شينحۋا اگەنتتىگىنىڭ 5 ـ ايدىڭ 11 ـ كۇنى جەنەۆادان بەرگەن حابارى (تىلشىلەر حان جيە، چىن جۇنشيا). جەرگىلىكتى ۋاقىت 5 ـ ايدىڭ 10 ـ كۇنىنەن 11 ـ كۇنىنە دەيىن، جۇڭگو مەن امەريكانىڭ ەكونوميكا ـ ساۋداسىنداعى جۇڭگو جاقتىڭ جەتەكشىسى، مەملەكەتتىك كەڭەستىڭ ورىنباسار زۇڭليى حى ليفىڭ امەريكا جاقتىڭ جەتەكشىسى، امەريكا قازىنا مينيسترى بەسسەنتپەن جانە ساۋدا ۋاكىلى گريرمەن شۆەتساريانىڭ جەنەۆا قالاسىندا جۇڭگو مەن امەريكانىڭ ەكونوميكا ـ ساۋدا جوعارى جىكتەگىلەر كەڭەسىن وتكىزدى. ەكى جاق 1 ـ ايدىڭ 17 ـ كۇنى جۇڭگو مەن امەريكا مەملەكەت باسشىلارىنىڭ تەلەفوندا سويلەسكەندەگى ماڭىزدى ورتاق تانىمىن تياناقتاندىرۋ توڭىرەگىندە بۇكپەسىز، ىشكەرىلەي، سىندارلى پىكىرلەسىپ، ٴبىر قىدىرۋ ماڭىزدى ورتاق تانىمعا كەلدى، كەڭەس ماندىك ىلگەرىلەۋشىلىككە قول جەتكىزدى.
حى ليفىڭ مىنالاردى ٴبىلدىردى: جۇڭگو مەن امەريكانىڭ كەڭ كولەمدى ورتاق مۇددەسى جانە كەڭ سەلبەستىك ٴورىسى بار، ەكى ەلدىڭ ەكونوميكا ـ ساۋدا قارىم ـ قاتىناسىنىڭ ٴمانى _ ٴوزارا پايدا جەتكىزىپ تەڭ يگىلىككە كەنەلۋ. دامۋ ساتىسى، ەكونوميكالىق ٴتۇزىمى ۇقسامايتىن ەكى ٴىرى ەل رەتىندە، جۇڭگو مەن امەريكا ەكى جاقتىڭ ەكونوميكا ـ ساۋدا سەلبەستىگىندە الاۋىزدىق پەن قاجالىستىڭ جارىققا شىعۋى قالىپتى، ماڭىزدىسى، ەكى ەلدىڭ مەملەكەت باسشىلارىنىڭ ماڭىزدى ورتاق تانىمىن جەتەكشى ەتىپ، ٴوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىككە كەنەلۋ پرينسيبى نەگىزىندە تەڭ تۇرعىدا سويلەسۋ، كەڭەسۋ ارقىلى ماسەلەلەردى ۇيلەسىمدى شەشۋدىڭ ٴادىسىن تابۋ كەرەك. ساۋدا شايقاسىندا جەڭىمپاز بولمايدى، جۇڭگو جاق ساۋدا شايقاسىن جۇرگىزۋدى قالامايدى، ايتسەدە شايقاسۋدان قورىقپايدى. ەگەر امەريكا جاق قاسارىسىپ جۇڭگو جاقتىڭ ۇقىق ـ مۇددەسىنە قول سۇقسا، جۇڭگو جاق باتىل قارسى تۇرىپ، سوڭىنا دەيىن شايقاسادى. جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنىڭ اقاۋسىز، ورنىقتى، باياندى دامۋىن قورعاۋ ەكى ەلدىڭ جانە ەكى ەل حالقىنىڭ ٴتۇبىرلى مۇددەسىنە ۇيلەسەدى، سونداي ـ اق دۇنيە ٴجۇزى ەكونوميكاسىنىڭ ارتۋىنا دا ٴتيىمدى. ەكى جاق سەلبەستىك كومەسكى كۇشىن ىشكەرىلەي اشىپ، سەلبەستىك ٴتىزىمىن كەڭەيتىپ، سەلبەستىك بالكۇلشەسىن زورايتىپ، جۇڭگو مەن امەريكانىڭ ەكونوميكا ـ ساۋدا قارىم ـ قاتىناسىنىڭ ۇزدىكسىز تىڭ دامۋعا قول جەتكىزۋىن ىلگەرىلەتىپ، دۇنيە ٴجۇزى ەكونوميكاسىنا اناعۇرلىم كوپ ايقىندىق جانە ورنىقتىلىق ۇستەۋگە ٴتيىس.
جۇڭگو مەن امەريكا ەكى جاق ەكونوميكا ـ ساۋدا كەڭەسى مەحانيزمىن ورناتىپ، ەكى جاقتىڭ ەكونوميكا ـ ساۋدا سالاسىنداعى وزدەرىنىڭ ٴجىتى قاداعالاپ وتىرعان ماسەلەلەرى جونىندە پىكىرلەسۋدى ساقتاۋعا ٴبىر اۋىزدان قوسىلدى.
