شينحۋا اگەنتتىگىنىڭ 5 ـ ايدىڭ 13 ـ كۇنى بەيجيڭنەن بەرگەن حابارى. مەملەكەتتىك كەڭەس اقپارات كەڭسەسى بۇگىن جۇڭگو حالقىنىڭ جاپون شاپقىنشىلارىنا قارسى سوعىسى جانە دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن اتاپ ٴوتۋ قيمىلىنىڭ بەلگىسىن اشىق جاريالادى.
بەلگى ۇلى قورعان، ٴزايتۇن بۇتاعى، شۇعىلا، ”80“ سيفرى، ”1945 _ 2025“ دەگەن ۋاقىت سياقتىلاردان قۇرالعان. ۇلى قورعان بۇكىل ۇلتتىڭ جۇدىرىقتاي جۇمىلىپ جاپون شاپقىنشىلارىنا قارسى ەرلىكپەن سوعىس جۇرگىزگەندىگىنىڭ سيمۆولى بولىپ، وتانشىلدىقتى وزەك ەتكەن ۇلى ۇلت رۋحىنىڭ جاپون شاپقىنشىلارىنا قارسى سوعىستىڭ جەڭىسكە جەتۋىندەگى شەشۋشى فاكتور ەكەندىگىن بەينەلەيدى. ٴزايتۇن بۇتاعى جۇڭگو حالقىنىڭ جاپون شاپقىنشىلارىنا قارسى اسا ماشاقاتتى سوعىس جۇرگىزىپ، جەڭىسپەن بەيبىتشىلىككە قول جەتكىزگەندىگىنىڭ سيمۆولى بولىپ، جۇڭگو حالقىنىڭ ٴار ەل حالقىمەن ىنتىماقتاسىپ بەيبىتشىلىكتى قاستەرلەپ، بەيبىتشىلىكتى قورعاعاندىعىن بىلدىرەدى. شۇعىلامەن قورشالىپ جاسالعان جەڭىس قاقپاسى جۇڭگو حالقىنىڭ جاپون شاپقىنشىلارىنا قارسى سوعىسىنىڭ جانە دۇنيە جۇزىلىك فاشيزمگە قارسى سوعىسىنىڭ جەڭىسى ادىلەتتىلىك سۇرقيالىقتى جەڭگەن، جارىق قاراڭعىلىقتى جەڭگەن، العا باسۋ كەرتارتپالىقتى جەڭگەن ۇلى جەڭىس ەكەندىگىنىڭ سيمۆولى بولىپ، جۇڭگو كوممۋنيستىك پارتياسىنىڭ پارمەندى باسشىلىعىندا، جۇڭحۋا ۇلتىنىڭ ۇلى گۇلدەنۋدى جۇزەگە اسىرۋ بولاشاعىنىڭ شەكسىز نۇرلى ەكەندىگىن اڭعارتادى.
بەلگى جەر ـ جەردىڭ، تاراۋلاردىڭ جۇڭگو حالقىنىڭ جاپون شاپقىنشىلارىنا قارسى سوعىسى جانە دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن اتاپ ٴوتۋ قيمىلىنىڭ ورىندارىن ورنالاستىرۋىنا، بۇقارالىق نەگىزگى تاقىرىپتىق ۇگىت تاربيە قيمىلدارىنا جانە قاتىستى سىرتقى ىستەر قيمىل بۇيىمدارىن جاساۋىنا پايدالانىلادى.
