انار بۇلت \ شينجياڭ گازەتىنىڭ ٴتىلشىسى چىن چياڭۋي 6 ـ ايدىڭ 21 ـ كۇنى ۇرىمجىدەن حابارلايدى. ٴۇرىمجى كەدەنىنەن ۇعىسۋىمىزشا، الدىڭعى 5 ايدا شينجياڭنىڭ سىرتقى ساۋدا يمپورت ـ ەكسپورت جالپى قۇنى 227 ميلليارد 670 ميلليون يۋان بولىپ، سايكەس مەزگىلدەگىدەن %22.9 ارتقان، سىرتقى ساۋدانىڭ ارتۋ قارقىنى بۇكىل ەلدىڭ ارتۋ قارقىنىنان 20.4 پايىز جوعارى بولىپ، كولەمى بىلتىرعى الدىڭعى جارتى جىلداعى دەڭگەيدەن اسقان.
ساۋدا كولەمىنەن قاراعاندا، الدىڭعى 5 ايدا ىلە قازاق اۆتونوميالى وبلىسى، قاشقار ايماعى، ٴۇرىمجى قالاسى، بۇراتالا موڭعۇل اۆتونوميالى وبلىسى رايونىمىزدا الدىڭعى 4 ورىندى يەلەپ، يمپورت ـ ەكسپورت قۇنى سايكەس مەزگىلدەگىدەن جەكە ـ جەكە %15، %5.6، %48.6، %25.1 ارتقان.
جۇڭگو (شينجياڭ) ەركىن ساۋدا سىناق رايونىنىڭ، كەشەندى قورعامالى باجى اۋماعىنىڭ تۇعىرلىق رولى ۇزدىكسىز ساۋلەلەندىرىلدى. الدىڭعى 5 ايدا شينجياڭ ەركىن ساۋدا سىناق رايونىنىڭ قاشقار اۋماعى، قورعاس اۋماعى، ٴۇرىمجى اۋماعىنىڭ يمپورت ـ ەكسپورت قۇنى جەكە ـ جەكە 37 ميلليارد 900 ميلليون يۋان، 34 ميلليارد 640 ميلليون يۋان، 27 ميلليارد 610 ميلليون يۋان بولىپ، جيىنتىعى شينجياڭنىڭ سىرتقى ساۋدا يمپورت ـ ەكسپورت جالپى قۇنىنىڭ %44ىن ۇستاعان. شينجياڭداعى 4 كەشەندى قورعامالى باجى اۋماعىنىڭ جيىنتىق يمپورت ـ ەكسپورت قۇنى 81 ميلليارد 570 ميلليون يۋان بولىپ، %35.8تى ۇستاعان.
ساۋدا تاسىلىنەن قاراعاندا، ادەتتەگى ساۋدانىڭ شينجياڭنىڭ يمپورت ـ ەكسپورتىن جەبەۋ رولى كورنەكتى بولعان. الدىڭعى 5 ايدا شينجياڭنىڭ ادەتتەگى ساۋدا تاسىلىندەگى يمپورت ـ ەكسپورت قۇنى سايكەس مەزگىلدەگىدەن %80.8 ارتىپ، %54.9تى يەلەپ، بىلتىرعى سول تۇستاعىدان 17.6 پايىز جوعارىلاپ، شينجياڭنىڭ سىرتقى ساۋداسىنىڭ ارتۋىن 30.2 پايىز جوعارىلاتقان.
ساۋدا تۇلعاسىنان قاراعاندا، حالىقتىق كاسىپورىندار ”جۇكتىڭ اۋىرىن كوتەرۋ“ رولىن ۇزدىكسىز ساۋلەلەندىرگەن. الدىڭعى 5 ايدا شينجياڭداعى حالىقتىق كاسىپورىنداردىڭ يمپورت ـ ەكسپورت قۇنى سايكەس مەزگىلدەگىدەن %25 ارتىپ، %94.7تى ۇستاپ، شينجياڭنىڭ سىرتقى ساۋداسىنا قوسقان ۇلەسى %101.5كە جەتكەن. تاۋار تۇرىنەن قاراعاندا، الدىڭعى 5 ايدا شينجياڭنىڭ ەكسپورت ەتكەن ماشينا ـ ەلەكتر ونىمدەرى سايكەس مەزگىلدەگىدەن %43.8 ارتىپ، %40.2تى ۇستاعان.
الدىڭعى 5 ايدا جۇڭگو شينجياڭى 222 مەملەكەتپەن جانە وڭىرمەن ساۋدا بارىس ـ كەلىسىن جاساسىپ، ”ٴبىر بەلدەۋ، ٴبىر جولدى“ بىرگە قۇراتىن مەملەكەتتەرگە باعىتتاعان يمپورت ـ ەكسپورت قۇنى سايكەس مەزگىلدەگىدەن %13.8 ارتىپ، %84.8تى ۇستاعان. الدىڭعى 2 ۇلكەن ساۋدا سەرىگى ٴالى دە قازاقستان مەن قىرعىزستان بولعان. جۇڭگو شينجياڭىنىڭ شىعىس وڭتۇستىك ازيا ەلدەرى وداعىنا، ەۆروپا وداعىنا باعىتتاعان يمپورت ـ ەكسپورت قۇنى سايكەس مەزگىلدەگىدەن جەكە ـ جەكە %91.6، %55.7 ارتقان.
