انار بۇلت \ شينجياڭ گازەتىنىڭ ٴتىلشىسى دۇڭ لياڭ
8 ـ ايدىڭ 20 ـ كۇنى ٴۇرىمجى قالاسى تيانشان رايونى يان ـ ان جولى ٴمالى باسقارماسى جيشۇن كوشەسى سولتۇستىك الەۋمەتتىك اۋماعىندا جاڭادان سالىنعان فۋتبول الاڭىندا ومىرشەڭدىككە تولى اۋىس ـ كۇيىس جارىسى ٴوتتى. وسى الەۋمەتتىك اۋماقتاعى كىشكەنتاي فۋتبولشىلار سايماچاڭ ٴمالى باسقارماسى حۇڭچي الەۋمەتتىك اۋماعى ۋاكىلدەر قۇراماسىنداعى بالالارمەن جارىسقا ٴتۇسىپ، سوڭىندا 1:3 ۇپايمەن جەڭىسكە جەتتى. جاسىل الاڭدا جۇگىرگەن بەينەلەر، دوپ كىرگەن كەزدەگى الاقايلاعان ۇندەر الەۋمەتتىك اۋماقتاعى جاستار مەن وسپىرىمدەر دەنە تاربيەسىنىڭ ومىرشەڭ كۇشىن ايگىلەدى.
12 جاستاعى كىشكەنتاي فۋتبولشى مۇستاپا راحمەتوللا تىلشىگە بىلاي دەدى: ”فۋتبول تەپكەنىمە 2 جىل بولدى، ٴبىراق وسى ٴبىر مەزگىلدە ەرەكشە تەز العا باستىم“. بيىل 6 ـ ايدىڭ باسىندا جيشۇن جولى سولتۇستىك الەۋمەتتىك اۋماعى 5 ادامدىق فۋتبول الاڭىن سالىپ قانا قويماي، كاسىپتىك جاتتىقتىرۋشى ۇسىنىس ەتىپ، بالالارعا فۋتبول تەبۋدى ۇيرەتتى. 2 ايدان استام ۋاقىتتان بەرى، جاتتىقتىرۋشىنىڭ جەتەكشىلىگىندە، ولار ونەردى قايتكەندە جوعارىلاتۋعا بولاتىندىعىن، الاڭدا ساپتاستارىمەن قالاي سايكەسكەندە جارىستا جەڭىپ شىعۋعا بولاتىندىعىن بىرتىندەپ ٴتۇسىندى. 6 ـ ايدىڭ سوڭىندا الەۋمەتتىك اۋماق ىشكى فۋتبول جارىسىن ۇيىمداستىرىپ، 4 تارماق اترەتكە ٴبولدى. مۇستاپا تۇرعان الەۋمەتتىك اۋماق 1 ـ اترەتى قيان ـ كەسكى سايىسۋ ارقىلى تۇڭعىش كەزەكتى الەۋمەتتىك اۋماق فۋتبول جارىسىنىڭ اعا جۇلدەگەرى بولدى ٴارى وسى رەتكى الەۋمەتتىك اۋماقتار ارا جارىستىڭ نەگىزگى كۇشىنە اينالدى.
”الەۋمەتتىك اۋماعىمىز كونە، شاعىن اۋماق، دەنە شىنىقتىراتىن الاڭ ـ ورىندار از، بالالار تەك عيماراتتىڭ الدىنداعى سەمەنت جەردە فۋتبول تەبەدى، ارلى ـ بەرلى وتەتىن اۆتوكولىكتەر مەن جۇرگىنشىلەر بولعاندىقتان قاتەرلى ەدى“. وسى الەۋمەتتىك اۋماق پارتيا باس ياچەيكاسىنىڭ شۋجيى جۇڭ مين بىلاي دەپ تانىستىردى: الەۋمەتتىك اۋماقتاعى كوپتەگەن بالا فۋتبول تەبۋدى ۇناتادى. تۇرعىنداردىڭ جاقىن ماڭدا دەنە شىنىقتىرۋ قاجەتىن قاناعاتتاندىرۋ ٴۇشىن، الەۋمەتتىك اۋماق تيانشان رايونى مادەنيەت، دەنە تاربيە جانە ساياحات مەكەمەسىنىڭ الەۋمەتتىك اۋماقتا تۇراتىن قىزمەت اترەتى مەن اۆتونوميالى رايوندىق دەنە تاربيە مەكەمەسىنىڭ كومەگىندە، مەملەكەتتىڭ شينجياڭنىڭ جالپى حالىقتىق دەنە شىنىقتىرۋ الاڭ ـ ورىندارى جابدىقتارىنىڭ كەم ـ كەتىگىن تولىقتاۋ ينجەنەرياسىنا ارنايى قولداۋ كورسەتۋ قارجىسىنان 200 مىڭ يۋان ٴوتىنىش ەتىپ، 2000 شارشى مەتر كەلەتىن كوپ فۋنكتسيالى سپورت الاڭىن سالدى، مۇندا 5 ادامدىق فۋتبول، باسكەتبول جانە ۆولەيبول الاڭدارى قامتىلدى.
مۇستاپانىڭ جاتتىقتىرۋشىسى مامەتجان ياسىن تيانشان رايوندىق مادەنيەت، دەنە تاربيە جانە ساياحات مەكەمەسىنەن كەلگەن جوعارى دارەجەلى فۋتبول جاتتىقتىرۋشىسى. بيىل 5 ـ ايدىڭ سوڭىندا الەۋمەتتىك اۋماقتىڭ ۇسىنىسىمەن ول الەۋمەتتىك اۋماق فۋتبول قۇراماسىن قۇردى ٴارى جاتتىقتىرۋشى بولىپ بالالارعا تەگىن ۇيرەتتى.
”جازدىق كانيكۋلدا كۇن ىستىق، ٴبىز اپتاسىنا 2 كۇن تۇستەن بۇرىن جاتتىعۋ جاسايمىز. بالالاردىڭ العا باسۋى وتە زور بولعانىمەن، ٴبىراق جارىس ارقىلى جەتىستىكتى سىننان وتكىزىپ، سەنىم ورناتىپ، جەتەرسىزدىكتەردى بايقاۋ قاجەت بولۋدا“، ـ دەدى مامەتجان، ـ قۇرامادا قازىر تاباندىلىقپەن جاتتىعاتىن 18 ادام بار، فۋتبول تەبۋ شەبەرلىگىن وسىرۋدەن سىرت، بالالار تاعى قول تەلەفون ويناۋ، ۇيقىدان باس كوتەرمەۋ ادەتتەرىن بىرتىندەپ وزگەرتتى، اتا ـ انالاردىڭ جاقسى باعاسىنا يە بولدى. ”قىزمەتتەن سىرت بالالارعا فۋتبول تەبۋدى ۇيرەتۋ، ولارمەن بىرگە جۇگىرۋ كوڭىلدى ٴىس. ٴتىپتى دە كوپ شاعىن اۋماقتىڭ جيشۇن جولى سولتۇستىك الەۋمەتتىك اۋماعى سياقتى فۋتبول الاڭىن قۇرىپ، بالالاردىڭ ەسىك الدىندا كوڭىلدى فۋتبول تەبۋىنە مۇمكىندىك جاساۋىن ٴۇمىت ەتەمىن“، ـ دەدى مامەتجان.
جۇڭ مين بىلاي دەدى: فۋتبول جاتتىعۋى الەۋمەتتىك اۋماقتاعى ”كۇنباعىس شاعىن ساباقحاناسى“ ساباقتارىنىڭ ٴبىرى. ”شاعىن ساباقحانا“ تاعى سايىسكەرلىك ونەرى، شاحمات تاقتاسى، ٴبي، دەنە شىنىقتىرۋ گيمناستيكاسى، يوگا، مۋزيكا، سۋرەت سىزۋ كلاسى سياقتىلاردى قامتيدى، الەۋمەتتىك اۋماقتا ەرەكشەلىگى بار تۇرعىندار مەن ەرىكتىلەر مىندەتتى تۇردە ساباق وتەدى. ”شاعىن ساباقحانا“ بالالاردىڭ جازعى كانيكۋلداعى تۇرمىسىن بايىتىپ، ولاردىڭ ونەر يگەرۋىنە مۇمكىندىك جاسادى، سونداي ـ اق اتا ـ انالاردىڭ قىزمەت قاربالاستىعىنان بالالارىنا قاراي الماۋ سىندى قيىن ماسەلەنى شەشتى.
ٴتىلشىنىڭ اۆتونوميالى رايوندىق دەنە تاربيە مەكەمەسىنەن ۇعىسۋىنشا، جيشۇن جولى سولتۇستىك الەۋمەتتىك اۋماعى سياقتى اۆتونوميالى رايون مەملەكەتتىڭ شينجياڭنىڭ جالپى حالىقتىق دەنە شىنىقتىرۋ الاڭ ـ ورىندارى جابدىقتارىنىڭ كەم ـ كەتىگىن تولىقتاۋ ينجەنەرياسىنا ارنايى قولداۋ كورسەتۋ قارجىسىنان 12 ميلليون 200 مىڭ يۋانعا قول جەتكىزگەن. سوڭعى جىلدارى مەملەكەتتىڭ ارناۋلى قارجىسىنىڭ جانە شينجياڭعا كومەكتەسەتىن ولكە، قالالاردىڭ كومەگىندە، 2024 ـ جىلدىڭ سوڭىنا دەيىن تۇتاس رايونىمىزدا 88 مىڭ 816 دەنە تاربيە الاڭ ـ ورنى سالىنىپ بولىپ، 10 جىلدىڭ الدىنداعىدان ٴبىر قاتتالدى. دەنە تاربيە الاڭ ـ ورنىنىڭ جالپى اۋدانى 75 ميلليون 601 مىڭ 500 شارشى مەتر، ادام باسىنا تۋرا كەلەتىن دەنە تاربيە الاڭ ـ ورنىنىڭ اۋدانى 2.88 شارشى مەتر بولىپ، «شينجياڭ ۇيعۇر اۆتونوميالى رايونىنىڭ جالپى حالىقتىق دەنە شىنىقتىرۋدى اتقارۋ جوسپارىندا (2025 - 2021 ـ جىل)» العا قويىلعان ”2025 ـ جىلعا دەيىن ادام باسىنا 2.6 شارشى مەتردەن تۋرا كەلۋ“ نىساناسىنان اسىپ تۇسكەن.
الاڭ ـ ورىنداردىڭ ارتۋى جالپى حالىقتىڭ دەنە شىنىقتىرۋىنا دەم بەردى. 2024 ـ جىلى تۇتاس رايونىمىزدا 54 مىڭ رەت جالپى حالىقتىق دەنە شىنىقتىرۋ جارىسى مەن قيمىلى وتكىزىلىپ، جالپى 5 ميلليون 580 مىڭ ادام (رەت) قاتىناستى؛ بيىل 8 ـ ايدىڭ باسىنا دەيىن 19 مىڭ رەت قيمىل وتكىزىلىپ، ٴبىر ميلليون 620 مىڭ ادام (رەت) قاتىناسىپ، بىلتىرعى سول تۇستاعىدان 3 ەسە ارتتى.
