72 جاستاعى ٴۇي يەسى مەن ٴۇيدى جالعا العان 76 وتباسى ”ٴبىر شاڭىراقتىڭ ادامدارىنا“ اينالدى
انار بۇلت \ شينجياڭ گازەتىنىڭ ٴتىلشىسى ۋي حۇڭپيڭ
بيىلعى مەملەكەت مەرەكەسى، جۇڭچيۋ دەمالىسىندا ٴۇرىمجى قالاسى شۇيموگوۋ رايونى ۋيحۋلياڭ ٴمالىسى چاڭشىڭشياڭ الەۋمەتتىك اۋماعىنىڭ تۇرعىنى ٴالي قيۇمنىڭ وتباسى ايرىقشا دۋمانعا بولەندى، ول ٴۇيدى جالعا العان وتباسىلارىمەن ٴبىر ارادا باس قوسىپ، مەرەكەنى بىرگە وتكىزدى.
ٴوزى سالعان ۇيلەردىڭ يەسى 72 جاستاعى ٴالي مەن وسى ارادا ٴۇي جالعا الىپ تۇراتىن 76 وتباسىنىڭ دوستىق سۇيىسپەنشىلىگى 15 جىلعا جالعاستى.
2010 ـ جىلى ٴالي تۇرعان قىستاق ”قىستاق تۇرعىندار كوميتەتىن الەۋمەتتىك اۋماققا وزگەرتۋدى“ اتقارادى، 30 نەشە جىل ۇزاق جولدى تاسىمالمەن اينالىسقان ول قولىنداعى جيعان ـ تەرگەنىمەن جانە قىستاق كوللەكتيۆى كەپىل بولعان قارىز اقشامەن جالعا بەرىلەتىن قابات ٴۇي سالىپ الدى. 3 جىلدان كەيىن ول تاعى ەكىنشى قابات ٴۇيىن سالدى.
”ٴالي اعانىڭ قابات ٴۇيى سالىنىپ بولا سالا كوشىپ كەلدىم، مەن ەڭ ۇزاق ۋاقىت تۇرعان جالعا الۋشىمىن“. وتكەن ىستەردى اۋىزعا العاندا، شانشيلىق جاڭ كايشۋە ٴسوز تيەگىن اعىتتى. 10 نەشە جىلدىڭ الدىندا ول اجىراسقاننان كەيىن 2 بالاسىن ەرتىپ شينجياڭعا كەلىپ جۇمىس ىستەيدى، قىزى تاعى اۋرۋعا شالدىققاندىقتان تۇرمىسى وتە جاپالى ەدى.
جاڭ كايشۋە باستابىندا ٴاليدىڭ نەمەرە اعاسىنىڭ ٴۇيىن جالعا الدى، ”قىستاق تۇرعىندار كوميتەتىن الەۋمەتتىك اۋماققا وزگەرتۋ“ جۇمىسى باستالعاننان كەيىن، نەمەرە اعاسى قابات ۇيگە كوشىپ كىرەدى دە، ول ٴبىر مەزەت تۇرار جەر تابا المايدى. باسى قاتىپ تۇرعاندا، ٴاليدىڭ ٴوزى سالعان ٴۇيى سالىنىپ بولعاندىقتان، ٴالي تراكتورىن ايداپ ىرىقتىلىقپەن ىزدەپ كەلىپ، ونى كوشىپ كەلۋگە ۇسىنىس ەتەدى.
”مەنىڭ قيىنشىلىعىمدى بىلگەن ٴالي اعاي مەنەن مۇلدە جالاقى المادى. ول ٴۇيدىڭ يەسى عانا ەمەس، ونان دا ماڭىزدىسى، مەنىڭ جان اشىر ـ جاقىنىم“. اسەرلى ىستەردى اۋىزعا العاندا، جاڭ كايشۋە ارتىنا بۇرىلىپ كوز جاسىن ٴسۇرتتى، ”قازىر تۇرمىسىمىز جاقساردى، وسى قامقورلىقتىڭ قارىمجىسىن قايتارامىن“.
ٴالي چيداۋۋان قىستاعىنىڭ ٴتول تۋماسى، بالا كەزىندە وتباسى قيىنشىلىعى سەبەبىنەن وقي الماعان، بۇل ونىڭ بۇرىننان بەرگى وكىنىشى ەدى. جالعا الۋشى جاي حۋاييۋاننىڭ كىتاپ جازىپ جاتقانىن بىلگەننەن كەيىن، ول كوپ جىلدان بەرى وعان تۇرمىستىق قولايلىلىق جاراتىپ، ونىڭ الاڭسىز جاسامپازدىق جاراتۋىنا مۇمكىندىك جاسادى.
”سۋ، ەلەكتر اقىسىن 2 جىلدان استام ۋاقىت تاپسىرمادىم، بەرسەم دە المادى. مەن ۇنەمى ’بىرگە تۋعان اعايىندى بولسا دا ەسەپ انىق بولۋ كەرەك‘ دەيتىن ەدىم، ول جاۋاپ قاتپاي كۇلىپ قانا قويادى“. جاي حۋاييۋان بىلاي دەدى: ”ٴبىز ەجەلدەن بىرگە تۋعانداي بولىپ كەتتىك، مەن دە بۇل ارانى قيمايمىن“.
”ٴالي اعاي جالعا الۋشى بىزدەرمەن بىرگە تۇرادى، ونىڭ ٴۇيىنىڭ قاقپاسى جىلدىڭ ٴتورت ماۋسىمىندا دا اشىق، كوپشىلىك ٴوز ۇيىمىزگە قايتقانداي سەزىمدە بولامىز“، ـ دەدى جالعا الۋشى راۋشانگۇل مامەت.
ٴاليدىڭ ىقپالىمەن اۋلادا دا بىرتىندەپ ٴوزارا كومەكتەسەتىن راي قالىپتاستى. جاڭ كايشۋە بوس ۋاقىتىندا زالدىڭ قابىرعاسىن اقتاپ قويدى؛ جالعا الۋشى ۋي شيلۋ مىندەتتى رەمونتشىعا اينالدى، قايسى ٴۇي قاجەت ەتسە، قۇرال ـ سايمان سومكەسىن كوتەرىپ جەتىپ بارادى؛ بالالار وقۋدان تاراعاننان كەيىن، ٴجۇرىپ ـ تۇرۋى قولايسىز جالعىز تۇراتىن قارتتارعا ىرىقتىلىقپەن كومەكتەسەدى... كورشىلەردىڭ ٴوزارا قارايلاسۋى داعدىلى ىسكە اينالدى.
”سىرتتا جۇرگەندىكتەن ٴۇيدى ساعىنامىز. مەرەكە ـ مەيرامداردا ٴالي اعاي ۇلكەن قازانمەن حوش ٴيىسى اڭقىعان پالاۋ باسىپ، ٴبىزدى بىرگە جەۋگە شاقىرادى. بۋى بۇرقىراعان ىستىق پالاۋ سالىنعان ىدىستى قولىما العاندا جۇرەگىم جىلىپ سالا بەردى“، ـ دەدى جاي حۋاييۋان تەبىرەنە.
”ۇيدەن الىستا جۇرگەندە كىم قينالمايدى دەيسىز؟ كومەكتەسەتىن كەزدە شامام جەتكەنىنشە كومەكتەسەمىن“. ٴالي ۇنەمى ٴبىر اۋلادا تۇرعاندار ٴبىر شاڭىراقتىڭ ادامى سانالادى، ٴبىر ـ بىرىنە قارايلاسىپ تۇرۋى كەرەك دەيدى.
