5 ـ ايدىڭ 14 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگو - لاتىن امەريكاسى جانە كارايب ەلدەرى ورتاق تۇلعاسى تالقى مىنبەرى 4 ـ كەزەكتى مينيستر دارەجەلىلەر ماجىلىسىنە قاتىناسۋ ٴۇشىن جۇڭگوعا كەلگەن كولۋمبيا زۇڭتۇڭى پەترومەن كەزدەستى.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 5 ـ ايدىڭ 14 ـ كۇنى بەيجيڭنەن بەرگەن حابارى (ٴتىلشى فىڭ شينران). 5 ـ ايدىڭ 14 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگو - لاتىن امەريكاسى جانە كارايب ەلدەرى ورتاق تۇلعاسى تالقى مىنبەرى 4 ـ كەزەكتى مينيستر دارەجەلىلەر ماجىلىسىنە قاتىناسۋ ٴۇشىن جۇڭگوعا كەلگەن كولۋمبيا زۇڭتۇڭى پەترومەن كەزدەستى.
شي جينپيڭ بىلاي دەپ اتاپ كورسەتتى: كولۋمبيا - لاتىن امەريكاسىنداعى ماڭىزدى مەملەكەت، جۇڭگو جاق ەكى ەل قارىم ـ قاتىناسىن دامىتۋعا ەجەلدەن ستراتەگيالىق بيىكتەن جانە ۇزاق بولاشاقتىق تۇرعىدان مامىلە جاساپ كەلەدى. بيىل — جۇڭگو مەن كولۋمبيانىڭ ديپلوماتيالىق قارىم ـ قاتىناس ورناتقاندىعىنىڭ 45 جىلدىعى. جاڭا تاريحي باستامادا جۇڭگو جاق كولۋمبيا جاقپەن بىرگە قۇلشىنىپ، ەكى ەلدىڭ ستراتەگيالىق سەرىكتەستىك قارىم ـ قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى. ەكى جاق ساياسي ٴوزارا سەنىمدىلىكتى بەكەمدەپ، ستراتەگيالىق بايلانىستى كۇشەيتىپ، ەكى جاقتى قارىم ـ قاتىناستىڭ دامۋ بەتالىسىن مىقتاپ يگەرۋى كەرەك. كولۋمبيانىڭ ”ٴبىر بەلدەۋ، ٴبىر جولدى“ جوعارى ساپامەن بىرگە قۇرۋ ۇلكەن شاڭىراعىنا رەسمي قوسىلۋىن وراي ەتىپ، ەكى ەل سەلبەستىگىنىڭ ساپاسىنىڭ جوعارىلاپ، دارەجەسىنىڭ ٴوسۋىن ىلگەرىلەتۋ كەرەك. جۇڭگو جاق كولۋمبيانىڭ اناعۇرلىم كوپ ساپالى ونىمدەرىن يمپورت ەتىپ، جۇڭگو كاسىپورىندارىنىڭ كولۋمبياعا بارىپ قارجى قوسىپ شارۋاشىلىقتى گۇلدەندىرۋىنە، نەگىزدىك قۇرىلعى قۇرىلىسىنا ات سالىسۋىنا قولداۋ كورسەتۋدى قالايدى. ەكى جاق جەل ەنەرگياسى، جاڭا ەنەرگيالى اۆتوكولىك، سيفرلى ەكونوميكا، جاساندى زەردە سياقتى جاڭادان گۇلدەنگەن سالالارداعى سەلبەستىكتى ونان ارى كەڭەيتىپ، جاسىل، تومەن كومىر قىشقىل گازدى بولۋعا تيپ جاڭالاۋدى بىرگە جۇزەگە اسىرسا بولادى. ديپلوماتيالىق قارىم ـ قاتىناس ورناتقاندىقتىڭ 45 جىلدىعىن قۇتتىقتاۋ قيمىلدارىن ويداعىداي وتكىزىپ، وقۋ ـ اعارتۋ، مادەنيەت ـ ساياحات سياقتى سالالارداعى سەلبەستىكتى كۇشەيتىپ، گۋمانيتارلىق اۋىس ـ كۇيىستى جيىلەتىپ، ەكى ەل دوستىعىنىڭ حالىق رايى نەگىزىن بەكەمدەۋ كەرەك.
شي جينپيڭ بىلاي دەپ باسا دارىپتەدى: جۇڭگو - لاتىن امەريكاسى سەلبەستىگى — تۇستىك ەلدەر سەلبەستىگىنىڭ ماڭىزدى قۇرامداس بولىگى، دۇنيە ٴجۇزىنىڭ دامۋ ۇلكەن اۋقىمىنا جانە تاريح اعىمىنا ۇيلەسەدى، جۇڭگو جانە لاتىن امەريكاسى ەلدەرىنىڭ ورتاق مۇددەسىنە ۇيلەسەدى. جۇڭگو - لاتىن امەريكاسى جانە كارايب ەلدەرى ورتاق تۇلعاسى تالقى مىنبەرى 4 ـ كەزەكتى مينيستر دارەجەلىلەر ٴماجىلىسىنىڭ تابىستى وتكىزىلۋى دۇنيە جۇزىنە دامۋدى، گۇلدەنۋدى بىرگە جوسپارلاۋ بەلسەندى سيگنالىن تاراتتى. كولۋمبيا لاتىن امەريكاسى جانە كارايب ەلدەرى ورتاق تۇلعاسىنىڭ كەزەكتى ٴتوراعا ەلى رەتىندە، ٴماجىلىستىڭ ٴساتتى وتكىزىلۋىنە ماڭىزدى ۇلەس قوستى. جۇڭگو جاق كولۋمبيانى قامتىعان لاتىن امەريكاسىنداعى ەلدەرمەن بىرگە جۇڭگو - لاتىن امەريكاسى جانە كارايب ەلدەرى تاعدىرلاس ورتاق تۇلعاسى قۇرىلىسىنىڭ ۇزدىكسىز تەرەڭدەۋىن، ناقتىلانۋىن جەبەپ، جۇڭگو مەن لاتىن امەريكاسى حالقىن اناعۇرلىم ويداعىداي باقىتقا كەنەلتۋدى قالايدى.
پەترو مىنالاردى ٴبىلدىردى: كولۋمبيا مەن جۇڭگونىڭ دوستىق قارىم ـ قاتىناسى ارىدان جالعاسقان، كولۋمبيا جاق جۇڭگومەن قارىم ـ قاتىناستى ىشكەرىلەي دامىتۋدى ٴۇمىت ەتەدى. ەكى جاق ساياسي ٴوزارا سەنىمدىلىكتى تەرەڭدەتىپ، ٴوزارا قولداۋدى كۇشەيتۋى كەرەك. ”ٴبىر بەلدەۋ، ٴبىر جولدى“ بىرگە قۇرىپ، ساۋدا، نەگىزدىك قۇرىلعى، جاڭا ەنەرگيا، جاساندى زەردە سياقتى سالالارداعى سەلبەستىكتى كەڭەيتىپ، حالىق تۇرمىسىن جاقسارتۋ كەرەك. قازىر حالىقارالىق جاعداي كۇردەلى دە اۋمالى ـ توكپەلى، ٴىشىنارا مەملەكەتتەردىڭ پايدانى عانا كوزدەگەن ارەكەتى دۇنيە جۇزىنە ٴتيىمسىز، ٴار ەل بۇعان ىنتىماقتاسا توتەپ بەرۋى كەرەك. كولۋمبيا جاق جۇڭگو جاقپەن تىعىز سايكەسىپ، حالىقارالىق ادىلدىكتى، تۋراشىلدىقتى جاقتاپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
كەزدەسۋدەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى ۇكىمەتى مەن كولۋمبيا رەسپۋبليكاسى ۇكىمەتىنىڭ جىبەك جولى ەكونوميكالىق بەلدەۋىن جانە 21 ـ عاسىرداعى تەڭىزدەگى جىبەك جولى قۇرىلىسىن بىرگە ىلگەرىلەتۋ جونىندەگى سەلبەستىك جوباسىنا» قول قويىلۋىنا بىرگە كۋا بولدى.
ۋاڭ ي جوعارىداعى قيمىلدارعا قاتىناستى.
