انار بۇلت \ شينجياڭ گازەتىنىڭ ٴتىلشىسى لي ياڭ 6 ـ ايدىڭ 27 ـ كۇنى ۇرىمجىدەن حابارلايدى. 6 ـ ايدىڭ 27 ـ كۇنى شينجياڭداعى افريكاعا جۇك تاسىمالدايتىن تۇڭعىش اۋە جەلىسى ٴۇرىمجى - ادديس ابەبا جۇك تاسىمال اۋە جەلىسى رەسمي اشىلدى. اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز تۇڭعىش قاتىناۋ سالتىنا قاتىناستى ٴارى ەفيوپيانىڭ جۇڭگودا تۇراتىن باس ەلشىسى تافەررا دەربەۋ يمام قاتارلىلارمەن بىرگە تۇتقانى العا قوزعاپ، تۇڭعىش ۇشۋدى باستاپ بەردى.
تافەررا دەربەۋ يمام ارناۋ سوزىندە مىنالاردى ٴبىلدىردى: ەفيوپيا اۆياتسيا سەرىكتەستىگى ٴۇرىمجى - ادديس ابەبا جۇك تاسىمال اۋە جەلىسىنىڭ اشىلۋى ەفيوپيا مەن جۇڭگو اراسىنداعى، اسىرەسە، جۇڭگونىڭ شينجياڭىمەن ەكونوميكالىق اۋىس ـ كۇيىستى، سەلبەستىكتى جەبەۋدە توتەنشە ماڭىزدى رول اتقارادى.
كەزەكشى ۇشاق جوسپارىنا نەگىزدەلگەندە، ٴۇرىمجى - ادديس ابەبا جۇك تاسىمال اۋە جەلىسىندە ٴار اپتادا 3 - 2 كەزەك ۇشاق قاتىنايدى، بوين 777F تۇرپاتتى ۇشاق پايدالانىلادى ەكەن. اۋە جەلىسى اشىلعاننان كەيىن، شينجياڭنىڭ داڭقى دۇنيە جۇزىنە ايگىلى ساپالى جەمىس ـ جيدەك، سالمون بالىعى سياقتى ەرەكشە اۋىل شارۋاشىلىق ونىمدەرى افريكاعا، ورتا شىعىسقا جانە الەمدىك بازارلارعا تىكە جەتكىزىلەتىن جوعارى قارقىندى جول اشىلادى، سونىمەن بىرگە ەفيوپيانىڭ جانە افريكاداعى باسقا ەلدەردىڭ ساپالى سيىر، قوي ەتى، تاڭداۋلى كوفەسى، ەرەكشە باۋ ـ باقشا ونىمدەرى سياقتىلاردىڭ جۇڭگونىڭ تۇتىنۋ بازارىنا ەنۋىنە قولايلىلىق جاراتىلادى.
ٴۇرىمجى - ادديس ابەبا جۇك تاسىمال اۋە جەلىسىندەگى تۇڭعىش قاتىناۋ — شينجياڭ حالىقارالىق اۆياتسيا تاسىمالى ارناسىنىڭ تاعى ٴبىر رەت دەڭگەيى جوعارىلاپ، سيىمدىلىعى ارتقاندىعىن كورسەتەدى. بيىل 5 ـ ايدىڭ اياق شەنىنە دەيىن شينجياڭنىڭ حالىقارالىق جولاۋشى تاسىمال جانە جۇك تاسىمال اۋە جەلىسى جەكە ـ جەكە جيىنى 25كە جانە 24كە جەتىپ، حالىقارالىق جولاۋشىلاردى جانە جۇك ـ پوچتا جولدامالارىن قابىلداۋ ـ جونەلتۋ مولشەرى 301 مىڭ ادام (رەت)، 40 مىڭ 200 توننا بولىپ، حالىقارالىق اۋە جەلىسى تورىنىڭ ىركىلىسسىزدىگى ۇزدىكسىز جوعارىلادى.
ەفيوپيا اۆياتسيا سەرىكتەستىگىنىڭ قاتىستى جاۋاپتىسى، اۆتونوميالى رايوننىڭ جانە ٴۇرىمجى قالاسىنداعى قاتىستى ورىنداردىڭ، ورتالىقتىڭ شينجياڭدا تۇراتىن ٴبىر ٴبولىم ورىندارىنىڭ، شينجياڭ اۋەجاي (توبى) شەكتى جاۋاپكەرشىلىك سەرىكتەستىگىنىڭ، شينجياڭ ساۋدا ـ زات اينالىمى (توبى) شەكتى سەرىكتەستىگىنىڭ قاتىستى جاۋاپتىلارى، ت.ب تۇڭعىش قاتىناۋ سالتىنا قاتىناستى.
