ەرىكتى تىلشىلەر جاڭ حۇڭليڭ، چىن چاۋ 10 ـ ايدىڭ 19 ـ كۇنى جاڭاشاردەن حابارلايدى. 10 ـ ايدىڭ 11 ـ كۇنى ٴجاڭاشار اۋدانىنداعى ”لۋجياڭچيڭ“ ازىقتىق ساڭىراۋقۇلاق ەكولوگيالىق عىلىم ـ تەحنولوگيا ۇلگى كورسەتۋ باقشاسىنا بارعانىمىزدا، 26 وسىزاماندانعان جىلىجايدان تىرشىلىك تىنىسى جالىنداعان كورىنىستى كوردىك. قاتار ـ قاتار ساڭىراۋقۇلاق تاياقشالارى رەتتى ٴتىزىلىپ، ٴبىر ـ بىرلەگەن جاس جۇپار ساڭىراۋقۇلاق، حۋاڭجينگۋ، چاشۋگۋ سياقتىلار ساڭىراۋقۇلاق تاياقشاسىنان قىلتيىپ شىعىپ، قاۋلاپ ٴوسىپ كەلەدى ەكەن.
جۇمىسشىلار ساڭىراۋقۇلاق سورەسىنىڭ اراسىندا قايشالىسىپ، پىسقان ساڭىراۋقۇلاقتاردى ەپپەن ٴۇزىپ الىپ جاتتى. ”بيىل ساڭىراۋقۇلاقتىڭ ٴونىم مولشەرى بىلتىرعىدان زور مولشەردە ارتتى، ەندى عانا اياقتاعان ’1 ـ قازان‘ دەمالىسىندا باقشا رايونى ينتەرنەت جەلىسىندە ٴبىر كۇندە 5000عا دەيىن تاپسىرىس قابىلدادى!“ وسى ۇلگى كورسەتۋ باقشاسىنىڭ جاۋاپتىسى حان حايبو بىلاي دەپ تانىستىردى: قازىر ٴار كۇنى قىرۋار ساڭىراۋقۇلاق تەرىپ، نەگىزىنەن توڭىرەكتەگى بازارلاردى قامداپ، تۇتىنۋشىلاردىڭ قارسى الۋىنا بولەندىك.
بۇل ۇلگى كورسەتۋ باقشاسى كاسىپ سالاسىنىڭ شوعىرلانۋ، جەتەكتەۋ رولىن تولىق ساۋلەلەندىرىپ، بەلسەندىلىكپەن توڭىرەكتەگى اۋىل ـ قالاشىقتارداعى قىستاق تۇرعىندارىن جۇمىس ورنىمەن قامدادى. قازىر 300دەن استام بۇقارانى تۇراقتى جۇمىسقا ورنالاستىرىپ، قىستاق تۇرعىندارىنىڭ ٴۇيىنىڭ الدىندا كىرىسىن ارتتىرۋلارىنا مۇمكىندىك جاسادى. ”وسى ارادا جۇمىس ىستەپ اي سايىن 3000 يۋاننان استام كىرىس كىرگىزەمىن، تاعى كاسىپتىك ساڭىراۋقۇلاق ەگۋ تەحنولوگياسىن ۇيرەندىم، تەحنولوگياعا ىسىلعاننان كەيىن، ٴوزىم دە ەگىپ كورمەكشىمىن، تۇرمىسىمىز، ٴسوز جوق، بارعان سايىن جاقسارا تۇسەدى“، ـ دەدى ساڭىراۋقۇلاق تەرىپ جاتقان قىستاق تۇرعىنى قامبارچەھرى سۇلەيمەن.
بۇل عانا ەمەس، ۇلگى كورسەتۋ باقشاسى ساڭىراۋقۇلاق تاياقشاسىن جاساۋ سياقتى بۋىنداردى توڭىرەكتەگى 5 قىستاققا دەيىن كەڭەيتىپ، قىستاق تۇرعىندارىنىڭ قىستاقتان شىقپاي ـ اق يكەمدى جۇمىسقا ورنالاسۋىنا، ٴار ادامنىڭ كۇنىنە شامامەن 150 يۋان كىرىس كىرگىزۋىنە مۇمكىندىك جاسادى. بۇل شارا بۇقارانىڭ ”اقشا قاپشىعىن“ شىنايى قامپايتىپ، كاسىپ سالاسى دامۋىنىڭ پايداسىنان اناعۇرلىم كوپ شارۋالاردى يگىلىكتەندىردى.
قازىر وسى ۇلگى كورسەتۋ باقشاسىندا 15 مىڭ شارشى مەترلىك ولشەمدەنگەن ٴوندىرىس سەحى بار، نەگىزىنەن ياڭدۋگۋ، حۋتوۋگۋ سياقتى 14 ٴتۇرلى سيرەك كەزدەسەتىن ازىقتىق ساڭىراۋقۇلاق ەگىلەدى، جىلىنا 300 توننا ازىقتىق قۇرعاق ساڭىراۋقۇلاق ٴوندىرىپ، جىلدىق ٴونىم قۇنى 20 ميلليون يۋاننان اسادى.
بىلتىر وسى باقشا رايونى اۆتونوميالى رايوننىڭ زەرتتەۋ ـ ۇيرەنۋ بازاسى جانە مەملەكەتتىك 3A دارەجەلى ساياحات كورىنىس ٴوڭىرى بولىپ ٴساتتى بەكىتىلدى. ٴونىم ٴتۇرىن مولايتۋ ٴۇشىن، باقشا رايونى اعاش ساڭىراۋقۇلاق قويمالجىڭى، جۇپار ساڭىراۋقۇلاق ۇگىلمەسى سياقتى جىنتىكتەي وڭدەۋ ٴوندىرىس جەلىسىن جاڭادان ەنگىزىپ، ٴونىمنىڭ قوسىمشا قۇنىن ونان ارى جوعارىلاتتى. قازىر وسى ۇلگى كورسەتۋ باقشاسى ازىقتىق ساڭىراۋقۇلاق ەگۋ، وڭدەۋ، مادەنيەت ـ ساياحات، زەرتتەۋ ـ ۇيرەنۋ سىندى 1 ـ، 2 ـ، 3 ـ كاسىپتەردىڭ توعىسپالى دامۋىن جۇزەگە اسىرىپ، جەرگىلىكتى ورىننىڭ اۋىل ـ قىستاقتى گۇلدەندىرۋ ىسىنە پارمەندى قوزعاۋشى كۇش ۇستەدى.
