جاڭا داۋىردە ەسەلى ەڭبەك ٴسىڭىرىپ، ارمان قۋىپ بولاشاققا بەت الدى
— پارتيا ورتالىق كوميتەتىنىڭ، مەملەكەتتىك كەڭەستىڭ تاڭداۋلى مامانداردىڭ، دارىندىلاردىڭ ۋاكىلدەرىن بەيدايحىدا دەمالۋعا ۇسىنىس ەتكەندىگى جونىندە ەستەلىك
شينحۋا اگەنتتىگىنىڭ ٴتىلشىسى شيۇڭ فىڭ
شىلىڭگىر شىلدە كەزىندەگى بەيدايحى جاسىل جەلەك جامىلعان، شاعالالار شارق ۇرىپ ٴجۇر.
8 ـ ايدىڭ 1 ـ كۇنىنەن 7 ـ كۇنىنە دەيىن، پارتيا ورتالىق كوميتەتىنىڭ، مەملەكەتتىك كەڭەستىڭ ۇسىنىسىمەن جوعارى عىلىم ـ تەحنولوگيا سالاسى، فيلوسوفيا، قوعامدىق عىلىمدار سالاسىنداعى مامان جانە نەگىزدىك زەرتتەۋ سالاسىنداعى جاس دارىندىلار قاتارلى 60 ادام بوحاي تەڭىزىنىڭ جاعالاۋىندا باس قوسىپ، بەيدايحىداعى دەمالىس قيمىلىنا قاتىناستى.
”جاڭا داۋىردە ۇلەس قوسۋدى“ نەگىزگى تاقىرىپ ەتكەن وسى رەتكى دەمالىس قيمىلىنىڭ ماقساتى — مامانداردى ايبىندى وتان تابيعاتىنان اسەر الىپ، مەملەكەت سۇيىسپەنشىلىگىن ىشكەرىلەي جەتىلدىرىپ، وتان ٴۇمىتىن اقتاۋدى مۇرات ەتىپ، بەرىلە شوگەلدىكپەن ىستەپ، جاڭا بيىك شىڭعا قۇلشىنا ورلەپ، ٴداۋىردىڭ تىڭ تاراۋىن جازا تۇسۋگە جىگەرلەندىرۋ.
دارىندىلار جينالسا، مەملەكەت گۇلدەنىپ ـ كوركەيەدى. ۇلتتى گۇلدەندىرۋدىڭ ايبىندى ساپارىنا بەت الىپ، ماماندار ەرلىكپەن ٴداۋىردىڭ الدىڭعى لەگىندە تۇرىپ، كامىل سەنىم، كوكىرەك تولى ىستىق ىقىلاس پەن تۋلاعان تولقىن ٴوزارا توعىسىپ، اسەرلى ەكپىندەي ىلگەرىلەۋ كۇي تاراۋىنا اينالىپ، كوگىلدىر تەڭىز بەن زەڭگىر كوكتە ۇزاققا دەيىن جاڭعىردى.
تەلەگەي تەڭىزدە بالىقتار ەركىن جۇزەدى —
شەكسىز كەڭ جاڭا ٴداۋىر ساحناسىندا قابىلەتتەرىن ايگىلەدى
قالىڭ اعاش جەلمەن تەربەلىپ، شەگىرتكە داۋىسى ەستىلىپ تۇردى. ماماندار ٴيىر ـ قيىر كەتكەن تەڭىز جاعاسىندا بىرگە سەرۋەندەپ، كوڭىلدى اڭگىمەلەرىندە قويۋ مەملەكەت سۇيىسپەنشىلىگى قامتىلىپ جاتتى.
پارتيا ورتالىق كوميتەتى، مەملەكەتتىك كەڭەس اتىنان تاڭداۋلى مامانداردىڭ ۋاكىلدەرىن بەيدايحىدا دەمالۋعا ۇسىنىس ەتۋ — پارتيا مەن مەملەكەتتىڭ دارىندىلار قىزمەتىندەگى ٴبىر ماڭىزدى تۇزىمدىك ورنالاستىرۋى. عىلىم ـ تەحنولوگيانىڭ الدىڭعى لەگىن باستايتىن اتويشىلاردان فيلوسوفيا، قوعامدىق عىلىمداردا قىرپۋلى ەڭبەك ەتكەن ساڭلاقتارعا، ودان نەگىزدىك زەرتتەۋگە جىڭىشكەلىكپەن ۇڭىلگەن جاڭا كۇشتەرگە دەيىن... وسى رەت ۇسىنىس ەتىلگەن ماماندار ٴوز سالالارىندا كورنەكتى ناتيجەگە قول جەتكىزگەن پارتيا مەن مەملەكەتتىڭ تاڭداۋلى دارىندىلارىنىڭ ۋاكىلدەرى بولىپ تابىلادى.
”دەمالىس — ۇيىم ورنالاستىرعان ’ٴماجبۇري دەمالىس‘، بۇل جەردىڭ قورشاعان ورتاسى جايلى، قىزمەت كورسەتۋى كوڭىلدەگىدەي، بارلىق جەرىنەن مەيىرلى قامقورلىق مەن مۇندالاپ، پارتيا مەن مەملەكەتتىڭ دارىندىلاردى قاستەرلەۋى مەن قۇرمەتتەۋى ايگىلەنىپ تۇر“، ـ دەدى بەيجيڭ داشۋەسى بويا مىنبەرىنىڭ پروفەسسورى چيان چىڭدان.
كۆانتتىق عىلىم ـ تەحنولوگيانىڭ كوشباسشىسى، جۇڭگو عىلىم ـ تەحنولوگيا داشۋەسىنىڭ پروفەسسورى، جۇڭگو عىلىم اكادەمياسىنىڭ اكادەميگى پان جيانۋي دەمالىس شاقىرتۋىن تاپسىرىپ العاندا، مەملەكەتتىڭ ٴتۇيىندى زەرتتەۋ ـ اشۋ مىندەتىنىڭ الدىڭعى شەبىندە شايقاس جاساپ جاتقان ەدى. تالاي جىلدان بەرى، ول ۇجىمدى باستاپ كۆانتتىق حابارلاسۋ جانە كۆانتتىق ەسەپتەۋ وزەكتى تەحنيكاسىندا ۇزدىكسىز تابىسقا جەتىپ، ەلىمىزدىڭ وسى سالادا حالىقارالىق وزىق قاتارعا ٴوتۋىن ىلگەرىلەتتى. ”بۇل قامقورلىق پارتيا مەن مەملەكەتتىڭ دارىندىلاردى قادىرلەۋ، دارىندىلارعا ٴمان بەرۋ سۇيىسپەنشىلىگىن ايگىلەدى، اسىرەسە، بۇل جاڭا ٴداۋىردىڭ ٴبىز عىلىم ـ تەحنولوگيا قىزمەتكەرلەرىنە جۇكتەگەن بورىشىنىڭ ۇندەۋى بولىپ تابىلادى“، ـ دەدى پان جيانۋي.
ەل تىنىشتىعىنىڭ ٴتۇپ نەگىزى دارىندىلاردى ىستەتە بىلۋدە. پارتيا 18 ـ قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى دارىندىلار قىزمەتىن ەل باسقارۋدىڭ ماڭىزدى ورنىنا قويىپ، پارتيانىڭ دارىندىلار قىزمەتىنە باسشىلىعىن جاپپاي كۇشەيتىپ، دارىندىلاردا قۋاتتى ەل ستراتەگياسىن ىشكەرىلەي اتقارىپ، وقۋ ـ اعارتۋ، عىلىم ـ تەحنولوگيا، دارىندىلار ىستەرىنىڭ دامۋىن ٴبىر تۇلعالى ىلگەرىلەتىپ، دارىندىلار مولىنان شىعاتىن، اركىم قابىلەتىن تولىق ساۋلەلەندىرەتىن، قابىلەتتى تولىق پايدالاناتىن جالىندى جاعداي قالىپتاستى.
8 ـ ايدىڭ 3 ـ كۇنى باس شۋجي شي جينپيڭنىڭ تاپسىرۋىمەن جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ساي چي بەيدايحىدا جازعى دەمالىستاعى ماماندارعا امانداستى. ول بىلاي دەپ اتاپ كورسەتتى: مامانداردىڭ، دارىندىلاردىڭ عالىمدار رۋحىن زور كۇشپەن اسقاقتاتىپ، ٴداۋىردىڭ اۋىر مىندەتىن ىرىقتىلىقپەن ارقالاپ، ٴورىس اشا العا ىلگەرىلەپ، جان قيارلىقپەن كۇرەس جۇرگىزىپ، وقۋ ـ اعارتۋدا قۋاتتى ەل، عىلىم ـ تەحنولوگيادا قۋاتتى ەل، دارىندىلاردا قۋاتتى ەل قۇرىپ، پارتيا مەن مەملەكەت ىستەرىنىڭ دامۋىن ىلگەرىلەتۋگە تىڭ دا اناعۇرلىم زور ۇلەس قوسۋىن ٴۇمىت ەتەمىن.
ماماندار دەر كەزىندە ٴار ٴتۇرلى تاسىلمەن پارتيا ورتالىق كوميتەتىنىڭ ىقىلاستى تاپسىرماسىن جەتكىزىپ، ۇجىمىنداعىلارعا، كاسىپتەستەرىنە اسەرلەرىن ايتىپ، ٴبولىسىپ، ”مەملەكەتتىڭ زور ٴىسىن“ كوكەيدە ساقتاۋدىڭ، ٴورىس اشا ەكپىندەي ىلگەرىلەۋگە ۇمتىلۋدىڭ تەلەگەي كۇشىن ۇيىستىردى.
ايبىنمەن قۇلاشىن كەڭ جايعان ۇلى داۋىردە تۇرعاندا، ارمانعا جەتۋدىڭ بولاشاعى شەكسىز نۇرلى، دارىندى ايگىلەۋدىڭ ساحناسى شەكسىز كەڭ بولماق.
شىنجىن مەديتسينا عىلىم اكادەمياسىنىڭ باستىعى، جۇڭگو عىلىم اكادەمياسىنىڭ اكادەميگى يان نيڭ مىنانى ٴبىلدىردى: وتانعا ورالعان كوپتەگەن دارىندى بۇدان بۇرىنعى ەل ىشىندەگى ۇزاق ۋاقىتتىق قورى جانە تانىس ورتاسى كەمشىل بولعاندىقتان قىزمەت جانە تۇرمىس بارىسىندا وزگەشە سىن ـ سايىستارعا ٴدوپ كەلۋى مۇمكىن. سوندىقتان ولاردىڭ ”جىلدام توعىسۋى مەن دامۋىنا دالمە ـ ٴدال قولداۋ كورسەتۋ“ ايرىقشا ماڭىزدى بولماق.
”مەن مەملەكەتتىڭ شەتەلدەن دارىندىلاردى ەنگىزۋ، الىپ قالىپ ىستەتۋ جانە دامىتۋ ماسەلەسىن جۇيەلىلەندىرىپ شەشىپ، دارىندىلاردىڭ دامۋىنا ەڭ لايىقتى ساحنا تۇلعالاۋعا كۇش سالىپ وتىرعاندىعىن سەزىندىم“. ول بىلاي دەپ قارادى: ”قازىر ەلىمىز دارىندىلار ٴوز قابىلەتتەرىن بارىنشا ايگىلەيتىن التىن وراي مەزگىلىندە تۇر، ٴار ٴتۇرلى دارىندىلاردىڭ وتانعا ورالىپ جاڭالىق اشۋىنىڭ، شارۋاشىلىق قۇرۋىنىڭ ۋاقىت، شارت ـ جاعداي، جۇرت تىلەگى جاقتارىنان ورايلى ٴساتى تۋىپ وتىر“.
جۇڭگو ۇلگىسىندەگى وسىزامانداندىرۋ قۇرىلىسىنىڭ ٴورىستى ورايى الدىندا، پارتيا مەن مەملەكەتتىڭ بارىنشا سەنىمى مەن شىنايى تىلەگىن ارقالاپ وتىرعان ماماندار وسى رەتكى دەمالىستى ارمانعا قانات قاعۋداعى ”قۋات جيناۋ“ دەپ قاراپ، بيىك شىڭعا ەرلىكپەن شىعۋعا كۇش ـ قۋات توپتايدى.
شالقار تەڭىزدە ارمان قۋدى —
ناقتى ىستەۋدى ەسكەك ەتىپ، ەكپىندەي العا ۇمتىلىپ، شالقار تەڭىزدە ارمان قۋدى
كوز جەتكىسىز يانشان تاۋى، كەڭ كوسىلگەن بوحاي تەڭىزى. جۇڭگو ۇلى قورعان مۇراجايى جياۋشان ۇلى قورعانىنىڭ قويناۋىندا ۇزاققا سوزىلعان جاسىل دالامەن بىتە قايناسىپ جاتىر.
8 ـ ايدىڭ 4 ـ كۇنى تۇستەن بۇرىن ماماندار وسى اراعا كەلىپ ەكسكۋرسيالادى. كورمە زالىنداعى باعالى مادەني ەسكەرتكىشتەر ۇلى قورعاننىڭ مىڭ جىلدىق تاريحىنان سىر شەرتىپ، جۇڭحۋا ۇلتىنىڭ ۇزىلمەي جالعاسقان رۋحاني سۋرەتتەر جيناعىن سۇلبالاۋدا.
مۇراجايدىڭ ىشىندەگى الىپ اينەك تەرەزەنىڭ الدىندا تۇرعانىڭىزدا، يرەلەڭدەگەن ايباتتى جياۋشان ۇلى قورعانى كوز الدىڭىزعا كەلەدى. جۇڭگو اسەمونەر باس باسپاسىنىڭ بۇرىنعى باستىعى ۋاڭ جياميڭ تەرەڭ اسەرمەن بىلاي دەدى: ”ۇلى قورعان تاس كەرپىشتەن جينالعان توسقاۋىل عانا ەمەس، تىپتەن، جۇڭحۋا ۇلتىنىڭ رۋحاني تىرەگى. قازىرگى زامانعى فيلوسوفيا، قوعامدىق عىلىمدار سالاسىنداعى زيالى رەتىندە، جۇڭحۋا ۇلتىنىڭ رۋحاني ۇلى قورعانىن سومداۋعا كەرپىش بولىپ قالانۋ — ٴبىزدىڭ بۇلتارماس جاۋاپكەرشىلىگىمىز“.
دەمالىس قيمىلى ماماندارعا قىسقا دامىلداۋ ازىرلەپ قانا قويماي، ونان دا ماڭىزدىسى، سالا اتتاعان اۋىس ـ كۇيىس تۇعىرىن ازىرلەدى. اۆتوكولىكپەن كەتىپ بارا جاتقان كەزدەرىندە، داستارقان ۇستىندەگى اڭگىمەدە نەمەسە اۋلاداعى اعاش ساياسىندا وتىرعاندا، قايراڭدا سەرۋەندەپ جۇرگەندە بولسىن، ماماندار كوڭىل سەرگىتۋمەن بىرگە، يدەيالىق جاقتان پىكىر الماستىرىپ، اسەرلەرىن ٴبولىستى.
پارتيا 20 ـ قۇرىلتايىنىڭ بايانداماسىندا دۇنيە ٴجۇزى عىلىم ـ تەحنيكاسىنىڭ الدىڭعى لەگىن بەتكە الۋعا، ەكونوميكانىڭ نەگىزگى شايقاس مايدانىن بەتكە الۋعا، مەملەكەتتىڭ ماڭىزدى قاجەتىن بەتكە الۋعا، حالىقتىڭ ٴومىرىن، سالاماتتىعىن بەتكە الۋعا تاباندى بولىپ، جوعارى دەڭگەيلى عىلىم ـ تەحنولوگيادا ٴوز كۇشىنە سۇيەنۋدى، ٴوزىن ـ ٴوزى الەۋەتتەندىرۋدى جەدەل جۇزەگە اسىرۋ العا قويىلدى.
قيان ـ كەسكى بەلدەسۋلەر ٴجۇرىپ جاتقان جاساندى زەردە سىندى الدىڭعى لەكتىك سالادا شاڭحاي جاساندى زەردە تاجىريبەحاناسىنىڭ مەڭگەرۋشىسى، باس عالىم جوۋ بوۋىن بىلاي دەپ ىشكەرىلەي تالداۋ جاسادى: ”جاساندى زەردە بولاشاققا باستاماشىلدىق ەتەتىن ستراتەگيالىق تەحنولوگيا رەتىندە، وعان قاتىستى باسەكە ٴمانى جاعىنان العاندا، بولاشاق دامۋ بيىگىن يەلەۋ باسەكەسى. قازىرگى ۋاقىتتا كەلەلى ۇيىمدىق ۇلگىدە جاڭالىق اشۋ ارقىلى ٴبىر توپ ستراتەگيالىق عالىمدى بايقاۋ، تاڭداۋ ٴارى جەتىلدىرۋ اسا قاجەت“.
جۇڭگو مەديتسينا عىلىم اكادەمياسى وسپە اۋرۋلارى شيپاحاناسى دارىلەردى كلينيكالىق سىناقتان وتكىزۋ زەرتتەۋ ورتالىعىنىڭ مەڭگەرۋشىسى، جۇڭگو ينجەنەريا اكادەمياسىنىڭ اكادەميگى شۇي بيڭحى ٴوز باسىنان وتكەرۋشى تۇرعىسىنان اسەرىن ٴبولىسىپ بىلاي دەدى: ”پارتيا 18 ـ قۇرىلتايىنان بەرى، ەلىمىزدەگى راكقا قارسى دارىلەر بۇرىنعى يمپورتقا سۇيەنۋدەن شەتەل كاسىپورىندارىنىڭ كلينيكالىق سىناقتان وتكىزۋىنە وكىلەتتىك بەرۋگە دەيىنگى، حالىقارالىق عىلىم ساحناسىندا جۇڭگولىق مامانداردىڭ نەكەن ـ ساياق بولۋىنان بۇگىنگى تاڭدا كوپتەگەن جۇڭگو وقىمىستىلارىنىڭ نەگىزگى تاقىرىپتىق باياندامادا نەگىزگى رول الۋىنا دەيىنگى وزگەرىستەر ٴدال ەلىمىز دارىندىلارى دەڭگەيىنىڭ بارعان سايىن حالىقارانىڭ مويىنداۋىنا يە بولىپ جاتقاندىعىنىڭ بەينەسى“.
باسقارۋدىڭ ارقاۋى — دارىندى جەتىلدىرۋدى ماڭداي الدى ورىنعا قويۋ. بولاشاققا كوز جىبەرسەك، اناعۇرلىم كوپ جاس دارىندىنى جەتىلدىرۋدى جەبەۋ ٴبىر ٴتۇرلى ستراتەگيالىق مىندەت. وسى رەتكى بەيدايحىدا دەمالۋ قيمىلىنا 40 جاستان تومەن 8 مامان، دارىندى ۋاكىلى قاتىناستى، ەڭ جاسى 33 جاستا.
”دەمالىس قيمىلىنا ۇسىنىسپەن قاتىناسۋ پارتيا مەن مەملەكەتتىڭ جاس عىلىم ـ تەحنولوگيا دارىندىلارىنا كوڭىل بولەتىندىگىن ايگىلەپ قانا قويماي، نەگىزدىك زەرتتەۋگە دە باسا ٴمان بەرەتىندىگىن ايگىلەدى“. جىجياڭ داشۋەسىنىڭ چيۋشى ەرەكشە ۇسىنىس ەتىلگەن پروفەسسورى فىڭ جياندۇڭ بىلاي دەدى: ”ەلىمىزدىڭ عىلىم ـ تەحنولوگيادا ٴوز كۇشىنە سۇيەنۋىن، ٴوزىن ـ ٴوزى الەۋەتتەندىرۋىن ىلگەرىلەتۋدە جاس عىلىم ـ تەحنولوگيا قىزمەتكەرلەرى جاڭا ٴداۋىر بورىشىن ارقالاپ وتىر، ٴسوز جوق، نەگىزگى كۇش بولىپ، ىرىقتىلىقپەن جاۋاپكەرشىلىك ارقالاپ، عىلمي زەرتتەۋدىڭ قيىن ماسەلەلەرىنە باتىلدىقپەن سايىس جاريالاپ، جۇرەكتىلىكپەن قيىن تۇيىندەردى شەشىپ، عالىمدار رۋحىن مەملەكەت ستراتەگياسىنا قىزمەت كورسەتۋدەگى ناقتى ارەكەتكە اينالدىرۋ كەرەك“.
جوعارى ساپالى دامۋدى جۇزەگە اسىرۋدىڭ تەتىگى — عىلىم ـ تەحنولوگيادا جاڭالىق اشۋعا سۇيەنۋ، ونىڭ وزەكتى فاكتورى دارىندىلار بولىپ تابىلادى. بىرنەشە كۇننەن بەرى، كوپشىلىك قايتكەندە الەمدىك باسەكەلىك قابىلەتكە يە دارىندىلار ٴتۇزىمى جۇيەسىن جەدەل قالىپتاستىرۋ جونىندە كەڭ كولەمدە پىكىر اۋىستىرىپ، سىندارلى اقىل ـ كەڭەس بەردى.
”قازىرگى ۋاقىتتاعى كاسىپ سالاسى دامۋىنىڭ ٴتۇيىنى كولەمدى كەڭەيتۋدەن جوعارى ساپالى دامۋعا قاراي ويىستى. دارىندىلاردى باۋلۋدىڭ تەتىگى — مەملەكەتتىڭ ۇزاق بولاشاقتىق دامۋىنا تىرەك بولاتىن ستراتەگيالىق دارىندىلار كۇشىن قالىپتاستىرۋ“، ـ دەدى چي ـ انشين عىلىم ـ تەحنولوگيا توبىنىڭ ٴتوراعاسى ۋ يۇنكۇن.
جۇڭگو تەلەگرافىنىڭ باس عالىمى، جاساندى زەردە اكادەمياسىنىڭ باستىعى لي شۋەلۇڭ بىلاي دەپ قارادى: دارىندىلاردىڭ وتانشىلدىق تاربيەسىن كۇشەيتىپ، جاستاردى جۇرەكتىلىكپەن ىستەتىپ، ولارعا ٴوز قابىلەت ـ دارىندارىن ايگىلەۋىنە تۇعىر جانە بايلىق جاعىنان اناعۇرلىم كوپ قولداۋ كورسەتۋ، سونىمەن قاتار ٴوندىرىستىڭ، وقىتۋدىڭ، زەرتتەۋدىڭ توعىسۋىن تەرەڭدەتۋ ارقىلى بىرلەسىپ باۋلۋدى كۇشەيتىپ، اناعۇرلىم كوپ تاڭداۋلى جاس دارىندىنىڭ اعالاپ العا شىعۋىنا مۇمكىندىك جاساۋ كەرەك.
باتىلدىقپەن ٴداۋىر سەركەسى بولدى —
پارتيا مەن مەملەكەتتىڭ شىنايى قامقورلىعىن قۋاتتى قوزعاۋشى كۇشكە اينالدىردى
ايبىندى شانحايگۋاندا ماماندار قاشاعا سۇيەنە الىسقا كوز جىبەرگەندە، شەكسىز كوگىلدىر تولقىن كوز الدارىنا كەلىپ، كوڭىلدەرىن وتان ٴۇمىتىن اقتاپ، باتىلدىقپەن بيىك شىڭعا شىعۋ سىندى اسقاق ارمان كەرنەدى.
”پارتيا 20 ـ كەزەكتى ورتالىق كوميتەتى ٴۇشىنشى جالپى ٴماجىلىسىنىڭ وقۋ ـ اعارتۋ، عىلىم ـ تەحنولوگيا، دارىندىلار ٴتۇزىلىسىن، مەحانيزمىن ٴبىر تۇلعالاندىرۋ رەفورماسىن ٴبىر تۇتاس جوسپارلاپ ىلگەرىلەتۋدى العا قويۋى پارتيا ورتالىق كوميتەتىنىڭ دارىندىلاردا قۋاتتى ەل قۇرىلىسىنا بارىنشا ٴمان بەرەتىندىگىن جانە ول جونىندەگى ستراتەگيالىق جوباسىن تولىق ايگىلەدى. كەلەسى قادامداعى تەتىك تىڭعىلىقتى ارەكەتتە، اۋەلگى جاڭالىق اشۋدىڭ جەتكىلىكسىزدىگى، شەشۋشى، وزەكتى تەحنولوگيانىڭ باسقالاردىڭ ىقپالىنا ۇشىراۋى سياقتى بوگەتتەردى، قيىندىقتاردى شوعىرلى تۇردە شەشىپ، جوعارى دەڭگەيلى عىلىم ـ تەحنولوگيادا ٴوز كۇشىنە سۇيەنۋدى، ٴوزىن ـ ٴوزى الەۋەتتەندىرۋدى جەدەل جۇزەگە اسىرۋ كەرەك“، ـ دەدى بەيجيڭ اۆياتسيا، عارىش داشۋەسى ماتەريالدىق فيزيكا فاكۋلتەتىنىڭ مەڭگەرۋشىسى ليۋ جىچي.
”2035 ـ جىلى زاڭمەن باسقارىلاتىن مەملەكەتتى، زاڭمەن باسقارىلاتىن ۇكىمەتتى، زاڭمەن باسقارىلاتىن قوعامدى نەگىزىنەن قۇرىپ شىعۋعا تاعى 10 جىل ۋاقىت بار، مىندەت توتەنشە ماشاقاتتى“. جۇڭگو قوعامدىق عىلىمدار اكادەمياسى عىلىم سالاسى كوميتەتىنىڭ مۇشەسى لي لين مىنانى ٴبىلدىردى: جۇڭگو ۇلگىسىندەگى وسىزامانداندىرۋ قۇرىلىسىنا قىزمەت كورسەتۋدە زاڭمەن باسقارۋدىڭ ەكونوميكا، ساياسي، مادەنيەت، قوعام، ەكولوگيالىق وركەنيەت قۇرىلىسىمەن سايكەستى بىرگە العا باسۋىن ىلگەرىلەتىپ، ۇلتتى گۇلدەندىرۋ ۇلى ٴىسى ٴۇشىن ٴتۇبىردى بەكەمدەيتىن، مەجەنى ورنىقتىراتىن، ۇزاق بولاشاققا پايدالى بەرىك زاڭمەن باسقارۋ قامتاماسىزدىعىن ازىرلەۋ كەرەك.
ماماندار ”الەمدەگى ٴبىرىنشى قامال“ مىنبەسىنە شىعىپ، قامال ۇستىندە باياۋ ٴجۇردى. تاريحتىڭ لەبى بەتكە ۇرىپ، جۇڭحۋا ۇلتىنىڭ تەرەڭ مەملەكەت سۇيىسپەنشىلىگىن جانە قاجىرلى جىگەرىن بايانداپ تۇردى.
”مادەنيەت قىزمەتكەرى جانە وقۋ ـ اعارتۋ قىزمەتكەرى رەتىندە، ٴداۋىر رۋحىن شىڭدايتىن، حالىق تۇرمىسىن ايگىلەيتىن سارا تۋىندى شىعارىپ، جاڭا داۋىردەگى مۋزيكا كوركەمونەرىنىڭ شوقتىقتى دارىندىلارىن قۇلشىنا جەتىلدىرۋ — ٴبىزدىڭ داۋىرلىك جاۋاپكەرشىلىگىمىز“. جۇڭگو مۋزيكا شۋەيۋانىنىڭ باستىعى لي شينساۋ بىلاي دەدى: اعا بۋىن كوركەمونەرشىلەر وسىدان بۇرىن قالتقىسىز ادال مەملەكەت سۇيىسپەنشىلىگى ارقىلى جۇڭحۋا ۇلتى رۋحىنىڭ ماياگىن جاقتى، بۇگىنگى تاڭدا ٴبىز تىپتەن الاۋدى وتكەرىپ الىپ، مادەنيەت ـ كوركەمونەر ىستەرىنىڭ ۇرپاقتان ـ ۇرپاققا جالعاسۋىن، ماڭگى توقتاماي جالعاسا بەرۋىن ىلگەرىلەتۋىمىز كەرەك.
شىڭنىڭ ۇشار باسىنا شىعۋدا جاپا ـ ماشاقاتتان قايمىقپايتىن قايسارلىق بولۋ، كۇرەسكەر بولۋ ٴۇشىن ۋاقىتتى ۇتا جەدەل قيمىلداۋ كەرەك. بەيدايحىداعى دەمالىس كەزىندە دە مەملەكەتتىك جوعارى جىلدامدىقتى پويەز چيڭداۋ تەحنولوگيالىق جاڭالىق اشۋ ورتالىعىنىڭ مەڭگەرۋشىسى لياڭ جيانيڭ تاعى دا عىلمي زەرتتەۋدە جاڭالىق اشۋدى ەسىنەن شىعارماي، جاڭا ۇرپاق جوعارى جىلدامدىقتى رەليستى قاتىناس تەحنولوگياسىنان قامال الۋدى بەلسەنە جوسپارلادى.
”پارتيا ورتالىق كوميتەتىنىڭ، مەملەكەتتىك كەڭەستىڭ قامقورلىعىن كۇرەس جۇرگىزۋدىڭ قوزعاۋشى كۇشىنە اينالدىرىپ، مەملەكەتتىڭ ستراتەگيالىق قاجەتى بويىنشا وزەكتى تەحنيكالاردان قامال الۋدى كوزدەپ، جوعارى دەڭگەيلى رەليستى قاتىناس جابدىقتارى تەحنولوگياسىندا ٴوز كۇشىنە سۇيەنۋدى، ٴوزىن ـ ٴوزى الەۋەتتەندىرۋدى ىلگەرىلەتۋ جولىندا عىلىم ـ تەحنولوگيادا قۋاتتى ەل، قاتىناستا قۋاتتى ەل قۇرۋعا كۇش قوسامىز“، ـ دەدى ول نىق سەنىممەن.
وسى رەتكى بەيدايحىداعى جازدىق دەمالىسقا ٴوندىرىستىڭ الدىڭعى شەبىندەگى ”ٴىرى ەل ۇستالارى“ دا ەرەكشە ۇسىنىس ەتىلدى.
جۇڭگو ماشينا ونەركاسىبى توبىنا قاراستى جۇڭگو 2 ـ اۋىر تۇرپاتتى ماشينا توبىنىڭ 80 مىڭ توننالىق قالىپپەن شىڭداۋ ماشيناسى گرۋپپاسىنىڭ جەتەكشىسى، ”مەملەكەتتىك ەڭبەك ەرى“ يە لينۋي ەلىمىزدىڭ جوعارى دەڭگەيلى ەلەۋلى تەحنولوگيالىق جابدىقتار سالاسىنىڭ كورنەكتى ۋاكىلى.
”بۇل قامقورلىق ەلىمىزدىڭ ونەركاسىپ جۇمىسشىلارى قوسىنىنا بارىنشا كوڭىل ٴبولۋ جانە وسكەلەڭ قۇرمەتى، ٴبىز ’ٴىرى ەل جابدىعىن جاساۋ‘ سىندى بورىش ارقالاۋدان جازباي، وزىقتىققا تاباندىلىقپەن ۇمتىلىپ، قاجىماي ـ تالماي كۇرەس جۇرگىزۋ ارقىلى ۇستا رۋحىن امالياتتا ايگىلەيمىز“. يە لينۋي ٴوزىنىڭ دەمالىس قيمىلىنا قاتىناسقانىن ايرىقشا داڭق سەزىنەتىندىگىن ايتىپ بىلاي دەدى: ”بولاشاقتا ’ۇيرەتۋدى، كومەكتەسۋدى، جەتەكتەۋدى‘ بۇكپەسىز تولىق ىستەپ، مەملەكەت ٴۇشىن اناعۇرلىم كوپ ’ٴىرى ەل ۇستالارىن‘ باۋلىپ شىعامىز“.
دۇنيە جۇزىندەگى ەگەي دارىندىلار جۇڭگودا جينالىپ، بارلىعى ٴوز قابىلەتتەرىن ەركىن ساۋلەلەندىردى.
كوپشىلىك ٴبىر اۋىزدان بىلاي دەپ قارادى: پارتيا ورتالىق كوميتەتىنىڭ، مەملەكەتتىك كەڭەستىڭ دارىندىلاردى باۋلۋ، دارىندىلاردى ىنتىماقتاستىرۋ، دارىندىلاردى جەتەكتەۋ، دارىندىلاردى تابىسقا جەتكىزۋ سىندى كوڭىل ٴبولۋىن، قامقورلىعىن ٴىس تىندىرىپ ناتيجە شىعارۋداعى كوكىرەك تولى ىستىق ىقىلاسقا اينالدىرىپ، جۇرەكتىلىكپەن جاۋاپكەرشىلىك ارقالاپ ىسكەرلىك كورسەتىپ، باتىلدىقپەن قامال الىپ قيىندىقتاردى جەڭىپ، جۇڭگو ۇلگىسىندەگى وسىزامانداندىرۋدىڭ ايبىندى جورىعىندا ٴوز قابىلەت ـ دارىنىمىزدى ايگىلەپ، ەسە قوسىپ ەڭبەك ٴسىڭىرۋىمىز كەرەك.
(شينحۋا اگەنتتىگىنىڭ 8 ـ ايدىڭ 8 ـ كۇنى بەيدايحىدان بەرگەن حابارى)
