شي جينپيڭ ساپقا قوسىلۋعا تۋ تاپسىرۋ سالتىنا قاتىناستى ٴارى اۆياماتكاعا شىعىپ كوزدەن كەشىردى
11 ـ ايدىڭ 5 ـ كۇنى ەلىمىزدىڭ تۇڭعىش ەلەكتروماگنيتتىك سەرىپپە تيبىندەگى اۆياماتكاسى فۋجيان اتتى اۆياماتكانىڭ ساپقا قوسىلۋىنا تۋ تاپسىرۋ سالتى حاينان سان ـ ياداعى ٴمالىم اسكەري پورتتا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ساپقا قوسىلۋعا تۋ تاپسىرۋ سالتىنا قاتىناستى ٴارى اۆياماتكاعا شىعىپ كوزدەن كەشىردى. سۋرەتتە: شي جينپيڭ فۋجيان اتتى اۆياماتكانىڭ باستىعىنا، جىڭۋيىنا ارميا تۋىن تاپسىردى.
□ سۋرەتتى شينحۋا اگەنتتىگىنىڭ ٴتىلشىسى لي گاڭ تۇسىرگەن
11 ـ ايدىڭ 5 ـ كۇنى ەلىمىزدىڭ تۇڭعىش ەلەكتروماگنيتتىك سەرىپپە تيبىندەگى اۆياماتكاسى فۋجيان اتتى اۆياماتكانىڭ ساپقا قوسىلۋىنا تۋ تاپسىرۋ سالتى حاينان سان ـ ياداعى ٴمالىم اسكەري پورتتا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ساپقا قوسىلۋعا تۋ تاپسىرۋ سالتىنا قاتىناستى ٴارى اۆياماتكاعا شىعىپ كوزدەن كەشىردى. سۋرەتتە: شي جينپيڭ اۆياماتكا ۇشاقتارىنىڭ ۇشقىشتارىمەن، اۆياتسيالىق قامتاماسىزداندىرۋ قىزمەتكەرلەرىمەن بىرگە سۋرەتكە ٴتۇسىپ ەستەلىك قالدىرۋدا.
□ سۋرەتتى شينحۋا اگەنتتىگىنىڭ ٴتىلشىسى لي گاڭ تۇسىرگەن
شينحۋا اگەنتتىگىنىڭ 11 ـ ايدىڭ 7 ـ كۇنى سان ـ يادان بەرگەن حابارى (ٴتىلشى مەي چاڭۋي). ەلىمىزدىڭ تۇڭعىش ەلەكتروماگنيتتىك سەرىپپە تيبىندەگى اۆياماتكاسى فۋجيان اتتى اۆياماتكانىڭ ساپقا قوسىلۋىنا تۋ تاپسىرۋ سالتى 11 ـ ايدىڭ 5 ـ كۇنى حاينان سان ـ ياداعى ٴمالىم اسكەري پورتتا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ساپقا قوسىلۋعا تۋ تاپسىرۋ سالتىنا قاتىناستى ٴارى اۆياماتكاعا شىعىپ كوزدەن كەشىردى.
11 ـ ايداعى سان ـ يا، ۇشى ـ قيىرسىز كەڭ تەڭىزدە كوك تولقىن شىمىرلايدى. اسكەري كەمەجايدا فۋجيان اتتى اۆياماتكا تەڭىزدە قاسقايىپ تۇر، جالاۋلار جەلبىرەپ، شاندۇڭ اتتى اۆياماتكا تولقىن جارا وعان سەرىك بولىپ، تەڭىز ارمياسى اسكەري بولىمدەرى مەن اۆياماتكا قۇرىلىس ورىندارىنان كەلگەن ۋاكىلدەردەن 2000نان استام ادام كەمەجايدا رەتتى قاتار تۇزەپ، سالتاناتتى دا دۋماندى بەينەگە شومدى.
تۇستەن كەيىن ساعات 4تەن 30 مينۋت مولشەرىندە ساپقا قوسىلۋعا تۋ تاپسىرۋ سالتى باستالدى، بۇكىل الاڭداعىلار جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى، بەس جۇلدىزدى قىزىل تۋ باياۋ كوتەرىلدى. قۇرمەت قاراۋىلى 1 ـ تامىز ارميا تۋىن قورعاپ مارش قاداممەن ٴتوراعالار مىنبەسىنىڭ الدىنا كەلدى. شي جينپيڭ 1 ـ تامىز ارميا تۋىن فۋجيان اتتى اۆياماتكانىڭ باستىعىنا، جىڭۋيىنا تاپسىردى. فۋجيان اتتى اۆياماتكانىڭ باستىعى، جىڭۋيى شي جينپيڭگە قۇرمەت ٴبىلدىرىپ، شي جينپيڭنىڭ قولىنان 1 ـ تامىز ارميا تۋىن تاپسىرىپ الدى. شي جينپيڭ ولارمەن بىرگە سۋرەتكە ٴتۇسىپ ەستەلىك قالدىردى. ساپقا قوسىلۋعا تۋ تاپسىرۋ سالتى جۇڭگو حالىق ازاتتىق ارمياسىنىڭ ارميا انىمەن اياقتادى.
شي جينپيڭ ەلىمىزدىڭ اۆياماتكا قۇرىلىسىنىڭ دامۋىنا باستان ـ اياق ايرىقشا نازار اۋدارىپ كەلەدى. سالت اياقتاعاننان كەيىن شي جينپيڭ فۋجيان اتتى اۆياماتكاعا شىعىپ، ەلىمىزدىڭ اۆياماتكا قۇرىلىسىنىڭ دامۋى جونىندەگى قىزمەت مالىمەتىن تىڭداپ، اۆياماتكا جۇيەسىنىڭ سوعىس جۇرگىزۋ قابىلەتىن قالىپتاستىرۋ، ەلەكتروماگنيتتىك سەرپۋ جۇيەسى قۇرىلىسىنىڭ قولدانىلۋى سياقتى جاعدايلاردى ۇعىستى.
كەڭ كوسىلگەن ۇشۋ الاڭقىسىندا 4 توسقاۋىلداۋ ارقانى، 3 ەلەكتروماگنيتتىك سەرىپپە ۇشىرۋ ورنى ەرەكشە كوز تارتادى، جيان _ 35، جيان _15T، اۋە ساقشىسى _ 600 سياقتى جاڭا تۇرپاتتى كەمەلىك ۇشاقتار رەتى بويىنشا توقتاتىلعان. شي جينپيڭ پالۋبانىڭ يقۋاتتىق ورنالاسۋى جونىندەگى تانىستىرۋدى تىڭداپ، ٴالسىن ـ ٴالى كىدىرىپ، جابدىق ـ قۇرىلعىلاردى كوزدەن كەشىردى. شي جينپيڭ اۆياماتكا ۇشاعىنىڭ ۇشقىشتارىمەن ىقىلاسپەن اڭگىمەلەسىپ، ۇشاقتىڭ تەحنولوگيالىق، تاكتيكالىق قاسيەتىن جانە ەلەكتروماگنيتتىك سەرىپپە تيبىندەگى ەرەكشەلىگى مەن ارتىقشىلىعىن ەگجەي ـ تەگجەيلى سۇراستىرىپ، اۆياماتكالىق ۇشاقتى سەرىپپە ۇشىرۋ بارىسى كورسەتپەسىن كوردى. الۋان ٴتۇستى كۇرمە كيگەن اۆياتسيالىق قامتاماسىزداندىرۋ قىزمەتكەرلەرى ٴتوراعا شي جينپيڭنىڭ كەلگەنىن كورىپ، تۇس ـ تۇستان قاۋمالاپ، ٴتوراعا شي جينپيڭگە امانداسىپ، وزدەرىنىڭ قىزمەت ورىندارى مەن باستى مىندەتتەرىن مالىمدەدى. شي جينپيڭ كوپشىلىكتى كاسىپتىك شەبەرلىك پەن سوعىس جۇرگىزۋ قابىلەتىن ۇزدىكسىز جوعارىلاتىپ، فۋجيان اتتى اۆياماتكانىڭ جاۋىنگەرلىك قۋاتى قۇرىلىسىنا ۇلەس قوسۋعا شابىتتاندىردى.
وسىدان كەيىن شي جينپيڭ فۋجيان اتتى اۆياماتكا ارالىنا بارىپ، مۇنارا تۇعىرىنا شىعىپ، ۇشۋعا قولباسشىلىق ەتۋ جانە ۇشىپ ـ قونۋ جاعدايىن ۇعىستى. شي جينپيڭ جۇرگىزۋ بولمەسىنە كىرىپ، كەزەكشىلىك مىندەت وتەۋ ورنىن كورىپ، ٴجۇرۋ ـ توقتاۋ ەستەلىگىنە بايىپتىلىقپەن قول قويدى. شي جينپيڭ فۋجيان اتتى اۆياماتكانىڭ ەلەكتروماگنيتتىك سەرپۋ تەحنيكاسىن قولدانۋ جونىندە ٴوزى شەشىم جاسادى. ول سەرپۋ ۋنيۆەرسال مەڭگەرۋ پۋنكتىنە كەلىپ، قىزمەت بارىسىن مۇقيات كوزدەن كەشىرىپ، سەرپۋ كنوپكاسىن باستى، پالۋباداعى بوس تۇرعان قوزعالتقىش بەينە ادىرنادان اجىراعان جەبەدەي كەمە باسىنا قاراي زىمىرادى. شي جينپيڭ كەمەدەگى وفيتسەر ـ اسكەرلەردىڭ تۇرمىسىنا ايرىقشا كوڭىل ٴبولىپ، اسحاناعا جانە اسكەرلەر بولمەسىنە ارنايى كەلىپ، اس ـ سۋ جانە جاتىن ورىن قامتاماسىزدىعى جاعدايىن كوزدەن كەشىرىپ، اسكەرلەرمەن ىقىلاسپەن اڭگىمەلەسىپ، ٴار دارەجەلى ورىندارعا ٴار جاقتاعى قامتاماسىزدىقتى ويداعىداي ىستەپ، قالىڭ وفيتسەر ـ اسكەرلەردىڭ اسكەري ٴبولىم قۇرىلىسىنا جانە سوعىسقا دايىندالۋعا، سوعىس جۇرگىزۋگە اناعۇرلىم ويداعىداي ات سالىسۋىنا مۇمكىندىك جاساۋدى تاپسىردى.
قوشتاساردا اۆياماتكاداعى وفيتسەر ـ اسكەرلەر قيماستىقپەن ۇشۋ الاڭقىسىندا جانە كەمەجايدا رەتتى ساپ تۇزەپ، ٴتوراعا شي جينپيڭگە قۇرمەت ٴبىلدىرىپ، «پارتيانىڭ قولباسشىلىعىنا بويسۇنامىز، جەڭىستى شايقاس جۇرگىزەمىز، ستيلدە جاقسى بولامىز» دەپ بىركەلكى داۋىسپەن اسقاقتاتا ۇراندادى.
ساي چي، جاڭ گوچيڭ فۋجيان اتتى اۆياماتكانىڭ ساپقا قوسىلۋىنا تۋ تاپسىرۋ سالتىنا قاتىناستى. جاڭ شىڭمين سالتتى باسقاردى.
فۋجيان اتتى اۆياماتكا _ ەلىمىزدىڭ تۇڭعىش ەلەكتروماگنيتتىك سەرىپپە تيبىندەگى اۆياماتكاسى، سونداي ـ اق ەلىمىزدىڭ 3 ـ اۆياماتكاسى، ٴنومىرى «18»، 2022 ـ جىلى 6 ـ ايدا سۋعا ٴتۇسىرىلىپ ات قويىلعان. فۋجيان اتتى اۆياماتكانى ەلىمىز بۇكىلدەي دەربەس جوبالاپ جاساعان، ونىڭ ەلەكتروماگنيتتىك سەرپۋ تەحنيكاسى دۇنيە ٴجۇزىنىڭ وزىق ورەسىنە جەتكەن.
ورتالىق پەن مەملەكەت ورگاندارىنىڭ قاتىستى تاراۋلارىنداعى، اسكەري ىستەر كوميتەتى ورگانىنىڭ قاتىستى تاراۋلارىنداعى، وڭتۇستىك بولىك سوعىس رايونىنداعى، تەڭىز ارمياسىنداعى، حاينان ولكەسىندەگى، سونداي ـ اق اۆياماتكا قۇرىلىسى ورىندارىنداعى جاۋاپتى جولداستار سالتقا قاتىناستى.
