”ٴار جاقتىڭ كەلەر جىلى شىنجىن كەزدەسۋىنە بىرگە بارۋىن ٴۇمىت ەتەمىن“
شينحۋا اگەنتتىگىنىڭ تىلشىلەرى ياڭ يجۇن، سۋ لياڭ
جەرگىلىكتى ۋاقىت 11 ـ ايدىڭ 1 ـ كۇنى تۇستەن بۇرىن كورەيانىڭ چيڭجوۋىنداعى حىباي ٴماجىلىس ورتالىعىندا ٴتوراعا شي جينپيڭ ازيا - تىنىق مۇحيت ەكونوميكالىق سەلبەستىك ۇيىمىنىڭ (APEC) 32 ـ رەتكى باسشىلار بەيرەسمي ٴماجىلىسىنىڭ 2 ـ كەزەڭدىك ماجىلىسىنە قاتىناستى. مۇنداعى ٴبىر ماڭىزدى بۋىن APEC وتاعاسى ەل مىندەتىن وتكىزىپ بەرۋ ـ وتكىزىپ الۋ بولدى.
2026 ـ جىلى جۇڭگو 3 ـ رەت APECتىڭ وتاعاسى ەلى بولادى. باسشىلار بەيرەسمي ٴماجىلىسىنىڭ وتكىزىلەتىن ۋاقىتى مەن ورنى وسى ساتتە جاريالاندى.
ٴارقايسى جاق ۇمىتتەنىپ وتىرعاندا، ٴتوراعا شي جينپيڭ سالتاناتپەن مىنانى جاريالادى: جۇڭگو جاق كەلەر جىلى 11 ـ ايدا گۋاڭدۇڭ ولكەسىنىڭ شىنجىن قالاسىندا APECتىڭ 33 ـ رەتكى باسشىلار بەيرەسمي ٴماجىلىسىن وتكىزەدى. ”ٴار جاقتىڭ كەلەر جىلى شىنجىن كەزدەسۋىنە بىرگە بارىپ، ازيا - تىنىق مۇحيت ٴوڭىرىنىڭ دامۋ ۇلى جوسپارىن بىرگە اقىلداسىپ، ازيا - تىنىق مۇحيت ٴوڭىرىنىڭ كوركەم بولاشاعىن بىرگە جاراتۋىن ٴۇمىت ەتەمىن“.
”2026 ـ جىلى شىنجىندا كەزدەسەيىك“! چيڭجوۋدا APEC ماجىلىسىنە تىلشىلىك جاساعان مەديا ٴتىلشىسى وسى ٴبىر حاباردى بۇكىل دۇنيە جۇزىنە دەرەۋ تاراتتى.
ٴماجىلىستى باسقارعان كورەيا زۇڭتۇڭى لي زايميڭ ٴتوراعا شي جينپيڭنىڭ قولىن قاتتى قىسىپ، قۇتتى بولسىن ايتتى. ول بىلاي دەدى: بىلتىر پەرۋدە جۇڭگونىڭ 2026 ـ جىلى APECتىڭ وتاعاسى ەلى مىندەتىن ارقالايتىندىعى جاريالانعاننان بەرى، جۇڭگو جاق كوپتەگەن دايىندىق قىزمەتتەر ىستەدى. ”قازىر ٴتوراعا شي جينپيڭنىڭ باسشىلىعىندا APEC جاڭا ساپاردى باستايدى“.
سوڭعى جىلدارى ەكونوميكانىڭ جاھاندانۋى كەرى تولقىنعا جولىعىپ، APECتىڭ رولى اناعۇرلىم كورنەكتىلەندى. حالىقارالىق جاعدايدا وزگەرىس پەن بىلىقپالىق قاباتتاسىپ، ازيا - تىنىق مۇحيت ٴوڭىرىنىڭ اشىق سەلبەستىگى تىڭ قاتاڭ سىن ـ سايىسقا ٴدوپ كەلدى، ٴارقايسى جاق APECتىڭ ازيا - تىنىق مۇحيت وڭىرىندەگى ەڭ ماڭىزدى ەكونوميكالىق سەلبەستىك مەحانيزمى رەتىندە، اۋەلگى ماقساتتى قايتا ەسكە الىپ، اناعۇرلىم ومىرشەڭدىككە جانە سەرپىمدىلىككە تولى ازيا - تىنىق مۇحيت سەلبەستىگى ارقىلى دۇنيە جۇزىنە كورنەكتى ۇلەس قوسۋىن ٴۇمىت ەتەدى.
”جۇڭگو جاق مۇنى وراي ەتىپ، ٴار جاقپەن قول ۇستاسا وتىرىپ ازيا - تىنىق مۇحيت ورتاق تۇلعاسىن قۇرىپ، ازيا - تىنىق مۇحيت ٴوڭىرىنىڭ ارتۋى مەن گۇلدەنۋىن جەبەپ، ازيا - تىنىق مۇحيت وڭىرىندەگى ەركىن ساۋدا رايونى، ۇلاستىرۋ ـ تۇتاستىرۋ، سيفرلى ەكونوميكا، جاساندى زەردە سياقتى ناقتى ىستەر سەلبەستىگىن كۇش سالا ىلگەرىلەتىپ، ازيا - تىنىق مۇحيت ٴوڭىرىنىڭ دامۋىنا اناعۇرلىم زور ومىرشەڭ كۇش جانە قوزعاۋشى كۇش ۇستەپ، ازيا - تىنىق مۇحيت وڭىرىندەگى حالىقتى ٴتىپتى دە كوپ باقىتقا كەنەلدىرۋدى قالايدى“. ٴتوراعا شي جينپيڭنىڭ ٴسوزى سەنىمدى دە بەكەم بولدى.
نىسانا بار، بەتالىس بار، شارا بار. حالىقارالىق باقىلاۋشى قايراتكەر شولۋ جاساپ بىلاي دەدى: جۇڭگونىڭ 3 ـ رەت APECتىڭ وتاعاسى ەلى بولۋى جۇڭگو جاقتىڭ ازيا - تىنىق مۇحيت ٴوڭىرى سەلبەستىگىندە جاۋاپكەرشىلىك ارقالايتىندىعىن بەينەلەدى.
2001 ـ جىلى شاڭحايدا، 2014 ـ جىلى بەيجيڭدە جۇڭگو APEC باسشىلار بەيرەسمي ٴماجىلىسىن 2 رەت وتكىزىپ، APECتىڭ دامۋ تاريحىنداعى 2 ماڭىزدى بەلەستى جاراتتى. شىنجىن قالايشا 2026 ـ جىلعى APEC ٴماجىلىسى وتكىزىلەتىن جەر بولدى؟
ٴتوراعا شي جينپيڭ كوسىلە بىلاي دەدى: ”شىنجىن تىنىق مۇحيت جاعالاۋىنا ورنالاسقان، نەشە ون جىلدا مەشەۋ شاعىن بالىقشىلىق قىستاقتان دامىپ وسىزاماندانعان حالىقارالىق ٴىرى قالاعا اينالدى، بۇل جۇڭگو حالقى جاراتقان دۇنيە ٴجۇزىنىڭ دامۋ تاريحىنداعى ٴبىر كەرەمەت، سونداي ـ اق جۇڭگونىڭ ٴوزارا پايدا جەتكىزىپ تەڭ يگىلىككە كەنەلەتىن اشىق ۇستاۋ ستراتەگياسىن بۇلجىماي اتقارۋداعى ماڭىزدى تەرەزەسى“.
چيڭجوۋ ٴماجىلىسى اقپارات ورتالىعىندا ٴتوراعا شي جينپيڭنىڭ ٴسوزىنىڭ تىكە تاراتىلىمىن ەستىگەن فرانسيا مەدياسىنىڭ ٴتىلشىسى چەليو فرولەدي بىلاي دەدى: ”وسى ساتتە مەن كەلەر جىلى شىنجىنعا بارىپ وسى سالتاناتتى ٴماجىلىستى حابارلاپ، جۇڭگونىڭ ەسىك اشۋ تىنىسى مەن دامۋ جاعدايىن يگەرىپ، دۇنيە جۇزىنە APEC’ جۇڭگو جىلىنىڭ‘ تاماشا ساتتەرىن جەتكىزۋدى كۇتە باستادىم“.
وتكىزىپ بەرۋ ـ وتكىزىپ الۋ بۋىنى اياقتاعاننان كەيىن، ماجىلىسكە قاتىناسقان ٴبىرقانشا ەكونوميكالىق تۇلعانىڭ باسشىلارى ىرىقتىلىقپەن الدىعا بارىپ ٴتوراعا شي جينپيڭمەن ىقىلاسپەن قول الىسىپ اڭگىمەلەستى، ٴبىر جىلدان كەيىن شىنجىندا باس قوسۋدى كۇتەتىندىكتەرىن ٴبىلدىردى.
ۇشى ـ قيىرسىز تىنىق مۇحيت APECتىڭ دامۋ تاريحىنداعى ماڭىزدى بەلەسكە تاعى دا كۋا بولادى.
(شينحۋا اگەنتتىگىنىڭ 11 ـ ايدىڭ 1 ـ كۇنى كورەيانىڭ چيڭجوۋىنان بەرگەن حابارى)
