ٴبۇتىن قاقتالعان قوي ەتى دۇكەنىندەگى ىزگى ونەگە

انار بۇلت \ شينجياڭ گازەتىنىڭ ٴتىلشىسى گان شيڭحۋا

　　ٴۇرىمجى قالاسى تيانشان رايونى ارداۋچياۋ ٴمالىسى ارداۋچياۋ الەۋمەتتىك اۋماعىنىڭ تۇرعىنى تاجىگۇل سەيىت الەۋمەتتىك اۋماق كادرى لي حۇڭمەن بىرگە 14 جىل بويى ۇلتتار ىنتىماعىنىڭ اسەرلى حيكاياسىن جازدى.

　　2011 ـ جىلى نەبارى 13 جاستاعى تاجىگۇل ٴومىرىنىڭ جول ايىرىعىندا تۇردى. اتا ـ اناسى ەرتە قايتىس بولىپ، كىشكەنتايىنان ونى ماپەلەپ وسىرگەن ناعاشى جەڭگەسى تامىر وسپەسىنە شالدىققاندىقتان اياعىن باسىپ جۇرە المايتىن، ناعاشى اعاسىنىڭ دا تۇتقيىل جۇرەك اۋرۋى ۇستاپ شيپاحاناعا جاتىپ قالادى. بولاشاقتا فينانس قىزمەتىمەن شۇعىلدانۋدى ارماندايتىن ول وتباسىنىڭ مۇشكىل حالى سەبەبىنەن وقۋدان قول ٴۇزىپ، ناعاشى اعاسىنا كومەكتەسىپ اسحانانى جۇرگىزۋ ويىنا كەلەدى.

　　الەۋمەتتىك اۋماق كادرى لي حۇڭ بۇل حاباردى ەستي سالا اسحاناعا كەلەدى. قىزىل تاناۋ بولىپ جۇرگەن تاجىگۇلدى كورىپ جانى اشىعان لي حۇڭ ونى قاتتى قۇشاقتاپ تۇرىپ بىلاي دەيدى: ”اقىماق قىزىم ـ اۋ، ٴبىلىمىڭ بولماسا، ونەرىڭ بولماسا، ناعاشى اعاڭنىڭ دۇكەنىن قايتىپ جۇرگىزەسىڭ؟“ لي حۇڭنىڭ شىن پەيىلىمەن ناسيحاتتاۋىندا تاجىگۇل ۇزدىكسىز وقۋ بەكىمىنە كەلەدى، كەيىن ول ۇرىمجىدەگى ٴبىر كاسىپتىك تەحنولوگيالىق مەكتەپتى تاڭداپ اس ـ سۋ باسقارۋ ماماندىعىن ۇيرەنەدى.

　　وقىپ جۇرگەن كەزىندە تاجىگۇل ٴار اپتا سوڭىندا ۇيىنە قايتىپ، ناعاشى اعا ـ جەڭگەسىنە كومەكتەسىپ اسحانانى جۇرگىزەدى، لي حۇڭ دا دەمالىس ۋاقىتىنان پايدالانىپ اسحاناعا بارىپ كومەكتەسەتىن، مۇنى كورىپ تاجىگۇلدىڭ كوڭىلى جاي تابادى.

　　تاجىگۇل مەكتەپتە قۇلشىنا ۇيرەنىپ، اسحاناعا قايتقاننان كەيىن امالياتتا ىستەپ كورەدى. لي حۇڭ مەن ناعاشى اعا ـ جەڭگەسىنىڭ جىگەرلەندىرۋىندە تاجىگۇلدىڭ وزىنە سەنىمى ارتا تۇسەدى. وسى ارالىقتا ول ۋاقىت شىعارىپ جۇڭگوشا شيپاگەرلىكتەگى ۋقالاۋدى ۇيرەنىپ، بوس ۋاقىتىندا ناعاشى جەڭگەسىنىڭ اياعىن ۋقالاپ بەرەتىن. ناعاشى اعا ـ جەڭگەسىنىڭ دەنساۋلىعى بىرتىندەپ جاقساردى، اسحانانىڭ ساۋداسى دا كۇسەت بولا باستادى.

　　تاجىگۇل ۇيلەنگەندە وتاۋ ەتەرلىك لايىقتى ٴۇي جالعا الا المايدى، لي حۇڭ ٴوزىنىڭ ٴۇيىن وعان بەرە تۇرادى. 2019 ـ جىلى تاجىگۇل وتباسى ٴبۇتىن قاقتالعان قوي ەتى دۇكەنىنىڭ بولىمشە دۇكەنىن اشۋدى جوسپارلايدى. ”اپەكە، ٴسىز الەۋمەتتىك اۋماقتا قىزمەت ىستەيسىز، ماڭايدا قاي جەردە ادام كوپ ەكەندىگىن، قاي جەردە جالعا الاتىن دۇكەن بارىن بىلەسىز بە؟“ تاجىگۇل لي حۇڭنان كەڭەس سۇرايدى، وسىدان كەيىن قىزمەت ارەدىگىندە لي حۇڭ تاجىگۇلدى ەرتىپ ٴارقايسى جول بويلارىنداعى دۇكەندەردىڭ جاعدايىن ۇعىسىپ، بولىمشە دۇكەن اشۋعا جوسپار جاساپ، جول كورسەتەدى.

　　2021 ـ جىلى تاجىگۇل جاڭا ٴۇي ساتىپ الۋعا بەكيدى، لي حۇڭ دەمالىس كەزىنەن پايدالانىپ سىڭلىسىمەن بىرگە ۇلكەندى ـ كىشىلى كوشەلەردى ارالاپ ٴۇي كورىپ، بانكە قارىزىن بىتىرەدى. ”اپەكەم بار بولسا، مەن الاڭسىزبىن“، ـ دەيدى تاجىگۇل.

　　بۇگىندەرى 27 جاستاعى تاجىگۇل 2 اسحانانىڭ باسقارۋشىسىنا اينالدى، ناعاشى اعاسى قازان باسىنا جاۋاپتى بولسا، ناعاشى جەڭگەسى قازىنانى باسقارادى، ٴبىر وتباسىنداعىلاردىڭ قىزمەت ٴبولىسى ايقىن، ساۋداسى بارعان سايىن كۇسەت بولدى.

　　بوس ۋاقىتتارىندا تاجىگۇل لي حۇڭمەن بەينە ەكراندا تىلدەسىپ اسحاناداعى ىستەردى ايتىساتىن: ”بۇگىن شاڭحايلىق ساياحاتشىلار بىزدەگى ٴبۇتىن قاقتالعان قوي ەتىن ٴدامدى ەكەن دەپ ماقتادى، ٴسىز ۇيرەتكەن ’كۇلىمسىرەي قىزمەت وتەۋ‘ شىنىمەن دە جارامدى ەكەن!“

　　تاجىگۇل لي حۇڭنىڭ بويىنان ماحاببات پەن ۇلەس قوسۋدى سەزىنگەندىگىن، ٴوزىنىڭ بۇل سۇيىسپەنشىلىكتى جالعاستىرا بەرەتىندىگىن ايتتى. تاياۋ جىلداردان بەرى، كۇن ەڭ سۋىق جانە ەڭ ىستىق كەزدەردە تاجىگۇل وتباسىنداعىلار ورتا تازالىقشىلارىنا ”مەيىر جەتكىزۋ تاماعىن“ ازىرلەيدى. قاراستى اۋماقتاعى جالعىز تۇراتىن قيىنشىلىعى بار قارتتار قيىنشىلىققا جولىققاندا، تاجىگۇل دە وزدىگىنەن كومەكتەسەدى.

　　ون نەشە جىل ارالاسۋ ارقىلى ەكەۋىنىڭ اراسىنداعى دوستىق سۇيىسپەنشىلىك قاندارىنا ٴسىڭىپ كەتتى، بىرنەشە كۇن لي حۇڭمەن كەزىكپەسە، تاجىگۇل الەۋمەتتىك اۋماققا بارادى. لي حۇڭ دا ۇنەمى تاجىگۇلدى ەسىنەن شىعارماي، الەۋمەتتىك اۋماقتا جاڭادان شىعارىلعان حالىققا ٴتيىمدى ساياساتتار بولسا، ەڭ الدىمەن تاجىگۇلگە ايتادى.

　　”اپەكەم تۇرمىس جاعىندا ماعان كوپ كومەكتەسىپ قانا قويماي، تاعى ماعان ساۋدادا ادال بولۋدى، كوبىرەك باسقالاردىڭ قامىن جەۋدى ۇيرەتتى. ونىڭ كومەگى مەن جىگەرلەندىرۋى بولماعاندا، مەن دە كوپ بۇراڭ جول باسار ەدىم“. تاجىگۇل بىلاي دەدى: ”كىشكەنتايىمنان اكە ـ شەشەمنەن ايرىلىپ باقىتسىز بولدىم، الايدا ٴار رەت تاڭداۋ جاساۋىما تۋرا كەلگەندە، لي حۇڭ اپەكەم جانىمدا بولعاندىقتان دا مەن تالەيلىمىن“.

　　كوكتەم كەتىپ، جاز كەلىپ، ٴۇرىمجى ساياحاتتىڭ قاۋىرت مەزگىلىن قارسى الدى، تاجىگۇل وتباسىنىڭ ٴبۇتىن قاقتالعان قوي ەتى دۇكەنى دە ساۋدانىڭ كۇسەت مەزگىلىن قارسى الدى. لي حۇڭ بوس ۋاقىتتارىندا دۇكەنگە بارىپ كومەكتەسىپ، تاجىگۇلمەن بالالاردىڭ ۇيرەنۋ جانە تۇرمىسى جونىندە اڭگىمەلەسەدى. ولاردىڭ اراسىنداعى بۇل دوستىق سۇيىسپەنشىلىك بارعان سايىن قويۋلاسا ٴتۇستى.