شينحۋا اگەنتتىگىنىڭ 8 ـ ايدىڭ 17 ـ كۇنى چىڭدۋدان بەرگەن حابارى (تىلشىلەر ليۋ جىن، دۇڭ شياۋحۇڭ). الاۋلاعان چىڭدۋدا اسقاق سەزىم تۋلادى. 12 ـ كەزەكتى دۇنيە جۇزىلىك سپورت جارىسى 8 ـ ايدىڭ 17 ـ كۇنى كەشتە سىچۋان ولكەسىنىڭ چىڭدۋ قالاسىندا تولىق تابىسپەن جابىلدى.
وتكەن 11 كۇندە 116 مەملەكەت پەن وڭىردەن كەلگەن 4000عا جۋىق سپورتشى اشتى تەرلەرىن توگىپ، ارمان قۋىپ، چىڭدۋدا ”سپورت شەكسىز، كەرەمەتتەر سانسىز“ دەيتىن تارتىمدى تاراۋدى بىرگە جازدى. باس بولىپ وتكىزۋشى جاق ”جاسىل، بىرگە يگىلىكتەنۋ، اشىق، پاك بولۋ“ سىندى جارىس ۇيىمداستىرۋ ۇستانىمىنان جازباي، عىلمي جوبالاپ، دەن قويا ۇيىمداستىرىپ، حالىقارالىق دۇنيە ٴجۇزى سپورت جارىسى قوعامى ۇلكەن شاڭىراعى مەن حالىقارالىق قوعامنىڭ جاپپاي جاقسى باعاسىن الدى.
جۇڭگو دەنە تاربيە ۋاكىلدەر ۇيىرمەسى وسى كەزەكتى سپورت جارىسىندا 36 التىن، 17 كۇمىس، 11 قولا مەدال، جيىنى 64 مەدال الىپ، التىن مەدال، مەدال جالپى سانى جاعىنان تۇگەلدەي تاريحتاعى تىڭ دەڭگەيدى جاراتىپ، تۇڭعىش رەت التىن مەدال تاقتاسى مەن مەدال تاقتاسىندا 1 ـ ورىندى يەلەپ، ەلىمىزدىڭ دۇنيە جۇزىلىك سپورت جارىسىنا قاتىناسۋ تاريحىنداعى ەڭ تاماشا ناتيجەنى جاراتتى.
تۇنگى چىڭدۋ الەمدىك باۋ ـ باقشا كورمەسى چىڭدۋ حالىقارالىق دوستىق سارايى الۋان تۇسكە بولەندى، توبەنىڭ ورتاڭعى بولىگىندەگى دوڭگەلەك ٴپىشىندى توبەلىك تۋ سىرتتاعى تاۋمەن، جاسىل وسىمدىكتەرمەن جاندى توعىسىپ، ”باۋ ـ باقشا قالاسىنىڭ“ ەكولوگيالىق كوركىن بارىنشا ايگىلەدى. دۇنيە ٴجۇزىنىڭ جەر ـ جەرىنەن كەلگەن سپورتشىلار وسى ارادا باس قوستى، الاڭدا كوپشىلىك ٴان ايتىپ، بيگە باسىپ، اسقاق سەزىم تۋلادى.
ٴدال ساعات 20دا جابىلۋ سالتى رەسمي باستالدى. ۇلكەن ەكراندا ەسكە ٴتۇسىرۋ قىسقا فيلمى قويىلىپ، وتكەن 11 كۇندەگى تارتىمدى جانە بەرەكەلى ساتتەردى ٴبىر ـ بىردەن كورسەتىپ، كوڭىلدى دە ىستىق ىقىلاستى قوشتاسۋ كەشىن باستادى.
ٴارقايسى ۋاكىلدەر ۇيىرمەلەرىنىڭ تۋى جانە سپورتشىلار ۋاكىلى الاڭعا كىردى، بۇكىل الاڭداعى كورەرمەندەر قىزۋ شاپالاق داۋىسىمەن جانە الاقايلاعان ۇندەرىمەن بار كۇشىمەن قۇلشىنعان دەنە تاربيە ساڭلاقتارىن قۇتتىقتادى جانە ولارعا قۇرمەت ٴبىلدىردى.
چىڭدۋ دۇنيە جۇزىلىك سپورت جارىسىن ۇيىمداستىرۋ كوميتەتىنىڭ ٴتوراعاسى شى شياۋلين، حالىقارالىق دۇنيە ٴجۇزى سپورت قوعامىنىڭ ٴتوراعاسى جوسە پەرۋرەنا ىلگەرىندى ـ كەيىندى ٴسوز سويلەپ، وسى كەزەكتى دۇنيە جۇزىلىك سپورت جارىسىنىڭ تولىق تابىستى بولۋىنا ۇلەس قوسقان بارلىق ادامعا العىس ٴبىلدىردى. كەلەسى كەزەكتى دۇنيە جۇزىلىك سپورت جارىسى وتكىزىلەتىن قالا — گەرمانيا كارلسرۇح قالاسىنىڭ باستىعى فرانك مەنترۋپ ٴسوز سويلەپ، ىستىق ىقىلاسپەن دۇنيە جۇزىندەگى قوناقتاردى 4 جىلدان كەيىن كارلسرۇح قالاسىندا باس قوسۋعا شاقىردى.
ساعات 20دان 50 مينۋت وتكەندە مەنترۋپ چىڭدۋ 2025 ـ جىلعى 12 ـ كەزەكتى دۇنيە جۇزىلىك سپورت جارىسىنىڭ جابىلعاندىعىن جاريالادى. ۇلكەن ەكراننان باستالۋ سالتىنىڭ نەگىزگى الاڭىندا اسقاق تۇرعان دۇنيە جۇزىلىك سپورت جارىسىنىڭ نەگىزگى الاۋ مۇناراسىنداعى الاۋدىڭ «دوستىق ماڭگى جالعاسادى» اتتى بالالار حورىمەن بىرگە باياۋ سونگەنى كورسەتىلدى.
ارقاۋ مۋزيكا «چىڭدۋدىڭ» اسەرلى اۋەنى ىشىندە كوپتەگەن ٴبيشى باياۋ يشارات ٴتىلى ارقىلى جاراسىمدىلىقتىڭ، توعىسۋدىڭ كوركەمدىگىن بيمەن بەينەلەدى. سوڭىندا بيشىلەر بىرگە قول بۇلعاپ قۇرمەت ٴبىلدىرىپ، بۇگىنگى كەشكە قوش ايتتى، تىپتەن، بولاشاقتا جۇزدەسۋگە ۋادەلەستى.
