شىنجوۋ − 20 عارىشكەرلى الەم كەمەسىن ۇشىرۋ تولىق تابىستى بولدى
3 عارىشكەر جۇڭگونىڭ كەڭىستىك بەكەتىنە ٴساتتى كىردى
4 - ايدىڭ 24 - كۇنى شىنجوۋ − 20 عارىشكەرلى الەم كەمەسىن الىپ ۇشقان چاڭجىڭ − F2 شالعاي 20 تاسىمال راكەتاسى جيۋچۋان جاساندى سەرىك ۇشىرۋ ورتالىعىنان ۇشىرىلدى.
□ شينحۋا اگەنتتىگى تاراتقان (سۋرەتتى حان چيياڭ تۇسىرگەن)
شينحۋا اگەنتتىگىنىڭ 4 ـ ايدىڭ 24 ـ كۇنى جيۋچۋاننان بەرگەن حابارى (تىلشىلەر لي گولي، حۋاڭ يچىن). 4 ـ ايدىڭ 24 ـ كۇنى شىنجوۋ − 20 عارىشكەرلى الەم كەمەسىنىڭ ۇشىرىلۋى تولىق تابىستى بولدى، جۇڭگونىڭ عارىشقا ادام الىپ ۇشۋى ”دۇڭفاڭحۇڭ − 1“ ۇشىرىلۋىنىڭ 55 جىلدىعى ساتىندە شىنجوۋ الەم كەمەسى 20 ـ رەتكى عارىشتى بارلاۋ ساپارىن باستادى.
سول كۇنى ساعات 17دەن 17 مينۋت وتكەندە شىنجوۋ − 20 عارىشكەرلى الەم كەمەسىن الىپ ۇشقان چاڭجىڭ − 2F شالعاي / 20 تاسىمال راكەتاسى جيۋچۋان جاساندى سەرىك ۇشىرۋ ورتالىعىندا وتالدىرىلىپ ۇشىرىلىپ، شامامەن 10 مينۋتتان كەيىن شىنجوۋ − 20 عارىشكەرلى الەم كەمەسى راكەتادان ٴساتتى اجىراپ، مەجەدەگى وربيتاعا كىردى. قازىر عارىشكەرلەردىڭ جاعدايى جاقسى، ۇشىرۋ تولىق تابىستى بولدى.
جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ تانىستىرۋىنا قاراعاندا، الەم كەمەسى وربيتاعا ەنگەننەن كەيىن الدىن الا بەلگىلەنگەن ٴتارتىپ بويىنشا كەڭىستىك بەكەتى قۇراما تۇلعاسىمەن وزدىگىنەن شاپشاڭ توعىسىپ، ٴتۇيىلىسىپ، شىنجوۋ − 20داعى عارىشكەرلەر توبى شىنجوۋ − 19داعى عارىشكەرلەر توبىمەن وربيتادا كەزەك اۋىستىرادى. كەڭىستىك بەكەتىندە قىزمەت ىستەپ، تۇرمىس كەشىرگەن مەزگىلدە شىنجوۋ − 20داعى عارىشكەرلەر توبى كەڭىستىك تىرشىلىگى جانە ادام دەنەسىن زەرتتەۋ، ميكرو اۋىرلىق كۇش فيزيكا عىلىمى، كەڭىستىك جاڭا تەحنولوگياسى سياقتى سالالاردا كوپ ٴتۇرلى سىناقتاردى (تاجىريبە) جانە قولدانىمداردى ورىستەتىپ، كوپ رەت بولمەدەن شىعىپ، كەڭىستىك بەكەتىنىڭ قيىرشىقتاردان ساقتانۋ جابدىقتارىن ورناتۋ، بولمە سىرتىنىڭ كوتەرىمدىلىگى مەن بولمە سىرتىنداعى تۇعىر جابدىقتارىن ورناتۋ جانە جيناۋ سياقتى مىندەتتەردى ورىندايدى ەكەن.
بۇل رەتكى مىندەت — ەلىمىز عارىشقا ادام الىپ ۇشۋ ينجەنەرياسىنىڭ كەڭىستىك بەكەتىنىڭ ىسكە قوسىلۋ جانە دامىتۋ كەزەڭىنە وتكەننەن كەيىنگى 5 ـ رەتكى ادام الىپ ۇشۋ مىندەتى، ينجەنەريا جوسپارلانىپ اتقارىلعاننان بەرگى 35 ـ رەتكى ۇشىرۋ مىندەتى، قازىرگە دەيىن ەلىمىزدەن 26 عارىشكەر، 41 ادام (رەت) عارىشقا شىعىپ ۇشۋ مىندەتىن اتقاردى.
بۇل رەتكى مىندەت چاڭجىڭ جەلىلەس تاسىمال راكەتاسىنىڭ 571 ـ رەتكى ۇشۋى، شىنجوۋ الەم كەمەسىنىڭ 20 ـ رەتكى ۇشۋى.
شينحۋا اگەنتتىگىنىڭ 4 ـ ايدىڭ 25 ـ كۇنى بەيجيڭنەن بەرگەن حابارى (ٴتىلشى ساي لينلين). جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ حابارىنا نەگىزدەلگەندە، عارىشكەرلى الەم كەمەسى كەڭىستىك بەكەتى قۇراما تۇلعاسىمەن ٴساتتى ٴتۇيىلىسۋدى جۇزەگە اسىرعاننان كەيىن، شىنجوۋ − 20داعى عارىشكەرلەر توبى الەم كەمەسىنىڭ قايتۋ بولمەسىنەن وربيتا بولمەسىنە كىرگەن. 2025 ـ جىلى 4 ـ ايدىڭ 25 ـ كۇنى بەيجيڭ ۋاقىتى ساعات بىردەن 17 مينۋت وتكەندە وربيتادا مىندەت وتەپ جاتقان شىنجوۋ − 19داعى عارىشكەرلەر توبى ”ٴۇي ەسىگىن“ ٴساتتى اشىپ، شالعايدان كەلگەن شىنجوۋ − 20داعى عارىشكەرلەر توبىنىڭ جۇڭگو كەڭىستىك بەكەتىنە كىرۋىن قارسى العان، بۇل جۇڭگو عارىشقا ۇشۋ تاريحىنداعى 6 ـ رەتكى ”عارىشتا كەزدەسۋ“، سونداي ـ اق 2 بۇيرىق بەرۋشىنىڭ 3 جىلدان كەيىنگى ”تيانگۇڭدا“ قايتا باس قوسۋى. وسىدان سوڭ 2 عارىشكەرلەر توبى توپتىق سۋرەتكە ٴتۇسىپ، وزدەرىنەن الاڭداعان بۇكىل ەل حالقىنا اماندىقتارىن بىرگە حابارلادى.
كەيىن 2 عارىشكەرلەر توبى كەڭىستىك بەكەتىندە وربيتادا كەزەك اۋىستىرادى ەكەن. وسى مەزگىلدە 6 عارىشكەر كەڭىستىك بەكەتىندە شامامەن 5 كۇن ۋاقىت بىرگە قىزمەت ىستەپ، تۇرمىس كەشىرىپ، ٴتۇرلى بەلگىلەنگەن قىزمەتتەردى ورىندايدى.
