ٴبىرىنشى ماۋسىمدا شينجياڭنىڭ ادەتتەگى الەۋمەتتىك مەجە ەسەپ كىرىسى سايكەس مەزگىلدەگىدەن %10.8 ارتتى
ارتۋ مولشەرى بۇكىل ەل بويىنشا 2 ـ ورىندا تۇردى
انار بۇلت \ شينجياڭ گازەتىنىڭ ٴتىلشىسى ران حۋ 4 ـ ايدىڭ 24 ـ كۇنى ۇرىمجىدەن حابارلايدى. ٴبىرىنشى ماۋسىمدا شينجياڭنىڭ ادەتتەگى الەۋمەتتىك مەجە ەسەپ كىرىسى جالپى 68 ميلليارد 400 ميلليون يۋان بولىپ، سايكەس مەزگىلدەگىدەن %10.8 ارتىپ، ارتۋ مولشەرى بۇكىل ەل بويىنشا 2 ـ ورىندا تۇرىپ، العاشقى ماۋسىمدا جاقسى باستامانى جۇزەگە اسىردى. بۇل ٴتىلشىنىڭ اۆتونوميالى رايوندىق حالىق ۇكىمەتى اقپارات كەڭسەسى اشقان ”اناعۇرلىم بەلسەندى قازىنا ساياساتىن اتقارىپ، كۇش سالىپ ونىمدىلىكتى جوعارىلاتىپ، اۆتونوميالى رايوننىڭ ەكونوميكاسىنىڭ، قوعامىنىڭ جوعارى ساپالى دامۋىن ىلگەرىلەتۋ“ اقپار جاريالاۋ ماجىلىسىنەن العان حابارى.
ٴبىرىنشى ماۋسىمدا شينجياڭنىڭ سالىق كىرىسى جيىنى 33 ميلليارد 960 ميلليون يۋانعا جەتىپ، سايكەس مەزگىلدەگىدەن %0.1 ارتتى، ارتقان قۇن سالىعى، كاسىپورىننىڭ تابىس سالىعى قاتارلى باستى سالىق تۇرلەرىنىڭ ارتۋ مولشەرى جوعارى بولمادى، سالىق كىرىسىنىڭ ارتۋى نەگىزىنەن بايلىق سالىعى، قالا ـ قالاشىقتاردىڭ جەردەن پايدالانۋ سالىعى، قورا ـ جاي سالىعى، ماركا سالىعى سياقتى شاعىن سالىق تۇرلەرىنىڭ دەم بەرۋىنە سۇيەندى، جالپى ارتقان سالىق كىرىسى 670 ميلليون يۋان بولىپ، سالىق كىرىسىنىڭ 2 پايىز جوعارىلاۋىنا دەم بەردى. مۇندا قورا ـ جاي بازارىنىڭ جاقسارۋىنىڭ جانە ٴبىر رەتتىك فاكتوردىڭ ىقپالىنان قالا ـ قالاشىقتاردىڭ جەردەن پايدالانۋ سالىعى، قورا ـ جاي سالىعى، ماركا سالىعى جەكە ـ جەكە سايكەس مەزگىلدەگىدەن %85.1 ، %20.3 ، %12.6 ارتتى.
ادەتتەگى الەۋمەتتىك مەجە ەسەپ كىرىسىنىڭ ورنىقتى ارتۋدى جۇزەگە اسىرۋىمەن بىرگە، ٴبىرىنشى ماۋسىمدا شينجياڭنىڭ ادەتتەگى الەۋمەتتىك مەجە ەسەپ شىعىسى ۇزدىكسىز تەبىندى ارتۋدى ساقتاپ، جالپى 168 ميلليارد 120 ميلليون يۋانعا جەتىپ، سايكەس مەزگىلدەگىدەن %26.7 ارتىپ، ارتۋ مولشەرى بۇكىل ەل بويىنشا 1 ـ ورىندا تۇردى.
قازىنالىق شىعىسى حالىق تۇرمىسىن قامتاماسىزداندىرۋعا اناعۇرلىم ٴمان بەردى، ٴبىرىنشى ماۋسىمدا حالىق تۇرمىسى شىعىسى 128 ميلليارد 280 ميلليون يۋان بولىپ، سايكەس مەزگىلدەگىدەن 27 ميلليارد 70 ميلليون يۋان ارتىپ، ادەتتەگى الەۋمەتتىك مەجە ەسەپ شىعىسىنىڭ %76.3ىن يەلەدى، نەگىزىنەن، قارتتاردى كۇتىمدەۋ، وقۋ ـ اعارتۋ، قاتىناس، ەمدەۋ ـ دەنساۋلىق ساقتاۋ، قوعامدىق قامتاماسىزداندىرۋ جانە جۇمىستاندىرۋ سياقتى بۇقارانىڭ ٴتول مۇددەسىنە ساياتىن ٴتۇيىندى سالالارعا پايدالانىلدى.
