انار بۇلت \ شينجياڭ گازەتىنىڭ ٴتىلشىسى ۋي يۇڭگۇي
بۇل ٴبىر پارشا وتباسىلىق توپتىق سۋرەت. سۋرەتتە ٴبىر حانزۋ قىز بالا جىميىپ، تاتار شەشەسى جولدىقان ٴۋاليوللانى مەيىرلەنە قۇشاقتاپ تۇر.
قىز بالانىڭ اتى شۋە مينلي، 8 جاسىنان باستاپ جولدىقان ونى ٴوز ۇيىنە اكەلىپ، ٴوز بالاسىنداي ماپەلەپ باقتى. قازىر شۋە مينلي جوعارى مەكتەپتىڭ وقۋشىسى.
7 ـ ايدىڭ 4 ـ كۇنى ”شەكارا بويىنداعى 10 مىڭ شاقىرىمدىق ساپار — اۆتونوميالى رايون قۇرىلعاندىعىنىڭ 70 جىلدىعى كولەمدى جالپىلىق مەديا تىلشىلىك قيمىلى“ سولتۇستىك شينجياڭ گرۋپپاسىنىڭ مۇشەلەرى شونجى اۋدانى داچۋان تاتار اۋىلىنا بارىپ، مەملەكەتتىك ۇلتتار ىنتىماعى، العاباسارلىعىنىڭ ۇلگىسى جولدىقان ٴۋاليوللانىڭ اسەرلى ىزگى ىستەرىن تىڭدادى.
الدىمەن جولدىقان مەن شۋە مينليدىڭ اڭگىمەسىنە توقتالايىق.
وسى ٴبىر تۇرلىشە ۇلت ارا، قانداستىق قاتىناسى جوق ”انا ـ بالا سۇيىسپەنشىلىگى“ 2011 ـ جىلى باستالعان.
جولدىقان داچۋان تاتار اۋىلى قوعامدىق قۇتقارۋ ـ كومەك بەرۋ ورتالىعىنىڭ مەڭگەرۋشىسى. ٴبىر جولى ول حال سۇراۋ بارىسىندا داچۋان تاتار اۋىلى نيۋماۋچۋانزى قىستاعىنداعى 8 جاستاعى قىز بالا شۋە مينليدىڭ اكە ـ شەشەسىنىڭ ناۋقاستانىپ، حالىق ىستەرى تاراۋلارىنىڭ كومەگىنە سۇيەنىپ تۇرمىس كەشىرىپ كەلگەنىن بىلەدى. شۋە مينلي كىشكەنتايىنان جەمسارى اۋدانىنداعى ناعاشى اتاسىنىڭ ۇيىندە تۇرمىس كەشىرگەن، ٴبىراق ناعاشى اتاسىنىڭ جاسى ۇلعايىپ قالعاندىقتان، بالانى باعۋعا ارمانى بار، دارمەنى جوق ەدى.
جولدىقان بالانى اكەلىپ قاراۋ ويىنا كەلەدى، سونىمەن ول جەمسارى اۋدانىنا كەلىپ شۋە مينليمەن كەزدەسەدى.
بيىل 22 جاستاعى شۋە مينليدىڭ ەسىندە جولدىقان شەشەيمەن تۇڭعىش رەت كەزدەسكەن جاعدايى ٴالى دە انىق ەدى: ”ول كىسىنىڭ جاقىنداپ كەلىپ باسىمدى سيپاپ، قولىمدى ۇستاپ سويلەسكەنى ماعان ايرىقشا ىستىق سەزىلدى، شىداي الماي جىلاپ جىبەردىم“.
بالانىڭ كوز جاسى جولدىقاننىڭ جۇرەگىن ەزىلتىپ جىبەردى.
جولدىقان شۋە مينليدى شونجى اۋداندىق 6 ـ باستاۋىش مەكتەپكە اۋىستىرىپ وقىتادى ٴارى شۋە مينليدىڭ ۇيرەنۋ، تۇرمىس قاراجاتىن ارقالايدى. مەرەكە ـ مەيرام كۇندەرى ول شۋە مينليدى ۇيىنە الىپ كەلىپ، بالاعا وتباسىنىڭ مەيىرىن سەزىندىرەدى.
”سول كەزدە مەن كەدەي بالالارعا اقشالاي، زاتتاي جىلۋ اتاۋدان دا ماڭىزدىسى، ولارعا اناسىنداي قامقورلىق جاساۋ جانە ايالاۋ كەرەكتىگىن تانىپ جەتتىم“، ـ دەدى جولدىقان.
سول كەزدە جولدىقاننىڭ ۇلكەن ۇلى ورتالاۋ مەكتەپتە وقيتىن، كىشى ۇلى باستاۋىش مەكتەپتىڭ 1 ـ جىلدىعىنا ەندى تۇسكەن، ٴۇي جۇمىستارى دا اۋىر ەدى، ٴبىراق جولدىقان شۋە مينليگە ەرەكشە ۇقىپتىلىقپەن قارايلاستى.
”وسى ۇيدە مەن قالتقىسىز سۇيىسپەنشىلىككە بولەندىم، اكە ـ شەشەم دە، اعام مەن باۋىرىم دا بار، ولار ماعان ەرەكشە كوڭىل بولەدى، مەنى ەرەكشە ايالايدى“. شۋە مينلي بىلاي دەدى: ”ماعان ەرەكشە تەرەڭ اسەر قالدىرعانى، جاڭا عانا مەكتەپ جاتاعىنا جاتقان ەكىنشى كۇنى كەشكى ساعات 10نان اسقاندا، اكە ـ شەشەم مەكتەپكە كەلىپ، ماعان ارناۋلى كىتاپ قاپتايتىن قاعاز الا كەلدى. ول كەزدە مەكتەپتىڭ شامدارى ەرتە سونەتىن، جاتاعىم قاپ ـ قاراڭعى ەدى، اكە ـ شەشەم كاريدورداعى شام جارىعىمەن كىتاپتارىمدى قاپتاپ بەردى“.
2022 ـ جىلى شۋە مينلي شينجياڭ شىفان داشۋەسىنىڭ حيميا كاسىبىنە وقۋعا تۇسەدى. جولدىقان شۋە مينليدى داشۋەگە اتتاندىرعان كۇنى شۋە مينلي شەشەسىنىڭ قولىن بوساتقاننان كەيىن قايىرىلىپ قاراۋعا باتىنا المادى. ”بۇرىلىپ شەشەمە قاراسام، جىلايمىن با دەپ الاڭدادىم“، الايدا ”شەشەم بولعاندىقتان، مەنىڭ جان دۇنيەم كۇش ـ قۋاتقا تولى بولدى“، ـ دەدى ول.
2024 ـ جىلى جولدىقاننىڭ كەنجە ۇلى بەيجيڭ داشۋەسىنە قابىلدانادى. بالاسىن بەيجيڭگە وقۋعا اپارعاندا، جولدىقان شۋە مينليدى دە ارنايى ەرتىپ الدى. جولدىقان بىلاي دەدى: ”ٴبىز ٴبىر ٴۇيلى جاندارمىز، استانا بەيجيڭگە بارساق تا بىرگە بارۋىمىز كەرەك“.
جولدىقان اۋىلداعى بالالارعا دا كوپ كوڭىل ٴبولدى. 2014 ـ جىلى داچۋان تاتار اۋىلى ”مەيىربان انالار“ ٴوزارا كومەكتەسۋ قوعامى قۇرىلىپ، جولدىقان قوعام باستىعى بولدى.
قوعام مەرزىم بويىنشا حال سۇراۋ قيمىلىن ورىستەتىپ، شۋە مينلي سياقتى كوپتەگەن بالالارعا قوعامنىڭ مەيىرىن تولىق سەزىندىردى.
داچۋان تاتار اۋىلى داچۋانحۋ قىستاعىندا تۇراتىن روزا سەرجان تۋما اقىل ـ پاراسات كەمىستىگى اۋرۋىنا شالدىققان، جولدىقان مۇنى بىلگەننەن كەيىن روزانىڭ وتباسىنداعىلاردى سەنىم ورناتۋعا بەلسەنە ٴناسيحاتتادى. قۇلشىنۋ ارقىلى جولدىقان ٴساتتى تۇردە روزاعا ەڭ تومەنگى تۇرمىستى قامتاماسىزداندىرۋ جانە ساۋىقتىرۋ نىسانىن ٴوتىنىش ەتىپ الىپ بەردى ٴارى روزانى شينجياڭ حالىق ىستەرى ساۋىقتىرۋ شيپاحاناسىنا ەرتىپ بارىپ ساۋىقتىرۋ بويىنشا ەمدەتتى.
جولدىقاننىڭ ىزگى ىستەرى سانسىز ادامدى اسەرلەندىردى، اينالاسىنداعىلاردى جىگەرلەندىردى.
11 جىلدان بەرى، ”مەيىربان انالار“ ٴوزارا كومەكتەسۋ قوعامىنىڭ مۇشەلەرى 158گە جەتىپ، ەرىكتى قىزمەت وتەۋگە 23 مىڭ ادام (رەت) قاتىناستى، جيىنى 64 مىڭ ساعات ەرىكتى قىزمەت وتەپ، 2000 ادام (رەت) جۋىق قيىنشىلىعى بار بۇقاراعا كومەكتەستى، جيىنى 400 مىڭ يۋان اقشالاي جانە زاتتاي جىلۋ اتادى. ”مەيىربان انالار“ ٴوزارا كومەكتەسۋ قوعامى سانجى حۇيزۋ اۆتونوميالى وبلىسى جاعىنان جەلەكتىلەر وزات كوللەكتيۆى بولىپ باعالاندى.
داچۋان تاتار اۋىلىنىڭ تۇرعىنى ٴمانيرا ٴناسيحات وسى مەيىر جەتكىزۋ توبىنىڭ ٴبىر مۇشەسى.
”مەن ورتالاۋ مەكتەپتە وقىپ جۇرگەن كەزىمدە شەشەم اۋرۋدان قايتىس بولىپ، ۇيدەگى جيعان ـ تەرگەننىڭ ٴبارىن جۇمساپ تاۋىستىق. سول كەزدە جولدىقان شەشەي ماعان كومەكتەستى. مەن سول كەزدەن باستاپ مەيىرىمنىڭ قارىمجىسىن مەيىرىممەن قايتارۋعا بەل بايلادىم“، ـ دەدى ٴمانيرا.
جولدىقان مەن ”مەيىربان انالار“ ٴوزارا كومەكتەسۋ قوعامىنىڭ كومەگىندە ٴمانيرا شاشتارازحانا اشتى ٴارى قوعامعا مۇشە بولدى. تالاي جىلدان بەرى، ول اۋىلداعى تۇرمىسىندا قيىنشىلىق بار قىستاق تۇرعىندارىنىڭ شاشىن تەگىن الىپ، قىستاق تۇرعىندارىنىڭ جاقسى باعاسىنا يە بولدى. بۇدان سىرت، ول تاعى ناۋقاس بالا ماحمۇت عالىمنىڭ وتباسىمەن جۇپ قۇرادى، ۇنەمى تارتۋ ـ تارالعى الىپ ماحمۇتقا بارىپ حال سۇراپ، بالانىڭ كوڭىلىندەگى ”مەيىربان اناعا“ اينالدى.
”’مەيىربان انالار‘ قوسىنى ۇزدىكسىز زورايىپ، كومەكتەسەتىن بۇقارا دا بارعان سايىن كوبەيدى“، جولدىقان: ”ٴبىز اناردىڭ دانىندەي تىعىز ۇيىسىپ، ويدى ٴبىر اراعا شوعىرلاندىرىپ، كۇشتى ٴبىر اراعا جۇمساۋىمىز كەرەك“، ـ دەدى.
ۇشقىننان جالىن لاۋلاتىپ، مەيىرمەن قورعادى. شونجى اۋدانىنىڭ قالا، اۋىلدارىندا ”قىزىل انار“، ”مەيىر ـ شاپاعات بىرلەستىگى“ قاتارلى 30 نەشە الەۋمەتتىك يگىلىك ۇجىمى قۇرىلىپ، اناعۇرلىم كوپ ادام سانالى تۇردە ىنتىماقتاسا العا باساتىن، حالىق ٴۇشىن قىزمەت ىستەيتىن ”اناردىڭ دانىنە“ اينالدى.
