قويدىڭ بەتىن دە پارىقتاي الادى، بۇل سەرىكتەستىك قوي باعۋدا عىلىم ـ تەحنولوگيا ۇلگىسىن كورسەتتى

انار بۇلت \ شينجياڭ گازەتىنىڭ ٴتىلشىسى ما بويۇي

　　20 مىڭ تۇياق قويدان ۇلگى الىپ تەكسەرۋگە قانشا ۋاقىت كەتەدى؟ نەبارى 2 كۇن ۋاقىت كەتەدى. مىنە بۇل جاساندى زەردە ارقىلى كەسكىندى پارىقتاۋ تەحنولوگياسى قولدانىلعان زەردەلى باعىمشىلىق باسقارۋ جۇيەسىنىڭ قىزمەت ونىمدىلىگى. عىلىم ـ تەحنولوگيانىڭ ۇشقان قۇستاي دامۋىنا ىلەسە، سيفرلانۋعا قاراي تيپ جاڭالاۋ مال شارۋاشىلىعىنىڭ بەت ـ بەينەسىن ىشكەرىلەي وزگەرتۋدە — 2023 ـ جىلى قۇرىلعان اقسۋ جياكى ينفورماتسيالىق عىلىم ـ تەحنولوگيا شەكتى سەرىكتەستىگى كەلپىن اۋدانىندا سيفرلى تەحنولوگيالىق جاڭالاۋ ارقىلى باعىمداعى قويدىڭ ساپاسىن جوعارىلاتىپ ونىمدىلىگىن ارتتىرۋدا.

　　سوڭعى جىلدارى كەلپىن اۋدانى ”كەلپىن قويى ەتى“ كاسىپ سالاسى باسىمدىعىن اشۋعا كۇش سالدى، بۇل رۋان ليجيانعا كەڭ ساحنا ازىرلەدى. 2024 ـ جىلى ”بوعدا دارىندىلارىن“ ەنگىزۋ جوسپارىنداعى شارۋاشىلىق قۇرۋ كوشباسشى دارىندىسى رەتىندە، رۋان ليجيان جىجياڭ ولكەسى حۋجوۋ قالاسىنىڭ كەلپىن اۋدانىنا باعىتتامالى كومەكتەسۋ الدىڭعى شەپ قولباسشىلىق شتابى ارقىلى كەلپىن اۋدانىنا كەلدى. ٴبىر جىلعا جەتپەيتىن ۋاقىتتا ونىڭ سەرىكتەستىگى زات ينتەرنەتى، ۇلكەن ساندى مالىمەت، جاساندى زەردە سياقتى وزىق تەحنولوگيالاردى بىرىكتىرىپ، باعىمشىلىق بارىسىن دالمە ـ ٴدال باقىلاۋ ـ مەڭگەرۋدى جانە باسقارۋدى جۇزەگە اسىرىپ، جەرگىلىكتى مال شارۋاشىلىعىنىڭ دامۋىنا جان ـ جاقتى، سيفرلانعان شەشۋ جوباسىن ازىرلەدى.

　　وسى سەرىكتەستىك زەرتتەپ اشقان زەردەلى باعىمشىلىقتى باسقارۋ جۇيەسىنەن پايدالانىپ، باعىمشىلىق وتباسىلارى باعىمشىلىق ورتاسىنىڭ پارامەترىن دەر كەزىندە رەتتەپ، مالدىڭ ەڭ ۇيلەسىمدى شارت ـ جاعدايدا تىرشىلىك ەتۋىنە كەپىلدىك ەتىپ قانا قويماي، مالدىڭ ٴوسىپ ـ جەتىلۋ كەزەڭى مەن دەنساۋلىق جاعدايىنا نەگىزدەلىپ، دالمە ـ ٴدال ازىقتاندىرۋدى جۇزەگە اسىرىپ، ازىقتىڭ پايدالانىلۋ مولشەرىن بارىنشا جوعارىلاتىپ، باعىمشىلىق وزىندىك قۇنىن تومەندەتتى.

　　”سەرىكتەستىگىمىز زەردەلى باعىمشىلىق باسقارۋ جۇيەسىن قولدانعاننان كەيىن، ٴار جىلى ٴوندىرىس ونىمدىلىگىن %30 جوعارىلاتادى“. شينجياڭ حۋكى جينلان ەگىن، مال شارۋاشىلىق عىلىم ـ تەحنولوگيا شەكتى سەرىكتەستىگى باعىمشىلىق الاڭىنىڭ باستىعى بيان چىڭ بىلاي دەدى: بۇرىن 60 ادام ىستەيتىن جۇمىستى قازىر 38 ادام عانا ىستەيدى، باعىمشىلىق الاڭىندا 15 مىڭ قوي بورداقىلانادى، بۇرىن جىلىنا 15 ميلليون يۋاننان استام جەم ـ ٴشوپ وزىندىك قۇنى سارىپ ەتىلەتىن، قازىر ٴبىر ميلليون 500 مىڭ يۋان ۇنەمدەۋگە بولادى.

　　زەردەلى باعىمشىلىقتى باسقارۋ جۇيەسى ٴداستۇرلى مال شارۋاشىلىعىندا ۇزاق ۋاقىت ٴومىر ٴسۇرىپ كەلە جاتقان كوپتەگەن كەسىرلى ماسەلەلەردى ٴونىمدى شەشتى. بۇرىن باعىمشىلىق بارىسىنداعى ساندى مالىمەتتەردى جيناۋدا نەگىزىنەن ادام كۇشى ارقىلى ەستەلىككە الۋعا سۇيەنەتىن، ونىمدىلىگى تومەن، قاتەلىك پارقى بار، ال سيفرلاندىرىلعان شەشۋ جوباسى ساندى مالىمەتتەردى اۆتوماتتى جيناۋدى جانە دەر كەزىندە جەتكىزۋدى جۇزەگە اسىرىپ، ساندى مالىمەتتەردى جيناۋدىڭ ونىمدىلىگى مەن دالدىگىن بارىنشا جوعارىلاتتى. ىندەتتەن ساقتانۋ ـ تىزگىندەۋ جاعىندا، ٴداستۇرلى مال شارۋاشىلىعىندا ىندەتتىڭ العاشقى كەزدەگى اۋرۋ بەلگىلەرىن دەر كەزىندە بايقاۋ قيىن، زەردەلى باعىمشىلىق باسقارۋ جۇيەسى مالدىڭ دەنە تەمپەراتۋراسى، ازىقتانۋ مولشەرى، ارەكەت مولشەرى سياقتى ساندى مالىمەتتەرىن دەر كەزىندە باقىلاۋ ـ ولشەۋ ارقىلى مالداعى قالىپسىز جاعدايدى دەر كەزىندە بايقاپ، الدىن الا ساقتاندىرىپ، دەر كەزىندە ساقتانۋ ـ تىزگىندەۋگە مۇمكىندىك جاساي الادى.

　　زەردەلى باعىمشىلىقتى باسقارۋ جۇيەسىن اشۋ بارىسىندا رۋان ليجيان ۇجىمدى باستاپ كەمەلدەندىرە ٴتۇستى.

　　قويدىڭ بەتىن پارىقتاۋدى جۇزەگە اسىرۋ ٴۇشىن، تەحنولوگيالىق ۇجىمداعى 10 ادام ٴوندىرىس ورنىندا ٴبىر اي بويى تۇرىپ، 1500 تۇياق قويدان ۇلگى الىپ تەكسەرۋ قىزمەتىن ورىندادى.

　　”مۇنداي ونىمدىلىكتى قالاي عانا قولايلى، جوعارى ٴونىمدى دەپ اتاۋعا بولادى“؟ ـ دەپ سۇرايدى رۋان ليجيان ٴوز ـ وزىنەن. سونىمەن ول پارىقتاۋدىڭ باستى ماقساتى نە دەگەن شەشۋشى ٴتۇيىندى قاراستىرا باستادى.

　　ساناپ انىقتاۋ ٴۇشىن عوي! ەندەشە، نە ٴۇشىن تولىق اۆتوماتتى دەنەنى ولشەۋ بۋىندارىنان پايدالانىپ ٴبىر ۋاقىتتا ورىنداماسقا؟

　　سونىمەن ولار سالاۋات پارىقتاۋعا پايدالانىلاتىن قۇلاقتاعى بەلگىنى جانە سكانەرلەۋ جابدىعىن زەرتتەپ جاساپ، جاساندى زەردە كەسكىن پارىقتاۋ تەحنولوگياسىن قولدانىپ، قىزمەتكەرلەردىڭ قوراعا كىرمەي ـ اق ساناۋ تەحنولوگياسىن تەز ارادا جۇزەگە اسىردى. وسى تەحنولوگيادان پايدالانىپ، 2 كۇندە 20 مىڭ قويدىڭ سانىن انىقتاۋعا جانە سالاۋاتىن پارىقتاۋعا بولاتىن بولدى، ٴداستۇرلى تاسىلمەن سالىستىرعاندا مۇنىڭ ونىمدىلىگى %50تىڭ ۇستىندە جوعارىلاپ، دالدىك سالىستىرماسى %99.5تەن استى.

　　سول سياقتى جاپپاي قارسى الۋعا بولەنگەن اۆتوماتتى جەم بەرۋ ماشيناسى دا بازاردىڭ تەكسەرۋىنەن وتكەننەن كەيىن دەر كەزىندە رەتتەلدى. ەڭ العاشىندا زەرتتەپ جاسالعان جەم بەرۋ ماشيناسىنىڭ وزىندىك قۇنى جوعارى، جەرگىلىكتى ورىنعا ۇيلەسپەيتىن ەدى. تەحنولوگيالىق ۇجىم بۇرىنعى جەم بەرۋ ماشيناسىنا سيفرلى وزگەرىس ەنگىزىپ، ساندى مالىمەتتەردى اۆتوماتتى ەستەلىككە الۋدى ٴارى ونى جەمدەۋ مىندەتىمەن سايكەستىرىپ، جوعارى ٴونىمدى، تەز بولۋدى جۇزەگە اسىرىپ، تۇتىنۋشىلاردىڭ جاپپاي جاقسى باعاسىنا يە بولدى.

　　باعىمشىلىق وتباسىلارىنىڭ سيفرلاندىرۋ اكەلگەن قولايلىلىقتان تولىق يگىلىكتەنۋىنە شىنايى كەپىلدىك ەتۋ ٴۇشىن، بۇل سەرىكتەستىك ەل ىشىندەگى كوپتەگەن جوعارى مەكتەپتەرمەن سەلبەستىك جاساپ، ٴونىم مەن تەحنولوگيانى ۇزدىكسىز ساپالىلاندىردى جانە دارەجەسىن جوعارىلاتتى، سونداي ـ اق باعىمشىلىق وتباسىلارىنا جان ـ جاقتى تەحنولوگيالىق قولداۋ كورسەتتى جانە باۋلۋ قىزمەت وتەۋىن ازىرلەدى.

　　قازىر كاسىپورىننىڭ تەحنولوگياسى شينجياڭنىڭ ٴىشى ـ سىرتىندا قولدانىلۋدا. بولاشاقتاعى دامۋ بارىسىنا توقتالعاندا، رۋان ليجيان ۇزدىكسىز جاڭالىق اشىپ، سالالاردى كەڭەيتىپ، ساپانى جوعارىلاتىپ، مال شارۋاشىلىعىنىڭ سيفرلانىپ، زەردەلىلەنىپ دامۋىن ىلگەرىلەتۋگە اناعۇرلىم كوپ كۇش قوساتىندىعىن ٴبىلدىردى.