شي جينپيڭ ”15 ـ بەسجىلدىق“ جوبانى جاساۋ قىزمەتى جونىندە ماڭىزدى نۇسقاۋ بەرىپ، بىلاي دەپ باسا دارىپتەدى
عىلمي شەشىم جاساۋعا، دەموكراتيالى شەشىم جاساۋعا، زاڭ بويىنشا شەشىم جاساۋعا تاباندى بولىپ، ”15 ـ بەسجىلدىق“ جوبانى جاساۋ قىزمەتىن جوعارى ساپامەن ورىنداۋ كەرەك
شينحۋا اگەنتتىگىنىڭ 5 ـ ايدىڭ 19 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ تاياۋدا ”15 ـ بەسجىلدىق“ جوبانى جاساۋ قىزمەتى جونىندە ماڭىزدى نۇسقاۋ بەرىپ، بىلاي دەپ باسا دارىپتەدى: 5 جىلدىق جوبانى عىلمي جاساۋ جانە ونى ۇزدىكسىز اتقارۋ — پارتيامىزدىڭ ەل باسقارۋداعى ماڭىزدى تاجىريبەسى ٴارى جۇڭگوشا سوتسياليزمنىڭ ماڭىزدى ساياسي ابزالدىلىعى. ”15 ـ بەسجىلدىق“ جوبانى جاساۋ جانە اتقارۋ — پارتيا 20 ـ قۇرىلتايىنىڭ ستراتەگيالىق ورنالاستىرۋىن جاپپاي تياناقتاندىرۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىنەن كەلەلى مانگە يە. عىلمي شەشىم جاساۋعا، دەموكراتيالى شەشىم جاساۋعا، زاڭ بويىنشا شەشىم جاساۋعا تاباندى بولىپ، جوعارى دەڭگەيدە جوبالاۋ مەن حالىقتان اقىل سۇراۋدى بىرلىككە كەلتىرىپ، تەكسەرۋ ـ زەرتتەۋدى، دالەلدەۋدى كۇشەيتىپ، كەڭ كولەمدە ورتاق تانىم ۇيىستىرىپ، كوپ ٴتۇرلى تاسىلمەن حالىق بۇقاراسىنىڭ جانە قوعامداعى ٴار سالانىڭ پىكىر ـ ۇسىنىسىن تىڭداپ، كادر، بۇقارانىڭ ناقتى اماليات بارىسىندا جاراتقان جاڭا تاجىريبەلەرىن تولىق قابىلداپ، نىسانا ـ مىندەتتەردىڭ جانە ساياسات ـ شارالاردىڭ جۇيەلىلىگىنە، تۇتاس تۇلعالىلىعىنا، سايكەستىلىگىنە باسا ٴمان بەرىپ، جوبا جاساۋ قىزمەتىن جوعارى ساپامەن ورىنداۋ كەرەك.
ەلىمىز 2026 ـ جىلدان باستاپ ”15 ـ بەسجىلدىق“ جوبانى اتقارادى، كەزەكتە پارتيا ورتالىق كوميتەتى ”15 ـ بەسجىلدىق“ جوبا ۇسىنىسىن ۇيىمداستىرىپ دايىنداۋدا. شي جينپيڭنىڭ ماڭىزدى نۇسقاۋىنىڭ رۋحىنا جانە جوبا ۇسىنىسىن دايىنداۋ قىزمەتى ورنالاستىرۋىنا ساي، قاتىستى جاقتار جۋىق ارادا كوپ ٴتۇرلى فورمامەن كادر، بۇقارا، مامان، وقىمىستىلار قاتارلىلاردان ”15 ـ بەسجىلدىق“ جوبانى جاساۋ جونىندە پىكىر ـ ۇسىنىس قابىلدايدى.
