شينحۋا اگەنتتىگىنىڭ 5 ـ ايدىڭ 20 ـ كۇنى بەيجيڭنەن بەرگەن حابارى. 5 ـ ايدىڭ 20 ـ كۇنى مەملەكەت ٴتوراعاسى شي جينپيڭ 2025 ـ جىلعى شاڭحاي سەلبەستىك ۇيىمى كەدەيلىكتى ازايتۋ جانە باياندى دامۋ تالقى مىنبەرىنە قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: كەدەيلىكتى جويۋ — الەمدىك قيىن ماسەلە ٴارى دۇنيە جۇزىندەگى ٴار ەلدىڭ ورتاق نىساناسى. جۇڭگو جاپالى قۇلشىنىس جاساۋ ارقىلى كەدەيلىكتەن ارىلتۋدان قامال الۋ شايقاسىندا ٴساتتى جەڭىسكە جەتىپ، بىرلەسكەن مەملەكەتتەر ۇيىمىنىڭ 2030 ـ جىلعا دەيىنگى باياندى دامۋ كەڭەستىك تارتىبىندەگى كەدەيلىكتى ازايتۋ نىساناسىن 10 جىل بۇرىن جۇزەگە اسىرىپ، كەدەيلىكتى ازايتۋدىڭ جۇڭگوشا جولىمەن ٴجۇرىپ، ادامزاتتىڭ كەدەيلىككە قارسى تۇرۋ تاريحىنىڭ جاڭا تاراۋىن جازدى.
شي جينپيڭ بىلاي دەپ باسا دارىپتەدى: كەدەيلىكتى ازايتۋ ماسەلەسى، ٴتۇبىن قۋعاندا، دامۋ ماسەلەسى. سوڭعى جىلدارى شاڭحاي سەلبەستىك ۇيىمى كەدەيلىكتى ازايتۋ جانە باياندى دامۋ سەلبەستىگىن بەلسەنە ورىستەتىپ، كورنەكتى تابىستارعا قول جەتكىزدى. جۇڭگو جاق شاڭحاي سەلبەستىك ۇيىمىنىڭ كەزەكتى ٴتوراعا ەلى رەتىندە، ٴارقايسى جاقپەن بىرگە ساياسات جاقتاعى تىلدەسۋدى ۇزدىكسىز كۇشەيتىپ، كەدەيلىكتى ازايتۋ تاجىريبەلەرىن ٴبولىسىپ، ناقتى سەلبەستىكتى تەرەڭدەتىپ، ٴتىپتى دە كوپ مەملەكەتتىڭ ٴوزىنىڭ مەملەكەت جاعدايىنا ۇيلەسەتىن كەدەيلىكتى ازايتۋ جانە باياندى دامۋ جولى جونىندە ىزدەنىس جاساۋىنا كومەكتەسىپ، كەدەيلىكتەن اۋلاق، بىرگە كوركەيىپ ـ گۇلدەنەتىن كوركەم دۇنيەنى قول ۇستاسا قۇرۋدى قالايدى.
وسى رەتكى تالقى مىنبەرى سول كۇنى شانشيدىڭ شي ـ ان قالاسىندا اشىلدى، نەگىزگى تاقىرىبى ”ۇزدىكسىز كەدەيلىكتى ازايتىپ، سەلبەسىپ دامۋ — شاڭحاي سەلبەستىك ۇيىمىنداعى ەلدەردىڭ كەدەيلىكتى ازايتۋىن جانە باياندى دامۋىن ىلگەرىلەتۋ“، شاڭحاي سەلبەستىك ۇيىمى تاتۋ كورشى، دوستىق، سەلبەستىك كوميتەتى جانە شانشي ولكەلىك حالىق ۇكىمەتى بىرگە ۇيىمداستىردى.
