.
جوعارى ولشەمدى ەگىنجايلاردىڭ ونىمدىلىگى مول ٴونىمدى اتىزدارعا جازىلدى.
4 - ايدىڭ 10 - كۇنى، ءپايزاۋات اۋدانى قوشاۋات قالاشىعى سەمەن قىستاعىنداعى اشتى بۇرىش بازاسىندا ماشينالار گۇرىلدەپ، اشتى بۇرىشتى كوشىرىپ ەگۋ ماشيناسى الدىن الا جوسپارلانعان شونەك بويىنشا اشتى بۇرىشتى دالمە - ءدال، ءتارتىپتى كوشىرىپ ەگۋدە. سۋرەتتى ءپايزاۋات اۋداندىق توعىسپالى مەديا ورتالىعى قامداعان
2024 ـ جىلى شينجياڭنىڭ استىق ٴوندىرىس قۋاتى بارىنشا جوعارىلاپ، تۇتاس جىلدا استىقتىڭ بىرلىك ٴونىمى مۋ باسىنا 524.8 كيلوگرامعا جەتىپ، بۇكىل ەلدىڭ ورتاشا دەڭگەيىنەن 130 كيلوگرام جوعارى بولىپ، تاريحتا تۇڭعىش رەت بۇكىل ەل بويىنشا ٴبىرىنشى ورىندا تۇردى.
استىقتىڭ ورتاشا بىرلىك ٴونىمى 2023 ـ جىلداعىمەن سالىستىرعاندا 24.7 كيلوگرام ارتىپ، بىرلىك ٴونىمنىڭ ارتۋ مولشەرى بۇكىل ەلدىڭ ورتاشا دەڭگەيىنەن 5 ەسەگە جۋىق ارتتى.
2024 ـ جىلى شينجياڭدا تۇتاس جىلدا استىق ەگىلگەن جەر اۋدانى 44 ميلليون 400 مىڭ مۋعا جەتىپ، الدىڭعى جىلداعىمەن سالىستىرعاندا 2 ميلليون 28 مىڭ مۋ ارتىپ، جەر اۋدانىنىڭ ارتۋ مولشەرى بۇكىل ەل بويىنشا ٴبىرىنشى ورىندى يەلەدى؛ استىقتىڭ جالپى ٴونىمى 46 ميلليارد 600 ميلليون جىڭ بولىپ، الدىڭعى جىلداعىمەن سالىستىرعاندا 4 ميلليارد 220 ميلليون جىڭ ارتتى.
شينجياڭدا نەگىزىنەن ەگىلەتىن استىق داقىلى بولعان ٴبيداي مەن جۇگەرى بۇكىل ەل بويىنشا ٴبيداي، جۇگەرىنىڭ كەڭ كولەمدى بىرلىك ٴونىم رەكوردىن جاراتتى. ٴبيدايدىڭ 100 مۋ، 1000 مۋ، 10 مىڭ مۋ جەردەگى بىرلىك ٴونىمى جەكە ـ جەكە 795.8 كيلوگرام، 756.2 كيلوگرام، 720.39 كيلوگرام بولىپ، مەملەكەت بويىنشا كەڭ كولەمدە جوعارى ٴونىم الۋ رەكوردىن جاراتتى؛ جۇگەرىنىڭ 1000 مۋ، 10 مىڭ مۋ، ميلليون مۋ جەردەگى بىرلىك ٴونىمى جەكە ـ جەكە 1550.15 كيلوگرام، 1392.7 كيلوگرام، 1164.7 كيلوگرام بولىپ، مەملەكەت بويىنشا كەڭ كولەمدە جوعارى ٴونىم الۋ جاڭا رەكوردىن جاراتتى.
سان ـ سيفردىڭ جوعارىلاۋىنىڭ استارىندا ”توقشىلىق اتىزىنان “ ”بايۋعا باستايتىن اتىزعا“ قاراي سەكىرۋ جولى جاتىر.
ماكىت اۋدانى قۇمقۇسار اۋىلى تومەنقادىلىق قىستاعىندا قىستاق تۇرعىنى ابلاحات ىدىرىس كەزىندە ٴوز ٴۇيىنىڭ بىرنەشە مۋ جەرىنە ەگىن سالىپ تۇرمىس كەشىرگەن. ”بۇرىن ەگىن ەككەندە شارشاپ ـ شالدىعاتىنبىز، كىرىسىمىز دە قارنىمىزدى عانا تويعىزاتىن“، ـ دەدى ول وتكەندى ەسىنە الىپ. جەرگىلىكتى ورىن جوعارى ولشەمدى ەگىنجاي قۇرىلىسىن ىلگەرىلەتكەننەن كەيىن، قىستاقتىڭ ەگىستىك جەرى كوبەيىپ، استىق، ماقتا ٴونىم مولشەرى بارىنشا جوعارىلادى. ول جەردى سەلبەستىك كووپەراتيۆىنە وتكەرمەلەپ بەرىپ، ايەلىمەن بىرگە باسقارۋشىعا اينالدى، سونداي ـ اق ەگىس جۇمىسىنىڭ سايابىر كەزىنەن پايدالانىپ سىرتقا شىعىپ جۇمىس ىستەپ، وتباسىنىڭ جىلدىق كىرىسىن 70 مىڭ يۋاننان اسىردى.
”تويا تاماقتانۋدان“ ”جاقسى تاماقتانۋعا“ دەيىن، ”ٴونىم مولشەرىنە كەپىلدىك ەتۋدەن“ ”گۇلدەنۋدى جەبەۋگە“ دەيىن، جوعارى ولشەمدى ەگىنجاي قۇرىلىسى تۋدىرعان كوبەيتكىش اسەرى تيانشان الابىندا اۋىل ـ قىستاقتى گۇلدەندىرۋدىڭ ايبىندى تاراۋىن جازۋدا.
استىق الەمنىڭ تىنىشتىعىنا سايادى، جەر ونىڭ ٴتۇپ نەگىزىن ورنىقتىرادى، شينجياڭنىڭ ”بايۋعا باستاۋ اتىزىندا“ ”جۇڭگونىڭ اس كەسەسىن“ مىقتى ۇستاۋ سەنىمى مەن ٴۇمىتى ٴوسىپ ـ جەتىلۋدە.
