شينحۋا اگەنتتىگىنىڭ 5 ـ ايدىڭ 17 ـ كۇنى بەيجيڭنەن بەرگەن حابارى. 5 ـ ايدىڭ 17 ـ كۇنى مەملەكەت ٴتوراعاسى شي جينپيڭ اراب ەلدەرى وداعى باسشىلارى القالار كەڭەسى ٴماجىلىسىنىڭ كەزەكتى ٴتوراعاسى، يراق زۇڭتۇڭى راشيدكە قۇتتىقتاۋ حاتىن جولداپ، 34 ـ كەزەكتى اراب ەلدەرى وداعى باسشىلارى القالار كەڭەسى ٴماجىلىسىنىڭ باعداتتا اشىلعاندىعىن قۇتتىقتادى.
شي جينپيڭ بىلاي دەپ اتاپ كورسەتتى: اراب ەلدەرى وداعى قۇرىلعان 80 جىلدان بەرى، اراب دۇنيەسىنىڭ بىرلەسىپ ٴوزىن الۋەتتەندىرۋىن ىلگەرىلەتۋگە باستان ـ اياق كۇش سالىپ، اراب ەلدەرىنىڭ ورتاق ٴۇنىن بەلسەنە تاراتىپ، ورتا شىعىس ٴوڭىرىنىڭ بەيبىتشىلىگىن، ورنىقتىلىعىن، گۇلدەنۋىن جەبەدى. قازىر دۇنيە جۇزىندە 100 جىلدىق وزگەرىس جەدەل قۇبىلۋدا، ورتا شىعىس جاعدايى كۇردەلى دە قۇبىلمالى بولىپ وتىر، اراب ەلدەرى دەربەس، وزىنە ـ ٴوزى قوجايىن بولۋعا تاباندى بولىپ، دامۋدى، گۇلدەنۋدى جەبەپ، ادىلدىكتى، تۋراشىلدىقتى قورعاپ، جەر شارىنىڭ وڭتۇستىگىنىڭ ايبىنىن زورايتۋدا بەلسەندى رول اتقاردى.
شي جينپيڭ بىلاي دەپ باسا دارىپتەدى: تاياۋ جىلداردان بەرى جۇڭگونىڭ اراب ەلدەرىمەن قارىم ـ قاتىناسى قارىشتاپ دامىپ، وركەندەپ كەلە جاتقان ەلدەردىڭ ىنتىماقتاسا سەلبەسۋىنىڭ تيپتىك ۇلگىسىن ورناتتى. 2022 ـ جىلى 12 ـ ايدا مەن اراب ەلدەرى باسشىلارىمەن بىرگە تۇڭعىش كەزەكتى جۇڭگو - اراب ەلدەرى باسشىلار ماجىلىسىنە قاتىناسىپ، جاڭا ٴداۋىردى بەتكە العان جۇڭگو - اراب ەلدەرى تاعدىرلاس ورتاق تۇلعاسىن بار كۇشپەن قۇرۋعا ٴبىر اۋىزدان قوسىلدىق. 2026 ـ جىلى 2 ـ كەزەكتى جۇڭگو - اراب ەلدەرى باسشىلار ٴماجىلىسى جۇڭگودا وتكىزىلەدى، مۇنىڭ جۇڭگو - اراب ەلدەرى قارىم ـ قاتىناسى تاريحىنداعى تاعى ٴبىر ماڭىزدى بەلەسكە اينالاتىندىعىنا سەنەمىن. جۇڭگو مەن اراب ەلدەرى ٴوزارا قارىم ـ قاتىناسقا ستراتەگيالىق بيىكتەن جانە ۇزاق بولاشاقتىق تۇرعىدان قاراۋعا تاباندى بولدى. بولاشاققا كوز جىبەرسەك، جۇڭگو باستان ـ اياق اراب ەلدەرىنىڭ سەنىم ارتۋعا تاتيتىن دوسى جانە سەرىگى بولىپ، اراب ەلدەرىنىڭ ادىلەتتى ىستەرى جاعىندا باتىل تۇرادى. جۇڭگو اراب ەلدەرىمەن بىرگە قۇلشىنىپ، ساياسي ٴوزارا سەنىمدىلىكتى تەرەڭدەتىپ، ٴوزارا پايدا جەتكىزۋ سەلبەستىگىن جەبەپ، گۋمانيتارلىق اۋىس ـ كۇيىستى كۇشەيتىپ، وزدەرىنىڭ وسىزامانداندىرۋ جولىندا قول ۇستاسا العا باسىپ، اناعۇرلىم جوعارى دەڭگەيدەگى جۇڭگو - اراب ەلدەرى تاعدىرلاس ورتاق تۇلعاسىن قۇرۋدى قالايدى.
