تيانشان تورى - شينجياڭ گازەتىنىڭ حابارى ( ءتىلشىسى ياۋ گاڭ حابارلايدى). التىن كۇزدىڭ 10 - ايى، پوسكام اۋدانى ٴبىر جىلداعى ەڭ شۇعىلالى مەزگىلدى قارسى الدى. التىن توراڭعى مەملەكەتتىك 5A دارەجەلى ساياحات كورىنىس وڭىرىندەگى توراڭعى ورمانى التىن سارى رەڭگە بويالىپ، شىمىرلاعان كوك تولقىنمەن ۇندەستىك تاۋىپ، تاماشا ماي بوياۋلى سۋرەت قالىپتاستىرىپ، بۇكىل ەلدەگى ساياحاتشىلاردى وزىنە باۋرادى.
پوسكام التىن توراڭعى كورىنىس ٴوڭىرىنىڭ كۇزگى كۇنگى كوركەم كورىنىسى. سۋرەتتى تيانشان تورى - شينجياڭ گازەتىنىڭ ٴتىلشىسى جۇڭ جاۋفىڭ تۇسىرگەن
”بۇل ءوڭىردىڭ كۇزگى كورىنىسى وتە كوركەم ەكەن! كۇزدە وڭتۇستىك شينجياڭعا كەلىپ توراڭعى كورىنىسىن تاماشالاعانعا جەتەرى جوق ەكەن“،- دەدى ساياحاتشىلار پوسكام اۋدانى التىن توراڭعى كورىنىس ٴوڭىرىنىڭ كۇزگى كورىنىسىن ايرىقشا القاپ.
”بۇل مەنىڭ التىن توراڭعى كورىنىس وڭىرىنە 2 ـ رەت ات باسىن بۇرۋىم، بىلتىر كەلگەنىمدە نەبارى 2 كۇن عانا تۇردىم، بيىل توراڭعى ەڭ ادەمى بولعانعا دەيىن كۇتەمىن“، ـ دەدى سىچۋاننان جەكە كولىكپەن ساياحاتتاپ كەلگەن لي رۇيشين، ول پوسكام اۋدانىنداعى جەكە كولىكپەن ساياحاتتاۋ لاگەرىندە ٴبىر اپتا ۋاقىت تۇرعان.
10 ـ ايدىڭ 20 ـ كۇنى ساياحاتشىلار پوسكام اۋدانى التىن توراڭعى كورىنىس وڭىرىندەگى توراڭعى پاتشاسىنىڭ الدىنا بارىپ باقىت تىلەدى. سۋرەتتى تيانشان تورى - شينجياڭ گازەتىنىڭ ٴتىلشىسى ياۋ گاڭ تۇسىرگەن
التىن توراڭعى كورىنىس وڭىرىندە ساياحاتشىلار ورمان اراسىندا سەيىلدەپ، ادەمى كورىنىستەرگە توقتاپ سۋرەتكە ٴتۇسىپ جاتتى. حاڭجوۋلىق ساياحاتشى چىن حاڭجۇن: ”كۇن شۇعىلاسىنا شومعان توراڭعى ورمانى التىنداي جارقىرايدى، ويىمداعىدان دا كەرەمەت بولدى، كەلەر جىلى، ٴسوز جوق، تاعى كەلەمىن“، ـ دەپ القادى.
پوسكام اۋدانى توراڭعىنى دانەكەر ەتىپ، مادەنيەت پەن ساياحاتتىڭ تەرەڭدەي توعىسۋىن ىلگەرىلەتتى. ءوز باسىنان سەزىنۋ اسەرىن جوعارىلاتۋ ءۇشىن، التىن توراڭعى كورىنىس ءوڭىرى جالپى حالىقتىق سالاماتتى، كوڭىلدى جۇگىرىس، توراڭعى وزەن اڭعارى مۋزيكا ساۋىعى سياقتى ەرەكشە قيمىلداردى ىسكە قوسىپ، سپورتقا قىزىعۋشىلىق پەن كوركەمونەرلىك رومانتيكانى شەبەرلىكپەن توعىستىردى. بۇدان سىرت، اتلاس كيىم - كەشەك شوۋى، ۆەلوسيپەدپەن ارالاۋ، تۇزدە تۇنەۋ سياقتى نىساندار ساياحاتشىلارعا تابيعات كورىنىسىمەن قوسا جەرگىلىكتى ورىننىڭ سالت - ساناسىن تەرەڭ سەزىندىردى. وتكەن اپتا سوڭىنداعى ەكى كۇندە توراڭعى ورمانى كورىنىس ءوڭىرى ٴار كۇنى 18 مىڭ ادام ـ رەتتەن استام ساياحاتشى قابىلدادى.
پوسكام اۋدانىنداعى توراڭعى ورمانىنىڭ وزگەشە تارتىمدىلىعى ونىڭ سۋعا جاقىن ورنالاسقان يكەمدىلىگىنەن باستاۋ العان. كورىنىس ٴوڭىرىن باسقارۋ كوميتەتىنىڭ ورىنباسار مەڭگەرۋشىسى ريزۋانگۇل قادىر بىلاي دەپ تانىستىردى: كورىنىس ٴوڭىرى باسقارۋ ـ قورعاۋ سەرپىنىن ارتتىرىپ، ساياحاتشىلاردى تارتىپپەن تاماشالاۋعا جەتەكتەپ، توراڭعىنىڭ كوركەم كورىنىسىن ٴتىپتى دە كوپ ادامنىڭ كورۋىنە مۇمكىندىك جاسادى. پوسكام اۋدانى ”التىن تانىسقى“ بەينەسىمەن كۇزگى كۇندەگى مادەنيەت - ساياحاتتىڭ تىڭ تاراۋىن جازۋدا.
