تاريحتىڭ دامۋ اعىنى ۇزدىكسىز العا ىلگەرىلەۋدە، ورايدى يگەرىپ تاعى جەلكەن جايىپ اتتاندىق
شينحۋا اگەنتتىگىنىڭ تىلشىلەرى جۋ جيچاي، جاڭ يان
كۇز بەن قىس ٴولاراسىندا نانحاي تەڭىزىنىڭ جاعاسىندا ٴبىر دەنە تاربيە سالتاناتى تاۋ مەن تەڭىزدەن دە، ۋاقىت پەن كەڭىستىكتەن دە ەندەي ٴوتتى.
گۋاڭدۇڭ وليمپيادا سپورت ورتالىعىندا ٴموپ ـ ٴمولدىر ساقينا فورمالى ”سۋ ساحناسى“ جارىق تەڭىزىنە اينالىپ، تەڭىزدە تولعان اي كوتەرىلىپ، وزەن ـ تەڭىزدەر جوڭكىلىپ، بيشىلەر تولقىن جارا العا تارتتى، دەلفيندەر اسىر سالدى، ۇلكەن كەمەلەر جەلمەن بىرگە بيىك جەلكەن جايىپ، جۇڭحۋا وركەنيەتىنىڭ وزىنە سەنىممەن دۇنيە جۇزىمەن قاۋىشقان اسقاق بەينەسىن ايگىلەدى.
11 ـ ايدىڭ 9 ـ كۇنى كەشتە 15 ـ كەزەكتى مەملەكەتتىك سپورت جارىسى سالتاناتپەن باستالدى، باس شۋجي شي جينپيڭ قاتىناستى ٴارى سپورت جارىسىنىڭ باستالعاندىعىن جاريالادى.
اسقاق سەزىمگە تولى دەنە تاربيە كارتيناسى ومىرشەڭ شىعاناق رايونىن نۇرلاندىردى. وسى كەزەكتى مەملەكەتتىك سپورت جارىسى ”جاڭا داۋىردەگى جۇڭگونىڭ دەنە تاربيە ىستەرىنىڭ دامۋ تىڭ تابىستارىنا كۋا بولىپ قانا قويماي، تاعى جۇڭگو ۇلگىسىندەگى وسىزامانداندىرۋدىڭ گۋاڭدۇڭ - شياڭگاڭ - اۋمىن ۇلكەن شىعاناق رايونىنداعى الۋان ٴتۇرلى بەينەسىن ايگىلەيدى“.
وتانىمىزدىڭ وڭتۇستىك شەتى، كوك زەڭگىر تەڭىز اسپانى شەتسىز ـ شەكسىز، بۇل ارا بۇگىنگى تاڭداعى جۇڭگونىڭ ەسىك اشۋ دەڭگەيى ەڭ جوعارى، ەكونوميكالىق ومىرشەڭ كۇشى ەڭ تەبىندى وڭىرلەردىڭ ٴبىرى، سونداي ـ اق جۇڭگو حالقىنىڭ ەجەلدەن بەرگى تاريحي قيمىلىنىڭ ۇلكەن ساحناسى: مىڭ جىلدان استام ۋاقىتتىڭ الدىندا تەڭىزدەگى جىبەك جولىنداعى جەلكەن ساعىمى جوڭكىلگەن تولقىندى جاناي ٴوتتى؛ 100 جىلدان استام ۋاقىتتىڭ الدىندا جۇڭگولىقتار وسى ارادان دۇنيە جۇزىنە كوز سالدى؛ 40 نەشە جىلدىڭ الدىندا رەفورما جاساپ، ەسىك اشۋدىڭ كوكتەم تاسقىنى جوڭكىلدى...
تاياۋدا كورەيانىڭ چيڭجوۋىندا APEC ٴماجىلىسىنىڭ وتاعاسى ەل مىندەتىن وتكىزىپ بەرۋ ـ وتكىزىپ الۋ بۋىنىندا باس شۋجي شي جينپيڭ شىنجىننىڭ شاعىن بالىقشىلىق قىستاعىنان وسىزاماندانعان حالىقارالىق ٴىرى قالاعا اينالعاندىعى جونىندەگى حيكايانى باياندادى، ”بۇل جۇڭگو حالقى جاراتقان دۇنيە ٴجۇزى دامۋ تاريحىنداعى ٴبىر كەرەمەت، سونداي ـ اق جۇڭگونىڭ ٴوزارا پايدا جەتكىزىپ تەڭ يگىلىككە كەنەلەتىن اشىق ۇستاۋ ستراتەگياسىن بۇلجىماي اتقارۋىنداعى ماڭىزدى تەرەزە“.
مەملەكەتتى باسقارۋ شاحمات ويناعانعا ۇقسايدى، ىشكى ـ سىرتقى جوبالاۋ تىعىز بايلانىسۋى، ورنالاستىرۋلاردى تياناقتاندىرۋ ٴبىر ـ بىرىمەن تىعىز ۇشتاسۋى كەرەك.
پارتيا 20 ـ كەزەكتى ورتالىق كوميتەتىنىڭ ٴتورتىنشى جالپى ماجىلىسىنەن كەيىن، باس شۋجي شي جينپيڭ تۇڭعىش رەت ەل ىشىندە قىزمەت تەكسەردى، ”15 ـ بەسجىلدىق“ جوبا جاسالدى، 15 ـ كەزەكتى سپورت جارىسىنىڭ قاسيەتتى الاۋى تۇتاندىرىلدى، جۇڭگونىڭ تۇڭعىش ەلەكتروماگنيتتىك سەرىپپە تيبىندەگى اۆياماتكاسى ساپقا قوسىلدى، حاينان ەركىن ساۋدا پورتى كەدەن جابىق كۇيدە جۇمىس جۇرگىزۋدىڭ الدىندا تۇر... جۇڭگونىڭ نانحاي تەڭىزى جاعاسىندا ايبىندى ۋاقىت پەن كەڭىستىكتىڭ بويلىق ـ ەندىگى توعىسىپ، ادامدارعا كۇشتى تاريح سەزىمىن، ٴداۋىر سەزىمىن، بولاشاق سەزىمىن سيلايدى.
11 ـ ايدىڭ 6 ـ كۇنى حايناننىڭ سان ـ ياسىندا باس شۋجي شي جينپيڭ حاينان ەركىن ساۋدا پورتى قۇرىلىسى جونىندەگى قىزمەت مالىمەتىن تىڭدادى.
12 ـ ايدىڭ 18 ـ كۇنى حاينان ەركىن ساۋدا پورتىنىڭ تۇتاس ارالدا كەدەن جابىق كۇيدە جۇمىس جۇرگىزۋىن رەسمي باستاۋىنا ٴبىر ايدان استام ۋاقىت عانا قالدى. 1978 ـ جىلدىڭ ٴدال وسى كۇنى پارتيا 11 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسى اشىلعان.
رەفورما جاساپ، ەسىك اشۋدى ەڭ جاقسى ەسكە الۋ — رەفورما جاساپ، ەسىك اشۋ تۋىن اناعۇرلىم بيىك ۇستاۋ، ”حاينان ەركىن ساۋدا پورتىن قۇرۋ ستراتەگيالىق نىساناسى — حاينان ەركىن ساۋدا پورتىن ەلىمىزدىڭ جاڭا داۋىردەگى سىرتقا ەسىك اشۋىنا جەتەكشىلىك ەتەتىن ماڭىزدى قاقپا ەتىپ تۇلعالاۋ“.
”وسىنشاما كەڭ كولەمدە كەدەن جابىق كۇيدە جۇمىس جۇرگىزۋ جونىندە بۇكىل دۇنيە جۇزىندە دايىن تاجىريبە جوق“. باس شۋجي شي جينپيڭ بۇل شارانىڭ ستراتەگيالىق ٴمانىن ايقىن ٴتۇسىندىردى، ”بۇل ەلىمىزدىڭ جوعارى دەڭگەيدەگى سىرتقا ەسىك اشۋدى بۇلجىماي كەڭەيتىپ، اشىق دۇنيە ٴجۇزى ەكونوميكاسىن قۇرۋدى ىلگەرىلەتۋدەگى بەلگى سيپاتتى شاراسى“.
ٴداۋىر اعىمىنا ۇيلەسەتىن ستراتەگيالىق تالعام جاساۋدا رەفورماشىلاردىڭ باتىلدىعى مەن اقىل ـ پاراساتى سىنالادى.
ەكونوميكالىق ەرەكشە رايوندى باسقارۋدا ەركىن ساۋدا پورتى جونىندە جوبا جاساۋدا ۋاقىتتىڭ ٴتىپتى دە تەرەڭ تۇكپىرىنە نازار سالۋعا بولادى.
”مەن ەركىن ساۋدا پورتى ماسەلەسىن ەرتەرەك زەرتتەدىم ٴارى كەيبىر ساياساتتاردىڭ شيامىندا اتقارىلۋىن ىلگەرىلەتتىم“. وتكەن عاسىردىڭ 80 ـ جىلدارىندا رەفورما جاساپ، ەسىك اشۋدىڭ الىپ تولقىنى العاش كوتەرىلگەندە، فۋجياننىڭ شيامىنىندا قىزمەت ىستەيتىن شي جينپيڭ جولداس 15 جىلعا سوزىلاتىن ەكونوميكالىق، قوعامدىق دامۋدىڭ ستراتەگيالىق جوباسىن جاساۋعا باسشىلىق ەتىپ، تولىق تەكسەرۋ ـ زەرتتەۋ نەگىزىندە ”ەركىن پورتتىڭ كەيبىر ساياساتتارىن اتقارۋ“ جونىندە ”ٴۇش قادامعا ٴبولىپ جۇرگىزۋ“ جولىن باتىلدىقپەن العا قويدى.
سول جىلدارى باتىلدىقپەن الدا جۇرگەن ىزدەنىستەر قازىر اناعۇرلىم كەڭ كولەمدى امالياتقا اينالدى.
حاينان ولكە بولىپ قۇرىلعان العاشقى مەزگىلدە تۇتاس ارالدا قىزىل، جاسىل شىراق جوق، ورتا بولىكتەگى تاۋلى رايونداردا ٴالى دە ”ورتەڭگە ەگىن سالاتىن“ ٴوندىرىس ٴتاسىلى بولۋدان بۇگىنگى تاڭدا بۇكىل جەر شارىنداعى قارجى، تەحنولوگيا، دارىندىلار توپتالعانعا دەيىن كەزىندە كوكتەم سامالى جەتپەيتىن ”شالعاي جەر“ ەكى مۇحيتتى بەتكە العان، باستاماشى بولعان ەسىك اشۋ قاقپاسىنا اينالدى.
بۇرىن بولماعان جۇيەلىك ينجەنەريالاردى ىلگەرىلەتۋدە رەفورماشىلاردىڭ سەرگەكتىگى مەن ناقتى ىستەۋى ايگىلەنەدى.
باس شۋجي شي جينپيڭ بىلاي دەپ قاداعالاي تاپسىردى: ”ۇزاق ۋاقىتتىق كۇرەس دايىندىعىن، ٴسوز جوق، جاقسى ىستەۋ كەرەك“، ”اياقتى جەرگە باسۋ كەرەك“، ”ورىنسىز ەلىكتەۋگە، تيداۋسىز جىبەرۋگە، ۇشقالاقتىققا سالىنۋعا بولمايدى“، ”ەسىك اشۋ ريتىمى مەن اياق الىسىن عىلمي، ٴتارتىپتى ورنالاستىرىپ، ورنىقتى، تىڭعىلىقتى ىستەپ، قادام سايىن قامال الىپ، ’يكەمدى قويا بەرۋگە‘، ’ويداعىداي باسقارۋعا‘ كۇش سالۋ كەرەك“. جۇڭگوشا ەركىن ساۋدا پورتى، ٴسوز جوق، پارتيانىڭ باسشىلىعىنا باستان ـ اياق بۇلجىماي تاباندى بولىپ، جۇڭگو جولىمەن باستان ـ اياق بۇلجىماي ٴجۇرۋى كەرەك.
11 ـ ايدىڭ 7 ـ كۇنى قىس باسى، بۇل ٴارى 1931 ـ جىلى جۇڭحۋا سوۆەتتىك رەسپۋبليكاسىنىڭ ۋاقىتشا ورتالىق ۇكىمەتى قۇرىلعان كۇن.
باس شۋجي شي جينپيڭ گۋاڭجوۋدان جولعا شىعىپ، پويەزبەن، اۆتوكولىكپەن 3 ساعاتتان استام جول باسىپ، مەيجوۋ قالاسى مەيشيان رايونى يان ـ ياڭ قالاشىعىنا كەلدى.
مەيجياڭ وزەنى يرەلەڭدەپ اعادى، ٴورلى ـ قىرلى تاۋ جوتالارى بۇيراتتالىپ وراپ جاتىر، 3 ولكەنىڭ شەكاراسىنداعى مەيجوۋدىڭ تۇتاس ٴوڭىرى بۇرىنعى ورتالىق سوۆەت رايونىنا جاتادى، توڭكەرىستىك بايىرعى رايون بولىپ، تاۋ ـ وزەندەرگە قىزىل توڭكەرىستىك ەستەمە سىڭگەن.
باس شۋجي وسى جولعى ساپاردىڭ العاشقى ماقساتىن ايقىن تىلگە الدى: ”بۇل قىزىل مەكەن. گۋاڭدۇڭ رەفورما جاساۋ، ەسىك اشۋدىڭ الدىڭعى شەبى رەتىندە، وندا دامۋدىڭ بىركەلكىسىزدىگى بار، بۇل دا مەنى الاڭداتادى“. بۇل الاڭداۋشىلىق باستان ـ اياق تاباندى بولىپ كەلە جاتقان اۋەلگى ماقسات.
حۋشيڭ تاۋىنىڭ ەتەگىندە يە جيانيىڭ ەسكەرتكىش سارايى تاۋ جاستانا سالىنعان. باس شۋجي شي جينپيڭ باسپالداقپەن جوعارى كوتەرىلىپ ەسكەرتكىش سارايىنا كىرىپ ەكسكۋرسيالادى. ايالداپ، تەرەڭ ويعا شومدى، توڭكەرىستىك اعا بۋىنداردىڭ ”كوممۋنيزم ۇلى ٴىسىن مۇرات ەتۋگە بەل بايلاعان“ شۇعىلالى ٴومىرىن ەسكە الدى، باس شۋجي تەرەڭ ماعىنالى تۇردە بىلاي دەدى: ”ٴبىزدىڭ بۇگىنگى قول جەتكىزگەن ۇلى تابىستارىمىزدىڭ بارلىعى ماۋ زىدۇڭ قاتارلى اعا بۋىن توڭكەرىسشىلەر ورناتقان بيلىك، جيناعان قور نەگىزىندە قۇرىلعان“.
كورمە زالىنا الىپ گلوبۋس قويىلعان، كورمە تاقتاسىنا ”جەر شارىنىڭ تامىرىن ۇنەمى ۇستاپ تۇرۋ كەرەك“ دەگەن ٴسوز جازىلعان، جۇڭگو كوممۋنيستەرىنىڭ الەمدى كوكەيدە ساقتايتىن، ۇزاق بولاشاقتى كوزدەيتىن اسقاق جىگەرى ايقىن ٴارى جاندى.
ٴبىر ٴوڭىردى تياناق ەتكەندە، اعىمعا زەر سالۋعا، دۇنيە جۇزىنە كوز جىبەرۋگە بولادى.
ۇشى ـ قيىرسىز جۋجياڭ اتىراۋى، ٴۇش وزەن توعىسىپ، سەگىز تارماق تارامدالىپ، گۋاڭدۇڭ - شياڭگاڭ - اۋمىن ۇلكەن شىعاناق رايونىنىڭ وزگەشە وڭىرلىك ورىن ابزالدىلىعىن قالىپتاستىردى: جاعراپيالىق ماندەگى تۇزدى سۋ مەن تۇشتى سۋدىڭ تۇيىلىسكەن جەرى ٴارى دامۋ مانىندەگى قوس اينالىمنىڭ تۇيىلىسكەن جەرى.
ٴار جولى ليڭنانعا كەلۋى پارتيا مەن مەملەكەت ىستەرى دامۋىنىڭ ماڭىزدى كەزەڭدەرىنە تۋرا كەلەتىن. باس شۋجي شي جينپيڭ باستاماشى بولعان وسى جەرگە زور ٴۇمىت ارتتى.
پارتيا 18 ـ قۇرىلتايىنان كەيىن تۇڭعىش رەت بەيجيڭنەن شىعىپ گۋاڭدۇڭعا قىزمەت تەكسەرە كەلگەندە، باس شۋجي شي جينپيڭ ”گۋاڭدۇڭنىڭ شياڭگاڭمەن، اۋمىنمەن بىرلەسىپ، جالپىلىق باسەكەلىك قۋاتقا يە دۇنيە جۇزىلىك دەڭگەيدەگى قالالار شوعىرىن قالىپتاستىرۋىن ٴۇمىت ەتتى“.
2023 ـ جىلى 4 ـ ايدا باس شۋجي شي جينپيڭ گۋاڭدۇڭعا بارىپ قىزمەت تەكسەرىپ، گۋاڭدۇڭ - شياڭگاڭ - اۋمىن ۇلكەن شىعاناق رايونىنا ”جاڭا دامۋ ارناسىنىڭ ستراتەگيالىق تىرەگى، جوعارى ساپالى دامۋدان ۇلگى كورسەتەتىن جەر، جۇڭگو ۇلگىسىندەگى وسىزامانداندىرۋداعى جەتەكشى جەر“ دەگەن ستراتەگيالىق ورىن بەردى.
دۇنيە ٴجۇزى ەكونوميكاسى كارتاسىنا كوز جىبەرسەك، الدىڭعى قاتاردا جۇرگەن كوپتەگەن ەكونوميكالىق تۇلعالاردىڭ ٴبارى دۇنيە جۇزىنە ايگىلى ۇلكەن شىعاناق رايونىنا يە. وزگەشە وڭىرلىك ارتىقشىلىق، شوعىرلى فاكتورلار توپتالعان، اشىق دامۋ ەكولوگياسى شىعاناق رايونىن تابيعي تۇردە جوعارى ساپالى دامۋدىڭ سىناق الاڭى مەن جەتەكشى جەرىنە اينالدىردى.
2024 ـ جىلى گۋاڭدۇڭ - شياڭگاڭ - اۋمىن ۇلكەن شىعاناق رايونىنىڭ ەكونوميكالىق جالپى مولشەرى 14 تريلليون 790 ميلليارد يۋان بولىپ، بۇكىل ەلدىڭ %1ىنە جەتپەيتىن جەر اۋدانى، %6ىنە جەتپەيتىن جان سانى جالپى مولشەرى ارقىلى بۇكىل ەلدىڭ 1/9 ۇلەس ەكونوميكالىق مولشەرىن جاراتتى. ”شىنجىن - شياڭگاڭ - گۋاڭجوۋ“ عىلىم ـ تەحنولوگيا شوعىرىندا جاڭالىق اشۋ كورسەتكىشى دۇنيە ٴجۇزى بويىنشا ٴبىرىنشى ورىنعا شىقتى.
2024 ـ جىلى ۇلكەن شىعاناق رايونىنداعى 7 اۋەجايدىڭ جولاۋشى قابىلداۋ ـ جونەلتۋ جالپى مولشەرى 200 ميلليون ادامنان (رەت) استى؛ 2025 ـ جىلدىڭ الدىڭعى ٴۇش ماۋسىمىندا شياڭگاڭ - جۋحاي - اۋمىن ۇلكەن كوپىرىنىڭ كۇندىك ورتاشا اۆتوكولىك اعىنى مولشەرى 14 مىڭ اۆتوكولىك (رەت) بولدى؛ شىنجىن - جۇڭشان ارناسىنداعى اۆتوموبيل اعىنى مولشەرى 10 ميلليون كولىكتەن (رەت) استى، جوعارى قارقىندى تەمىر جول 14 مينۋتتا شىنجىننان شياڭگاڭعا جەتىپ بارادى، حىڭچين شەكارا وتكەلىندە ەڭ تەز بولعاندا 20 سەكۋندتا كەدەننەن وتۋگە بولادى... ٴبىر توپ ناقتى ساندى مالىمەتتەر ۇلكەن شىعاناق رايونىنىڭ بۇگىنگى تىرشىلىك تىنىسى مەن ومىرشەڭ كۇشىن، ”قاتتى ۇلاستىرۋ“، ”جۇمساق ۇلاستىرۋ“، ”جۇرەكتەردى توعىستىرۋدىڭ“ ٴبىر بەتالىسقا قاراي ىلگەرىلەگەندىگىن ايگىلەدى.
وسى رەت كەلگەنىندە باس شۋجي شي جينپيڭ گۋاڭدۇڭدى ۇلكەن شىعاناق رايونى قۇرىلىسىندا ”نەگىزگى كۇش جانە باستاۋشى رولىن ساۋلەلەندىرۋگە“، ”ومىرشەڭ كۇشكە جانە حالىقارالىق باسەكەلىك قۋاتقا باي بىرەگەي شىعاناق رايونىن جانە دۇنيە جۇزىلىك دەڭگەيدەگى قالالار شوعىرىن قۇرۋ نىساناسىن كوزدەپ، ٴبىر نيەتپەن سەلبەسىپ، ورنىقتى دا تىڭعىلىقتى ىستەپ، ٴتۇيىندى قامال الۋدى، جاپپاي ىلگەرىلەتۋدى قۇلشىنا جۇزەگە اسىرۋعا ونان ارى شابىتتاندىردى“.
جۇڭگو ۇلگىسىندەگى وسىزامانداندىرۋعا جەتەكشىلىك ەتەتىن الۋان تۇسكە ەنگەن وسى جەردە گۋاڭدۇڭ، شياڭگاڭ، اۋمىن سىندى 3 جەر بىرلەسىپ وتكىزگەن 15 ـ كەزەكتى مەملەكەتتىك سپورت جارىسى اناعۇرلىم تەرەڭ ٴماندى ارقالاپ وتىر.
باس شۋجي شي جينپيڭ بىلاي دەدى: ”وسى سالتاناتتى جينالىستى وتكىزۋ ارقىلى وتانشىلدىق ىنتاسىن قاۋلاتىپ، رۋحاني دانەكەردى نىعايتىپ، ەسىك اشۋدى، سەلبەسۋدى، ٴوزارا پايدا جەتكىزىپ تەڭ يگىلىككە كەنەلۋدى جەبەپ، ۇلكەن شىعاناق رايونى قۇرىلىسى ٴۇشىن تاماشا راي قالىپتاستىرۋعا بولادى“.
11 ـ ايدىڭ 9 ـ كۇنى تۇستەن كەيىن گۋاڭجوۋ باييۇن حالىقارالىق ٴماجىلىس ورتالىعىنىڭ ليڭنان زالىندا كىلەڭ ەگەيلەر باس قوستى، شاپالاق ٴۇنى جاڭعىردى.
باس شۋجي شي جينپيڭ بۇقارالىق دەنە تاربيەدەگى مەملەكەتتىك وزات ورىنداردىڭ، وزات جەكەلەردىڭ ۋاكىلدەرىن جانە مەملەكەتتىك دەنە تاربيە جۇيەسىندەگى وزات كوللەكتيۆتەردىڭ، وزات جەكەلەردىڭ ۋاكىلدەرىن ىقىلاسپەن قابىلداپ، ولاردى قۇلشىنا كۇرەس جۇرگىزىپ، تاعى دا تاماشا ناتيجە جاراتىپ، سپورتتا قۇدىرەتتى ەل قۇرۋعا تىڭ ۇلەس قوسۋعا شابىتتاندىردى.
”ومىردە بەلدەسۋ ورايى كوپ ەمەس“ دەۋدەن ”ىنتىماقتاسىپ، جۇڭحۋانى گۇلدەندىرۋگە“ دەيىن، ”ٴبىر دۇنيە، ٴبىر ارماننان“ ”بولاشاققا بىرگە بەت الۋعا“ دەيىن.... دەنە تاربيە ىستەرىنىڭ قارىشتاۋى مەملەكەت تاعدىرىمەن تىعىز قاتىستى؛ ۇلتتىڭ گۇلدەنۋ بولاشاعى، ٴسوز جوق، جالپى حالىقتىڭ دەنە قۋاتىنىڭ كۇشەيۋىمەن بىرگە بولادى.
كۇرەس بارىسىندا اققان ٴاربىر تامشى تەر بوگەۋ بەرمەس جويقىن وزەن ـ داريا بولىپ توعىستى.
سول كۇنى كەشتەگى مەملەكەتتىك سپورت جارىسىنىڭ اشىلۋ سالتىندا بارابان ىرعاعىمەن بىرگە شياڭگاڭنىڭ وتان قۇشاعىنا ورالۋىن قۇتتىقتاۋ ٴۇشىن جازىلعان «جۇڭگولىقتار» اتتى ٴاننىڭ اسقاق اۋەنى كوتەرىلدى، بۇكىل الاڭداعى كورەرمەندەردىڭ كوڭىلى كولدەي تولقىدى —
”بەس مىڭ جىلدىق بوران ـ شاشىندا قانشالاعان ارمان جاسىرىنعان، سارى تاندىلەر، قارا كوزدەر، وزگەرمەيتىنى كۇلىمدەگەن بەينەلەر“. ”قول ۇستاسىپ، سەن، مەن دەپ بولىنبەي، كوكىرەك كەرە العا تارتىپ، دۇنيە جۇزىنە ٴبارىمىزدىڭ جۇڭگولىق ەكەنىمىزدى ۇعىندىرامىز“.
تاريحتىڭ دامۋ اعىنى ۇزدىكسىز العا ىلگەرىلەۋدە، ورايدى يگەرىپ تاعى جەلكەن جايىپ اتتاندىق.
نانحاي تەڭىزىنىڭ جاعاسىندا باس شۋجي شي جينپيڭنىڭ ٴسوزى ەكپىندى بولدى: ”يدەيا مەن ارەكەتتى پارتيا ورتالىق كوميتەتىنىڭ شەشىمدەرىمەن، ورنالاستىرۋلارىمەن شىن مانىندە بىرلىككە كەلتىرىپ، ورتاق تانىمدى ونان ارى نىعايتىپ، سەنىمدى كۇشەيتىپ، قايراتتى تاسقىنداتۋ كەرەك“، ”وسىزامانداندىرۋ قۇرىلىسىندا ۇزدىكسىز جاڭا ناتيجەگە قول جەتكىزۋ كەرەك“.
(شينحۋا اگەنتتىگىنىڭ 11 ـ ايدىڭ 11 ـ كۇنى بەيجيڭنەن بەرگەن حابارى)
