شينحۋا اگەنتتىگىنىڭ 5 ـ ايدىڭ 12 ـ كۇنى بەيجيڭنەن بەرگەن حابارى. مەملەكەتتىك كەڭەستىڭ اقپارات كەڭسەسى 5 ـ ايدىڭ 12 ـ كۇنى «جاڭا داۋىردەگى جۇڭگونىڭ مەملەكەت حاۋىپسىزدىگى» اق تىستى كىتابىن جاريالادى، مۇنداعى ماقسات _ جاڭا داۋىردەگى جۇڭگونىڭ مەملەكەت حاۋىپسىزدىگى قىزمەتىنىڭ جاڭالىق اشۋ ۇستانىمىن، جاندى امالياتىن جانە قۇرىلىس جەتىستىكتەرىن جان ـ جاقتى ٴتۇسىندىرىپ، حالىقارالىق قوعامنىڭ جۇڭگونىڭ مەملەكەت حاۋىپسىزدىگى جونىندەگى تانىمى مەن تۇسىنىگىن ارتتىرۋ.
اق تىستى كىتاپ العى سوزدەن، سوڭعى سوزدەن سىرت 6 بولىككە بولىنگەن، بۇلار مىنالار: جۇڭگو وزگەرىس پەن بىلىقپالىق قاباتتاسقان دۇنيە جۇزىنە ايقىندىق جانە ورنىقتىلىق ۇستەدى؛ جالپى تۇلعالىق مەملەكەت حاۋىپسىزدىگى كوزقاراسى جاڭا داۋىردەگى مەملەكەت حاۋىپسىزدىگىنە باعدار كورسەتتى؛ جۇڭگو ۇلگىسىندەگى وسىزامانداندىرۋدىڭ ورنىقتى قاداممەن الىسقا جەتۋىنە بەرىك تىرەك ازىرلەۋ؛ دامۋ بارىسىندا حاۋىپسىزدىكتى بەكەمدەۋ، حاۋىپسىزدىك بارىسىندا دامۋدى كوزدەۋ؛ الەمدىك حاۋىپسىزدىك باستاماسىن امالياتتا ايگىلەپ، حالىقارالىق ورتاق حاۋىپسىزدىكتى ىلگەرىلەتۋ؛ رەفورمانى تەرەڭدەتۋ بارىسىندا مەملەكەت حاۋىپسىزدىگى جۇيەسى مەن قابىلەتىن وسىزامانداندىرۋدى ىلگەرىلەتۋ.
اق تىستى كىتاپتا مىنالار اتاپ كورسەتىلدى: جۇڭگو جۇڭحۋا ۇلتىنىڭ ۇلى گۇلدەنۋى ستراتەگيالىق جالپى جاعدايى مەن دۇنيە جۇزىندە ٴجۇز جىلدا بولماعان زور وزگەرىستى ٴبىر تۇتاس جوسپارلاپ، مەملەكەتتىڭ حاۋىپسىزدىك جاعدايى جالپى جاقتان ورنىقتىلىقتى ساقتاپ، ورنىقتىلىق بارىسىندا ىلگەرىلەپ، ازيا ـ تىنىق مۇحيت وڭىرىندەگى ەلدەرمەن بىرگە ٴوڭىردىڭ بەيبىتشىلىگى مەن دامۋىن قورعاپ، اۋمالى ـ توكپەلى دۇنيە جۇزىنە سەنىمدى ورنىقتىلىق ۇستەدى.
اق تىستى كىتاپتا مىنالار تانىستىرىلدى: جالپى تۇلعالىق مەملەكەت حاۋىپسىزدىگى كوزقاراسى _ جاڭا جۇڭگو قۇرىلعاننان بەرگى تۇڭعىش رەت مەملەكەت حاۋىپسىزدىگى قىزمەتىنىڭ جەتەكشى يدەياسى بولىپ تۇراقتاندىرىلعان كەلەلى ستراتەگيالىق يدەيا، شي جينپيڭ جاڭا ٴداۋىر جۇڭگوشا سوتسياليزم يدەياسىنىڭ ماڭىزدى قۇرامداس بولىگى، زامانىمىزداعى جۇڭگونىڭ دۇنيە جۇزىنە قوسقان ماڭىزدى يدەيالىق، نازاريالىق ۇلەسى. جاڭا داۋىردەگى جۇڭگونىڭ مەملەكەت حاۋىپسىزدىگى جۇڭگوشا مەملەكەت حاۋىپسىزدىگى جولىنا تاباندى بولادى، ول _ جالپى تۇلعالىق، جۇيەلى، سالىستىرمالى ۇلكەن حاۋىپسىزدىك، حالىقتىڭ حاۋىپسىزدىگىن باستى ماقسات، ساياسي حاۋىپسىزدىكتى ٴتۇبىرلى نەگىز، مەملەكەت مۇددەسىن ولشەم ەتكەن حاۋىپسىزدىك، جوعارى ساپالى دامۋعا قىزمەت وتەيتىن جانە ونى جەبەيتىن حاۋىپسىزدىك، ەكونوميكالىق، قوعامدىق دامۋعا نەگىزدەلىپ يكەمدى رەتتەلەتىن حاۋىپسىزدىك، جوعارى دەڭگەيدەگى ەسىك اشۋدى ونان ارى كەڭەيتۋگە تىرەك بولاتىن حاۋىپسىزدىك، زاڭمەن باسقارۋ ارناسىندا جۇيەلى اينالىم جاسايتىن حاۋىپسىزدىك.
اق تىستى كىتاپتا مىنالار باسا دارىپتەلدى: جۇڭگونىڭ مەملەكەت حاۋىپسىزدىگى پارتيا مەن حالىق جۇكتەگەن كەلەلى جاۋاپكەرشىلىكتى باتىل اتقارىپ، جۇڭگو كوممۋنيستىك پارتياسىنىڭ بيلىك جۇرگىزۋ ورنى مەن سوتسياليستىك ٴتۇزىمدى قورعاپ، حالىق بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن ارتتىرىپ، جوعارى ساپالى دامۋدى قامتاماسىز ەتىپ، مەملەكەتتىڭ تەرريتوريا تۇتاستىعى مەن تەڭىز ـ مۇحيت ۇقىق ـ مۇددەسىن قورعاپ، جاڭادان گۇلدەنگەن سالالاردىڭ حاۋىپسىز، سەنىمدى بولۋىنا شىنايى كەپىلدىك ەتىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ٴۇشىن حاۋىپسىزدىك قالتقىسىن بەكەمدەيدى. جۇڭگو دامۋ مەن حاۋىپسىزدىكتى ٴبىر تۇتاس جوسپارلاۋعا ٴمان بەرىپ، جوعارى ساپالى دامۋ مەن جوعارى دەڭگەيلى حاۋىپسىزدىكتىڭ ۇتىمدى ىقپالداستىعىن قۇلشىنا جۇزەگە اسىرىپ، ەسىك اشۋ مەن حاۋىپسىزدىكتىڭ ٴبىرىن ـ ٴبىرى جەبەۋىن، سايكەستى جوعارىلاۋىن ىلگەرىلەتەدى. جۇڭگونىڭ مەملەكەت حاۋىپسىزدىگى رەفورما جاساۋدى، جاڭالىق اشۋدى قوزعاۋشى كۇش، جۇيەلىلەندىرۋ مەن مەحانيزمدەندىرۋدى نەگىزگى جەلى ەتۋگە تاباندى بولىپ، بىرلەسىپ ارەكەتتەنەتىن، جوعارى ٴونىمدى مەملەكەت حاۋىپسىزدىگى جۇيەسىن اقاۋسىزداندىرىپ، ناقتى شايقاستا قولدانىلاتىن مەملەكەت حاۋىپسىزدىگى قابىلەتىن سومدايدى.
اق تىستى كىتاپتا مىنالار اتاپ كورسەتىلدى: الەمدىك حاۋىپسىزدىك باستاماسى _ ادامزاتتىڭ تاعدىرلاس ورتاق تۇلعاسىنىڭ ”حاۋىپسىزدىك تاراۋى“ ٴارى جالپى تۇلعالىق مەملەكەت حاۋىپسىزدىگى كوزقاراسىنىڭ ”دۇنيە تاراۋى“. جۇڭگو ٴوز حاۋىپسىزدىگى مەن ورتاق حاۋىپسىزدىكتى ٴبىر تۇتاس جوسپارلاپ، الەمدىك حاۋىپسىزدىكتى باسقارۋدى كۇشەيتۋدى دارىپتەپ، بىرگە اقىلداساتىن، بىرگە قۇراتىن، بىرگە يگىلىكتەنەتىن الەمدىك باسقارۋ كوزقاراسىن امالياتتا ايگىلەپ، ناعىز كوپ جاقتىلىققا تاباندى بولىپ، الەمدىك حاۋىپسىزدىكتى باسقارۋ جۇيەسىنىڭ اناعۇرلىم ادىلەتتى، ۇيلەسىمدى بەتالىسقا قاراي وزگەرۋىن ىلگەرىلەتەدى.
