ساي چي قاتىناستى ٴارى ٴسوز سويلەدى
شينحۋا اگەنتتىگىنىڭ 7 ـ ايدىڭ 7 ـ كۇنى بەيجيڭنەن بەرگەن حابارى. بۇكىل ۇلتتىڭ جاپون شاپقىنشىلارىنا قارسى سوعىسى باستالعاندىعىنىڭ 88 جىلدىعىن اتاپ ٴوتۋ سالتى جانە «ۇلت ازاتتىعى مەن دۇنيە ٴجۇزىنىڭ بەيبىتشىلىگى ٴۇشىن» اتتى نەگىزگى تاقىرىپتىق كورمەنىڭ اشىلۋ سالتى 7 ـ ايدىڭ 7 ـ كۇنى تۇستەن بۇرىن جۇڭگو حالقىنىڭ جاپون شاپقىنشىلارىنا قارسى سوعىسى ەسكەرتكىش سارايىندا وتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ساي چي ٴسوز سويلەدى ٴارى كورمەنىڭ اشىلعاندىعىن جاريالادى.
بەيجيڭدەگى لۋگوۋچياۋ جاعاسى، جۇڭگو حالقىنىڭ جاپون شاپقىنشىلارىنا قارسى سوعىسى ەسكەرتكىش سارايى ايبىندى دا جىم ـ جىرت كورىنەدى. تۇستەن بۇرىن ساعات 9دا سالت باستالدى. جۇڭگو حالىق ازاتتىق ارمياسى اسكەري وركەسترى «ەرىكتىلەر مارشىن» ورىندادى، بۇكىل الاڭداعىلار جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى. سودان كەيىن، بۇكىل الاڭداعىلار ٴۇنسىز تۇرىپ، جۇڭگو حالقىنىڭ جاپون شاپقىنشىلارىنا قارسى سوعىسىندا ەرلىكپەن قۇربان بولعان قۇرباندارعا ٴۇنسىز ازا ٴبىلدىردى.
ساي چي سوزىندە بىلاي دەپ اتاپ كورسەتتى: 88 جىلدىڭ الدىنداعى بۇگىنگى كۇنى جاپونيا ميليتاريزمى قاساقانا جۇڭگو مەن شەتەلدى تىكسىندىرگەن لۋگوۋچياۋ وقيعاسىن تۋدىرىپ، شىمىرىكپەي جۇڭگوعا جالپى بەتتىك شاپقىنشىلىق سوعىس قوزعادى. جۇڭگو ارمياسى مەن حالقى قايراتتانا قارسى تۇردى، بۇكىل ۇلتتىڭ جاپون شاپقىنشىلارىنا قارسى سوعىسى بۇرق ەتە ٴتۇستى ٴارى دۇنيە جۇزىلىك فاشيزمگە قارسى سوعىستىڭ شىعىستاعى نەگىزگى سوعىس مايدانى اشىلدى. جۇڭگو كوممۋنيستىك پارتياسى جاپون شاپقىنشىلارىنا قارسى سوعىستىڭ ەڭ الدىڭعى شەبىندە ەرلىكپەن شايقاس جاساپ، جۇڭگونىڭ جاپون شاپقىنشىلارىنا قارسى سوعىسىنىڭ العا ىلگەرىلەۋ بەتالىسىنا جەتەكشىلىك ەتىپ، بۇكىل ۇلتتىڭ جاپون شاپقىنشىلارىنا قارسى سوعىسىنىڭ بەرىك تىرەگى بولدى، بۇكىل جۇڭحۋا ۇلاندارى قاتارعا تولاسسىز كەلىپ قوسىلىپ، ٴبىر نيەتپەن كۇش قوسىپ، مەملەكەتتىڭ ٴومىر ٴسۇرۋى ٴۇشىن شايقاس جاساپ، ۇلتتىڭ گۇلدەنۋى ٴۇشىن شايقاس جاساپ، ادامزاتتىڭ ادىلەت ىستەرى ٴۇشىن شايقاس جاساپ، جۇڭگو حالقىنىڭ جاپون شاپقىنشىلارىنا قارسى سوعىسىنىڭ ۇلى جەڭىسىنە قول جەتكىزدى، دۇنيە جۇزىلىك فاشيزمگە قارسى سوعىستىڭ جەڭىسى ٴۇشىن كەلەلى ۇلەس قوستى. جۇڭگو حالقىنىڭ جاپون شاپقىنشىلارىنا قارسى سوعىسى جانە دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى قارساڭىندا «ۇلت ازاتتىعى مەن دۇنيە ٴجۇزىنىڭ بەيبىتشىلىگى ٴۇشىن» اتتى نەگىزگى تاقىرىپتىق كورمە ۇسىنىلىپ، جۇڭگو حالقىنىڭ جاپون شاپقىنشىلارىنا قارسى 14 جىل ماشاقاتتى سوعىس جۇرگىزگەن شۇعىلالى بارىسى جالپى كورىنىستىك ۇلگىدە ايگىلەنىپ، وتانشىلدىق تاربيە جانە توڭكەرىستىك ٴداستۇر تاربيەسىن ورىستەتۋ ٴۇشىن ماڭىزدى تۇعىر ازىرلەندى.
ساي چي بىلاي دەدى: جاڭا جورىقتا باس شۋجي شي جينپيڭنىڭ جۇڭگو حالقىنىڭ جاپون شاپقىنشىلارىنا قارسى سوعىسى جانە دۇنيە جۇزىلىك فاشيزمگە قارسى سوعىس جونىندەگى ماڭىزدى بايىمداۋلارىن ىشكەرىلەي ۇيرەنىپ، دايەكتىلەندىرىپ، جاپون شاپقىنشىلارىنا قارسى سوعىس ۇلى رۋحىن زور كۇشپەن اسقاقتاتۋ كەرەك. جۇڭگو كوممۋنيستىك پارتياسىنىڭ باسشىلىعىنا بۇلجىماي تاباندى بولىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ەكىنى قورعاۋى“ باتىل ورىنداۋ؛ جۇڭگو ۇلگىسىندەگى وسىزامانداندىرۋدى بۇلجىماي ىلگەرىلەتىپ، كۇرەس رۋحىن اسقاقتاتىپ، قايراتتانا ٴورىس اشا العا ۇمتىلۋ؛ جۇڭحۋا پەرزەنتتەرىنىڭ ۇلى ىنتىماعىن بۇلجىماي نىعايتىپ، ۇلتتى گۇلدەندىرۋدىڭ تاماشا بولاشاعىن قول ۇستاسا اشۋ؛ ادامزاتتىڭ بەيبىتشىلىك، ادىلەت ىستەرىن بۇلجىماي قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ٴداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، سەنىمدى بەكەمدەپ، ەرلىكپەن العا ىلگەرىلەپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋ جولىندا قۇلشىنا كۇرەس جاساپ، ادامزاتتىڭ بەيبىتشىلىگى مەن دامۋى سىندى ارداقتى ٴىس ٴۇشىن تىڭ دا اناعۇرلىم زور ۇلەس قوسۋ كەرەك.
ساي چي قاتارلى باسشى جولداستار ٴار سالاداعى بۇقارانىڭ ۋاكىلدەرىمەن بىرگە جاپون شاپقىنشىلارىنا قارسى سوعىستاعى قاھارمان قۇرباندارعا گۇل قويدى ٴارى نەگىزگى تاقىرىپتىق كورمەنى ەكسكۋرسيالادى.
ۋاڭ ي، لي شۋلەي، جاڭ يوۋشيا، ۋاڭ شياۋحۇڭ، جاڭ چيڭۋي، ۋ جىڭلۇڭ، ۋاڭ يۇڭ جانە ليۋ جىنلي قاتىناستى. يىن لي باسقاردى.
جاپون شاپقىنشىلارىنا قارسى سوعىسقا قاتىناسقان بەيجيڭدەگى ساقا جاۋىنگەرلەر، ساقا جولداستار جانە جاپون شاپقىنشىلارىنا قارسى سوعىس قولباسشىلارى بالا ـ شاعالارىنىڭ ۋاكىلدەرى، جاپون شاپقىنشىلارىنا قارسى سوعىس قۇرباندارى تۋىس ـ تۋعاندارىنىڭ ۋاكىلدەرى، ورتالىقتاعى پارتيا، ۇكىمەت، ارميانىڭ قاتىستى تاراۋلارىنداعى جانە بەيجيڭ قالاسىنداعى جاۋاپتى جولداستار، ٴارقايسى دەموكراتيالىق پارتيا ـ توپتاردىڭ ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەر ۋاكىلدەرى، استاناداعى ٴار سالاداعى بۇقارا ۋاكىلدەرى قاتارلىلاردان 600دەي ادام قاتىناستى.
«ۇلت ازاتتىعى مەن دۇنيە ٴجۇزىنىڭ بەيبىتشىلىگى ٴۇشىن» اتتى نەگىزگى تاقىرىپتىق كورمە جيىنى 8 بولىككە بولىنگەن، جالپى اۋماعى 12 مىڭ 200 شارشى مەتر بولىپ، 1525 سۋرەت، 3237 مادەني ەسكەرتكىش كورمەگە قويىلدى.
