انار بۇلت \ شينجياڭ گازەتىنىڭ ٴتىلشىسى حي حۇڭۋي 6 ـ ايدىڭ 25 ـ كۇنى ۇرىمجىدەن حابارلايدى. 6 ـ ايدىڭ 25 ـ كۇنى ”ازيا ـ ەۆروپانى تۇتاستىرۋ . جۇڭگوعا قارجى قوسۋ . شينجياڭدى ارالاۋ“ نەگىزگى تاقىرىپ بولعان جۇڭگو حالىقارالىق ساۋدا قوعامى شينجياڭ ساۋدا قوعامىنىڭ 2025 ـ جىلعى ساۋدانى، قارجى قوسۋدى جەبەۋ جينالىسى ۇرىمجىدە اشىلدى.
اۆتونوميالى رايوندىق پارتكومنىڭ تۇراقتى مۇشەسى، اۆتونوميالى رايوننىڭ ۇنەمىلىك ىستەرگە جاۋاپتى ورىنباسار ٴتوراعاسى چىن ۋيجۇن ماجىلىسكە قاتىناستى ٴارى ارناۋ ٴسوز سويلەدى.
چىن ۋيجۇن بىلاي دەپ اتاپ كورسەتتى: شينجياڭ ”ٴبىر بەلدەۋ، ٴبىر جولدىڭ“ وزەكتى رايونى رەتىندە، سانالىلىقپەن شينجياڭ قىزمەتىن جۇڭگو ۇلگىسىندەگى وسىزامانداندىرۋدىڭ جالپى جاعدايى تۇرعىسىنان جوسپارلاپ، شينجياڭدى زاڭمەن باسقارۋدى، شينجياڭدى ىنتىماقتاسا ورنىقتىرۋدى، شينجياڭدى مادەنيەتپەن نارلەندىرۋدى، حالىقتى بايىتىپ شينجياڭدى گۇلدەندىرۋدى، شينجياڭدى باياندى كوركەيتۋدى تىڭعىلىقتى ىلگەرىلەتتى. شينجياڭ ىشكى قۇرلىقتىڭ قويناۋىنان سىرتقا ەسىك اشۋدىڭ الدىڭعى شەبىنە كۇرت كوتەرىلدى، الەمدەگى سيلى قوناقتار مەن كاسىپورىنشىلاردىڭ شينجياڭدا قارجى قوسۋ ورنالاسىمىن زورايتىپ، ”ون ٴىرى كاسىپ سالاسى شوعىرى“ قۇرىلىسىنا ىشكەرىلەي ات سالىسۋىن شىن ىقىلاسپەن قارسى الادى. شينجياڭ بىرەگەي شارۋاشىلىق ـ ساۋدا ورتاسىن ۇزدىكسىز تۇلعالاپ، جالپى پەريودتىق قىزمەت وتەۋمەن قامتاماسىز ەتۋدى ازىرلەپ، كاسىپورىنداردىڭ الاڭسىز قارجى قوسىپ، ۋايىمسىز تامىر تارتىپ، ويداعىداي دامۋىنا مۇمكىندىك جاسايدى.
جۇڭگو حالىقارالىق ساۋدا قوعامىنىڭ باس حاتشىسى سۇن شياۋ مىنالاردى ٴبىلدىردى: شينجياڭ وزگەشە وڭىرلىك ورنىنا جانە مول بايلىعىنا سۇيەنىپ، مەملەكەتتىڭ باتىسقا ەسىك اشۋىنداعى وزەكتى تورابىنا جەدەل اينالۋدا. جۇڭگو حالىقارالىق ساۋدا قوعامى شينجياڭعا ايرىقشا ٴمان بەرىپ، شينجياڭ ورايىن بەلسەنە ۇگىتتەپ، تانىستىرىپ، ٴار ەل ونەركاسىپ ـ ساۋدا سالالارىنىڭ ”شينجياڭعا كەلۋىنە، شينجياڭدى بىلۋىنە، شينجياڭعا قارجى قوسۋىنا“ قولداۋ كورسەتەدى ٴارى شينجياڭمەن قول ۇستاسا شارۋاشىلىق تۇلعالارىنا اناعۇرلىم ساپالى تۇعىر ورناتادى.
جۇڭگو اۋىل شارۋاشىلىق بانكەسى جارنا شەكتى سەرىكتەستىگىنىڭ، قىرعىزستان مەملەكەتتىك ساۋدا ـ ونەركاسىپشىلەر قوعامىنىڭ، رۋمينيا - جۇڭگو ساۋدا ـ ونەركاسىپشىلەر قوعامىنىڭ، پورتۋگاليا - جۇڭگو ساۋدا ـ ونەركاسىپشىلەر قوعامىنىڭ، حاڭجوۋ يۇيشۋ عىلىم ـ تەحنولوگيا جارنا شەكتى سەرىكتەستىگىنىڭ، ت. ب قاتىستى جاۋاپتىلارى ماجىلىستە پىكىر اۋىستىرىپ ٴسوز سويلەدى. ٴۇندىستان، ۋرۋگۆاي سياقتى ەلدەردەن كەلگەن ونەركاسىپ ـ ساۋدا سالالارى ۋاكىلدەرى، جۇڭگودا تۇراتىن ەلشىلەر، سونداي ـ اق ەل ٴىشى ـ سىرتىنداعى ايگىلى كاسىپورىنداردىڭ قاتىستى جاۋاپتىلارى ماجىلىسكە قاتىناستى.
