جىڭنىڭ ”قىزىل اقىق جەمىسى“ تىزبەك قالىپتاستىرىپ، ەگىنشىلەردى بايىتتى

جىڭنىڭ ”قىزىل اقىق جەمىسى“ تىزبەك قالىپتاستىرىپ، ەگىنشىلەردى بايىتتى

انار بۇلت \ شينجياڭ گازەتىنىڭ ٴتىلشىسى ما بەي

　　ساعات 10نان 30 مينۋت وتكەندە جىڭ اۋدانى تولى قالاشىعى باتىس وشاقباي قىستاعىنىڭ الاقات اتىزى كۇن نۇرىنا شومىلىپ، جاپ ـ جاسىل جاپىراقتار اراسىنداعى بۇتاقتاردا ”قىزىل اقىق جەمىسى“ سامسىپ تۇردى. ەگىنشى ۋاڭ لەي اتىزدا جۇرەلەي وتىرىپ، بىرنەشە تال الاقاتتى ٴۇزىپ الاقانىنا سالىپ: ”مىنا جەمىسكە قاراڭىزشى، ٴار تالىنىڭ ٴدانى تولىق، قازىر مۋ باسىندىق ٴونىم جوعارىلاپ، كىرىسىمىز دە ۇزدىكسىز ارتۋدا“، ـ دەدى. بۇرىنعى اق قالعان جەردەن قازىرگى كىرىستى ارتتىرۋ باقشاسىنا اينالعانعا دەيىن ۋاڭ لەي جەردى اينالىمعا سالۋدىڭ پايداسىن كورىپ، قىستاقتاعى اتى زاتىنا ساي الاقات ەگۋشى ٴىرى وتباسىنا اينالدى.

　　6 ـ ايدىڭ 26 ـ كۇنى ”جوعارى قارقىندى تاس جولدى بويلاپ شينجياڭعا نازار سالۋ“ كولەمدى جالپىلىق مەديا تىلشىلەر ۇيىرمەسى جىڭ اۋدانى تولى قالاشىعى باتىس وشاقباي قىستاعىنداعى الاقات جوعارى ولشەمدى ۇلگى كورسەتۋ باقشاسىنا كەلدى.

　　2022 ـ جىلى باتىس وشاقباي قىستاعى جالپى 8000 مۋ جەردى اينالىمعا سالىپ، قىستاق سەلبەستىك كووپەراتيۆى 3500 مۋ جەرگە الاقات ەكتى. ۋاڭ لەي شالعايداعى تۇتاسىپ جاتقان الاقات اتىزىن نۇسقاپ تۇرىپ، ۇكىمەت ”سەرىكتەستىك + ەگىنشى وتباسى + سەلبەستىك كووپەراتيۆى“ ۇلگىسىن جالپىلاستىرعان سوڭ، جۇرەكتىلىكپەن ەگىستىك جەرىن 100 مۋعا كەڭەيتىپ الاقات ەككەندىگىن ايتتى، ”باستابىندا كوڭىلىم كۇپتى بولىپ، وسىنشاما كوپ جەردى قالاي باسقارامىن دەپ ويلادىم“.

　　ۋاڭ لەيدىڭ ”كوڭىلىن ورنىقتىرعان“ ۇكىمەت پەن كاسىپورىن جالپىلاستىرعان ”بەس ٴبىر تۇتاس“ ەگىمشىلىك ۇلگىسى، ياعني ٴبىر تۇتاس تۇقىم تاڭداۋ، ٴبىر تۇتاس ەگىمشىلىك ولشەمى، ٴبىر تۇتاس باسقارۋ تەحنولوگياسى، ٴبىر تۇتاس باۋلۋ، ٴبىر تۇتاس ساتىپ الۋ بولدى.

　　كاسىپورىننىڭ تەحنولوگيالىق قىزمەتكەرلەرى اپتا سايىن اتىز باسىنا كەلىپ تۇرادى. ”نيڭجي 10 ـ ٴنومىردى“ تاڭداپ ەگۋدەن باستاپ دەرت ـ دەربەز، زياندى جاندىكتەردەن ساقتانۋ ـ تىزگىندەۋگە دەيىن وعان عىلمي ەگىمشىلىكتى قولما ـ قول ۇيرەتەدى. ”بۇرىن تىڭايتقىش بەرۋدى بىلمەگەندىكتەن جەمىس ۇلكەندى ـ كىشىلى بولاتىن، قازىر تەحنولوگيالىق قىزمەتكەرلەردىڭ ايتۋى بويىنشا بيولوگيالىق ەگىس دارىلەرىن قولدانىپ، ەگىس دارىلەرىنىڭ قالدىقتارىن تىزگىندەدىك، جەمىستەردىڭ ساپاسى جوعارىلاپ، ساۋداگەرلەر تالاسا ـ تارماسا ساتىپ الاتىن بولدى“. ۋاڭ لەي قۋانا: ”بيىل مۋ باسىندىق ٴونىمى 500 كيلوگرامعا جەتەدى، 100 مۋ جەردىڭ باستاپقى كىرىسى 600 مىڭ يۋان بولادى دەپ مولشەرلەپ وتىرمىن“، ـ دەدى.

　　جىڭ اۋدانى الاقات كاسىپ سالاسى تىزبەگىنىڭ كۇن سايىن كەمەلدەنۋىنە بايلانىستى، الاقات وڭدەۋ كاسىپورىندارى دا تەحنولوگيا الا كەلدى.

　　”ٴبىز ۋاكۋمدىق كەرى قىسىمدى جابدىقتان پايدالانىپ جاس كۇيىندە ساقتايمىز، ەشقانداي تولىقتىرعىش قوسپايمىز، قۇرعاتىلعان جەمىسى دىمقىلدانسا دا تۇيدەكتەلمەيدى، توتىقپايدى، ٴدامى جاس كۇيىندەگىمەن ونشا پارىقتالمايدى“. شينجياڭ چيميڭشيڭ الاقات كاسىپ سالاسىن دامىتۋ شەكتى سەرىكتەستىگىنىڭ تەحنولوگيا باس باقىلاۋشىسى حى ۋي بۇتاقتاۋدان باستاپ تەحنولوگيالىق قىزمەتكەرلەردى ەگىنجايعا جىبەرىپ، اۋىل شارۋاشىلىعى، اۋىل ـ قىستاق تاراۋلارىمەن بىرلەسىپ ەگىنشىلەرگە تەحنولوگيالىق جاقتان جەتەكشىلىك ىستەيتىندىكتەرىن ايتتى.

　　”ٴبىز جۇڭتۇڭمەن، پوچتامەن، شۇنفىڭمەن سەلبەسىپ جاس جەمىستەردى ٴۇزىپ العان سوڭ، 3 كۇن ىشىندە بۇكىل ەلدىڭ كوپ ٴبولىم وڭىرلەرىنە جەتكىزەمىز، جىلدامدىعىمىز بۇرىنعىدان ٴبىر ەسە تەزدەدى“. حى ۋي الاقات توسابى مەن جاس كۇيىندە كەپتىرىلگەن جەمىس بۇكىل ەلگە ساتىلۋمەن بىرگە، تاعى ورتا ازيا ەلدەرىنە ەكسپورت ەتىلەتىندىگىن ايتتى.

　　وشاقباي باتىس قىستاعى سولتۇستىكتە G30 جوعارى قارقىندى تاس جولىمەن، وڭتۇستىكتە جىڭ اۋدانى X214 جەلىسىمەن شەكتەسەدى، وزگەشە وڭىرلىك ورىن ابزالدىلىعىنا سۇيەنىپ، زات جەتكىزەتىن اۆتوكولىكتەر توتە اتىز باسىنا دەيىن بارا الادى.

　　”بۇرىن الاقات ساتقاندا ٴوزىمىز اۋدان ورتالىعىنداعى تولايىم ساتۋ بازارىنا اپاراتىنبىز، باعاسى دا ارزان بولاتىن“. ۋاڭ لەي بىلاي دەدى: قازىر زات جەتكىزەتىن اۆتوكولىكتەر توتە اتىز باسىنا بارىپ جاس جەمىستەردى تيەيدى، جاس كۇيىندە ساقتاپ وڭدەۋ زاۆودىنا الىپ بارادى، ۋاقىت، ەڭبەككۇش ۇنەمدەلەدى.

　　قىستاقتىڭ وزگەرىسىن تىلگە العاندا، ۋاڭ لەي كۇلىمسىرەپ: ”قازىر كوپتەگەن جاستار اۋىلعا قايتىپ كەلدى، كەيبىرەۋى سەلبەستىك كووپەراتيۆتەرىندە باسقارۋشى بولىپ ىستەيدى، كەيبىرەۋى ەلەكتروندى ساۋدا تىكە تاراتىلىمىن ىستەيدى، قىستاقتىڭ ومىرشەڭ كۇشى بارعان سايىن كۇشەيۋدە“، ـ دەدى. ٴسوز اياقتاماي جاتىپ، قىستاق پارتيا ياچەيكاسىنىڭ شۋجيى ما ۋىنجۇن ىلە ـ شالا تولىقتاپ: ”بيىل ٴبىز تاعى دا 2000 مۋ جاسىل ولشەمدەگى الاقات ەگۋ بازاسىن جاڭادان كوبەيتپەكشىمىز، جاس كۇيىندەگى جەمىس ٴونىم مولشەرى ٴتىپتى دە جوعارى بولادى، ٴتىپتى دە شالعاي جەرلەرگە ساتا الاتىن بولامىز“، ـ دەدى.