”ورتەڭگە ەگىن سالۋدان“ ”ياۋجانزى“ ماركالى ۇنعا دەيىن

　　شونجى اۋدانى بانجيەگوۋ قالاشىعى ياۋجانزى قىستاعىندا اۋىل شارۋاشىلىق ماشينا شوفەرلەرى كومباينمەن ٴبيداي ورۋدا (سۋرەت 7 ـ ايدىڭ 10 ـ كۇنى تۇسىرىلگەن).

سۋرەتتى حى لۇڭ تۇسىرگەن

　　شونجى اۋدانى بانجيەگوۋ قالاشىعى ياۋجانزى قىستاعى پارتيا باس ياچەيكاسىنىڭ شۋجيى تاڭ پەيكىنىڭ كومپيۋتەر البومىنداعى ەكى پارشا سۋرەت ونىڭ جادىنان تەرەڭ ورىن العان.

　　مۇنىڭ اراسىنداعى ٴبىر سۋرەتتىڭ تۇسىرىلگەن ۋاقىتى 2011 ـ جىلى، سۋرەتتە قىستاق تۇرعىندارى ٴونىم جيىپ الىنعاننان كەيىنگى جۇگەرى اتىزىندا ايىرمەن تراكتورعا جۇگەرى سابانىن باسىپ جاتىر؛ ەندى ٴبىر پارشا سۋرەت بيىلعى ٴبيداي ورۋ مەزگىلىندە تۇسىرىلگەن، سۋرەتتە كەڭ كوسىلگەن التىن ٴتۇستى ٴبيداي ”تەڭىزىندە“ بىرنەشە ٴىرى تۇرپاتتى كومباين ٴبىر ۋاقىتتا جيىن ـ تەرىن جۇمىسىن جۇرگىزىپ جاتقان ەدى، كوزىڭىزگە وسى زامانعى اۋىل شارۋاشىلىعىنىڭ جيىن ـ تەرىن كورىنىسى مەن مۇندالايدى.

　　”بۇل ەكى سۋرەتتى ياۋجانزى قىستاعىنىڭ سوڭعى جىلدارداعى دامۋ وزگەرىسىنىڭ جاندى كارتيناسى دەۋگە بولادى“ ـ دەدى تاڭ پەيكى.

　　شونجى اۋدانى بۇكىل ەلدەگى ساپالى ٴبيداي ٴوندىرىس بازاسى، ال ياۋجانزى قىستاعى ٴبيدايىنىڭ جوعارى ٴونىمدى، ساپالى بولۋىمەن ەلگە تانىلعان، ەجەلدەن ”ٴبيداي قىستاعى“ دەگەن تاماشا اتى بار. الايدا ون نەشە جىلدىڭ الدىندا ياۋجانزى قىستاعىنىڭ باسقا قىستاقتان پالەندەي پارقى جوق ەدى. ول كەزدە ياۋجانزى قىستاعىنىڭ ەگىستىك جەرى بىتىراندى بولىپ، قىستاق تۇرعىندارى ٴوز الدىنا ەگىن سالىپ، ەككەن داقىلدارى دا كوپ ٴارى ٴار ٴتۇرلى، ەگىن سالۋ وزىندىك قۇنى جوعارى، مۋ باسىندىق ٴونىم تومەن بولاتىن.

　　قاراپايىم ٴبيدايدى قايتكەندە حالىقتى بايىتىپ، قىستاقتى قۇدىرەتتەندىرەتىن ٴىرى كاسىپ سالاسىنا اينالدىرۋعا بولادى؟ بۇل تاڭ پەيكى مەن ياۋجانزى قىستاعىنداعى كادرلار مەن بۇقارا باستان ـ اياق ىزدەنىس جاساپ كەلە جاتقان ماسەلە ەدى.

　　2009 ـ جىلى ياۋجانزى قىستاعى شونجى اۋدانى فىڭيۇي اۋىل شارۋاشىلىعىنا قىزمەت وتەۋ كاسىپتىك سەلبەستىك كووپەراتيۆىن قۇرىپ، بۇكىل قىستاقتىڭ جەرىن ٴبىر تۇتاس سەلبەستىك كووپەراتيۆىنە وتكىزىپ بەرىپ، ٴاربىر وتباسىنىڭ ”ۇساق اتىزدارىن“ قوسىپ ”ۇلكەن اتىزعا“ اينالدىرىپ، سەلبەستىك كووپەراتيۆى ٴبىر تۇتاس باسقاردى. سونىمەن ياۋجانزى قىستاعىنداعى 443 وتباسى سەلبەستىك كووپەراتيۆىنىڭ جارناگەرىنە اينالىپ، كوپشىلىك بىرگە ”ٴبىر اتىزعا“ ەگىن سالدى، جەرىن جارناعا قوسقان قىستاق تۇرعىندارى سەلبەستىك كووپەراتيۆىنەن جەردى اينالىمعا سالۋ اقىسىن السا، سەلبەستىك كووپەراتيۆىندە جۇمىس ىستەگەندەر ەڭبەكاقى اقىسىن الىپ، جىل سوڭىندا تاعى پايدا ٴبولىسىن الدى.

　　بۇل سەلبەستىك كووپەراتيۆى ٴبيداي سياقتى ەگىس داقىلدارىن كولەمدەندىرىپ، ولشەمدەندىرىپ، عىلمي جولمەن ەگىپ، ەگىمشىلىك ونىمدىلىگىن ۇزدىكسىز جوعارىلاتتى. سوڭعى جىلدارى ياۋجانزى قىستاعى ”تۇتاس ٴوڭىر جاسىل، ٴىشىنارا جەرلەر ورگانيكالى بولۋ“ نىساناسىن ارقاۋ ەتىپ، جاسىل، ورگانيكالى ٴبيداي، ەرەكشەلىككە يە قارا استىق سياقتى داقىلداردى ەگۋدى كۇش سالا دامىتىپ، اۋىل شارۋاشىلىعى ەگىمشىلىگىنىڭ ساپالى، جوعارى ٴونىمدى بولۋعا قاراي قادام تاستاۋىن جەبەدى.

　　ياۋجانزى قىستاعىندا ٴبىر ٴتۇيىر ٴبيدايدى ەگۋدەن جيىپ الۋعا دەيىنگى بارىسى قۇن تىزبەگىنىڭ ٴبىرىنشى قادامى عانا ەدى.

　　2020 ـ جىلى قىستاق سەلبەستىك كووپەراتيۆى 50 ميلليون يۋان قارجى قوسىپ، ٴىرى تۇرپاتتى ۇن وڭدەۋ زاۆودىن قۇرىپ، جىلدىق وڭدەۋ قۋاتىن 70 مىڭ تونناعا جەتكىزىپ، ياۋجانزى قىستاعى مەن ونىڭ توڭىرەگىندەگى ٴبيداي شيكىزاتتارىن تۇگەلدەي سول جەردىڭ وزىندە وڭدەپ جانە كادەگە جاراتىپ قۇنىن ارتتىرۋدى جۇزەگە اسىردى. ورگانيكالى ٴبيدايدى وڭدەپ ۇن شىعارعاننان كەيىن، ارى قاراي جىنتىكتەي مانەرلەپ، قولمەن يلەنگەن ورگانيكالى لاعمان ەتىپ جاساپ، اتىزدان داستارقانعا دەيىنگى جاسىل تۇتاس كاسىپ سالاسى تىزبەگىنىڭ جابىق اينالىمىن ورىندادى.

　　بىرنەشە جىلدىڭ الدىندا قىستاق سەلبەستىك كووپەراتيۆى قارجى قوسىپ قۇرعان شينجياڭ فىڭي اۋىل شارۋاشىلىعىن دامىتۋ شەكتى سەرىكتەستىگى قىستاقتىڭ جاسىل، ورگانيكالى اۋىل شارۋاشىلىق ونىمدەرى بايلىعى باسىمدىعىنا سۇيەنىپ، جاسىل جانە ورگانيكالى ۇن، قولمەن يلەنگەن ورگانيكالى لاعمان، جاسىل ازىقتىق ماي جانە جاسىل قارا استىق سياقتى 4 ۇلكەن ٴتۇر بويىنشا 40 نەشە ٴتۇرلى ”ياۋجانزى“ جەلىلەس اۋىل شارۋاشىلىعى ونىمدەرىن ٴتۇيىندى تۇردە وڭدەدى. كاسىپ سالاسى تىزبەگىنىڭ ۇزارۋىنا ىلەسە، ياۋجانزى قىستاعىنىڭ اۋىل شارۋاشىلىق ونىمدەرىنىڭ قوسىمشا قۇنى دا ۇزدىكسىز جوعارىلادى.

　　”بازاردا ٴبىزدىڭ ’ياۋجانزى‘ ماركالى ورگانيكالى ۇنىمىزدىڭ ٴار كيلوگرامى 20 يۋانعا دەيىن ساتىلادى، باعاسى ادەتتەگى ۇننان نەشە ەسە جوعارى بولىپ، بازارداعى ايگىلى ونىمگە اينالدى!“ ـ دەدى تاڭ پەيكى ماقتانىشپەن.

　　سوڭعى جىلدارى اۋىل ـ قىستاق ساياحاتىنىڭ گۇلدەنۋىنە ىلەسە، ياۋجانزى قىستاعى اۋىل شارۋاشىلىعى مەن ساياحاتتى توعىستىرا دامىتۋ جاعىندا ٴىرى ىستەر تىندىرا باستادى. قىستاقتا ىلگەرىندى ـ كەيىندى ٴبيداي مۇراجايى، قىستاق تاريحى سارايى، ساياحاتشىلاردى قابىلداۋ ورتالىعى، اۋىل ـ قىستاقتى گۇلدەندىرۋ بويىنشا ناقتى جاتتىعۋ بازاسى، ٴبيداي اتىزى باقشاسى، ەرەكشەلىككە يە حالىقتىق تۇسەلحانا، ورگانيكالى اۋىل شارۋاشىلىق ونىمدەرىن تاماشالاۋ زاۆودى سياقتى ساياحات كورىنىس تۇيىندەرى قۇرىلدى. ٴبىر مەزگىلدە بيدايمەن اتى شىققان وسى قىستاق اۋىل ـ قىستاق ساياحاتىنداعى، ٴسوزسىز، باراتىن جەرگە اينالدى.

　　جاسىل، ورگانيكالى ٴبيداي ەگۋدەن اۋىل شارۋاشىلىق ونىمدەرىن جىنتىكتەي وڭدەۋ كاسىپ سالاسى تىزبەگىنىڭ ۇزارۋىنا دەيىن، ودان اۋىل شارۋاشىلىعى مەن ساياحاتتى ۇشتاستىرۋعا، اۋىل ـ قىستاق ساياحاتىن گۇلدەندىرۋگە دەيىن، ياۋجانزى قىستاعى ”1 ـ كاسىپتى جالعاستىرۋ، 2 ـ كاسىپتى ۇلاستىرۋ، 3 ـ كاسىپتى جەتەكتەۋ“ سىندى 3 كاسىپتى توعىستىرعان جاسىل كاسىپ سالاسى تىزبەگىن ۇزدىكسىز كەمەلدەندىرىپ، قاراپايىم ٴبيدايدىڭ قۇنىن ەسەلەپ ارتتىرىپ، كوللەكتيۆ شارۋاشىلىقتىڭ ۇزدىكسىز زورايۋىن جەبەپ، قىستاق تۇرعىندارىنىڭ كىرىسىن دە ورنىقتى ارتتىردى. 2024 ـ جىلى ياۋجانزى قىستاعىنىڭ ٴارقايسى كاسىپ سالاسىنىڭ جالپى ٴونىم قۇنى 510 ميلليون يۋانعا جەتىپ، بۇكىل قىستاقتاعى شارۋالاردىڭ جان باسىندىق كىرىسى 30 مىڭ 600 يۋانعا جەتتى.

　　ۇتىمسىز ەگۋدەن شوعىرلى شارۋاشىلىق جۇرگىزۋگە دەيىن، ٴداستۇرلى ەگىمشىلىكتەن عىلىم ـ تەحنولوگيامەن قورعاۋعا دەيىن، تومەن ٴونىمدى وندىرىستەن ساپالى، جوعارى ٴونىمدى وندىرۋگە دەيىن، ەگۋدى نەگىز ەتۋدەن 3 كاسىپتى توعىستىرۋعا دەيىن، العاشقى ونىمنەن قۇنىن ەسەلەپ ارتتىرۋعا دەيىن، بۇل ياۋجانزى قىستاعىنىڭ دامۋ وزگەرىسىنىڭ كارتيناسى عانا ەمەس، ونان دا ماڭىزدىسى، شينجياڭنىڭ اۋىل شارۋاشىلىعىنىڭ جوعارى ساپالى دامۋىنىڭ ىقشام كورىنىسى.

　　”ٴبىز تاعى جاسىل كاسىپ سالاسى تىزبەگىن ۇزدىكسىز ۇزارتىپ، اۋىل شارۋاشىلىعىنىڭ قۇن تىزبەگىن جوعارىلاتىپ، شارۋالاردىڭ كىرىستى ارتتىرۋ تىزبەگىن كۇشەيتىپ، جاسىل كاسىپ سالاسىن دامىتۋ ارقىلى اۋىل ـ قىستاق كاسىپ سالاسىنىڭ گۇلدەنۋىن جەبەپ، ياۋجانزى قىستاعىمىزداعىلاردىڭ اناعۇرلىم باي تۇرمىس كەشىرۋىنە مۇمكىندىك جاسايمىز“، ـ دەدى تاڭ پەيكى.