اتۇش قالاسىنىڭ نەگىزگى ساتىنى باسقارۋى پارمەندى بولدى
انار بۇلت \ شينجياڭ گازەتىنىڭ ٴتىلشىسى چىن جياڭلين، ەرىكتى ٴتىلشى حانقىز ابىليكىم
”بىلتىر 156 مىڭ يۋان پايدا ٴبولىندى، بيىل ٴجۇزىمنىڭ ٴوسۋى ٴتىپتى دە جاقسى، جىل سوڭىندا كوپشىلىكتىڭ قالتاسى، ٴسوز جوق، ٴتىپتى دە قامپايادى!“ 10 ـ ايدىڭ 9 ـ كۇنى اتۇش قالاسى ازاق قالاشىعى ازاق قىستاعىنىڭ ٴجۇزىم ەگىمشىلىگى بازاسىندا وسى قىستاق پارتيا ياچەيكاسىنىڭ شۋجيى چىن گوحۋ تىزبەك ـ تىزبەك جۇزىمگە قاراپ جايراڭ قاعىپ وسىلاي دەدى.
3 جىلدىڭ الدىندا بۇل جەردىڭ كوللەكتيۆ شارۋاشىلىعىندا ”قاڭقا قىستاق“ ەكەندىگىن كىم ويلاعان. بۇرىلىس جەرگىلىكتى ورىننىڭ نەگىزگى ساتىنى باسقارۋداعى شارالارىنان باستالدى: قىستاق پارتيا ياچەيكاسى بوس تۇرعان كوللەكتيۆ جەرىن بىرىكتىرىپ، ساپالى ٴجۇزىم تۇقىمىن ەنگىزىپ، ولشەمدەندىرىپ ەگۋدى دامىتتى؛ پارتيا مۇشەلەرى باستاماشىلدىقپەن تەحنولوگيا ۇيرەنىپ، ساتۋ جولىن قاراستىردى؛ سەلبەستىك كووپەراتيۆىن قۇرىپ، شارۋا وتباسىلارىمەن بازاردى بايلانىستىردى. بۇگىنگى تاڭدا ٴجۇزىم ەل ىشىندەگى باسقا ولكەلەرگە ساتىلىپ وتىر، 2024 ـ جىلى وسى قىستاقتىڭ كوللەكتيۆ شارۋاشىلىق كىرىسى ٴبىر ميلليون 37 مىڭ 700 يۋاننان اسىپ، قىستاق پارتيا ياچەيكاسى قالا دارەجەلى ”بەستە جاقسى“ پارتيا ياچەيكاسى بولىپ باعالاندى.
مۇنداي نەگىزگى ساتى پارتيا ياچەيكاسى اتۇش قالاسىندا جالعىز وسى عانا ەمەس. اتۇش قالاسى گۋاڭميڭ ٴمالىسى ماناس الەۋمەتتىك اۋماعىندا ”ۇيدەن سۋ وتسە ۋاڭ شۋجيدى ىزدەۋ، قارتتار ٴىس بىتىرسە گۋ مەڭگەرۋشىنى ىزدەۋ“ تۇرعىنداردىڭ ورتاق تانىمىنا اينالدى، 36 عيماراتتىڭ قابىرعاسىنداعى ”پارتيا مۇشەلەرىنىڭ بىرلەسىپ كوتەرمەگە الۋدى اشىق جاريالاۋ تاقتاسىندا“ الەۋمەتتىك اۋماقتاعى 53 پارتيالى كادردىڭ ينفورماتسياسى انىق كورسەتىلگەن.
ماناس الەۋمەتتىك اۋماعى پارتيا ياچەيكاسىنىڭ شۋجيى ۋاڭ مىڭحان كورسەتكەن ”تالاپ ـ تىلەكتەر تىزىمدىگىندە“ كورسەتىلۋىنشە، ”قيىنشىلىقتاردى، تالاپ ـ تىلەكتەردى شەشۋ توتە ارناسى“ اشىلعان سوڭ، تۇرعىندار كەڭەس زالى نەمەسە تەلەفون ارقىلى تالاپ ـ تىلەكتەرىن اڭىس ەتە الاتىن بولعان، شاعىن اۋماقتىڭ جول شامدارى جانباۋ ماسەلەسىن سول كۇنى تەكسەرىپ جوندەپ، كەلەسى كۇنى قالپىنا كەلتىرۋ جۇزەگە اسىرىلدى. ”جيناۋ ـ تۇجىرىمداۋ ـ ٴبىر جاقتى ەتۋ ـ اڭىس ەتۋ ـ باعالاۋ ـ ارحيۆكە الۋ“ سىندى ”6 باسقىشتى، جابىق“ قىزمەت ادىسىنە سۇيەنگەن بۇل الەۋمەتتىك اۋماق بيىل تۇرعىنداردىڭ 160تان استام تالاپ ـ تىلەگىن شەشىپ، بۇقارانىڭ ريزا بولۋ دەڭگەيى %99تەن استى.
سوڭعى جىلدارى اتۇش قالاسى نازاردى الەۋمەتتىك اۋماقتىڭ ”بەستى ساپالىلاندىرۋ“ بويىنشا قىزمەت كورسەتۋدىڭ ساپاسىن جوعارىلاتۋ ارەكەتىنە شوعىرلاندىرىپ، ٴالسىز، بىتىراڭقى نەگىزگى ساتى پارتيا ۇيىمدارىن ۇزدىكسىز رەتتەپ، ”بەستە جاقسى“ قىستاق (الەۋمەتتىك اۋماق) پارتيا ياچەيكاسىنان 162سىن كۇشەيتىپ قۇرىپ، ”ٴتورتتى كەڭەسۋ، ەكىنى جاريا ۇستاۋ“ مەحانيزمى ارقىلى ۇكىمەت ىستەرىن، قىستاق ىستەرىن، قازىنا ىستەرىن اشىق جاريالاپ، نەگىزگى ساتى پارتيا ۇيىمىن جۇرت تىلەگىن ۇيىستىراتىن نەگىزگى تىرەككە اينالدىردى.
”كوپشىلىك اسىقپاڭىزدار، بۇگىن ەلەكتر ساعاتىنىڭ احۋالىن انىق تۇسىندىرەيىك“. بيىل 8 ـ ايدا اتۇش قالاسى باقىت ٴمالىسى وستەڭ جولى الەۋمەتتىك اۋماعىنىڭ كادرى تۇرسۇنگۇل كامىل ورىندىقتى ٴتىزىپ قويىسىمەن، 10 نەشە تۇرعىن قاۋمالاي كەلدى. وسىدان بۇرىن ٴبىر تۇرعىن جاڭا ەلەكتر ساعاتىنىڭ تەز جۇرەتىندىگىن اڭىس ەتكەندە، سول كۇنى قاتىستى ورىندارمەن بايلانىس جاسادى ٴارى ٴىستى كەڭەسۋگە ۇيىمداستىردى، قىزمەتكەرلەردىڭ ”جاڭا ەلەكتر ساعاتى وتە سەزگىر“ دەپ تۇسىندىرۋىنەن كەيىن تۇرعىن مامەت ٴاليدىڭ كوڭىلىندەگى تۇيىنشەك شەشىلدى. مۇنداي ”ورىندىق ٴىس كەڭەسۋ ٴماجىلىسىن“ الەۋمەتتىك اۋماق اي سايىن 5 - 4 رەت اشادى، ۇلكەندى ـ كىشىلى ىستەردى تۇرعىنداردىڭ ٴوزى باسقارىپ، بۇقارانىڭ ماسەلەنى ايتاتىن ورنى بولۋىنا، ٴىستى اقىلداسۋ سەنىمىنىڭ بولۋىنا مۇمكىندىك جاسادى.
”مۇنداي تەز شەشىلەرىن ويلاماپپىن، كوپ ورىنعا بارۋدىڭ قاجەتى جوق بولدى“. تاياۋدا اتۇش قالاسى باقىت ٴمالىسى پارتيا مەن بۇقاراعا قىزمەت وتەۋ ورتالىعىندا قالا تۇرعىنى ٴامىراجان ابەيدوللا قايتا ـ قايتا العىس ايتتى. وسىدان بۇرىن ول قارىز اقشا بەرۋ داۋ ـ شارى سەبەبىنەن باسقالارمەن كەلىسە الماي ٴبىر جارىم جىل شەشىمىن تاپپاعان ەدى، قىزمەت وتەۋ ورتالىعىنا كەلگەننەن كەيىن «حالىقتىق جاراستىرۋ + ٴادىليالىق تۇراقتاندىرۋ» ارقىلى اقشانى تەز ارادا تاپسىرىپ الدى. وسى پارتيا مۇشەلەرى مەن بۇقاراعا قىزمەت وتەۋ ورتالىعىنا كىرسەڭىز، 1 ـ قاباتتاعى قابىلداۋ زالىنداعى ”ارىز ـ ارمان قابىلداۋ“، ”حالىقتىق جاراستىرۋ“ سياقتى تەرەزەلەر رەتتى تىزىلگەن، بۇقارا ”بارلىق جۇمىس ورنىنا جەتۋ“ كادرلار نۇسقاۋى بويىنشا ”ٴنومىر الىپ“ جۇمىس بىتىرە الادى.
وسى پارتيا مۇشەلەرى مەن بۇقاراعا قىزمەت وتەۋ ورتالىعىنىڭ مەڭگەرۋشىسى ليۋ جى بىلاي دەپ تانىستىردى: قايشىلىق ”شاعىن، ورتاشا، ۇلكەن“ دەپ تۇرگە ٴبولىنىپ ٴبىر جاقتى ەتىلەدى: كورشىلەر ارا ەرەگەسۋ سياقتى ”ۇساق اۋرۋلار“ سول جەردىڭ وزىندە شەشىلەدى؛ توقتام بەرەشەگى سياقتى ”ادەتتەگى اۋرۋلارعا“ كاسىپتىك جاراستىرۋشىلار ارالاسادى؛ جەردى وتكىزىپ الۋ، شاعۋ، كوشىرۋ سياقتى ”قيىن، كۇردەلى اۋرۋلار“ بويىنشا ”ماماندار بىرىگىپ دياگنوز قويادى“. ورتالىقتا ”ٴادىليا بولىمشەسى تۇراقتاپ تۇرۋ، ٴۇش كەڭسە، ٴتورت ورتالىق كەزەكپەن تۇرۋ“ ۇلگىسى اتقارىلىپ، ”بۇقارا ٴبىر عانا ەسىكتەن كىرىپ، قايشىلىقتى ٴبىر پۋنكتتە تولىق ٴبىر جاقتى ەتۋ“ جۇزەگە اسىرىلدى.
بۇقاراعا دالمە ـ ٴدال قىزمەت ەتۋ ٴۇشىن، اتۇش قالاسى باسشىلاردىڭ ٴسوز قالدىرۋ تاقتاسى، ”اماندىق e ۇيى“ سياقتى 6 ۇلكەن تۇعىردى بىرىكتىرىپ، حالىق تىلەگى ارناسىن كەڭەيتتى، سونىمەن قاتار ”اۋىل ـ قىستاقتاعى شاعىن دوڭگەلەك ۇستەل“ سياقتى شەپكە سۇيەنىپ، بۇقارانىڭ ادامدى ٴتۇسىندىرۋ، ٴىستى ايتۋ، ەسەپتى ايتۋ، ٴسوزدى ايتۋ سىندى ”ٴتورتتى ايتۋ“ قيمىلىن ۇدايى ورىستەتتى.
