انار بۇلت \ شينجياڭ گازەتىنىڭ ٴتىلشىسى ٴپاريزات ابدۇل، ەرىكتى ٴتىلشى ٴدىليار ابليكىم 4 ـ ايدىڭ 24 ـ كۇنى لوپتان حابارلايدى. 4 ـ ايدىڭ 24 ـ كۇنى تۇستەن بۇرىن لوپ اۋداندىق قوعام حاۋىپسىزدىگى مەكەمەسى تاڭداۋلى ساقشى ىستەرى كومەكشىلەرىنىڭ دارەجەسىن ٴوسىرۋ جانە دارەجە بەرۋ سالتىن وتكىزدى، قۇدىققا ٴتۇسىپ ادام قۇتقارعان 2000 ـ جىلداردىڭ تۇلەگى ايەل كومەكشى ساقشى ٴبۇپاتام ابدۇقادىردىڭ دارەجەسى 7 ـ دارەجەدەن 5 ـ دارەجەگە اتتاتىپ ٴوسىرىلدى. سول كۇنى تۇستەن كەيىن ٴبۇپاتام لوپ اۋدانىنىڭ ادىلەت جولىندا ايانباۋ ۇلگىسى اتاعىنا يە بولدى.
داڭق الدىندا ٴبۇپاتام بىلاي دەدى: ”بۇقارا حاۋىپ ـ قاتەرگە جولىققاندا ٴاربىر حالىق ساقشىسى ەرلىكپەن اتويلاپ العا شىعادى، مەن تەك ىستەۋگە ٴتيىستى ٴىستى عانا ىستەدىم“.
بىرنەشە كۇننەن بەرى، بويىنىڭ بيىكتىگى 1.55 مەتر، دەنە سالماعى نەبارى 40 كيلوگرام كەلەتىن 2000 ـ جىلداردىڭ تۇلەگى ايەل كومەكشى ساقشىعا كوپتەگەن سايتتاس كوڭىل ٴبولىپ كەلدى.
ۋاقىتتى 4 ـ ايدىڭ 16 ـ كۇنى ساعات 10نان 45 مينۋت مولشەرىنە شەگەرەيىك، لوپ اۋدانى اڭگيا قالاشىعى لاڭگارارىق قىستاعىندا 2 جاسار ٴسابي قىز ابايسىزدا 40 مەتر تەرەڭدىكتەگى قۇدىققا ٴتۇسىپ كەتەدى. ٴبۇپاتام كەلگەننەن كەيىن قۇدىق اۋزىنىڭ ديامەترى نەبارى 40 سانتيمەتر كەلەتىن تاستاندى قۇدىققا جالعىز ٴوزى تۇسەدى. سۇركەيلى دە ىزعارلى قۇدىقتىڭ استىنان شىققان قىز بالانىڭ ٴالسىز جىلاعان داۋىسى ونىڭ باتىلدىقپەن قۇدىققا ٴتۇسۋىنىڭ قوزعاۋشى كۇشىنە اينالادى، ”بالانى، ٴسوز جوق قۇتقارىپ الىپ شىعۋىم كەرەك“ دەگەن سەنىم ٴبۇپاتامنىڭ ۇرەيدى جەڭىپ، سوڭىندا قۇتقارۋ مىندەتىن ٴساتتى ورىنداۋىنا تىرەك بولدى.
ورتالىق تەلەۆيزياسىنىڭ حابارى، حالىق گازەتىنىڭ بەينەجازبا ٴنومىرى، انار بۇلت كليەنتى سياقتى كوپتەگەن مەديا ٴبۇپاتامنىڭ تەرەڭ قۇدىقتان ادام قۇتقارعان بەينەجازباسىن حابارلاپ، بۇكىل ەلدىڭ جەر ـ جەرىندەگى سايتتاستاردىڭ القاۋى مەن لەبىز قالدىرۋىنا يە بولدى.
”قۇتقارۋ ـ كومەكتەسۋ جۇمىسى اياقتاعان سوڭ، تۇلا بويى باتپاققا مالشىنعان ٴبۇپاتام دىڭكەسى قۇرىپ جەرگە وتىرا كەتىپ سۋ ٴىشتى، بۇل كورىنىستى كورىپ، مەن ٴارى تەبىرەندىم، ٴارى اياۋشىلىق ٴبىلدىردىم“. حوتان ايماعىنىڭ ينتەرنەت دارىنى ”شياۋلين يىڭشياڭ“ بىلاي دەدى: ”قوعام وڭ ەنەرگياعا مۇقتاج، ٴبۇپاتام قىسىلتاياڭ ساتتە كەۋدە كەرىپ العا شىعىپ، قۇدىققا تۇسكەن بالانى ەرلىكپەن قۇتقارىپ، جاڭا ۇرپاق جاستاردىڭ باتىلدىقپەن جاۋاپكەرشىلىك ارقالايتىن جاۋاپكەرشىلىك سەزىمىن ايگىلەدى، ول ٴبىزدىڭ ۇيرەنۋ ۇلگىمىز“.
شينجياڭ شەكارادان كىرۋ ـ شىعۋ شەكارالىق قورعانىس تەكسەرۋ باس پۋنكتى ىلە شەكارا باسقارۋ تارماق اترەتى قورعاس شەكارا باسقارۋ ۇلكەن اترەتى كوكدالا شەكارا ساقشى بولىمشەسىنىڭ 4 ـ دارەجەلى اعا ساقشىسى لي حۇي بىلاي دەدى: ”بۇقارا قىسىلتاياڭ جاعدايدا قالعاندا ٴبۇپاتام كاسىپتىك ساپا جانە باتىل ارەكەت ارقىلى ادالدىقپەن حالىق ٴۇشىن ىستەۋ اۋەلگى ماقساتىن ٴتۇسىندىردى. حالىق ساقشىسى رەتىندە، ٴبىزدىڭ مىندەتىمىز مەملەكەت قاقپاسىنىڭ حاۋىپسىزدىگىن قورعايتىن ’قالقان‘ بولۋ عانا ەمەس، ونان دا ماڭىزدىسى، ادامگەرشىلىك مەيىرىن جەتكىزەتىن ’كوپىر‘ بولۋ. ٴبۇپاتامنىڭ ىزگى ىستەرى ٴبىزدى ٴار رەتكى زاڭ اتقارۋ بارىسىندا مەيىر جەتكىزىپ، حالىق ٴۇشىن قىزمەت ىستەۋ اۋەلگى ماقساتىن ماڭگى ساقتاۋعا جىگەرلەندىردى“.
سايتتاس ”شينجياڭ حۇيشۋ“ ٴبۇپاتامنىڭ دارەجە اتتاپ وسىرىلگەن حابارىن كورگەننەن كەيىن تەبىرەنە بىلاي دەدى: ”ٴبۇپاتامنىڭ دارەجە اتتاپ 7 ـ دارەجەدەن 5 ـ دارەجەگە ٴوسىرىلۋى قوعامنىڭ قۇن ولشەمىن بەينەلەدى — داڭقتى تەرەڭ قۇدىقتا ٴومىردى قۇتقارعان قولعا، ٴتۇن قاراڭعىلىعىندا تىنىشتىقتى قورعاۋ ٴۇشىن باسىلعان ادىمعا بەرۋىمىز ’حالىق قوعام حاۋىپسىزدىگى حالىق ٴۇشىن‘ بولۋ دەگەننىڭ ەڭ جاندى تۇسىندىرمەسى بولىپ تابىلادى“.
”مەن حالىق ساقشىسىمىن، بۇقارانىڭ حاۋىپسىزدىگىن قورعاۋ مەنىڭ بورىشىم“. ٴبۇپاتام بىلاي دەدى: ”وسى رەت دارەجە اتتاپ وسىرىلگەندىگىمدى ٴارى ادىلەت جولىندا ايانباۋ ۇلگىسى اتاعىن العاندىعىمدى ەرەكشە داڭق سەزىنەمىن. بۇل داڭق مەنى وزىمە اناعۇرلىم جوعارى ولشەممەن تالاپ قويىپ، ’حالىق قوعام حاۋىپسىزدىگى حالىق ٴۇشىن‘ دەيتىن ايبىندى ۋادەنى ٴىس جۇزىندىك ارەكەتىم ارقىلى امالياتتا ايگىلەۋگە شابىتتاندىرادى“.
