زاڭدىق كومەك بەرەتىن 300دەن استام ەرىكتى شىمىرلاي اققان جىلى اعىس قالىپتاستىردى
ولار جولاۋشى ەمەس، ٴوز جاقىندارىمىز
انار بۇلت \ شينجياڭ گازەتىنىڭ ٴتىلشىسى سۇي يۇنيان
”شياۋ گاۋپيڭ ادۆوكات ٴوز جاقىنىمىز!“ ـ دەدى حوتان اۋدانى باقچي قالاشىعىنداعى ديقان ۇسەيىن تۇرسۇننياز.
ۇسەيىن 2009 ـ جىلدان باستاپ سىرتقا شىعىپ جۇمىس ىستەيدى. 2023 ـ جىلى 4 ـ ايدا ول قۇرىلىس ورنىندا ابايسىزدا جارالانىپ، سول اياعى مەرتىگىپ 5 ـ دارەجەلى مۇگەدەك بولىپ قالادى. العاشقى مەزگىلدە ەمدەلگەندە، جۇمىسشى ىستەتۋشى جاق تەك ٴبىر ٴبولىم قاراجاتتى عانا تولەيدى، بۇل اقشا شىعىنعا مۇلدە جەتپەيدى، سونىمەن بۇل وتباسىنداعىلار قيىنشىلىق قىسپاعىندا قالادى. ”حوتاندا سوتتاسۋعا تەگىن كومەكتەسەتىن ٴبىر ادام بار، اتى شياۋ گاۋپيڭ، ونى ىزدەپ كور“. وسى كەزدە جۇمىسشى سەرىكتەرىنىڭ ٴسوزى ۇسەيىننىڭ كوڭىلىندە ٴۇمىت ۇشقىنىن تۇتاندىرادى.
حوتان ايماقتىق زاڭدىق كومەك بەرۋ ورتالىعىندا ۇسەيىن قوبالجىعان كوڭىل كۇيمەن ٴادىليا مينيسترلىگىنىڭ ”1+1“ جۇڭگو زاڭدىق كومەك بەرۋ ەرىكتىلەر ارەكەتىندەگى ەرىكتى ادۆوكات شياۋ گاۋپيڭدى تاپتى. ”اقى الماسا، ول، شىنىندا، ماعان كومەكتەسە مە؟“ ۇسەيىننىڭ كۇدىك ـ كۇمانى تەز ارادا سەيىلدى. شياۋ گاۋپيڭ بۇل دەلونى قابىلداپ، تالاي كەدەرگىنى باستان وتكىزىپ، ەڭ سوڭىندا ۇسەيىنگە 470 مىڭ يۋان تولەم سوماسىن الىپ بەردى.
اقشانى العاننان كەيىن، ۇسەيىن العىس جالاۋشاسىن ۇسىنىپ: ”زاڭ ارقىلى حالىقتىڭ قيىنشىلىعىن شەشتى، زاڭدىق كومەك بەرۋ جۇرت جۇرەگىن جىلىتتى“ دەپ جازدى. قازىر ول اياعىنداعى بولات تاقتانى الدىرىپ تاستاپ، دەنساۋلىعىن قالپىنا كەلتىرۋگە قۇلشىنۋدا، بولاشاققا زور ٴۇمىت ارتىپ وتىر. ”ٴسىز ماعان ۇقىعىمدى باتىلدىقپەن قورعاۋ سەنىمىن سيلادىڭىز، كەيىن ۇلىمنىڭ دا زاڭ ۇيرەنىپ، ادۆوكات بولۋىنا مۇمكىندىك جاسايمىن!“ ـ دەدى ول شىن جۇرەكتەن شياۋ گاۋپيڭگە.
8 ـ ايدىڭ 8 ـ كۇنى شياۋ گاۋپيڭمەن سۇحباتتاسقانىمىزدا، ول ەڭبەك توقتامىنا قول قويماعان جارالانعان جۇمىسشىعا 180 مىڭ يۋان تولەم الىپ بەرۋ جونىندەگى جاراستىرۋدى ەندى عانا اياقتاتىپتى. ”بۇل ٴبىرشاما ٴساتتى بولدى“، ـ دەدى ول قۋانا.
شياۋ گاۋپيڭ حۋبەيدىڭ شى ـ يانىنان كەلگەن، 2014 ـ جىلى 7 ـ ايدا ول ٴادىليا مينيسترلىگىنىڭ ”1 + 1“ جۇڭگو زاڭدىق كومەك بەرۋ ەرىكتىلەر ارەكەتى ۇندەۋىنە ٴۇن قوسىپ، اراسان اۋدانىنا كەلگەن. ”سول كەزدە باتىس بولىكتە ادۆوكاتتاردىڭ شۇعىل تاپشى ەكەنىن ەستىگەننەن كەيىن كەلدىم“، ـ دەدى ول.
2017 ـ جىلى اراسان اۋدانىنداعى 3 جىلدىق قىزمەت وتەۋىن اياقتاتقاننان كەيىن، ول ۇيىندە جارتى اي عانا تۇرىپ، سول كەزدە ادۆوكات ٴتىپتى دە تاپشى حوتان ايماعىنا بارىپ ىستەۋدى تاعى ٴوتىنىش ەتتى. ”ەسىمىنەن شىقپاي ـ اق قويدى، جالعاستىرۋىم كەرەك دەپ ويلادىم“. شياۋ گاۋپيڭ بىلاي دەدى: باس شۋجي شي جينپيڭ ”جاي بۇقارانىڭ سوتتاسا الماۋىنا استە جول بەرمەيمىز“ دەپ باسا دارىپتەگەن بولاتىن، بۇل ٴسوز مەنى ايرىقشا جىگەرلەندىرىپ كەلەدى.
سول كەزدە حوتان ايماعىندا كاسىپتىك ادۆوكاتتار مەن ۇكىمەت قىزمەتىندەگى ادۆوكاتتاردى قوسقاندا، نەبارى 60 نەشە ادام عانا بولاتىن. شياۋ گاۋپيڭ ”كومەكتەسۋگە تيىستىلەرىنە تۇگەلدەي كومەكتەسۋ“ پرينسيبىن ۇستاندى، اسىرەسە، جۇمىس ۇستىندە جارالانۋ تولەمى سياقتى دەلو جاعدايى كۇردەلى ٴارى داۋگەردىڭ ٴتانى مەن جانىن قالجىراتقان دەلولارعا دەن قويدى.
حوتاندا ول قابىلداعان ٴبىرىنشى دەلو وتە تيپتىك دەلو ەدى. 2015 ـ جىلى 8 ـ ايدا جارالانعان ٴبىر جۇمىسشى ەڭبەك توقتامىنا قول قويماعاندىقتان، جۇمىسشى ىستەتۋشى جاق زاڭدىق تارتىپتەن پايدالانىپ كەشەۋىلدەتىپ، دەلو تورەلىك ايتۋ، ٴبىرىنشى سوت، ەكىنشى سوت جانە قايتا قاراۋ سياقتى ۇزاق بارىستى باستان كەشىردى. شياۋ گاۋپيڭ ەرەكشە توزىمدىلىكپەن جانە كاسىپتىك قابىلەتىمەن داۋگەرمەن بىرگە 7 جىل ارىزدانىپ، اقىرى 2024 ـ جىلى 10 ـ ايدا 190 مىڭ يۋان تولەم سوماسىن قايتارىپ الادى.
”جۇمىس ۇستىندە جارالانۋ دەلوسىندا داۋگەر دەنساۋلىق، رۋحاني جانە ەكونوميكا جاقتارىنان اۋىر سوققىعا ۇشىرايدى. داۋگەردىڭ ۇقىعىن زاڭ بويىنشا قورعاۋىنا كومەكتەسۋ ٴۇشىن، الدىمەن ولاردىڭ رۋحاني جاقتان ەڭسە كوتەرۋىنە كومەكتەسۋ كەرەك“، ـ دەدى شياۋ گاۋپيڭ.
شياۋ گاۋپيڭنىڭ اتى اۋىزدان ـ اۋىزعا تارالىپ، كوپتەگەن داۋگەر ونى ىرىقتىلىقپەن ىزدەپ كەلدى. ول ٴار جىلى 70 - 60 كومەك بەرۋ دەلوسىن قابىلداپ، تالايلاعان داۋگەردى قيىنشىلىق قىسپاعىنان شىعاردى.
حوتان ايماقتىق ٴادىليا مەكەمەسىنىڭ ورىنباسار باستىعى باھارگۇل احمەت بىلاي دەپ باعا بەردى: ”شياۋ ادۆوكات قاشاندا دالەل ـ ىسپات جەتكىلىكسىز، تالاپ ـ تىلەكتەرى كوكەي تەستى كەزدە دەلو جاعدايىن سابىرلىلىقپەن سارالاپ، زاڭدىق قاعيدا ارقىلى ۇقىق ـ مۇددەنى ايقىنداۋمەن بىرگە، ەگەستى ادامگەرشىلىكپەن شەشىپ، جۇمىس ىستەيتىن بۇقاراعا زاڭمەن باسقارۋدىڭ جىلۋىن شىنايى سەزىندىردى“.
شينجياڭعا كومەكتەسكەننەن بەرى، شياۋ گاۋپيڭ جۇڭچيۋ مەرەكەسىن دەرلىكتەي شينجياڭدا وتكىزىپ كەلەدى، جەرگىلىكتى بۇقارا جەرگىلىكتى اي كۇلشەلەرىن، وزدەرى پىسىرعان ناندارىن جانە جاس جەمىس ـ جيدەكتەرىن اكەلىپ، ونىڭ اۋىلىن ساعىنعان كوڭىلىن جۇباتادى. ”شينجياڭعا العاش كەلگەندە قوي ەتىن جەۋگە كونە المادىم، قازىر حۋبەيعا قايتقاندا بىرنەشە كۇن بولماي جاتىپ لاعماننىڭ ٴدامىن ساعىنامىن“. ول كۇلىپ ٴوزىن ”ناعىز شينجياڭدىقپىن“ دەدى.
بيىل 8 ـ ايدىڭ سوڭىندا 57 جاستاعى شياۋ گاۋپيڭ 11 جىلدىق شينجياڭعا كومەكتەسۋىن اياقتاتادى، ول حوتاندا قالىپ، جەرگىلىكتى ورىنداعى ادۆوكاتتار قوسىنىنا قوسىلۋ بەكىمىن جاسادى. ”جۇبايىم مەنى ەرەكشە قولدادى، ول زەينەتكە شىققاننان كەيىن حوتانعا كەلىپ باس قوسامىز“. وسى ٴسوزدى ايتقاندا ونىڭ جۇزىنەن باقىت لەبى ەستى.
شياۋ گاۋپيڭ زاڭمەن باسقارۋ مەيىرىن شينجياڭعا جەتكىزگەن كوپتەگەن زاڭدىق كومەك بەرەتىن ادۆوكاتتاردىڭ ٴبىرى. ۇعىسۋىمىزشا، 2009 ـ جىلى ”1 + 1“ جۇڭگو زاڭدىق كومەك بەرۋ ەرىكتىلەر ارەكەتى باستالعاننان بەرى 20 نەشە ولكەدەن كەلگەن 300دەن استام ادۆوكات شينجياڭنىڭ 40 نەشە اۋدان، قالا، رايونىنا بارىپ زاڭدىق كومەك بەرىپتى.
ولاردىڭ اراسىندا شينجياڭعا ەڭ ۇزاق ۋاقىت كومەكتەسكەن شياۋ گاۋپيڭ، سونداي ـ اق بۋىرشىن اۋدانىندا زاڭ دارىندىلارىن تاربيەلەۋ بازاسىن قۇرعان شاندۇڭدىق ادۆوكات ليۋ جۇن، ”شينجياڭ ارمانىن“ ورىنداۋ ٴۇشىن كەلگەن ”ەكىنشى ۇرپاق شينجياڭدىق“، شاڭحايلىق ادۆوكات حۇڭ مىڭ، بۋرىلتوعاي اۋدانىندا زاڭدىق قىزمەت وتەۋ پۋنكتىن قۇرىپ، انحۇي - شينجياڭ زاڭ اۋىس ـ كۇيىسىن ىلگەرىلەتكەن انحۇيلىق ادۆوكات گاۋ ميڭ بار...
”وتان ۇلى شاڭىراعىنىڭ شىمىرلاي اققان جىلى اعىسى شينجياڭدى زاڭمەن باسقارۋعا كۇش قوستى“. اۆتونوميالى رايوندىق زاڭدىق كومەك بەرۋ ورتالىعىنىڭ مەڭگەرۋشىسى پارحات جۇماحۇن تەبىرەنە مىنالاردى ٴبىلدىردى: ”1 + 1“ ارەكەتى — زاڭمەن باسقارۋ بايلىعىن ٴبىر تۇتاس جوسپارلاپ، شەكارا ٴوڭىردى باسقارۋعا دەم بەرىپ، باعىتتامالى كومەكتەسۋدى امالياتتا ايگىلەپ، زاڭمەن باسقارۋ كۇشىن جەتكىزۋدىڭ ماڭىزدى امالياتى بولدى.
