پارتيا مۇشەسى 100 ميلليون 271 مىڭ، نەگىزگى ساتى پارتيا ۇيىمى 5 ميلليون 250 مىڭ
جۇڭگو كوممۋنيستىك پارتياسىنىڭ پارتيا مۇشەلەرى قوسىنى ورنىقتى زورايىپ، قۇرىلىمى ٴۇرتىس ساپالىلاندى
نەگىزگى ساتى پارتيا ۇيىمى قۇرىلىسى اناعۇرلىم پارمەندى دە تەبىندى بولدى
شينحۋا اگەنتتىگىنىڭ 6 ـ ايدىڭ 30 ـ كۇنى بەيجيڭنەن بەرگەن حابارى. ورتالىق كوميتەت ۇيىمداستىرۋ ٴبولىمىنىڭ ەڭ جاڭا پارتيا ىشىندەگى ساناق ساندى مالىمەتىندە كورسەتىلۋىنشە، 2024 ـ جىلدىڭ سوڭىنا دەيىن جۇڭگو كوممۋنيستىك پارتياسى مۇشەلەرىنىڭ جالپى سانى 100 ميلليون 271 مىڭ ادام بولىپ، الدىڭعى جىلداعىدان ناق ٴبىر ميلليون 86 مىڭ ادام كوبەيگەن. پارتيانىڭ نەگىزگى ساتى ۇيىمدارى 5 ميلليون 250 مىڭ بولىپ، الدىڭعى جىلداعىدان ناق 74 مىڭ ارتقان. جۇڭگو كوممۋنيستىك پارتياسى رەفورما رۋحى مەن قاتاڭ ولشەم ارقىلى پارتيانى باسقارۋعا، پارتيانى جونگە سالۋعا تاباندى بولىپ، نەگىزگى ساتى ۇيىمىن كۇشەيتۋگە، ىسىلعان قوسىن شىڭداۋعا كۇش سالىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋگە پارمەندى ۇيىمدىق كەپىل ازىرلەدى.
پارتيا مۇشەلەرىنىڭ جالپى سانى ورنىقتى ارتتى. پارتيا مۇشەلەرىنىڭ جالپى سانى الدىڭعى جىلداعىدان %1.1 ارتتى. تۇتاس جىلدا پارتياعا 2 ميلليون 131 مىڭ مۇشە قابىلداندى، مۇنىڭ ىشىندە ٴوندىرىستىڭ، قىزمەتتىڭ ٴبىرىنشى شەبىنەن ٴبىر ميلليون 120 مىڭ ادام قابىلدانىپ، %52.6ىن ۇستادى؛ جوعارى تەحنيكۋم جانە ودان جوعارى وقۋ ماعلۇماتىنا يە پارتيا مۇشەسى ٴبىر ميلليون 159 مىڭ ادام بولىپ، %54.4 ىن ۇستادى؛ 35 جاستاعى جانە ودان تومەنگى جاستاعى پارتيا مۇشەلەرى ٴبىر ميلليون 784 مىڭ بولىپ، %83.7ىن ۇستادى.
پارتيا مۇشەلەرى قوسىنىنىڭ قۇرىلىمى ۇزدىكسىز ساپالىلاندى. 2024 ـ جىلدىڭ سوڭىنا دەيىن جوعارى تەحنيكۋم جانە ودان جوعارى ماعلۇماتقا يە پارتيا مۇشەلەرى 57 ميلليون 786 مىڭ بولىپ، %57.6تى ۇستاپ، الدىڭعى جىلداعىدان 1.4 پايىز ارتتى؛ ايەل پارتيا مۇشەلەرى 30 ميلليون 995 مىڭ بولىپ، %30.9تى ۇستاپ، الدىڭعى جىلداعىدان 0.5 پايىز ارتتى؛ از ۇلت پارتيا مۇشەلەرى 7 ميلليون 734 مىڭ بولىپ، %7.7تى ۇستاپ، الدىڭعى جىلداعىمەن قارايلاس بولعان؛ جۇمىسشىلار مەن ديقاندار ٴالى دە پارتيا مۇشەلەرى قوسىنىنىڭ نەگىزگى تۇلعاسى بولىپ، جالپى ساننىڭ %32.7ىن ۇستادى.
پارتيا مۇشەلەرىن تاربيەلەۋ، باسقارۋ ونان ارى كۇشەيتىلدى. ٴار دارەجەلى پارتيا ۇيىمدارى پارتيا ورتالىق كوميتەتىنىڭ شەشىمدەرى مەن ورنالاستىرۋلارىن باتىل دايەكتىلەندىرىپ، تياناقتاندىرىپ، شي جينپيڭ جاڭا ٴداۋىر جۇڭگوشا سوتسياليزم يدەياسىن ۇيرەنۋ، دايەكتىلەندىرۋ نەگىزگى تاقىرىپتىق تاربيەسىنىڭ جەتىستىكتەرىن بەكەمدەپ جانە كەڭەيتىپ، پارتيا ٴتارتىبىن ۇيرەنۋ تاربيەسىن تىڭعىلىقتى ورىستەتىپ، پارتيا مۇشەلەرىن تاربيەلەۋدى، باۋلۋدى اناعۇرلىم كۇشەيتتى، تۇتاس جىلدا تاربيەلەنگەن پارتيا مۇشەلەرىنىڭ سانى الدىڭعى جىلداعىدان %16.5 ارتتى، اۋدان دارەجەلىدەن جوعارى پارتكومدار 4 ميلليون 366 مىڭ نەگىزگى ساتى پارتيا ۇيىمى شۋجيلەرىن جۇمىستان قول ٴۇزدىرىپ تاربيەلەدى. پارتيانىڭ ۇيىمدىق تۇرمىسى قاتاڭ ارناعا ٴتۇسىرىلدى، 3200 جەرگىلىكتى پارتكوم باسشىلىق القاسى دەموكراتيالىق تۇرمىس جيىنىن اشتى، 4 ميلليون 518 مىڭ پارتيا ياچەيكاسى ۇيىمدىق تۇرمىس جيىنىن اشىپ، پارتيا مۇشەلەرىن دەموكراتيالىق جولمەن باعالادى. پارتيا ىشىندە ماداقتاۋ ـ سيلاۋ، شابىتتاندىرۋ، قامقورلىق جاساۋ پارمەندى ىلگەرىلەتىلدى، ٴار دارەجەلى پارتيا ۇيىمدارى جيىنى 175 مىڭ وزات نەگىزگى ساتى پارتيا ۇيىمىن ماداقتاپ ـ سيلادى، 728 مىڭ تاڭداۋلى پارتيا مۇشەسىن ماداقتاپ ـ سيلادى، 240 مىڭ تاڭداۋلى پارتيا ىستەرى قىزمەتكەرىن ماداقتاپ ـ سيلادى. تۇتاس جىلدا 894 مىڭ ”پارتيا قۇشاعىنداعى داڭقتى 50 جىل“ ەستەلىك زناگى تاراتىلدى.
نەگىزگى ساتى پارتيا ۇيىمدارى اناعۇرلىم نىعايىپ بەكەمدەلدى. بۇكىل ەل بويىنشا 306 مىڭ نەگىزگى ساتى پارتكومى، 330 مىڭ باس ياچەيكا، 4 ميلليون 614 مىڭ ياچەيكا قۇرىلىپ، الدىڭعى جىلداعىدان جەكە ـ جەكە 9000، 5000، 60 مىڭ كوبەيىپ، ۇيىمدىق ورنالاستىرۋ اناعۇرلىم عىلمي، جۇيەلى بولدى. پارتيا قۇرىلىسىن يگەرىپ، اۋىل ـ قىستاقتى گۇلدەندىرۋدى جەبەۋ ىشكەرىلەي ىلگەرىلەتىلىپ، قىستاق پارتيا ۇيىمىنىڭ باستاماشىلار قوسىنى قۇرىلىسى ۇزدىكسىز كۇشەيتىلدى، 485 مىڭ قىستاق پارتيا ۇيىمى شۋجيىنىڭ ىشىندە جوعارى تەحنيكۋم جانە ودان جوعارى ماعلۇماتقا يە بولعاندار %47.6ىن يەلەپ، الدىڭعى جىلداعىدان 3.6 پايىز جوعارىلادى. قىستاقتا تۇراتىن ٴبىرىنشى شۋجيلىككە مىقتىلاردى جىبەرۋ جانە ولاردى ويداعىداي ىستەتۋ ۇزدىكسىز جۇرگىزىلدى، قازىر قىستاقتا تۇراتىن 192 مىڭ ٴبىرىنشى شۋجي بۇكىل ەلدەگى اكىمشىلىك قىستاقتاردىڭ %39.5ىن قامتىدى. پارتيانىڭ نەگىزگى ساتىنى باسقارۋعا باسشىلىق ەتۋ ٴتۇزىلىس ـ مەحانيزمى اناعۇرلىم اقاۋسىزدانىپ، نەگىزگى ساتىنىڭ اۋىرتپالىعىن جەڭىلدەتىپ قۋات ۇستەۋ ىشكەرىلەي ىلگەرىلەتىلىپ، قالا، اۋىل، الەۋمەتتىك اۋماقتارىنىڭ پارتيا قۇرىلىسى قىزمەتىنىڭ كۇشى اناعۇرلىم تولىقتانىپ، پارتيا قۇرىلىسىنىڭ نەگىزگى ساتىنى باسقارۋعا جەتەكشىلىك ەتۋ ونىمدىلىگى ۇزدىكسىز جوعارىلادى. ٴار سالاداعى پارتيا ۇيىمدارىنىڭ قامتىمى ۇزدىكسىز بەكەمدەلىپ، كەڭەيىپ، ورگانداردىڭ، ٴىسورىنداردىڭ، كاسىپورىنداردىڭ جانە قوعامدىق ۇيىمداردىڭ پارتيا قۇرىلىسى قىزمەتىندە تىڭ تابىستارعا قول جەتىپ، نەگىزگى ساتى پارتيا ۇيىمدارىنىڭ ساياسي فۋنكتسياسى مەن ۇيىمدىق فۋنكتسياسى ۇزدىكسىز كۇشەيىپ، پارتيانىڭ ساياسي ارتىقشىلىعى، ۇيىمدىق ارتىقشىلىعى ۇزدىكسىز دامۋ ارتىقشىلىعىنا، باسقارۋ ارتىقشىلىعىنا اينالىپ، پارتيا مەن مەملەكەت قىزمەتى كەلەلى جاعدايىنا قىزمەت وتەۋگە، ەكونوميكانىڭ، قوعامنىڭ جوعارى ساپالى دامۋىن ىلگەرىلەتۋگە قۇدىرەتتى كۇش ۇيىستىردى.
