9 - ايدىڭ 2 - كۇنى تۇستەن بۇرىن مەملەكەت ءتوراعاسى شي جينپيڭ رەسەي زۇڭتۇڭى پۋتينمەن، موڭعۇليا زۇڭتۇڭى كۇرۇلسۇكپەن بەيجيڭ حالىق سارايىندا جۇڭگو، رەسەي، موڭعۇليا ءۇش ەل مەملەكەت باسشىلارىنىڭ 7 - رەتكى ديدارلاسۋىن وتكىزدى.
□ سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن
شينحۋا اگەنتتىگىنىڭ 9 ـ ايدىڭ 2 ـ كۇنى بەيجيڭنەن بەرگەن حابارى (تىلشىلەر سۇن ي، ما جويان). 9 ـ ايدىڭ 2 ـ كۇنى تۇستەن بۇرىن مەملەكەت ٴتوراعاسى شي جينپيڭ رەسەي زۇڭتۇڭى پۋتينمەن، موڭعۇليا زۇڭتۇڭى كۇرۇلسۇكپەن بەيجيڭ حالىق سارايىندا جۇڭگو، رەسەي، موڭعۇليا ٴۇش ەل مەملەكەت باسشىلارىنىڭ 7 ـ رەتكى ديدارلاسۋىن وتكىزدى.
شي جينپيڭ بىلاي دەپ اتاپ كورسەتتى: تاياۋ جىلداردان بەرى، جۇڭگو، رەسەي، موڭعۇليا ٴۇش جاقتىڭ سەلبەستىگى ورنىقتى دامىپ، ناقتى جەتىستىكتەرگە قول جەتكىزدى. ٴۇش جاق سەلبەستىگىنىڭ ورتا مەرزىمدىك جول كارتاسى ٴساتتى اتقارىلىپ، ٴۇش ەلدىڭ ساۋدا سوماسى بارعان سايىن جوعارىلاپ، ەكونوميكا ـ ساۋدا، عىلىم ـ تەحنولوگيا، ەكولوگيانى قورعاۋ، گۋمانيتارلىق ىستەر جاقتارىنداعى سەلبەستىگى ۇزدىكسىز تەرەڭدەدى. تاۋ ـ وزەندەرى تۇتاسقان، بەينەت پەن زەينەتتى بىرگە وتكەرگەن دوس كورشى ەل رەتىندە، جۇڭگو جاق رەسەي جاقپەن، موڭعۇليا جاقپەن بىرگە سەلبەسۋ اۋەلگى ماقساتىنان جازباي، سىرتقى كەدەرگىلەردى الاستاپ، ٴۇش جاق سەلبەستىگىنىڭ جوعارى ساپالى دامۋىن قول ۇستاسا ىلگەرىلەتۋدى قالايدى.
شي جينپيڭ جۇڭگو، رەسەي، موڭعۇليا سەلبەستىگىن ىلگەرىلەتۋ جونىندە 3 ٴتۇرلى ۇسىنىس قويدى.
ٴبىرىنشى، ساياسي ٴوزارا سەنىمدىلىكتى بەكەمدەۋ كەرەك. حالىقارالىق جاعدايدا نەعۇرلىم وزگەرىس پەن بىلىقپالىق ارالاسقان سايىن، جۇڭگو، رەسەي، موڭعۇليا ٴۇش جاق ىنتىماقتى، ىستەستىكتى سولعۇرلىم كۇشەيتىپ، ٴوزارا قولداۋدى كۇشەيتىپ، ٴبىر ـ ٴبىرىنىڭ وزەكتى مۇددەسى مەن ٴجىتى قاداعالاپ وتىرعان كەلەلى ىستەرىنە ساياتىن ماسەلەلەردە قۇرمەت ەتىپ، وزدەرىنىڭ دامۋ، گۇلدەنۋ جولىنداعى بەرىك ستراتەگيالىق سۇيەنىشىنە اينالۋى كەرەك.
ەكىنشى، ٴوزارا پايدا جەتكىزۋ سەلبەستىگىن تەرەڭدەتۋ كەرەك. ”قاتتى تۇتاستىرۋدى“ ماڭىزدى باعىت ەتىپ، ٴۇش ەلدى تۇتاستىراتىن شەكارا اتتاعان نەگىزدىك قۇرىلعىلار مەن ەنەرگيا نىساندارىن بەلسەنە ىلگەرىلەتىپ، سەلبەستىك مازمۇنىن بايىتۋ؛ ”جۇمساق تۇتاستىرۋدى“ ماڭىزدى تىرەك ەتىپ، دامۋ ستراتەگيالارىن ٴتۇيىلىستىرۋدى كۇشەيتىپ، ٴوز اقشاسىمەن ەسەپ جابۋ كولەمىن كەڭەيتۋ؛ ”جۇرەكتەردى تۇتاستىرۋدى“ ماڭىزدى نەگىز ەتىپ، ٴۇش ەلدىڭ كورشىلەس ولكە، وبلىستارىنىڭ بارىس ـ كەلىسىن جيىلەتىپ، ساياحات جانە مادەنيەت مۇرالارىن قورعاۋ سەلبەستىگىن كۇشەيتۋ كەرەك.
ٴۇشىنشى، شاڭحاي سەلبەستىك ۇيىمى جۇلگەسىندەگى ىستەستىكتى جيىلەتۋ كەرەك. شاڭحاي سەلبەستىك ۇيىمى — وڭىردەگى ەلدەردىڭ حاۋىپسىزدىكتى بىرگە قورعايتىن، دامۋدى بىرگە جوسپارلايتىن نەگىزگى تۇعىرى. تيانجين باسشىلار ٴماجىلىسى كەزىندەگى جۇڭگو جاقتىڭ جەبەۋمەن قۇرىلعان ٴتۇرلى سەلبەستىك تۇعىرلارى مەن ورتالىقتارىنان ويداعىداي پايدالانىپ، ٴتىپتى دە كەڭ سەلبەستىك ٴورىسىن كەڭەيتۋ كەرەك.
پۋتين مىنالاردى ٴبىلدىردى: رەسەي، جۇڭگو، موڭعۇليا دوس كورشىلەر، ۇزاق سەلبەستىك ٴداستۇرى بار. ساياسي ٴوزارا سەنىمدىلىكتى كۇشەيتۋ وتە ماڭىزدى، بۇل ٴۇش جاق قارىم ـ قاتىناسىنىڭ نەگىزىن بەكەمدەۋگە ٴتيىمدى. رەسەي جاق جۇڭگومەن، موڭعۇليامەن تەڭ تۇرعىدا پايدا جەتكىزەتىن، بولاشاققا بەت العان ستراتەگيالىق سەلبەستىك ورىستەتىپ، ٴۇش جاق سەلبەستىگى مەن ەكى جاقتى سەلبەستىكتىڭ ٴبىرىن ـ ٴبىرى تولىقتاۋىنا، ٴبىرىن ـ ٴبىرى جەبەۋىنە مۇمكىندىك جاساۋدى قالايدى. ٴۇش جاق دامۋ ستراتەگيالارىن ٴتۇيىلىستىرۋدى جيىلەتىپ، ۇلاستىرۋدى ـ تۇتاستىرۋدى كۇشەيتىپ، ساۋدا مەن قارجى قوسۋ كولەمىن كەڭەيتىپ، فينانس، ەنەرگيا، سيفرلى ەكونوميكا، وقۋ ـ اعارتۋ، قورشاعان ورتانى قورعاۋ، ساياحات سياقتى سالالارداعى سەلبەستىكتى، اۋىس ـ كۇيىستى تەرەڭدەتىپ، وزدەرىنىڭ ەكونوميكالىق دامۋىنا دەم بەرىپ، وڭىرلىك ەكونوميكانىڭ توعىسۋىن جەبەپ، حالىق تىلەگىنىڭ توعىسۋىن ىلگەرىلەتۋى كەرەك.
كۇرۇلسۇك مىنالاردى ٴبىلدىردى: جۇڭگو مەن رەسەي موڭعۇليانىڭ ماڭىزدى كورشىسى، موڭعۇليا جاق ەكى جاقتى قارىم ـ قاتىناستى جيىلەتىپ، ٴۇش جاق سەلبەستىگىن كەڭەيتىپ، جۇڭگو، موڭعۇليا، رەسەي ەكونوميكالىق ٴدالىزى قۇرىلىسىن ىلگەرىلەتىپ، گۋمانيتارلىق اۋىس ـ كۇيىستى نىعايتىپ، ٴۇش ەل حالقىنا باقىت جاراتىپ، ٴوڭىردىڭ دامۋىن، گۇلدەنۋىن جەبەۋگە كۇش سالادى. بيىل — جۇڭگو حالقىنىڭ جاپون شاپقىنشىلارىنا قارسى سوعىسى جانە سوۆەت وداعى ۇلى وتان قورعاۋ سوعىسى جەڭىسىنىڭ 80 جىلدىعى، موڭعۇليا، جۇڭگو، رەسەي ٴۇش ەل حالقى وسى تاريحي ٴساتتى بىرگە قۇتتىقتاپ جانە ەسكە الىپ، دۇنيە جۇزىلىك 2 ـ سوعىس جونىندەگى دۇرىس تاريحي كوزقاراستى اسقاقتاتۋى كەرەك.
ساي چي، ۋاڭ ي ديدارلاسۋعا قاتىناستى.
