قاجىرلى ەڭبەگىم ارقىلى ماقتاشىلاردىڭ مول ٴونىم الۋ ارمانىنا تىرەك بولامىن

قاجىرلى ەڭبەگىم ارقىلى ماقتاشىلاردىڭ مول ٴونىم الۋ ارمانىنا تىرەك بولامىن

— مەملەكەتتىك ەڭبەك ەرى توحتى نياز تۋرالى

انار بۇلت \ شينجياڭ گازەتىنىڭ ٴتىلشىسى جاڭ لەي

　　4 ـ ايدىڭ 28 ـ كۇنى قۋانىشتى حابار تارالدى، شايار بوشىران زەردەلى اۋىل شارۋاشىلىق ماشينالارى شەكتى سەرىكتەستىگى (تومەندە قىسقارتىلىپ ”شايار بوشىران سەرىكتەستىگى“ دەلىنەدى) دۋمانعا بولەندى، وسى سەرىكتەستىكتىڭ ساتىلعاننان كەيىنگى ىستەرگە جاۋاپتى ٴبولىم قىزمەتكەرى توحتى نياز ”مەملەكەتتىك ەڭبەك ەرى“ اتاعىنا يە بولدى.

　　بەيجيڭدە وتكىزىلگەن ماداقتاۋ ـ سيلاۋ جينالىسىنا قاتىناسقاننان كەيىن، توحتى قىزمەت ورنىنا قايتىپ كەلدى. ”قازىر ماقتا ەگۋ مەزگىلى، ساتىلعاننان كەيىنگى قامتاماسىز ەتۋ قىزمەتىن ويداعىداي ىستەۋىمىز كەرەك“. تىلشىلىك بارىسىندا توحتىنىڭ ەڭ كوپ ايتقان ٴبىر اۋىز ٴسوزى — وسى داڭقتا سەرىكتەستىكتەگى ٴاربىر قىزمەتكەردىڭ ماڭداي تەرى مەن قاجىرلى ەڭبەگى جاتىر دەگەنى ەدى.

　　جايشىلىقتا توحتىنىڭ باستى قىزمەتى — ٴىرى تۇرپاتتى اۋىل شارۋاشىلىعى ماشينالارىن جوندەۋ، كۇتىمدەۋ، ول تەكسەرۋگە اكەلىنگەن اۋىل شارۋاشىلىعى ماشينالارىنىڭ موتورى، قوزعالىس جۇيەسى، سۇيىقتىق قىسىم جۇيەسى، تاسپا سياقتى شەشۋشى بولشەكتەرىن مۇقيات تەكسەرەدى. ”مىسالى، ماقتا جيناۋ ماشيناسىنىڭ تاسپاسىنىڭ جالعانعان جەرى بوساۋ جايتى ٴبىرشاما كوپ كەزىگەدى، ەگەر شوفەر نازار اۋدارماسا، تاسپا ٴۇزىلىپ، كەيىنگى تايلاۋ جۇمىسىنا ىقپال جاسايدى، كۇتىمدەگەن كەزدە وسى جاعدايلارعا ەرەكشە نازار اۋدارۋ كەرەك“. ول بىلاي دەدى: كۇندەلىكتى كۇتىمدەۋدى ويداعىداي ىستەگەندە عانا اۋىل شارۋاشىلىق ماشينالارىنىڭ ەگىس جۇمىسىنىڭ قاربالاس كەزىندە اقاۋسىز جۇمىس ىستەۋىنە شىنايى كەپىلدىك ەتۋگە بولادى.

　　شايار بوشىران سەرىكتەستىگىنە كىرۋدەن بۇرىن توحتى ٴىرى تۇرپاتتى اۋىل شارۋاشىلىق ماشينالارىن مۇلدە ىستەتىپ كورمەگەن بولاتىن، ٴبىراق ”ٴبىر ماشينانىڭ 10 مىڭ ادامنىڭ قىزمەت سالماعىن كوتەرىپ، ٴبىر كۇندە ـ اق نەشە 100 مۋ جەردەگى ماقتانى جيناي الاتىندىعى“ ونى ەرەكشە باۋرادى، وعان بۇل قىزمەتتىڭ جاۋاپكەرشىلىگىنىڭ اۋىر ەكەنىن تەرەڭ سەزىندىردى.

　　وسى قىزمەتتى ويداعىداي ىستەۋ ٴۇشىن، ول بار زەيىنىن سالىپ، جارتى جىلدان استام ۋاقىت جۇمساپ، ماقتا جيناۋ ماشيناسى سياقتى ٴىرى تۇرپاتتى اۋىل شارۋاشىلىق ماشينالارىنىڭ قاعيداسى، تۇتاس ماشينا قۇرىلىمى سياقتى بىلىمدەردى مۇقيات زەرتتەپ، بىرتىندەپ سەرىكتەستىكتىڭ تەحنولوگيالىق تىرەكتىسىنە اينالدى. وسى بارىستا ول جوندەۋ ەستەلىگىن جازۋ ادەتىن قالىپتاستىردى، ول: ”ٴاربىر ماشينا ٴوز بالام سياقتى، جوندەۋ ەستەلىگى ونىڭ ٴوسىپ ـ جەتىلۋ بارىسى سانالادى“، ـ دەدى. قازىرگە دەيىن ول جوندەۋ ەستەلىگىنەن ۇشەۋىن جازىپ تولتىردى.

　　ٴار جىلى ماقتا ەگۋ جانە جيناۋ مەزگىلى توحتى مەن ونىڭ قىزمەتتەستەرىنىڭ ەڭ قاربالاس كەزى. ول اتىز باسىن جوندەۋ زاۆودى دەپ ساناپ، ماقتاشىلار قاجەت ەتسە بولعانى دەرەۋ جۇمىس باسىنا جەتىپ بارىپ كىناراتتاردى ٴبىر جاقتى ەتەدى.

　　”ٴبىزدىڭ تاماق جەيتىن ۋاقىتىمىز دا، ورنىمىز دا تۇراقتى ەمەس، كەي كەزدەرى اتىز باسىندا، كەي كەزدەرى ماشينانىڭ جانىندا بولامىز“. ول بىلاي دەدى: ماقتاشىلاردىڭ تۇتاس جىلدىق ٴونىمىنىڭ اتىزدا ەكەنىن ويلاسام بولعانى وزىمە، ٴسوز جوق، امالىن تاۋىپ ولاردىڭ ماسەلەسىن شەشۋىم كەرەك دەيمىن.

　　ماشينالاسقان، زەردەلىلەنگەن اۋىل شارۋاشىلىق ماشينالارىنىڭ جالپىلاسۋىنا بايلانىستى سەرىكتەستىكتىڭ ساتۋ ىستەرى بويىنشا جوندەۋ، كۇتىمدەۋ قىزمەتكەرلەرىنىڭ سانى بىرتىندەپ قاجەتتى قاناعاتتاندىرا المايتىن بولدى. توحتى ٴبىر جاعىنان ۇستەمە جۇمىس ىستەپ، ەندى ٴبىر جاعىنان جاڭا ادامداردى باۋلۋ اۋىر مىندەتىن ارقالادى.

　　مۇحتار احمەت بۇرىن تاسىمال سەرىكتەستىگىنىڭ شوفەرى بولاتىن، جوندەۋ قىزمەتىنە مۇلدە ارالاسىپ كورمەگەن. توحتى ول ٴۇشىن ارناۋلى باۋلۋ جوسپارىن جاساپ، ٴوزى ەرتىپ ٴجۇرىپ ۇيرەتتى. مۇحتار تەبىرەنە بىلاي دەدى: ”ۇستازىمنىڭ تاجىريبەسى مول ٴارى مۇقيات، جاۋاپكەرشىلىگى بار، ونىڭ كومەگىندە كوپتەگەن تەحنيكا ۇيرەندىم“.

　　قىزمەت بارىسىندا توحتى باستان ـ اياق شوگەلدىكپەن ىستەپ، ۇلەس قوسۋعا پەيىلدى بولدى. جوندەۋگە ٴتيىستى ماشينالاردىڭ ماسەلەلەرىن سابىرلىلىقپەن، ەگجەي ـ تەگجەيلى تاۋىپ، تەز ارادا جوندەپ، ساپاسىنا شىنايى كەپىلدىك ەتتى؛ ول جاڭا تەحنولوگيانى قۇلشىنا ۇيرەنىپ، قاجىرلىلىقپەن ىزدەندى. كورنەكتى بەينەسىمەن ول ىلگەرىندى ـ كەيىندى شينجياڭدى اشۋ، گۇلدەندىرۋ مەدالى، مەملەكەتتىك 1 ـ مامىر ەڭبەك مەدالى سياقتىلاردى الىپ، قىزمەتتەستەرىنىڭ ۇيرەنۋ ۇلگىسىنە، ماقتاشىلاردىڭ بايۋ جولىنداعى ”ماشينا شيپاگەرىنە“ اينالدى.

　　”مەن ۇزدىكسىز كاسىپتى قادىرلەپ، ۇلەس قوسىپ، جاڭا داۋىردەگى ەڭبەك ەرى رۋحىن، ەڭبەك رۋحىن، ۇستا رۋحىن اسقاقتاتىپ، ٴوز قىزمەتىمدى مۇقيات جاقسى ىستەپ، قاجىرلى ەڭبەگىم ارقىلى ماقتاشىلاردىڭ مول ٴونىم الۋ ارمانىنا تىرەك بولامىن“، ـ دەدى توحتى.