ٴبىر كۇندە ٴبىر كۇمىس مەدال، ٴتورت قولا مەدال الدى

شينجياڭ كۇرەس كومانداسى

ٴبىر كۇندە ٴبىر كۇمىس مەدال، ٴتورت قولا مەدال الدى

　　انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ 11 ـ ايدىڭ 12 ـ كۇنى چيڭيۋاننان حابارلايدى. 11 ـ ايدىڭ 12 ـ كۇنى گۋاڭدۇڭنىڭ چيڭيۋانىندا 15 ـ كەزەكتى مەملەكەتتىك سپورت جارىسىنا قاتىناسقان شينجياڭ دەنە تاربيە ۋاكىلدەر ۇيىرمەسى جان تەبىرەنتەر ٴساتتى قارسى الدى — ولاردىڭ ”داڭق اسىل ساندىعى“ وسى كۇنى اشىلدى. ەرلەر ەركىن جانە كلاسسيكالىق كۇرەس ٴتۇرى كوپ ٴتۇرلى سالماقتاعىلار دارەجەسىندەگى جارىستاردىڭ قيان ـ كەسكى سايىسىندا شينجياڭ كۇرەس كومانداسى تاماشا بەينە كورسەتىپ، ٴبىر كۇمىس، 4 قولا مەدال الۋ سىندى ۇزدىك ناتيجەمەن شينجياڭ ۋاكىلدەر ۇيىرمەسىنە تاعى دا داڭق سيلادى.

　　سول كۇنى ەرلەر ەركىن كۇرەس بويىنشا 3 ٴتۇرلى سالماقتاعىلار دارەجەسى جانە كلاسسيكالىق كۇرەس ٴتۇرى 2 ٴتۇرلى سالماقتاعىلار دارەجەسى جارىسى وتكىزىلدى، شينجياڭ شەبەرى كابيران ٴابۇشايمان ەرلەر ەركىن كۇرەس ٴتۇرى 97 كيلوگرام سالماقتاعىلار دارەجەسى بويىنشا كۇمىس مەدال، ايدوس ھادى ەركىن كۇرەس ٴتۇرى 86 كيلوگرام سالماقتاعىلار دارەجەسى بويىنشا قولا مەدال، ابلەز ماكەي ەركىن كۇرەس ٴتۇرى 97 كيلوگرام سالماقتاعىلار دارەجەسى بويىنشا قولا مەدال، سالتانات ەرەنبەك ەرلەر كلاسسيكالىق كۇرەس ٴتۇرى 60 كيلوگرام سالماقتاعىلار دارەجەسى بويىنشا قولا مەدال، تورەبات ەرلەر كلاسسيكالىق كۇرەس ٴتۇرى 67 كيلوگرام سالماقتاعىلار دارەجەسى بويىنشا قولا مەدال الدى.

　　كابيران 2023 ـ جىلى حاڭجوۋ ازيا سپورت جارىسىندا ەرلەر ەركىن كۇرەس ٴتۇرى 97 كيلوگرام سالماقتاعىلار دارەجەسى بويىنشا قولا مەدال العان ٴارى شينجياڭ ەرلەر ەركىن كۇرەس تۇرىندە تۇڭعىش رەت وليمپيادا جارىسىنا قاتىناسۋعا جولداما العان شەبەر. سول كۇنگى اعا جۇلدەگەرلىككە تالاسۋ جارىسىندا ول الدىڭعى كەزەكتى مەملەكەتتىك سپورت جارىسىنىڭ اعا جۇلدەگەرى — شاندۇڭ ساڭلاعى ياڭ چاۋچياڭعا جولىقتى. جارىستىڭ ەڭ سوڭعى ساتىندە از عانا السىزدىگىمەن قارسىلاسىنان ۇتىلىپ قالدى.

　　ايدوس مەملەكەتتىك سپورت جارىسىنا تۇڭعىش رەت قاتىناسىپ وتىر، ”تورتتەن ٴبىر جارىس بارىسىندا ساتسىزدىككە ۇشىراپ ەرەكشە تورىقتىم، ٴبىراق مەن ٴالى جاسپىن، كەلەسى كەزەكتى مەملەكەتتىك سپورت جارىسىندا ارمانىمداعى التىن مەدالدى الۋ ٴۇشىن قۇلشىنامىن“، ـ دەدى ول.

　　بۇل تورەباتتىڭ مەملەكەتتىك سپورت جارىسىنا 3 ـ رەت قاتىناسۋى، الدىڭعى 2 رەتكى جارىستا اعا جۇلدەگەر بولعان، شينجياڭنىڭ كۇرەس تاريحىندا مەملەكەتتىك سپورت جارىسىندا ”ٴۇرتىس 2 رەت اعا جۇلدەگەر“ بولعان تۇڭعىش شەبەر. ”ٴۇرتىس 3 رەت اعا جۇلدەگەر بولۋدى ورىنداي المادىم، وتە وكىنىشتى، بۇل مەنىڭ مەملەكەتتىك سپورت جارىسىنا ەڭ سوڭعى رەت قاتىناسۋىم، كاسىپتىك ٴومىرىمدى اياقتاتقاننان كەيىن باپكەر بولىپ، شينجياڭ كومانداسىنا اناعۇرلىم كوپ زاپاس كۇش باۋلۋعا قۇلشىنامىن“، ـ دەدى ول.

　　سالتانات تا مەملەكەتتىك سپورت جارىسى الاڭىنا 3 ـ رەت كەلىپ وتىر. ”ٴبىر ٴتاۋىرى، باز كەشكەن جوقپىن، بۇگىنگە دەيىن تاباندىلىق كورسەتىپ كەلەمىن. 2 جاستاعى قىزىما اكەسىنىڭ قولا مەدال العانىن ايتقىم كەلەدى“، ـ دەدى ول.

　　ابلەز مەملەكەتتىك سپورت جارىسىنا 2 ـ رەت قاتىناسىپ وتىر، قولا مەدالعا تالاسۋدا نەبارى 58 سەكۋندتا قارسىلاسىن جەڭىپ الدى. جارىستان كەيىن تىلشىلىكتى قابىلداعان ول ٴوزىنىڭ قۋانىشىمەن ٴبولىستى — جارىستان كەيىن اۋىلىنا قايتىپ، ماحاباتتاسقالى 9 جىل بولعان قالىڭدىعىمەن ۇيلەنەدى ەكەن.

　　شينجياڭ كۇرەس كومانداسى ەرلەر ەركىن كۇرەس كومانداسىنىڭ باس جاتتىقتىرۋشىسى داۋۇتنۇر تۇر وسى رەتكى مەملەكەتتىك سپورت جارىسىندا شينجياڭنان 8 ەركىن كۇرەس سپورتشىسىنىڭ شەشۋشى جارىسقا قاتىناسىپ، 7 سپورتشىنىڭ تاماشا ناتيجەگە قول جەتكىزگەنىن ايتىپ، بىلاي دەدى: ”وسى جارىستا دەنە تاربيەدە قۋاتتى باسقا ولكەلەردىڭ جاتتىعۋ ادىستەرىن مۇقيات ۇيرەندىم. بۇدان كەيىن پارىقتاردى تاۋىپ شىعىپ، اناعۇرلىم كوپ، اناعۇرلىم ٴونىمدى جاتتىعۋ تاسىلىنەن پايدالانىپ ناتيجەنى ۇزدىكسىز جوعارىلاتىپ، كەلەسى كەزەكتى مەملەكەتتىك سپورت جارىسىندا التىن مەدال الۋعا دايىندىق جاسايمىز“.