15 ـ كەزەكتى مەملەكەتتىك سپورت جارىسى گۋاڭدۇڭنىڭ گۋاڭجوۋىندا سالتاناتپەن باستالدى
شي جينپيڭ باستالۋ سالتىنا قاتىناستى ٴارى سپورت جارىسىنىڭ باستالعاندىعىن جاريالادى
11 - ايدىڭ 9 - كۇنى كەشتە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ گۋاڭدۇڭ ولكەسىنىڭ گۋاڭجوۋ قالاسىندا جۇڭحۋا حالىق رەسپۋبليكاسى 15 - كەزەكتى سپورت جارىسىنىڭ باستالۋ سالتىنا قاتىناستى ءارى سپورت جارىسىنىڭ باستالعاندىعىن جاريالادى. سۋرەتتە: شي جينپيڭ ءتوراعالار مىنبەسىندە كوپشىلىككە قول بۇلعاپ، قۇرمەت بىلدىرۋدە.
□ سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
شينحۋا اگەنتتىگىنىڭ 11 ـ ايدىڭ 9 ـ كۇنى گۋاڭجوۋدان بەرگەن حابارى. جۇڭحۋا حالىق رەسپۋبليكاسىنىڭ 15 ـ كەزەكتى سپورت جارىسى 11 ـ ايدىڭ 9 ـ كۇنى كەشتە گۋاڭدۇڭ ولكەسىنىڭ گۋاڭجوۋ قالاسىندا سالتاناتپەن باستالدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ باستالۋ سالتىنا قاتىناستى ٴارى سپورت جارىسىنىڭ باستالعاندىعىن جاريالادى.
11 ـ ايدىڭ 9 ـ كۇنى كەشتە گۋاڭدۇڭ وليمپيادا دەنە تاربيە ورتالىعى اشەكەيلى شامدار جارقىراپ قىزۋ مەرەيگە شومدى. بۇل گۋاڭدۇڭ، شياڭگاڭ، اۋمىن سىندى 3 جەر تۇڭعىش رەت بىرلەسىپ وتكىزگەن مەملەكەتتىك سپورت جارىسى.
ساعات 19دان 58 مينۋت وتكەندە ويناقى مۋزيكا ٴۇنى ىشىندە شي جينپيڭ مەن حانىمى پىڭ لييۋان قاتارلىلار ٴتوراعالار مىنبەسىنە شىعىپ، كورەرمەندەرگە قول بۇلعاپ قۇرمەت ٴبىلدىردى. بۇكىل الاڭدا ۇزاققا سوزىلعان قىزۋ شاپالاق ٴۇنى كوتەرىلدى.
ساعات 20دا 15 ـ كەزەكتى مەملەكەتتىك سپورت جارىسىنىڭ باستالۋ سالتى رەسمي باستالدى. «وتاندى جىرلايمىز» اسقاق اۋەنىمەن قۇرمەت قاراۋىلدارى بەس جۇلدىزدى نارت قىزىل تۋدى قورعاي كوتەرىپ، ارشىندى قاداممەن دەنە تاربيە الاڭىنا كىردى. ايبىندى دا اسقاق مۋزيكا ٴۇنى ىشىندە مەملەكەتتىك سپورت جارىسىنىڭ جارىس تۋى، 15 ـ كەزەكتى مەملەكەتتىك سپورت جارىسىنىڭ جارىس تۋى جانە 16 تۋ ۇستاۋشىدان قۇرالعان جارىس تۋى شارشى قاتارى الاڭعا كىردى. تورەشى ۋاكىلدەر شارشى توبى ىلە ـ شالا الاڭعا كىردى. وسىدان كەيىن 37 ۋاكىلدەر ۇيىرمەسىنىڭ سپورتشىلار ۋاكىلدەرى كوتەرىڭكى رۋحپەن كىردى، ولار جەكە ـ جەكە ٴارقايسى ولكەلەردەن، اۆتونوميالى رايونداردان، توتە قاراستى قالالاردان، شياڭگاڭ ەرەكشە اكىمشىلىك رايونىنان، اۋمىن ەرەكشە اكىمشىلىك رايونىنان، شينجياڭ ٴوندىرىس ـ قۇرىلىس بيڭتۋانىنان جانە 3 كاسىپتىك دەنە تاربيە قوعامىنان كەلگەن. بۇكىل الاڭداعى كورەرمەندەر الاڭعا كىرگەن سپورتشىلاردى قىزۋ شاپالاق ۇنىمەن جانە الاقايلاعان داۋىسپەن قارسى الدى.
الاڭعا كىرۋ سالتى اياقتاعان سوڭ، بۇكىل الاڭداعىلار ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى. ايبىندى مەملەكەت ٴانى ىشىندە بەس جۇلدىزدى قىزىل تۋ باياۋ كوتەرىلىپ، اسقاق جەلبىرەدى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، گۋاڭدۇڭ ولكەلىك پارتكومنىڭ شۋجيى حۋاڭ كۇنميڭ، شياڭگاڭ ەرەكشە اكىمشىلىك رايونىنىڭ اكىمى لي جياچاۋ، اۋمىن ەرەكشە اكىمشىلىك رايونىنىڭ اكىمى سىن حاۋحۇي، مەملەكەتتىك دەنە تاربيە باس مەكەمەسىنىڭ باستىعى گاۋ جىدان جەكە ـ جەكە ارناۋ ٴسوز سويلەدى.
ساعات 20دان 43 مينۋت وتكەندە شي جينپيڭ: جۇڭحۋا حالىق رەسپۋبليكاسىنىڭ 15 ـ كەزەكتى سپورت جارىسى باستالدى! ـ دەپ جاريالادى. بۇكىل الاڭ دۋمانعا بولەنىپ، شاپالاق ٴۇنى، الاقايلاعان داۋىستار كوپكە دەيىن تولاستامادى.
15 ـ كەزەكتى مەملەكەتتىك سپورت جارىسىنىڭ جارىس ٴانى اۋەنىمەن مەملەكەتتىك سپورت جارىسىنىڭ جارىس تۋى مەن مەملەكەتتىك 15 ـ كەزەكتى سپورت جارىسىنىڭ جارىس تۋى باياۋ كوتەرىلدى.
چىن ايسىن، يوۋ جۇنشيان، يۋان شۋانيۇن جەكە ـ جەكە 15 ـ كەزەكتى مەملەكەتتىك سپورت جارىسىنا قاتىناساتىن سپورتشىلار، جاتتىقتىرۋشىلار، تورەشىلەر اتىنان سەرت بەردى.
«بولاشاق ارماندى ىسكە اسىرۋ» نەگىزگى تاقىرىپ ەتىلگەن مادەنيەت ـ دەنە تاربيە كورمەلىك قويىلىمىنىڭ شىمىلدىعى اشىلدى. تۇتاس كونسەرت ”تامىرلاس، توركىندەس بولۋ“، ”تىلەكتەس، تاعدىرلاس بولۋ“، ”ورتاق ارماندى بىرگە جۇزەگە اسىرۋ“ سىندى 3 تاراۋدان قۇرالعان، دەنە تاربيە ەلەمەنتىنەن، كوركەمونەرلىك تاسىلدەردەن جانە الدىڭعى لەكتىك عىلىم ـ تەحنولوگيادان جاسامپازدىقپەن پايدالانىپ، وسى كەزەكتى مەملەكەتتىك سپورت جارىسىنىڭ ”اسەرلى سەزىمگە تولى مەملەكەتتىك سپورت جارىسى، ومىرشەڭدىككە يە ۇلكەن شىعاناق رايونى“ نەگىزگى تاقىرىبىن جاندى ٴتۇسىندىردى.
جان تەبىرەنتەرلىك الاڭعا الاۋ جەتكىزۋ جانە نەگىزگى الاۋدى تۇتاندىرۋ سالتى باستالدى. 11 ـ ايدىڭ 2 ـ كۇنى 15 ـ كەزەكتى مەملەكەتتىك سپورت جارىسىنىڭ الاۋى گۋاڭدۇڭ، شياڭگاڭ، اۋمىن سىندى 3 جەردە ٴبىر ۋاقىتتا جەتكىزىلىپ، ەڭ سوڭىندا گۋاڭدۇڭ وليمپيادا سپورت ورتالىعىندا توعىستى. كۇللى جۇرتتىڭ كوز تىگۋىندە ما لين، چىن رولين، حۋاڭ جينباۋ، فاڭ ۋىنحاۋ، گو جيڭجيڭ، ۋاڭ شينيۇي، ۋاڭ ليۋ ـ ي، ۋاڭ چيان ـ ي، لياڭ ۋيكىڭ، لاي شۋانجى، شيان دۇڭمەي، رۇڭ جىشيڭ قاتارلى 12 الاۋ جەتكىزۋشى كۇش جالعاپ جەتكىزدى، ەڭ سوڭىندا سۋ بيڭتيان، جاڭ جيالاڭ، لي ي مەملەكەتتىك سپورت جارىسىنىڭ نەگىزگى الاۋىن بىرگە تۇتاندىردى.
ساعات 21دەن 27 مينۋت وتكەندە 15 ـ كەزەكتى مەملەكەتتىك سپورت جارىسىنىڭ باستالۋ سالتى «اسپان مەن تەڭىز تىلەكتەس» اتتى نەگىزگى تاقىرىپتىق انىنە ىلەسە كوتەرىلگەن دۋماندى بەينەدە تابىسپەن اياقتادى.
ۋاڭ ي، لي حۇڭجۇڭ، حى ليفىڭ، جاڭ يوۋشيا، ۋاڭ شياۋحۇڭ، شىن يچين، ۋاڭ دۇڭفىڭ باستالۋ سالتىنا قاتىناستى.
حالىقارالىق وليمپيادا كوميتەتىنىڭ ٴتوراعاسى كاۆەنچرۋي، حالىقارالىق وليمپيادا كوميتەتىنىڭ ومىرلىك قۇرمەتتى ٴتوراعاسى باح، سونداي ـ اق 15 ـ كەزەكتى مەملەكەتتىك سپورت جارىسىن كورۋگە ۇسىنىس ەتىلگەن شەكارا سىرتىنان كەلگەن قوناقتار باستالۋ سالتىنا قاتىناستى.
15 ـ كەزەكتى مەملەكەتتىك سپورت جارىسى 11 ـ ايدىڭ 21 ـ كۇنى اياقتايدى، جالپى 14 مىڭنان استام سپورتشى باسەكەلىك جارىس تۇرىنە قاتىناسادى، شامامەن 11 مىڭ بۇقارالىق سپورتشى بۇقارالىق جارىس قيمىلىنا قاتىناسادى.
