شينحۋا اگەنتتىگىنىڭ 7 ـ ايدىڭ 28 ـ كۇنى بەيجيڭنەن بەرگەن حابارى. جاقىندا جۇڭگو كوممۋنيستىك پارتياسى ورتالىق كوميتەتى كەڭسەسى، مەملەكەتتىك كەڭەس كەڭسەسى «بالا باعۋ قوسىمشا قاراجاتىن بەرۋ ٴتۇزىمىن اتقارۋ جوباسىن» (تومەندە قىسقارتىلىپ «جوبا» دەلىنەدى) باسىپ تاراتتى ٴارى حابارلاندىرۋ شىعارىپ، جەر ـ جەردەن، تاراۋلاردان ٴىس جۇزىندىكپەن بىرلەستىرىپ مۇقيات دايەكتىلەندىرۋدى، تياناقتاندىرۋدى تالاپ ەتتى.
«جوبادا» مىنالار العا قويىلدى: 2025 ـ جىلى 1 ـ ايدىڭ 1 ـ كۇنىنەن باستاپ زاڭ، زاڭ ـ ەرەجەلەردەگى بەلگىلەمەلەرگە ۇيلەسىمدى تۋىلعان 3 جاستان تومەن نارەستەلەرگە، سابيلەرگە 3 جاسقا تولعانعا دەيىن قوسىمشا قاراجات تاراتىلادى.
بالا باعۋ قوسىمشا قاراجاتى جىل بويىنشا تاراتىلادى، قازىرگى كەزەڭدە مەملەكەتتىڭ نەگىزدىك ولشەمى ٴار بالاعا جىلىنا 3600 يۋان بولادى. مۇندا 2025 ـ جىلى 1 ـ ايدىڭ 1 ـ كۇنىنەن بۇرىن تۋىلعان، 3 جاسقا تولماعان نارەستەلەرگە، سابيلەرگە تاراتىلۋعا ٴتيىستى قوسىمشا قاراجات اي سانىنا شاعىپ تاراتىلادى. بالا باعۋ قوسىمشا قاراجاتى ٴتۇزىمى بەلگىلەمەسى بويىنشا تاراتىلعان بالا باعۋ قوسىمشا قاراجاتىنان جەكەلىك تابىس سالىعى كەشىرىم ەتىلەدى. ەڭ تومەنگى تۇرمىسى قامتاماسىزداندىرىلاتىن وبيەكتىلەر، ەرەكشە قيىنشىلىعى بار ادامدار قاتارلى قۇتقارۋ ـ كومەكتەسۋ وبيەكتىلەرىن تۇراقتاندىرعاندا، بالا باعۋ قوسىمشا قاراجاتى وتباسىنىڭ نەمەسە جەكەنىڭ كىرىسىنە قوسىلىپ ەسەپتەلمەيدى.
بالا باعۋ قوسىمشا قاراجاتىن نارەستەلەردىڭ، سابيلەردىڭ اتا ـ اناسىنىڭ بىرەۋى نەمەسە باسقا دا قامقورشىسى بەلگىلەمە بويىنشا نارەستەلەردىڭ، سابيلەردىڭ نوپوسى تۇرعان جەردە ٴوتىنىش ەتىپ الادى.
ورتالىق قازىنا 2025 ـ جىلدان باستاپ ورتاق قازىنا ٴىس ۇقىعى اۋىستىرىپ تولەۋ نىسانى ”بالا باعۋ قوسىمشا قاراجاتى كومەك قاراجاتىن“ ورنالاستىردى.
